Pilahn en Popohl

Sounpar kei samwalahro, mwurin Mahwen Keriau en Sampa, I ieiang college ni ansou me I tuhong Donna Smith. Ni ansouo I wadekada me soahng riau me kin wiahda pwopwoud mwahu, iei kirahka kokihs oh kis. I lemehiong me met inenen pahrek.

I kin iang sukuhl ni menseng oh pwurala nan kahnihmw en Brigham oh iang doadoahk nan en ei pahpao wasahn wie sidohsa mwurin sawas. En Donna keimwseklahn klahs ni menseng iei home economics. I kin uhdi ni ah perehn sukuhlo mwohn ahi kohkohla. Wenihmwo ekis rotorot ahpw ma I kesihnen limwahnte wenihmwo e kak kilang ngenio likio. E kin wai iei iangahki ehu kirahka oh ehu kis. Ni imwilaho kumwail esehier. Se kapwopwoud nan Tehnpas Sarawi en Salt Lake, oh tapiada seilok laud en aht mour kan.

Erein sounparkei I kin kalap padahngki wiewia kesemwpwal ehu: ni imwin mehkoaros me wiawi nan Mwomwohdiso ohl emen oh lih emen iangahki neira serihkan kin pereperen ni imwarail oh katengteng pene met oh kohkohlahte.

Ni tapio:

“Koht kau ketdihdo oh ketin wiahda aramas duwehte irail, irail eri wiahda ohl oh lih duwehte irail.

“Koht kau masanih: Kitail pahn kapai irahda. Oh Koht kau masanih: Kitail pahn wiahda pwe ira en kaparaparla, oh audehla sampa, oh apwalih sampa” (Abraham 4:27–28).

Oh aramas eri tapiada mour pohn sampa ni en Adam eh tuhong ah pwoud oh ah pwoudo neitikiedi ong ih pwutak kei oh serepein kei, oh irail kaparaparala oh audehla sampa.

“Oh{nb  … nein Adam pwutangko oh serepeinko tepda kohkohpeseng wad riemen nan sahpwo,  … oh irail eri pil nainkihda pwutak oh serepein (Moses 5:2–3).

Kosonned me pid kaparaparla oh audehla sampa wie momourte oh sohte uhdi. E kesemwpwal ong pilahn en komour oh e wia mehn kaperenda aramas. Ma kitail kin doadoahngki manaman wet ni pwung, kitial pahn kak karaniala Samatail Nanleng oh alehdi peren mehlel unsek. Manaman en kapikada mour sohte wiahte kisehn pilahn en popohlo; pwe iei ih me wia kih en popohl.

Ineng en wia tiahk en pwopwoud kin kehlail oh poatoapoat rehn aramas. Atail nsenamwahu, peren, oh popohl nan mour wet kin peian mwomwen atail kin apwalih ineng en paliwar uk oh kehlail pwukat. Ni en ineng wet eh kin keirda rehn mwahnakapw oh peinakapw kan, mie soangen pepehm kei kin pwarada, nin duwen kapikipik, me weksang pepehm koaros.

Tuhpene, en paliwahr kin tepsang limpoak. Mendahte tiahk kan kin wekpeseng, limpoak kin direkihla pepehm en peren, kaskasik mehkoat mwahu, de sapwungki ekei ansou. Mie maram oh wahnrohs kan, kisinlikou en limpoak kan, koulen limpoak kan, soi, kolpe, oh soangen wiewia kan me kin kasalehda limpoak nan pwungen mwahnakapw men oh peinakapw men. Sampa sohrala, oh ara perente me ira pepehm.

Ma ke medemedewe me mwomwen limpoak me, me pwulopwul kan kin kasalehda iei ih limpoak me kin kak wiawi nan mour wet, ke saikinte eseudahn limpoak mehlel me pwopwoud me mahlahr kan ahneki. Me pwopwoud kan alehier kasongsong, sawehweh kan, kahpwal en mwohni, kahpwal nan pwungen peneinei, soumwahu, ahpw ni ansouohte limpoako wie kekehlailla. Limpoak wereila kin ahneki popohl ehu me me pwopwoud kapw kan sohte ese.

Limpoak mehlel kin kauhdi weiwia kan me pahn kahrehda ineng en tuhpene pahn wiawi mwohn kapwopwoud. Met wehwehki aramas en dehr doula nan wiewia me pahn kamwakidada ineng en paliwar. Limpoak mwakelekel wehwehki me mwurin inou en kapwopwoud, kasarawihla, oh katengtengpene nan tehnpas sarawi me kin mweidada atail kak doadoahngki ineng en tuhpenehu ni limpoak unsek nin duwen me Koht koasonehdi. Wiewia wet pahn kin wiawihte nan pwungen meh riemen me kapwopwoudpenehr.

Ahnsou me meh riemen pwopwoud da ni ara warohng, ira kapatapene ara pepehm en paliwar oh palingehn me keieu lingan oh kaselel ong ni lepin mahsen limpoak. Sohte mehkot nan mour wet kak raseng de pelian limpoak en pwopwoud. Ansou me inou kan wiawihdahr oh wie kolkol, e pahn momourpotopot, pwe iei wasa me kih kan en priesthood kasarawiher, pwe kumwail en kak ale wahu oh klohri (D&C 124:34), klohrio iei me pahn kapwaiahda oh peusehla kaparaparla en tohn sampa kohkohlahte (D&C 132:19).

Ahpw limpoak me sohte poahsonki mehlel sohte kin werei. Limpoak kin kehlailla ansou me serihkan miehda oh wiawihda sang poahson en mour me kohieng pwopwoudkan. Kepikpikdahn mour kin wiawihda nan pwungen ohlo oh ah pwoud liho. Paliwar tikitik ehu kin tepda kierda mwurin doadoahk kapwuriamwei kei wiawiher. Serihmen kin pwaredo sang ni manaman en neitik, kepikpikda duwehte ah pahpa oh nohno en sampa. Ngehn ehu me pato nan paliwaro kin kehn oh kilang ngehn kan. Manaman en wiahda pein nah seri me duwehte ih miehier oh pahn keirda nan paliweren serio.

“Ngehn oh paliwar me wia mour en aramas” (D&C 88:15), oh kitail anahne kapwaiahda kosondi en ngehn oh paliwar pwe kitial en kak peren. Miekosonned, me iangahki kosonned en kapikada mour, me kosondiher nanleng mwohn kepikpikdahn sampa, iei kosonned tengeteng pwukat me kapai kan kin uhsang ie (D&C 130:20). Kosonned sarawi pwukat me kawada wiewia kan me aramas anahne alasang (tehn Joseph Smith Translation, Rom 7:14–15 [nan Bible appendix]; 2  Nephi 2:5; D&C 29:34; 134:6). Mie inoukan me kolokol, katengehdi, oh apwalih oh kihda inou en kapai potopot kan.

Alma panawih nah pwutak Shiblon, Kilang pwe ken koledi ahmw ineng koaros, pwe ken kak direkihla limpoak (Alma 38:12). Bridle kin doadoahk ong mehn kahluwa, kainene, de koledi. Kitail anahne koledi atail ineng kan. Ni eh kin doadoahk ni pwung, manaman en kepikipik pahn kapaida oh pil pahn kamwakelehda (tehk Teachings of Presidents of the Church: Joseph F. Smith [1998], 158).

Kasongsong kin mie wasa koaros. Pwehki tepelo sohte kak wiahda seri, eh kin luwangki koaros me ahneki manaman wet. Ih oh irail kan me kin idawehn ih lekidekla oh sohte kak ahneki paliwar en aramas. “Pwe en kin rapahki aramas koaros en kak pahtoula duwehte ih” (2 Nephi 2:27).E pahn soang, ma e kak, en katikala, kamwoamwsuwedialla, oh, ma kak, en kawehla kisakis me kitail kak alehki, ma kitail warehng, mour soutuk (tehk D&C 132:28–31).

Ma kitail kasaminehla poahson en atail mour de kahlwahlahng ekei nan dihp, mie kalokolok me inenen doar oh apwal en ale (tehkD&C 19:15) sang soangen men kaperen en paliwar koaros me kak rasehng.

Alma ndaiong nah pwutak Corianton, “Nei pwutak, dah, ke sehse me mepwukat me kin wia tiahk samin ehu mwohn sihlangin Kauno; ehi iei ihme keieu samin sang koaros, ihte kakerehdi inta mwakelekel de kamahm kihla Ngehn Sarawi?” (Alma 39:5). Kitail sohte kak ruksang kalokepen dipatail kan.

Ihte me mweimweiong en doadoahngki manaman en kepikipik iei ohl emen oh lih emen me kapwopwoudlahr ni mehlel oh sansal. Mehkoaros likin met kawelahr kosonned en Koht. Kumwail dehr lohdiong pahn kasongsong en tepelo, pwe pweinen dihp koaros pahn uhdahn pweipweila “ke lao kapwungala pweipwand koaros me kileledier” (Madiu 5:26).

Sohte wasa me mahk oh kalahngan en Koht kin sansal mwahu likin keluhla.

Paliwaratail kan, ni eh oahla, kin kak pein mohdi, ekei ansou toahkte kin sawas. Ahpw ma oahlao laud, lipwen oahlao kin mihmiehte mwurin ah mohdi pwehn kin katamanehng kitail oahlao.

Palingenatail weksang met. Palingenatail kin oahla ansou me kitail kin wiahda sapwung oh pwupwdiong nan dihp. Ahpw e sohte duwehte paliwaratail, sohte lipwen oahla kin mihmihte ni ansou me kitail keluhlahr ni mehlel pwehki Tomw en Sises Krais. Inouo iei: Kilang mehmen me keluhkilahr dipehkan, miehier mahk pen dipehkan, oh Ngehi, Kauno sohte kin tamataman (D&C 58:42).

Ni atail kin kosoia pwopwoud oh mour en peneinei, kitail kin kalap tamanda mehteikan de mwekid teikan. Ekei ipwikihdi kahpwal oh sohte kak wiahda seri. Ekei sohte arail sapwung ahpw arail pwopwoud oahkihla en arail pwoud kan likamw. Ekei sohte pwopwoud oh kin momourki mour pwung en me kiripw.

Met, I patohwenda kaweid en popohl: Koht iei Samatail! Kalaudpen limpoak oh kadek koaros me sansal rehn atail pahpa en sampa patopato Reh, Samatail oh atail Koht me kitail sohte kak pein wehwehki. Sapwellime tenek kan me pwung; Sapwellime kalahngan sohte imwi: Sapwellime manaman en epwel sipelehla mehkoaros me kitail kak karasahiong. “Ma atail koapworopworki Krais e doakedoakehte atail mouren sampah wet, kitail paisuwedsang aramas koaros nin sampah” (I  Korint 15:19).

Ni wahu met I doadoahngki lepin mahsen tehnpas sarawi. I kilang ehu perehn katengteng oh ehu pei sarawi me pwopwoud pwulepwul ehu kilikilipwikie. Tiahk sarawi wet udahn kesemwpwal, pwe kapwopwoud wet kakehr katengtengdi sang Ngehn Sarawi en Inouo, oh pwuhk sarawi kan kosoia me kitail pahn alehdi manaman kan oh kaunda wehi kan (D&C132:19). I kilang popohl me awiawi irail kan me ale oh warehng doadoahngki kisakis kesemwpwal wet.

Ngehi oh Sister Donna Smith Packer wie pwopwoudkier kereniong sounpar 70 [isihsek]. Ni ei kin medewe ahi pwoud, en nei serihkan arail nohno, I kin sohla kak kosoi. Pepehm oh kalahngan kin inenen loal oh laud kahrehda I kin sohla kak kosoia mehkot. Kisakis me keieu laud me se alehier nan mour wetoh nan mour kohkohdo iei nait serihkan oh neirailkan. Ni aht kereniala imwin aht mour met, I kaping kalahnganki minit koaros me se mihmikipene oh inou me Kauno ketkidahr me dene sohte imwin pwopwoud.

I kadehde me Sises iei ihme Krais oh Ieros en Koht ieiaso. Ih me wia mongen Mwomwohdiso wet. Pwehki Sapwellime Tomwo oh manaman en priesthood, peneinei kan me tapiadahr arail mour nan mour wet pahn kak mihmihpene kokolahte. Tomwpen dihp wet iei me pahn kak kapitala emenemen kitail. Met me wewehki me mendahte dahme kitail wiahier de ia wasa me kitail kolahr ie de ia mwomwen soahng tei kan a kin wiawi, ma kitail mehlelki atail koluhla, E inoukier me E pahn wia tomw o. Oh ni ansou me E pahn tomw kin kitaila, met me kosondier en wiawi. Kidalap kei kitail me kokohseli mwahl pwehki dene kitail ahniki kapahtou, apw sohte ese ia mwomwen atail pahn powehdi. Komw pahn powehdi ma ke alehda Tomwpen Krais, oh soahng kan koaros me kansensued pahn miehla linganpe oh limpoak oh mour soutik.

I inenen kapingki mehlel kapai kan en atail Kaun Sises Krais, ong manaman en kepikpikdahn sampaht, manaman en kopwurpwurdohn atail mour, ong Tomwpen Dihp–iei Tomwpen Dihp o me pahn kak en kamwakelei kitail sang nan dihp mendahte ia wen apwal de ia wen reirei de e pahn pak depe me e pahn kin wiwiawi. Tomwpen Dihp wet pahn kieng uhk saledek en pwurehng momour kowei ni mwakelekel oh warohng en pousehla ahl me ke piladahr nan mour et.

I wia ai kadehde me Koht ieias, Sises iei ih me Krais, oh Tomw en Sises Krais sohte wia oaralap ehu apw iei ong Mwomwodihsoht unsek. Tomw en Sises Krais iei ihte, oh ma mie mehkot me kin kedkediropwei komwi–mweihn rahnteio oh ke solahr kak taman–a ke doadoahngki Tomw wet. E pahn kamwakelei komwihda, duwehte Ih, me pahn sohla taman dipomw kan koaros. Ni mwaren Sises Krais, ahmen.