Ang Priesthood—isa ka Sagradong Dulot

Ang isa sa labing madumdoman ko nga mga handurawan amó ang pagtambong sa miting sang priesthood bilang bag-ong na-ordinan nga diyakono kag ang pag-amba sang pangbukas nga himno, “Come, all ye sons of God who have received the priesthood.”¹ Karon nga gab-i, sa tanan nga nagatililipon diri sa Conference Center kag, tunay, sa bug-os nga kalibutan, ginasulit ko ang espiritu sinang pinasahi nga himno kag magsiling sa inyo: Magkari, tanan kamo nga mga anak nga lalaki sang Diyos nga nagbaton sang priesthood, talupangdon naton ang aton mga palangakuan; hunahunaon naton ang aton mga responsibilidad; pat-uron naton ang aton katungdanan; kag magsunod kita kay JesuCristo, ang aton Ginuo. Samtang magkatuhay kita sa edad, sa pagginawi, ukon sa nasyonalidad, naghiliusa kita sa aton mga palangakuan sa priesthood.

Sa kada isa sa aton, ang pagpanumbalik sang Aaronic Priesthood kanday Oliver Cowdery kag Joseph Smith paagi kay Juan Bautista labing makahulogan. Amó man, ang pagpanumbalik sang Mechizedek Priesthood kanday Joseph kag Oliver paagi kanday Peter, James, kag John, isa ka ginapalangga gid nga hitabo.

Kabigon naton nga pinakalabing importante ang aton mga palangakuan, mga responsibilidad, kag mga katungdanan nga nagaabot upod sa priesthood nga aton gina-uyatan.

Nabatyagan ko ang dakung responsibilidad sang ako gintawag bilang sekretaryo sang korum sang mga diyakono. Naghanda gid ako sang labing maayo parte sa mga record nga akon ginkaptan, kay luyag ko nga himuon ang pinakalabing maayo nga mahimo ko sa sinang palangakuan. Ginpabugal ko gid ang akon trabaho. Ang paghimo sang tanan ko nga masarangan, sa pinakalabing maayo ko nga abilidad, amó ang akon kalab-uton sa ano man nga posisyon nga akon naangkon.

Nagalaum ako nga ang kada batan-on nga lalaki nga naordinan sa Aaronic Priesthood nahatagan sang espirituhanon nga pagkahibalo nahanungod sa pagkasagrado sang iya gin-ordinan nga palangakuan, subong man sa mga oportunidad sa pagpadaku sinang palangakuan. Nakabaton ako sinang oportunidad bilang diyakono sang ang bishopric nagpangabay nga dalhon ko ang sakramento sa isa ka indi makasimba nga katapo nga nagapuyò sang mga isa kag tunga ka kilometro halin sa kapilya. Sinang pinasahi nga Domingo sang aga, samtang nagpanuktok ako sa ganhaan ni Brother Wright kag nabatian ko ang maluya nga tingog niya nga nagasiling, “Sulod ka,” nagsulod ako indi lamang sa kubos niya nga balay apang sa kuwarto nga napunô sang Espiritu sang Ginuo. Nagpalapit ako sa katre ni Brother Wright kag mainandamon nga nagbutang sang tinapay sa iya mga bibig. Dayon ginkaptan ko ang diutay nga tasa sang tubig agud siya makainom. Sang naglakat na ako, nakit-an ko ang luha sa iya mga mata samtang siya nagsiling, “Bugayan ka sang Diyos, anak ko.” Kag ang Diyos nagbugay sa akon—nga may pagpasalamat sa mga simbolo sang sakramento kag sa priesthood nga akon gin-uyatan.

Walâ sang diyakono, teacher, ukon priest nga halin sa amon ward ang sarang malipat sa halandurawon nga mga pagbisita nga ginhimo namon sa Clarkston, Utah, sa lulubngan ni Martin Harris, isa sa Tatlo ka Mga Saksi sa Libro ni Mormon. Samtang kami nagpalibot sa mataas nga poste sang granito nga nagamarka sa iya lulubngan, kag samtang ang isa sa mga pinuno sang korum nagbasa sa amon sadtong nagatudok nga mga tinaga halin sa “Ang Panaksihon sang Tatlo ka Mga Saksi,” nga masapwan sa paunahan sang Libro ni Mormon, nakaangkon kami sang pagpalangga sa sinang sagradong kasulatan kag sa mga kamatuoran nga makit-an sa sulod sini.

Sadtong mga tuig ang amon tuyò amó ang magmangin anak nga mga lalaki ni Mosiah. Parte sa ila ini ginsiling:

”Sila nangin mabakod sa ihibalo sang kamatuoran; kay mga lalaki sila sang himpit nga paghangop kag sila nagsayasat sing maukod sang balaan nga mga kasulatan, agud mahibal-an nila ang pulong sang Diyos.

“Apang indi lamang ini tanan; sila nagbuhos sang ila mga kaugalingon sa madamo nga pangamuyo, kag pagpuasa; gani sila may espiritu sang panagna, kag espiritu sang bugna, kag kon sila magtudlo, nagatudlo sila nga may gahum kag awtoridad halin sa Diyos.” ²

Wala ako sang mahunahunaan nga mas takos pa nga kalab-uton para sa isa ka batan-on nga lalaki sangsa mailaragway kasubong sa isganan kag matarong nga mga anak nga lalaki ni Mosiah.

Samtang naghilapit ako sa akon ika-18 nga kaadlawan kag naghanda nga magsulod sa ginapangayo nga pag-alagad sa militar para sa batan-on nga mga lalaki sa panahon sang Ika-duhang Kalibutanon nga Giyera, ako ginrekomendar agud magbaton sang Melchizedek Priesthood, apang una kinahanglan ko nga magtawag sa telepono sa akon presidente sa stake, si Paul C. Child, para sa interbyu. Siya isa sa nagapalangga kag nakahangop sang balaan nga mga kasulatan, kag tuyò niya nga ang tanan dapat man nga magpalangga kag maghangop sa mga ini. Kay nabatian ko halin sa pila ko ka mga abyan ang iya detalyado kag nagapangusisa nga mga pag-interbyu, luyag ko nga diutay lamang niya nga mahibal-an ang akon ihibalo sa kasulatan; gani, sang ako nagtawag sa iya nagpanugyan ako nga kami magkit-anay sa masunod nga Domingo sa isa ka tion nga nahibal-an ko isa lamang ka oras antes sa tion sang iya miting sa sakramento.

Ang sabat niya: “Ah, Brother Monson, indi ina maghatag sa aton sang nagakaigo nga tion agud magtuon sang mga kasulatan.” Dayon siya nagpanugyan sang isa ka tion tatlo ka oras antes sang iya miting sa sakramento, kag nagtulin siya sa akon nga dalhon ko ang kaugalingon ko nga namarkahan nga mga libro sang balaan nga mga kasulatan.

Sang ako nag-abot sa ila puluy-an sang Domingo, maayo niya ako nga gintamyaw, kag dayon ang interbyu nagsugod. Si Presidente Child nagsiling, “Brother Monson, ginaangkon mo ang Aaronic Priesthood. Nabisitahan ka bala sang mga anghel agud alagaran?” Nagsabat ako nga walâ. Sang ginpamangkot niya ako, kon nahibal-an ko nga ako may katarungan para sa sina, nagsabat ako liwat nga walâ ako nakahibalo sina.

Siya nagtudlo, “Brother Monson, liwata halin sa imo memorya ang ika-13 nga seksyon sang Doktrina kag Mga Kasugtanan.”

Ako nagsugod, ’”Sa inyo kaupod ko nga mga alagad, sa ngalan sang Manluluwas ginatugyan ko ang Priesthood ni Aaron, nga nagaangkon sang mga yabi sang pagpang-alagad sang mga anghel—’”

“Untat,” ang hambal ni Presidente Child. Dayon sa kalma, kag mabuot nga tuno, siya naglaygay, “Brother Monson, indi gid paglipati nga bilang isa ka nagaangkon sang Priesthood ni Aaron may pagkamatarong ka sa pagpang-alagad sang mga anghel.”

Sadto halos nga daw sa may yara sang anghel sa kwarto sinang adlaw. Indi ko gid malimtan ang interbyu. Mabatyagan ko pa ang espiritu sinang sagradong okasyon samtang ginbasa namon ang mga responsibilidad, mga katungdanan, kag mga bugay sang Priesthood ni Aaron kag sang Priesthood ni Melchizedek—mga bugay nga indi lamang nagaabot sa aton apang sa aton man mga panimalay kag sa iban pa nga nga aton gina-alagaran bilang isa ka pribilihiyo.

Gin-ordinan ako nga isa ka elder, kag sa adlaw sang akon paglakat para sa aktibong katungdanan sa navy, isa ka miyembro sang bishopric ang nagbuylog upod sa akon panimalay kag mga abyan sa estasyon sang tren agud magpaalam sa akon. Antes mag-abot ang tren, siya nagbutang sa akon kamot sang diutay nga libro nga gintig-ulohan Missionary Handbook. Nagkadlaw ako kag nagsiling nga ako indi magmisyon.

Siya nagsabat, “Dalha lang. Basi magaabot nga kinahanglan mo ini.”

Ining tion nag-abot. Kinahanglan ko ang matig-a, medyo kwadrado nga butang sa idalom sang akon bag pangdagat agud ang akon mga panapton magpabilin nga plantsado kag indi masyado nga mayukot. Ang Missionary Handbook amó gid ang ginkinahanglan ko, kag ini nagbulig sing maayo sa 12 ka mga simana.

Sang gab-i antes sang amon bakasyon para sa Christmas, ang amon mga hunahuna yara sa amon puluy-an. Ang mga barrack malinong, apang ang kalinong gintublag sang upód ko sa masunod nga hiligdaan—isa ka Mormon nga batan-on, si Leland Merrill—nga nagsugod sa pag-ugayong sa sakit. Ginpamangkot ko siya sang kabangdanan, kag siya nagsiling nga indi gid maayo ang iya pamatyag. Indi siya luyag magkadto sa klinika sang kampo militar, kay nahibal-an niya nga ang ini makaupang sa iya pagpauli sa masunod nga adlaw.

Daw sa naglain pa gid siya samtang ang mga oras naglipas. Sang ulihi, kay nahibal-an niya nga ako isa ka elder, ginpangabay niya ako nga hatagan ko siya sang isa ka blessing sang priesthood.

Walâ pa gid ako makahatag sang isa ka blessing. Walâ man ako makabaton sang isa ka blessing, kag walâ pa gid ako makasaksi sang isa ka blessing nga ginhimo. Samtang nagpangamuyo ako sang mahipos para sa bulig, nadumdoman ko ang Missionary Handbook sa idalom nga sulod sang akon bag pangdagat. Maabtik ko nga ginbubo ang unod sang bag kag ginkuha ang libro agud basahon sa sanag sang gab-i. Didto ko nabasa kon paano ang tawo mag-bless sa may sakit. Upod ang madamo nga osyosong marinero nga nagalantaw, nagpadayon ako sa paghatag sang blessing. Antes ko nabalik sa akon bag ang tanan, si Leland Merrill nagatulog nga daw isa ka bata. Nagbugtaw siya sang masunod nga aga nga maayo ang pamatyag. Ang pagpasalamat nga amon nabatyagan kada isa para sa gahum sang priesthood daku kaayo.

Ang mga tinuig naghatag sa akon sang dugang nga mga oportunidad agud maghatag sang mga bugay sa yadtong nagkinahanglan nga labaw sangsa sarang ko maisip. Ang kada isa naghimo sa akon nga may madalom nga pagpasalamat nga ang Diyos nagtugyan sa akon sining sagradong dulot. Ginakabig ko nga may kaligdong ang priesthood. Nasaksihan ko ang gahum sini paliwat-liwat. Nakita ko ang kabakod sini. Nagdayaw kag natingala ako sa mga milagro nga ginhimo sini.

Mga kauturan sang priesthood, ang kada isa sa aton gintugyanan sang isa sa mga pinakabilidhon nga mga dulot nga nahatag sa katawhan bisan san-o pa man. Samtang ginapadunggan naton ang aton priesthood kag mangabuhi sang aton mga kabuhi agud nga kita takos sa tanan nga tion, ang mga bugay sang priesthood magailig paagi sa aton. Luyag ko gid ang mga tinaga nga yara sa Doktrina kag Mga Kasugtanan seksyon 121, bersikulo 45, nga nagahambal sa aton kon ano ang dapat naton buhaton agud mangin takos: “Tugoti ang inyo dughan ... nga mapuno sang gugma ni Cristo para sa tanan nga tawo, kag sa panimalay sang pagtuo, kag tugoti ang birtud nga magpalibot sa inyo mga panghunahuna sing padayon; dayon ang inyo pagsalig magmangin mabakod sa atubang sang Diyos; kag ang doktrina sang priesthood magatuhaw sa inyo kalag subong sa mga hamog halin sa langit.”

Bilang mga naga-uyat sang priesthood sang Diyos, kita nagabuylog sa buluhaton sang Ginuong JesuCristo. Ginsabat naton ang Iya panawagan; yara kita sa Iya pagsugo. Magtuon kita parte sa Iya. Magsunod kita sa Iya halimbawa. Sundon naton ang Iya mga panudlo. Sa paghimo sini, mangin handa kita sa ano man nga pag-alagad nga tawgon Niya kita agud buhaton. Ini buluhaton Niya. Ini ang Iya Simbahan. Sa katunayan, Siya ang aton pinuno, ang Hari sang Himaya, matuod ang Anak sang Diyos. Nagasaksi ako nga Siya buhi kag ginahatag ko ining saksi sa Iya balaan nga ngalan, sa ngalan ni JesuCristo amen.