Pristut—Sie Mwe Sang Muhtahl

Sie mwe esamyac yohk luhk ah pa wi toeni luhn pristut ke nga sasuc in ahkkweyeyucklac ke tikin ac onkihn hymn, “Tuhkuh, wen nohfohn nuhtin God suc eis pristut.”¹ Ofong, nuh sin mwet nuh kwewa suc wi ke Lohm in Toeni Luhlahp inge ac, wi pac, nuh ke facluh, nga sulpac fahk ke nguhn sacohk luhn hymn se ingen ac fahk nuh suwos, Tuhkuh, wen nohfohn nuhtin God suc eis pristut,Lwelah kuht in motko ke pahng lasr; lwelah kuht in nuhnkuh ke kunohkohn lasr; lwelah kuht in etuh ma kunacsr; ac lwelah kuht in ukwe Jisus Kraist, Leum lasr uh. Finne kuht matwac siena, facsin, kuh muhtuhnfacl, kuht ma sefannalac ke pahng luhn pristut lasr.

Nuh sin kais sie sesr, fohlohkihnyuckyak luhn Pristut Aaronic nuh sel Oliver Cowdery ac Joseph Smith sel John Mwet Pacptais, pa yohk srihpac na pwacye. Oacna, fohlohkihnyuckyak luhn Pristut Melchizedek nuh sel Joseph ac Oliver sel Peter, James, ac John, pa pacl sikyak ma luhngseyuck ah.

Lwelah kuht in kahlwem yohk ke pahng an, kunohkohn an, ac ke ma kunac ma tuhkuh ke pristut ma kuht sruok an.

Nga puhla ma kunac yohk ke nga pahngonyuck nuh ke secretary ke u luhn tikin luhk ah. Nga ahkolah ke ohiyac okak ma sihmlac an ma nga karihngihn, mweyen nga luhngse in wo emet ke ma nga kuh in oruh ke pahng se ingen. Nga sifacna yuckihn orekma luhk. Oruh ma nohfohn nga kuh, ke ohiyuck wo emet, pa finsrak luhk ke kuhtwena pahng nga sruok an.

Nga finsrak kais sie mukul suc ahkkweyeyucklac nuh ke Pristut Aaronic elos eis etwacack luhn nguhn ke ma muhtahl ke pahng lal, oacyacpac pacl mwesahs in ahkfalye pahng se ingen. Na eis pacl wo se ke nga tikin an ke pisaprik uh siyuck yuc in us kuhfa luhn Leum nuh sin sie suc muhta apkuhran mael se likina alu lasr. Ke lututacng Sacnri sacohk ingen, ke nga tongtong ke sruhngucl lal Tamuhlwel Wright ac lohng puhsrel muhnahs fahk, “Utyak,” nga tiac utyak nuh in lohm sel muhkwena tuhsruhktuh nuh in sie infuckihl sesseslah ke Nguhn luhn Leum. Nga som nuh ke pet lal Tamuhlwel Wright ac fihliyac flao nuh ke inwacluhl. Na nga fihliyac kuhp in kof, lah el kuh in nihm. Ke nga som, nga liye sron in muhtahl ac el fahk, “God ahkinsewowoye kom, mukul fuhsr wiyuck.” Ac pwacye God El ahkinsewowoyeyuc—ke tarilacna ke akucl muhtahl ke kuhfa luhn Leum ac ke pristut ma nga sruokyac ah.

Wacngihn tikin, titsucr, kuh prist ke ward lasr uh ac kuh in muhlkuhnlah muhtwacta etwacack kuht oruh nuh ke Clarkston, Utah, in liye puhpuhlyuck lal Martin Harris, sie sin Mwet Loh Tolu ke Puk luhn Mormon. Ke kuht raunlac yot loes ma ahkkahlwemye puhpuhlyuck lal, ac ke sie mwet kol ke u an riti nuh sesr kahs kuh on ke “Kahs In Fahkwack Luhlahlfongi Luhn Mwet Loh Tolu,” ma oasr ke acn met luhn Puk luhn Mormon, kuht eis luhngse yohk ke mwe sihm muhtahl se ingen ac ke ma pwacye oasr kac.

Ke yac ingen finsrak lasr pac in oacna wen nuhtin Mosiah. Ma inge fahkwack kwaclos:

“Ac elos fokokoi ke etwacack luhn ma pwacye; tuh elos mwet suc yohk kahlwem la ac elos oaru in lutlutkihn ma suhmuhslah, tuh elos in kuh in etuh kahs luhn God.

“Tuhsruhk tiac pa inge nohfohn; elos eisaclosyang sifacna nuh ke pruhe, ac lalo yohk; ke ma inge elos eis nguhn in pahluh, ac nguhn in fwackyuck, ac ke elos luti, elos luti ke kuh ac wal luhn God.”²

Nga tiac kuh in nuhnkuh ke finsrak se luhn mukul fuhsr ma wo likina in el fin ahkuhtweyacyucklac oacna el sie mukul oaru ac suwohswohs nahtuhl Mosiah.

Ke nga sun puhtte [singucul oalkosr] 18 luhk ac ahkolah in utyak nuh ke kuhlwacnsap luhn military ma enenweyuck sin mukul fuhsr nuh kwewa ke pacl luhn Mweun luhn Facluh Ahkluo, nga siyuck in eis Pristut Melchizedek, tuhsruhktuh nga enenuh pahng prestuhn luhn stek luhk met, Paul C. Child, ke kihsen siyuck in lohlngohk se. El pa sie suc luhngse ac kahlwem ma suhmuhslah muhtahl an, ac pa kena lal lah mwet sahyac enenuh luhngse ac kahlwem ma suhmuhslah oacna el. Ke srihpen nga lohng sin kuhtuh kawuck luhk ke kihsen siyuck loal ac yohk, nga kena tiac arlac sramsram yohk ke ma nga etuh ke ma suhmuhslah; pwacnwacng ke nga pahngonohl nga fahk nga ke ohsun ke Sacnri se fahsruh ke pacl ma muhtwacack oa se met liki toeni in kuhfa luhn Leum.

El topuk: “Oh, Tamuhlwel Monson, pacl se ngacn ac tiac lwelah pacl fal in kahkahsrihk riti ma suhmuhslah an.” Na el sulwaclah pacl ke oa tolu met liki toeni ke kuhfa luhn Leum, ac el kai yuc in us ma suhmuhslah sifacna luhk ma oasr mahkiyac kac.

Ke nga ohsun nuh ke lohm sel ke Sacnri, Prestuhn Child el pain yuc ke ohiyac wo, na kihsen siyuck muhtwacack an. Prestuhn Child el fahk, “Tamuhlwel Monson, kom sruok Pristut Aaronic. Oasr pacl lihpufacn ahkkweye kom?” Nga topuk lah nga tiac. Ke el siyuck nga fin etuh nga kuh in eis kain kahsruh inge, nga sulpac topuk nga nihkihn.

El ngihsre, “Tamuhlwel Monson, sulpac fahk ke etuh lom sapta [singucul tolu]13 ke Doctrine and Covenants.”

Nga muhtwacack in fahk lah John Mwet Pacptais fahk lah ke mwet kuhlwacnsap lal, ke inen Messiah el ahkkweye Pristut luhn Aaron, ma sruok ki ke orekma luhn lihpufacn.

“Tui,” Prestuhn Child el fahk. Na ke ohiyac mihslac, kuhlwacng, el luti yuc, “Tamuhlwel Monson, tiac muhlkuhnlah ke mwet se suc sruok Pristut Aaronic kom kuh in eis orekma luhn lihpufacn.”

Apkuhran oacna lihpufacn se oasr ke infuckihl ke lwen se ingen. Nga tiac muhlkuhnlah pacl in kihsen siyuck an se ingen. Nwe ke mihsenge nga srackna puhla nguhn ke ma muhtahl ma sikyak ah ke kuht riti tuhkweni kunohkohn, ma kunac, ac mwe insewowo luhn Pristut Aaronic ac Pristut Melchizedek.

Nga ahkkweyelah nuh ke elder, ac ke lwen se nga som nuh ke navy in orekma, mempucr se ke pisaprik luhn ward luhk wi sucu ac kawuck luhk ke lohm luhn train in fahk kuht fah ohsun. Mwet liki pacl in som, el fihliyac puk srihsrihk ma pahngonyuckHandbook luhn Misineri. Nga isracsr ac fahk lah nga tiac som in wi misin.

El topuk, “Us oacna sie. Sahp ac kuh in sie mwe kahsruh.”

Pwacye nga enenuh. Nga enenuh sie ma kwekwe, ma nga kuh in fihliyac ke pack luhk in muh nuknuk luhk ac muhta wo ac tiac oruh in okahrkahr. Handbook luhn Misineripa ma se nga enenuh, ac orekma wo lun pack luhk ke wik [singucul luo] 12 somlah.

Fong met liki pacl in som ke Kristmas, nuhnak lasr oasr ke lohm sesr. Barrack an mihslac, tuhsruhktuh mihslac som ke kawuck luhk sisken ma kiyuck──mukul Mormon se, Leland Merrill──muhtwacack in wohwohn ke ngal. Nga siyuck ke srihpac uh, ac el fahk lah el puhla arulacna mas. El tiac ke som nuh ke acn ono ke base, mweyen el etuh el fin oruh sahp el tiac kuh in fohlohk nuh lohm ke lwen se tok uh.

El luhman in koluklac ke oa uh somlah. Sahflahiyacn, ke srihpen nga etuh nga pa elder, el siyuck nga in sang mwe insewowo luhn pristut.

Nga soenna sang kain mwe insewowo se ingen, nga soenna eis kain mwe insewowo se ingen, nga soenna liye kain mwe insewowo se ingen sikyak. Ke nga kahkahsrihk pruhe ke kahsruh, nga esam Handbook luhn Misineri oasr ke pack luhk ah. Nga sa in eslah puk ke pack ac liye ke kahlwem luhn fong. Inge nga riti fuhkah in ahkinsewowoye mwet mas. Ke mwet sailor puhs liye nga, nga oruh mwe insewowo an. Met liki nga kuh in sulpac fihliyac ma nuh pack luhk ah, Leland Merrill el mutullac oacna tuhlihk se. El nguhtwaclihk ke lututacng fahsruh ac puhla wona. Tarilacna kais sie sesr puhla ke kuh luhn pristut pa yohklac.

Ke yac somlah nga eis pacl wo in sang mwe insewowo nuh sin elos suc enenuh yohklac ma nga kuh in oacwaclah. Kais sie pacl ingen nga konwacack tarilacna loal lah God El lwelah nga in us mwe sang muhtahl inge. Nga sruikihn pristut an. Nga liye kuh lal sulpac pacl nuh ke pacl. Nga liye ohiyac fokoko lal. Nga lut ke ma usrnguck el oreklac ah.

Tamuhlwel, kais sie sesr luhlahlfongiyuck ke sie mwe sang sacohk emet ma sang nuh sin mwet. Ke kuht ahkfuhlwactye pristut lasr ac moulkihn moul lasr tuh kuht nwacsnwacs pacl nuh kwewa, mwe insewowo luhn pristut fah som ahluhkwelah kuht. Nga luhngse kahs konwacack ke Doctrine and Covenants sapta [siofok longoul sie] 121, fuhs [angaul limekohsr] 45 ma luti kuht lah kuht enenuh in nwacsnwacs ke kuht sesseslah ke luhngse pwacye nuh sin mwet nuh kwewa, ac nuh sin mwet luhlahlfongi, ac lwelah ohiyac nwacsnwacs nwacklah nuhnak lasr pacl nuh kwewa. Na luhlahlfongi lasr ac fokokoi ye muhtuhn God ac ip yohk ke pristut fah tuhkuh nuh ke nguhnasr oacna aunfong tuhkuh ke inkuhsrao.

Ke mwet sruok pristut luhn God, kuht mukwikwi ke orekma luhn Leum Jisus Kraist. Kuht topuk pahng Lal; kuht wi orekma Lal. Lwelah kuht in lotwelah Sel. Lwelah kuht in ukwe fahsr Lal. Lwelah kuht in moulkihn mwe luti Lal. Ke kuht oruh, kuht ahkolah in kuhlwacnsap ke kuhtwena pahng El acse nuh sesr in oruh. Pa inge orekma Lal. Pa inge Alu Lal. Pwacye, El pa kacptin lasr, Tohkohsrah luhn Wolacna, finne Wen nuhtin God. Nga fahkwack El moul ac sang mwe lohoh inge ke ine muhtahl Lal, amen.