2010–2019
Hnub Caiv Yog Ib Hnub Zoo Siab
April 2015


Hnub Caiv Yog Ib Hnub Zoo Siab

Yog li ntawd nej yuav coj li cas thaum Hnub Caiv kom muaj kev xyiv fab thiab kev zoo siab?

Kuv cov kwv tij thiab cov muam, ob hnub ntawm lub tuam rooj sab laj no yeej zoo kawg. Cov nkauj thiab tej kev thov Vajtswv twb txhawb nqa peb. Peb txais kev tshoov siab los ntawm tej zaj ntawm qhov kaj thiab qhov tseeb. Thaum Hnub Caiv Easter no, peb rov qab koom siab koom ntsws ua Vajtswv tsaug rau ib tug yaj saub!

Qhov uas peb txhua tus yuav tsum nug peb tus kheej yog: vim kuv tau mloog thiab hnov tej no nyob hauv lub rooj sab laj no, kuv yuav hloov li cas? Txawm nej teb li cas los, kuv xav caw nej kom nej xav txog qhov uas nej coj li cas thaum Hnub Caiv.

Ua rau kuv xav txog Yaxayas cov lus, uas hais tias Hnub Caiv yog ib hnub zoo siab.1 Tiam sis kuv xav seb, Hnub Caiv puas yog ib hnub zoo siab rau nej thiab kuv tiag tiag?

Kuv twb nrhiav tau kev zoo siab thaum Hnub Caiv ntau xyoo tas los, thaum kuv yog ib tug kws phais mob, es kuv paub tias Hnub Caiv yog ib hnub rau kuv kho kuv tus kheej. Txhua lub lim tiam thaum kawg, kuv txhais tes mob mob heev vim kuv pheej muab ntxuav nrog xub npus, dej, thiab tus txhuam. Kuv kuj xav so vim kuv txoj hauj lwm nyuaj heev. Hnub Caiv yeej cia kuv muaj sij hawm so.

Tus Cawm Seej tej lus hais tias “Vajtswv tsim hnub caiv rau neeg, tsis yog tsim neeg rau hnub caiv” txhais li cas?2 Kuv ntseeg hais tias Nws xav kom peb to taub hais tias Nws tsim Hnub Caiv kom muab txiaj ntsim rau peb, cia peb so thiab muab cib fim rau peb kom peb sab ntsuj plig thiab sab cev nqaij daim tawv yuav rov qab muaj dag zog. Vajtswv tau muab hnub tshwj xeeb rau peb, tsis yog kom peb muaj kev lom zem los sis ua hauj lwm, tiam sis kom peb so tsis ua hauj lwm, kom pab peb sab cev nqaij daim tawv thiab sab ntsuj plig.

Hais lus Henplais, lo lus Sabbath txhais hais tias “so.” Lub ntsiab ntawm Hnub Caiv pib puag thaum ntuj tsim teb raug, es tom qab tus Tswv ua hauj lwm rau hnub lawm, tus Tswv so tsis tsim dab tsi ntxiv.3 Tom qab Nws muab Kaum Nqe Lus Txib tshwm sim rau Mauxes, Vajtswv txib kom peb nco ntsoov hnub caiv, ua hnub dawb huv.4 Tom qab ntawd, Ixayees ua Hnub Caiv kom lawv nco ntsoov tias lawv dim ntawm kev ua cev qhev nyob hauv Iyiv Teb.5 Tej zaum qhov tseem ceeb tshaj plaws, Hnub Caiv yog ib txoj kev khi lus, ib qho uas ua rau cov neeg nco ntsoov tias tus Tswv yuav ua kom Nws cov neeg dawb huv.6

Tsis tas li ntawd xwb, niaj hnub no peb txais lub cim nco txog thaum Hnub Caiv kom peb nco txog Yexus Khetos txoj Kev Theej Txhoj.7 Peb rov qab khi lus tias peb txaus siab ris Nws lub npe dawb huv.8

Tus Cawm Seej hais tias Nws yog tus Tswv ntawm Hnub Caiv.9 Yog Nws hnub tiag! Nws pheej hais kom peb hwm Hnub Caiv10 los yog ua Hnub Caiv kom dawb huv.11 Peb twb khi lus tias peb yuav ua li ntawd.

Yog li ntawd peb yuav ua li cas kom Hnub Caiv dawb huv? Thaum kuv tseem hluas, kuv tau kawm txog tej yam uas neeg sau hais tias yuav tsum tsis txhob ua thaum Hnub Caiv. Tom qab ntawd kuv twb kawm los ntawm cov vaj lug kub hais tias tej yam kuv ua thiab kuv tus xeeb ceem thaum Hnub Caiv yog ib lub cim uas kuv ua rau kuv Leej Txiv Saum Ntuj Ceeb Tsheej.12 Thaum kuv to taub li ntawd, kuv tsis tas sau hais tias kuv yuav ua dab tsi thiab tsis ua dab tsi. Thaum kuv yuav tsum txiav txim siab hais tias ib yam puas tsim nyog ua thaum Hnub Caiv, kuv cia li nug kuv tus kheej, “Kuv xav ua lub cim twg rau Vajtswv?” Lo lus nug ntawd ua yooj yim rau kuv paub xaiv ua dab tsi thaum Hnub Caiv.

Txawm yog Vajtswv hais cov lus qhuab qhia txog Hnub Caiv puag thaum ub los, Nws tau rov qab hais txog qhov no hauv lub caij nyoog kawg no nrog ib txoj kev khi lus thiab lo lus cog tseg. Cia li mloog seb Vajtswv tej lus no muaj hwj chim npaum li cas.

Vajtswv hais tias xwv kom peb yuav ceev peb tus kheej txhij zog kom kev ntiaj teb txhob ua tau rau peb ceb, peb yuav tau mus rau hauv lub tsev thov Vajtswv thiab fij peb tej cim nco txog thaum yog Nws hnub dawb huv.

Vim tseeb tiag hnub no yog ib hnub uas tau muab los rau peb so ntawm peb tej kev khwv, thiab muab peb tej kev hwm pub rau tus uas Siab Tshaj Plaws. …

Thiab nyob rau hnub no, tsuas cia npaj peb tej zaub mov noj nrog rau tib lub hom phiaj ua kom peb tej kev yoo mov yuav zoo tag nrho, xwv kom peb txoj kev xyiv fab yuav puv npo. …

Thiab npaum li uas peb ua tej yam no nrog kev ua tsaug, nrog kev lub siab thiab lub ntsej muag luag ntxhi, … txhua yam nyob hauv lub ntiaj teb yog peb li.13

Cia li xav seb zaj lus no zoo npaum li cas! Vajtswv cog lus tias yuav muab txhua yam nyob hauv lub ntiaj teb rau cov uas hwm Hnub Caiv kom ua dawb huv.14 Yeej tsim nyog uas Yaxayas hais tias Hnub Caiv yog ib hnub zoo siab.

Yog li ntawd nej yuav coj li cas thaum Hnub Caiv kom muaj kev xyiv fab thiab kev zoo siab? Ntxiv rau kev mus koom lub koom txoos, txais lub cim nco txog, thiab rau siab ua nej tej hauj lwm hauv lub koom txoos, nej yuav ua tej yam ntxim saib ntxim ua ntxiv kom Hnub Caiv yog ib hnub zoo siab rau nej? Nej yuav muab lub cim twg rau tus Tswv kom qhia Nws tias nej hlub Nws?

Hnub Caiv yog ib lub cib fim zoo kawg kom peb tsev neeg sib raug zoo. Vim peb yog Nws cov me nyuam, Vajtswv yeej xav kom peb txhua tus rov qab mus nrog Nws nyob thaum peb yog Haiv Neeg Ntseeg uas tau txais lub vaj txiaj ntsim, sib khi hauv lub tuam tsev, rau peb tsev neeg, peb cov poj koob yawm txwv, thiab peb xeeb leej xeeb ntxwv.15

Peb ua kom Hnub Caiv ua ib hnub zoo siab thaum peb qhia txoj moo zoo rau peb cov me nyuam. Peb txoj kev lav ris ua niam tsev txiv tsev yeej meej heev. Tus Tswv hais tias vim cov niam tsev txiv tsev muaj me nyuam nyob hauv Xi-oos, uas tsis qhia lawv kom lawv to taub txog kev hloov siab lees txim, kev ntseeg Yexus Khetos Vajtswv Leej Tub, thiab kev cai raus dej thiab lub txiaj ntsim Vaj Ntsuj Plig Dawb Huv los ntawm kev tso tes rau saum taub hau, thaum muaj yim xyoo, ces kev txhaum ntawd nyob ntawm niam txiv lub taub hau xwb.16

Ntau xyoo tas los Thawj Pawg Thawj Tswj Hwm qhia tias qhov uas yus siv sij hawm nrog yus tsev neeg tseem ceeb npaum li cas. Lawv sau hais tias:

“Peb hais kom cov niam tsev txiv tsev siv zog qhia thiab tu cov me nyuam kom ua raws li cov ntsiab cai ntawm txoj moo zoo uas yuav pab lawv koom lub Koom Txoos. Lub tsev yog lub hauv paus ntawm kev ua neej ncaj ncees, thiab tsis muaj lwm yam uas pauv tau los yog ua tej yam tseem ceeb kom ua raws li kev lav ris uas Vajtswv tau muab rau peb.

“Peb hais kom cov niam tsev txiv tsev thiab cov me nyuam saib tej no tseem ceeb tshaj plaws: tsev neeg kev thov Vajtswv, tsev neeg hmo ua ke, kev kawm txoj moo zoo, thiab tej yam ntxim saib ntxim ua nrog tsev neeg. Txawm lwm yam ntxim saib ntxim ua los sis tej hauj lwm tsim nyog npaum li cas los, tej ntawd yuav tsum tsis txhob pauv tej hauj lwm uas Vajtswv pom zoo rau cov niam tsev txiv tsev thiab tsev neeg ua tau xwb.”17

Thaum kuv xav txog cov lus ntuas no, ua rau kuv kheev lam kuv yog ib tug txiv tsev hluas. Niaj hnub no cov niam tsev txiv tsev muaj tej kev pab zoo heev kom lub sij hawm lawv nrog lawv tsev neeg muaj nqi heev, tsis hais thaum Hnub Caiv thiab lwm hnub los yog. Lawv muaj LDS.org, Mormon.org, cov video txog phau Npaiv Npaum, Mormon Channel, Media Library, Friend,New Era,Ensign,Liahona, thiab ntxiv—muaj ntau yam ntxiv. Tej yam no yeej pab tau cov niam tsev txiv tsev kom lawv ua lawv txoj hauj lwm qhia lawv cov me nyuam. Tsis muaj ib txoj hauj lwm uas tseem ceeb tshaj kev ua niam tsev txiv tsev raws li kev ncaj ncees!

Thaum nej qhia txog txoj moo zoo, nej yuav kawm ntxiv. Nov yog tus Tswv txoj kev kom pab nej to taub Nws txoj moo zoo. Nws hais tias:

Nws muab ib lo lus txib rau peb kom peb ib leeg qhia ib leeg txog txoj lus qhuab qhia ntawm lub nceeg vaj.

Nws hais kom peb rau siab ntso qhia xwv kom yuav qhia peb zoo dua txog tej lus qhuab qhia, tej kev cai ntawm txoj moo zoo, thiab txhua yam ntsig txog Vajtswv lub nceeg vaj.18

Kev kawm txoj moo zoo li no yuav ua kom Hnub Caiv ua ib hnub zoo siab. Yuav muaj raws li kev cog lus no txawm yog yus tsev neeg loj npaum li cas, muaj leej twg nyob haud, los yog nej nyob qhov twg los yog.

Nrog rau kev siv sij hawm nrog nej tsev neeg, nej yuav zoo siab nyob rau Hnub Caiv thaum nej nrhiav tsev neeg zaj keeb kwm. Kev tshawb thiab kev nrhiav tau nej tsev neeg uas tau yug los ua ntej nej hauv lub ntiaj teb—cov uas tsis tau muaj cib fim txais txoj moo zoo thaum lawv ua neej nyob—yuav pab nej muaj kev xyiv fab heev.

Kuv twb pom muaj qhov no rau kuv tus kheej. Ob peb xyoos tas los, kuv tus poj niam, Wendy, txiav txim siab tias nws yuav kawm nrhiav tsev neeg zaj keeb kwm. Thaum xub thawj nws maj mam ua, tiam sis sij hawm dhau mus es, nws txawm kawm tias yog ib qho yooj yim ua txoj hauj lwm dawb ceev no. Thiab kuv yeej tsis tau pom nws zoo siab npaum li tam sim no. Nej tsis tas mus rau lwm lub teb chaws los yog mus rau qhov chaw nrhiav tsev neeg zaj keeb kwm. Nyob hauv tsev, yog nej muaj ib lub computer los yog xov tooj ntawm tes, nej muaj peev xwm nrhiav tau cov neeg uas xav kom nej ua kab ke rau lawv. Ua kom Hnub Caiv ua ib hnub zoo siab thaum nej nrhiav nej cov poj koob yawm txwv thiab tso lawv dim ntawm lub nkuaj ntsuj plig!19

Ua kom Hnub Caiv ua ib hnub zoo siab thaum nej pab lwm tus, qhov tseem ceeb pab cov uas tsis xis nyob los yog cov uas kho siab thiab xav tau kev pab.20 Yog nej txhawb nqa lawv ces yuav txhawb nqa nej ib yam thiab.

Thaum Yaxayas hais tias Hnub Caiv yog ib hnub zoo siab, nws kuj qhia peb kom peb paub tias yuav ua li cas kom muaj li ntawd. Nws hais tias:

Yog nej ceev hnub caiv ua hnub dawb huv thiab hnub ntawd nej tsis ua tej yam raws li nej lub siab nyiam, … nej hwm [tus Tswv], tsis txhob taug kev, tsis txhob ua hauj lwm thiab tsis txhob hais lus phem:

“Ces nej thiaj yuav tau kev kaj siab vim nej mloog kuv lus.21

Nej yuav tsum tswj nej tus kheej yog tias nej yuav tsis “ua tej yam raws li nej lub siab nyiam” thaum Hnub Caiv. Tej zaum nej yuav tsum tsis txhob ua ib yam dab tsi ua nej nyiam ua heev. Yog nej xav tau kev kaj siab vim nej mloog tus Tswv lus, nej yuav tsis txaus siab saib Hnub Caiv zoo li lwm hnub. Kev lom zem thiab tej yam uas ua niaj hnub los nej ua tau lwm lub sij hawm.

Cia li xav txog qhov no: thaum peb them ib feem kaum, peb muab ib feem kaum rau tus Tswv. Thaum peb hwm Hnub Caiv kom coj dawb huv, peb muab ib feem xya tshwj tseg ua Nws li. Yog li ntawd peb muaj cib fim muab nyiaj thiab sij hawm cob ua Nws tug, tus uas muab txoj sia rau peb niaj hnub.22

Kev ntseeg Vajtswv ua rau peb nyiam Hnub Caiv; kev ntseeg Hnub Caiv ua rau peb hlub Vajtswv. Ib Hnub Caiv dawb ceev yeej yog ib hnub zoo siab.

Yog li ntawd, thaum peb xaus lub rooj sab laj no, peb paub tias peb yuav tsum coj yam ntxwv raws li cov ntseeg rau peb tsev neeg, cov neeg zej zog, thiab phooj ywg pom.23 Cov ntseeg tiag tiag yeej hwm Hnub Caiv kom dawb huv.

Kuv hais Maulaunais tej lus kawg thaum nws sau Phau Ntawv Maumoos tiav xaus kuv zaj lus hais no. Nws sau hais tias, “Cia li los cuag Khetos, thiab cia li ua kom zoo tshaj plaws nyob hauv nws, thiab tswj nej tej siab tawm ntawm txhua yam uas tsis zoo; thiab yog nej yuav tswj nej tej siab tawm ntawm txhua yam uas tsis zoo, thiab hlub Vajtswv tag nej siab, nej ntsws thiab nej dag nej zog, ces … nej yuav raug ua kom zoo tshaj plaws nyob hauv Khetos.”24

Nrog kev siab hlub, kuv hais kuv zaj lus thov Vajtswv, kuv zaj lus tim khawv, thiab kuv txoj kev foom koob hmoov rau nej los ntawm Yexus Khetos lub npe dawb huv, amees.