Lwen Sahpuht In sie Lwen Muhtahl

Tamuhlwel ac tahmtahel sacohk, lwen luo ke toeni inge sie ma wolacna. Kuht ahkkweyeyuck ke on moklweyuck ac pruhe kahto uh. Nguhnasr fokokoi ke pweng kahlwem ac pwacye uh. Ke Istuh in Sacnri se inge, kuht sifilpac tuhkweni ac pwacyena kuloh nuh sin God ke sie mwet pahluh!

Kihsen siyuck nuh sesr kais sie uh pa: ke srihpen ma nga lohng ac puhla ke toeni se inge, nga ac eklac fuhkah? Oacna sie top lom kac an, nga oacyacpac suli kom in liye puhla lom ke, ac mukwikwi lom ke, lwen Sahpuht uh.

Nga usrnguckkihn kahs lal Isaiah, suc pahngon Sahpuht uh “sie len mutal.”¹Tuh nga nuhnkuh, yac Sahpuht uh pwacyena sie lwen muhtahl nuh sum ac nuh sihk?

Nga sokwack pacl se emet lwen muhtahl ke Sahpuht uh yac pucspucs somlah ah ke, oacna sie mwet laslas kahfofo, Sahpuht uh eklac sie lwen in sifacna onwelah. Ke sahflahiyacn kais sie wik, pouk waek ke kalweni in oul ke sop, kof, ac puhras se. Nga enenuh pac sie monglac ke sie orekma toasr na upac. Sacnri el use sie monglac yohk enenuh.

Meac kalmeyac ke Mwet Lahngo El fahk lah “Len Sabbath orekla ke sripen mwet uh, ac tia mwet uh ke len Sabbath”?²Nga luhlahlfongi lah El kena kuht in etuh lah Sahpuht el mwe sang se Lal nuh sesr, use monglac pwacye liki ma upac ke moul lwen nuh kwewa ac pacl wowo nuh ke ahksasucyeyacn nguhn ac mahno. God El use nuh sesr lwen yohk srihpac se inge, tiac nuh ke mwe ahkpwacr kuh orekma lwen nuh kwewa tuh nuh ke sie monglac liki kunohkohn, wi monglac ke mahno ac nguhn.

Ke kahs Hebrew, kahs Sahpuht kalmeyac pa “monglac.” Srihpac luhn lwen Sahpuht oasr ke Oreklac luhn facluh, ke tukun lwen ohnkohsr ke orekma, Leum El monglac liki orekma in oraclah uh.³Ke El fahkwack tok Masap Singucul ah nuh sel Moses, God El sapkihn tuh kuht in “esamya len Sabbath, in ahkmutalye.”⁴Tok, Sahpuht uh ahkfuhlwactyeyuck oacna sie mwe acsmakihn ke fihlfihllac luhn mwet Israel liki srohoh lalos fin acn Egypt.⁵Sahp ma yohk srihpac emet, Sahpuht utuckuh oacna sie olweacng ne tok, sie mwe acsmakihn kalweniyuck lah Leum El fah ahkmuhtahlye mwet Lal.⁶

In weacng, kuht ingena ipeis ke kuhfa luhn Leum ke lwen Sahpuht in esamyac ke Iwaclah luhn Jisus Kraist.⁷Ke ohinge, kuht olwelah lah kuht kena in eis nuh facsr ine muhtahl Lal.⁸

Mwet Lahngo El Ahkkahlwemyacl Sifacna oacna Leum luhn Sahpuht.⁹Pa lwen Lal! Kalweni, El siyuck sesr in karuhnganwacng Sahpuht¹⁰kuh in ahkmuhtahlye lwen Sahpuht.¹¹Kuht oraclah sie olwelah lah kuht fah oruh oacna.

Kuht ac ahkmuhtahlye fuhkah lwen Sahpuht? Ke nga fuhsr ah, nga lutlutkihn orekma luhn mwet sahyac suc oracni tahk ke ma in oruh ac ma in tiac oruh ke Sahpuht. Tiac sikyak nuh ke tok ke nga lotwelah ke ma suhmuhslah uh lah mukwikwi luhk ac ohiyuck ke Sahpuht el sie sain inmahsrlok ac Pahpah tuhmuhk Lucng.¹²Ke etwacack se ingacn, nga tiac sifil enenuh tahk ke ma in oruh kuh tiac uh. Ke nga enenuh in oraclah sie sulaclah fin sie mukwikwi fal kuh tiac nuh ke Sahpuht, ngwac fihsrwacsr in sifacna siyuck, “Meac sain nga kena in sang nuh sin God uh?” Siyuck soko ingacn oraclah sulaclah luhk ke lwen Sahpuht uh arlac kahlwem.

Finne mwe luti ke lwen Sahpuht uh ma na emet me, sifilpac ahksasucyeyucklac ke lwen sahflah inge oacna ip ke sie olwelah sasuc ke sie wuhlweacng. Leum El use sie masap ma:

In kuh in sifacna karihngihn kuhtyang sifacna in nwacsnwacs liki facluh, kuht enenuh in som nuh in lohm in pruhe ac in sang kuhfa lasr ke lwen muhtahl Lal;

Sahpuht el sie lwen akwucki nuh sesr in monglac liki orekma lasr uh, ac in sang kwacfweacng lasr nuh sin El Suc Fuhlwactlacna.  …

Ac ke lwen se inge, kuht enenuh in ahkoelah mongo nwacsr ke lohacng yohk in muh lalo lasr kuh in suwohs ac engan lasr in sesseslah. …

Ac ke luhpah ma kuht oruh ma inge ke sang kuloh, ke pwacr ac sie puhla engan, … kuht fah eis mwe insewowo luhn facluh.”¹³

Nuhnkuh ke luhpan wolacnaiyacn pohloh fahk se ingacn! Mwe insewowo luhn facluh uliyuckme nuh sin mwet suc karuhnganwacng lwen Sahpuht in muhtahl.¹⁴ Pa sis Isaiah el pahngon Sahpuht “sie len mutal” uh.

Kom ac kuh in liye ahkwoyac lah mukwikwi lom ke Sahpuht uh fah oruh kom puhla pwacr ac in engan fuhkah? In weacng som nuh ke alu lom an, ipeis kuhfa luhn Leum, ac in oaru ke kunohkohn lom in kuhlwacnsap, meac mukwikwi sahyac kuh in kahsruh oruh Sahpuht sie lwen muhtahl nuh sum? Meac sain kom fah sang nuh sin Leum in ahkkahlwemye luhngse lom nuh Sel uh?

Sahpuht uh use sie pacl wo wolacna in ahkkweye kuhpahsr luhn sucu. Pwacyena lah, God El kena kais sie sesr, suc pa tuhlihk Nahtuhl, in fohlohk nuh Yohrohl oacna Mwet Luhlahlfongi eis mwe insewowo, siliyucki lun tempuhl oacna sucu, siliyucki nuh sin mwet somlah lasr, ac nuh sin fihl lasr.¹⁵

Kuht oruh Sahpuht sie lwen muhtahl ke kuht luti wosasuc nuh sin tuhlihk nahtuhsr uh. Ma kunacsr oacna pahpah ninac uh kahlwem na pwacye. Leum El fahk lah ke pahpah ninac suc oasr tuhlihk nahtuh in Zion, lah ma koluk uh fah ituckyang nuh fin pahpah ninac uh fin elos tiacnaluti tuhlihk nahtuhlos in etuh ke mwe luti ke auliyak, luhlahlfongi ke Kraist Wen nuhtin God moul, pacptais, ac mwe sang luhn Nguhn Muhtahl ke fihliyac luhn paho ke pacl se tuhlihk ingacn matwac yac alkosr uh.”¹⁶

Yac somlah ah Prestuhnsi Se Met ahkyohkye yohk srihpaciyacn pacl in tuhkweni luhn sucu uh. Elos suhmuhslah:

“Kuht ngihsre pahpah ninac an in sang kuhiyaclos nohfohn nuh ke luti ac tuhfahlah luhn tuhlihk nahtuhlos ke ip yohk ke wosasuc uh ma fah liyaclosyang fototo nuh ke Alu uh. Lohm uh pa yohk srihpac ke sie moul suwohswohs, ac wacngihn ma kuh in ahollah kuh ahkfalye mukwikwi yohk srihpac la in ahkfalye kunohkohn utuckuh sin God in luti ac tuhfahlah tuhlihk uh.

“Kuht kwacfe pahpah ninac ac tuhlihk uh in sang ma yohk srihpac emet nuh ke pruhe in sucu, ekuh in toeni luhn sucu, lutlut ac kolyuck ke wosasuc, ac tuhkweni mukwikwi luhn sucu uh. Finne fuhkah suwohs ac faliyen enenuh ac mukwikwi sahyac uh ac oruh, elos tiac enenuh in lwelah in ahollah kunohkohn pakpucki wolacna ma pahpah ninac ac sucu uh muhkwena kuh in oruh fal uh.”¹⁷

Ke nga motko kahs in kahsruh se inge, nga kwacna finsrakkihn ngan sifil sie pahpah fuhsr. Ingena pahpah ninac uh oasr kahsruh na wolacna la in kahsrwelos oraclah pacl luhn sucu in yohk kalmeyac, ke Sahpuht ac lwen sahyac uh pac. Oasr lalos LDS.org, Mormon.org, petsac ke Pwacpuhl, Mormon Channel, Media Library, Friend,New Era,Ensign,Liahona, ac kuhtuh pac—ma puhs sahyac. Kahsruh inge kahsruh mwe kahsruh na pwacye nuh sin pahpah ninac ke ahkfalye kunohkohn muhtahl lalos in luti tuhlihk nahtuhlos. Wacngihn orekma sahyac yohk liki in pahpah ninac suwohswohs ac luhngse!

Ke kom luti wosasuc uh, kom fah lotwelah yohk. Pa inge inkacnek luhn Leum in kahsrwe kom in kahlwem ke wosasuc Lal. El fahk:

El use masap se nuh sesr lah kuht enenuh in luti sie sin sie mwe luti luhn tohkohsrahi.

El fahk lah kuht enenuh in oaru … , in luti kuht in muh kuh in kolyuck suwohs yohk ke mwe luti, lun masap ke wosasuc uh, ac ke ma kuhpahsr nuh kwewa nuh ke tohkohsrahi luhn God.”¹⁸

Kain lutlut ke wosasuc uh oraclah Sahpuht in sie lwen muhtahl. Olwelah se inge kuhpahsr finne fuhkah luhpan sucu, oreyac, kuh acn oan we an.

In weacng ke pacl yurin sucu uh, kom kuh in puhlakihn lwen muhtahl pwacye ke Sahpuht ke oruh orekma mahtuh luhn sucu uh. Suk kac ac sokwack mwet ke sucu suc som liki facluh uh—elos suc wacngihn pacl wowo la in eis wosasuc uh ke muhta inge ah—kuh in us engan yohk.

Nga mwet lohoh ke ma inge. Yac pucspucs somlah ah, muhtwacn sacohk kiyuck Wendy el sulaclah in lotwelah ohiyac in oruh suk ke ma mahtuh luhn sucu uh. Oraclah wo lal pacl se emet an suhmuhi, tuh kahkahsrihk na el lotwelah ohiyac fihsrwacsr in oruh orekma muhtahl se inge. Ac nga tuhfahna liyacl in engan na pwacye. Kom tiac pac enenuh in forfor nuh muhtuhnfacl sahyac uh kuh finne nuh ke sie family history center. E lohm ah, ke kahsruh luhn computer kuh mobile device an, kom kuh in sokwack nguhna suc kena nuh ke akwuck lalos an. Oraclah Sahpuht in sie lwen muhtahl ke sokwack mwet mahtuh lom an ac ahksukohsohkyacloslac liki nien kaul luhn nguhn uh!¹⁹

Oruh Sahpuht in sie lwen muhtahl ke sang kuhlwacnsap nuh sin mwet sahyac uh, yohkna mwet suc tiacna puhla wo kuh mwet suc muhkahimtacl kuh enenuh.²⁰In kahsrwelos puhla wo liki met ah fah kahsrwe kom in puhla wo pac.

Ke Isaiah el ahkuhtweyac Sahpuht oacna “sie len mutal,” el oacyacpac luti kuht ohiyac in oruh in engankihnyuck.

“Kowos fin oru len Sabbath in sie len mutal, ac tiac ukwe lungse lowos sifacna ke len sac; kowos fin saokkin len mutal luk, ac akfulatye ke kowos tia fufahsryesr loes, ku orekma, ac tia fahk kas lusrongten ke len sac:

“Na kowos ac fah pulakin insewowo.”²¹

Tiac ukwe “kena sifacna” lom ke Sahpuht enenuh sifac kaiyuck. Kom ac enenuh in kahingkihn in oruh kuhtuh ma kom luhngse uh. Kom fin sulwaclah in ahkmuhtahlye kom sifacna in Leum kom fah tiac fihlikomyang sifacna in oruh lwen sacn oacna lwen sahyac uh. Mukwikwi ac kahfofo lwen nuh kwewa kuh in oreklac kuhtuh pacl sahyac uh.

Nuhnkuh ke ma inge: Ke moli sie tahfuh singucul, kuht fohlohkohnlah sie sin singucul ke ma kuht eis nuh sin Leum. Ke liyacacng Sahpuht in muhtahl, kuht sefiyac lwen se ahk itkohsr Lal. Na oruh pacl wo se lasr in ahkmuhtahlye kwewana mani ac pacl nuh Sel suc use nuh sesr moul kais sie lwen uh.²²

Luhlahlfongi ke God kol nuh ke sie luhngse ke Sahpuht; luhlahlfongi ke Sahpuht kol sie luhngse nuh sin God. Sie Sahpuht muhtahl pwacyena pa sie lwen muhtahl.

Ingena, ke toeni se inge apkuhran in tari uh, kuht etuh lah acn nuh kwewa kuht muhta we kuht enenuh in pa srihkasrak luhn mwet luhlahlfongi inmahsrlon sucu, mwet tuhlan, ac kawuck lasr uh.²³Mwet luhlahlfongi pwacye uh liyacacng lwen Sahpuht uh muhtahl.

Nga ahksahfye sramsram se luhk inge ke nguhsr sahflah lal Moroni el oraclah ke sahflahiyacn Puk luhn Mormon ah. El suhmuhslah, “Tuhkuh nuh yurun Kraist, ac ahksuwohsyeyucklac Kacl, ac lahfwekihn kowos sifacna ke ma koluk nuhkwewa; ac kowos fin lahfwekihn kowos sifacna ke ma koluk nuhkwewa, ac luhngse God ke insiowos, nuhnak lowos ac kuhiyowos nohfohn, na luhng kuhlwacng Lal ac fal wo nuh suwos, tuh ke luhng kuhlwacng Lal kowos kuh in ahksuwohsyeyucklac ke Kraist.”²⁴

Ke puhla loal ke luhngse, nga ahksahfye sramsram se inge, suc pa mwe pruhe, fahkwack luhlahlfongi, ac insewowo luhk ke ine muhtahl luhn Jisus Kraist, amen.