Gani Gintapna Nila ang Ila Mga Kahadlok
Ni Elder David A. Bednar
Sang Korum sang Napulogduha ka mga Apostoles
Walay sapayan nga ang kalibutanhon nga kahadlok nagatuga sang pagkakugmat kag kabalaka, ang diyosnon nga kahadlok amó ang ginahalinan sang paghidaet, kapat-uran, kag pagsalig.
Maathag ko nga nadumduman ang akon eksperiyensya sang ako batà pa nga gamay. Sang isa ka adlaw samtang ako nagahampang upód sa akon mga abyan, nabuka ko sing indi hungod ang bintana sang isa ka tiyendahan malapit sa amon balay. Samtang ang salamin nagkalarugmok kag ang alarm nagasigabong, nadulaan ako sang kusog sa daku nga kahadlok. Ginbabanà-banà ko nga ako pat-od nga mabilanggo sa nabilin ko nga kinabuhi. Sa ulihi ginkombinsi ako sang akon ginikanan nga maggwa sa idalom sang akon katre nga akon ginpanaguan kag ginbuligan ako nga bayaran ang tag-iya sang tiyangge. Masuwerte nga ang pamatbat nga ako prisuhon indi nadayón.
Ang kahadlok nga ginbatyag ko sinang adlaw sobra gid kag tunay. Walay pangduhaduha nga kamo nakaeksperyensya sang mas daku nga kahadlok matapos kamo makahibalo sang isa ka personal nga problema tuhoy sa inyo ikaayong lawas, mahibal-an nga isa ka katapo sang inyo panimalay yara sa kabudlay ukon katalagman, ukon kamo nakahat-om sang makatulublag nga mga hitabo sa kalibutan. Sa sinang mga kahimtangan, ang kahadlok nagatublag sa inyo bangud sa ginapaabot nga katalagman, walay kapat-uran, ukon kasakit kag mga eksperiyensya nga indi ginapaabot, kon kaisa hinali lang, kag basi magdala sang indi maayo nga mga palaabuton.
Sa adlaw-adlaw nga pagkinabuhi, ang walay katapusan nga mga report sang mapintas nga kasal-anan, gutom, mga inaway, pagkawalay katamparan, makakulugmat nga pagpahadlok, nagapaidalom nga mga prinsipyo, mga balatian, kag makalaglag nga mga puwersa sang kalibutan makahatag sang kahadlok kag kabalaka. Segurado nga kita nagakabuhi sa panahon nga ginpanagna sang Ginuo:”Kag sa sina nga adlaw … ang bilog nga kalibutan magkalagamo, kag ang mga tagipusuon sang katawhan indi magmadinalag-on” (D&C 45:26).
Ang akon tuyò sa pagsaysay kon paano ang kahadlok dulaon paagi sa tama nga kaalam nga natumod kay kag pagtuo kay JesuCristo. Tudok ako nga nagapangamuyo nga ang Balaan nga Espiritu magbugay sa aton sa pagbinagbinag sining importante nga katuyuan.
Ang Kalibutanhon nga Kahadlok
Sang ila pagkabati sang tingog sang Diyos pagkatapos nga makaon nila ang ginadumilian nga bunga’ngkahoy, si Adan kag si Eba nagpanago sa Hardin sang Eden. Ang Diyos nagpanawag kay Adan kag nagpamangkot:”Sa diin ka balá?” Kag [si Adan nagsabat], Nabatian ko ang imo tingog… , kag nahadlok ako” (Genesis 3:9–10). Maathag, nga ang isa sa mga kaabtanan sining Pagkalaglag amó nga si Adan kag si Eba makaeksperyensya sang kahadlok. Ining mabaskog nga balatyagon isa ka importante nga elemento sang aton dutan-on nga kinabuhi.
Ang isa ka ehemplo gikan sa Libro ni Mormon nagapaibabaw sa tanan sang gahum sa pagkahibalo sa Ginuo (tan-awa ang 2 Peter 1:2–8; Alma 23:5–6) amó ang nagakakas sang kahadlok kag nagahatag sang paghidaet bisan pa nga kita nagaatubang sang daku nga kalisdanan.
Sa lugar sang Helam, ang katawhan ni Alma nagkahadlok sa pagsulong sang armi sang mga Lamanite.
”Apang naggwa si Alma kag nagtindog sa tunga nila kag ginlaygayan sila nga indi sila dapat magkahadlok, kundi … nga dapat nila dumdumon ang Ginuo nga ila Dios kag pagaluwason niya sila.
”Gani gintapna nila ang ila mga kahadlok” (Mosiah 23:27–28).
Talupangdi ninyo nga si Alma indi nagtapna sang kahadlok sang mga tawo. Sa tigaylo, si Alma naglaygay sa mga sumulunod nga sila magdumdom nga ang Ginuo lang ang makaluwas sa ila (tan-awa ang 2 Nephi 2:8). Kag ang ihibalo sang pangluwas nga pagbantay sang Manluluwas nagpatapna sang ila mismo mga kahadlok.
Ang husto nga ihibalo sang kag ang pagtuo sa Ginuo nagahatag sang gahum sa pagtapna sang aton mga kahadlok bangud si JesuCristo amó lang ang ginahalinan sang nagapadayon nga paghidaet. Siya nagbantala, ”Magtuon kamo sa akon, kag magpamati sa akon mga pulong; maglakat kamo sa pagkamainubuson sang akon Espiritu, kag kamo makaangkon sang paghidaet” (D&C 19:23).
Ang Manunudlo nagpaathag man, ”Ang sin-o man nga nagahimo sang hilimuon sang pagkamatarong magabaton sang iya padya, bisan pa ang paghidaet sa sining kalibutan, kag sa walay katapusan nga kalibutan nga magaabot” (D&C 59:23).
Ang pagsalig kag pagtuo kay Cristo kag ang handa nga pagsandig sa Iya mga kaayo, kaluoy, kag grasya nagahatag sang paglaum paagi sa Iya Pagpasag-uli, sa Pagkabanhaw kag walay katapusan nga kabuhi (tan-awa ang Moroni 7:41). Inang sari sang pagtuo kag paglaum nagadala sa aton mga kabuhi sang matam-is nga paghidaet sang konsiyensya nga aton tanan ginahandum. Ang gahum sang Pagpasag-uli makapahinulsol kag makatapna sang pagkawalay paglaum bangud sa salâ; Ini nagapabakod man sa aton nga makakita, maghimo, kag mangin maayo sa mga paagi nga indi gid naton mahangpan ukon matuman sa aton lang dutan-on nga ikasarang. Sa kamatuoran, isa sa pinakadaku nga mga bugay sang matutom nga pagkasumulunod amó ang ”paghidaet sang Diyos, nga indi matungkad sa paghangop sang tawo” (Philippians 4:7).
Ang paghidaet nga ginahatag ni Cristo nagapatulok sa aton sa mortalidad nga isa ka walay katapusan nga kahimtangan kag nagadulot sang isa ka espirituhanon nga kalig-on (tan-awa ang Colossians 1:23) nga nagabulig sa aton sa pagpadayon sa wala nagabaylo nga pagtumod sa aton langitnon nga padulungan. Gani, mabugayan kita sa pagtapna sang aton mga kahadlok bangud ang Iya doktrina nagahatag sang katuyuan kag giya sa tanan nga bahin sang aton mga kabuhi. Ang Iya mga ordinansa kag mga kasugtanan nagapalig-on kag nagapaumpaw sa mga tion sang kaayuhan kag amó man sa kalautan. Ang Iya awtoridad sang priesthood nagahatag sang kapat-uran nga ang mga bagay nga pinaka-importante magapadayon sa sining tion kag amó man sa walay katapusan nga kinabuhi.
Pero makatapna ayhan kita sang aton mga kahadlok nga madali kag masunson nga nagatublag sa aton sa sining kinabuhi sa kalibutan? Ang sabat sa sining pamangkot indi gid masal-an nga huo. Tatlo ka panguna nga mga prinsipyo ang sentro sa pagbaton sining bugay sa aton mga kabuhi: (1) magtulok kay Cristo, (2) magpasad sang sadsaran kay Cristo, kag (3) magdutdot pasulong nga may pagtuo kay Cristo.
Magtulok kay Cristo
Ang laygay nga ginhatag ni Alma sa iya anak nga si Helaman madapat sing walay sayop sa tagsa sa aton subong nga panahon: ”Huo, pat-ura nga nagatulok ka sa Dios kag mabuhi” (Alma 37:47). Dapat kita magtulok kag magtumod sing malig-on sa Manluluwas sa tanan nga mga tion kag sa tanan nga mga lugar.
Dumduma ninyo kon daw ano ang mga apostoles sang Ginuo nga yara sa sakayan, nga ginabulubalinsay sang mga balud. Si Jesus nagpalapit sa ila, naglakat sa ibabaw sang tubig; pero indi nila Siya nakilala, sila nagsinggit sa kahadlok.
”Si Jesus nagsiling sa ila, Magpakaisog kamo; Ako ini; Indi kamo magkahadlok.
”Kag si Pedro nagsabat kag nagsiling, Ginuo, kon ikaw ina, pakadtua ako sa imo nga nagalakat sa ibabaw sang tubig.
”Kag siya nagsiling, Kari ka” (Matthew 14:27–29).
Gani si Pedro naglakat sa tubig pakadto kay Jesus.
”Apang sang iya matalupangdan nga ang hangin mabaskog, siya hinadlukan,” amat-amat nga naglugdang sa tubig, kag nagsinggit siya, ”Ginuo, luwasa ako.
”Sa gilayon gindawhat siya ni Jesus, kag gin-uyatan siya, kag nagsiling sa iya, Ah, kadiutay sang imo pagtuo, ngaa balá nagapangduhaduha ka?” (Matthew 14:30–31).
Makita ko si Pedro nga maisog kag gilayon nga nagsabat sa pag-imbita sang Manluluwas. Upod sang iya mga mata nga natumod kay Jesus, siya nagpanaog sa sakayan kag milagroso nga naglakat sa ibabaw sang tubig. Ugaling lang sang ang iya panulok nabalhin sa hangin kag sa mga balud nga siya nagkahadlok kag amat-amat nga naglugdang.
Kita bugayan nga magdaug sang aton mga kahadlok kag magpalig-on sang aton mga pagtuo samtang kita nagatuman sa mga panudlo sang Ginuo: ”Magtulok kamo sa akon sa tanan ninyo nga hunahuna; indi kamo magduhaduha, indi kamo magkahadlok” (D&C 6:36).
Magpasad sang Sadsaran kay Cristo
Si Helaman nagbadlong sa iya mga anak nga si Nephi kag Lehi: ”Dumduma, dumduma nga sa bató sang aton Manunubos nga amo si Cristo, ang Anak sang Dios, nga kamo kinahanglan gid nga magpasad sang inyo sadsaran; agud nga kon ang yawa magapadala sang iya mamadlos nga mga hangin, huo, sang iya mga baslay sa buhawi huo, kon ang tanan niya nga bato nga hielo kag ang iya mabaskog nga dalimuos magatupa sa inyo, mangin wala ini sing gahum sa pagpangibabaw sa inyo sa pagguyod sa inyo paidalom sa kadadalman sang kapiutan kag nagapadayon nga kasubo, tungod sang bato nga sa diin kamo napasad, nga amo ang isa ka pat-od nga sadsaran, isa ka sadsaran nga kon diin ang mga tawo mapasad indi sila mahulog” (Helaman 5:12).
Ang mga ordinansa kag mga kasugtanan amó ang pampasad nga mga tisa sa pagtukod sang aton mga kabuhi sa sadsaran Cristo kag sang Iya Pagpasag-uli. Kita mapag-on nga ginaugyon sa Manluluwas kag sa Iya samtang kita takos nga nagabaton sang mga ordinansa kag magsulod sa mga kasugtanan, himpit nga magdumdom kag magpadungog sa yadtong sagrado nga mga buluhaton, kag magkabuhi sa aton pinakamaayo nga ikasarang suno sa mga obligasyon nga aton ginbaton. Kag inang pag-ugyon amó ang ginahalinan sang espirituhanon nga kabakod kag kalig-unan sa tanan nga panahon sang aton mga kabuhi.
Kita ginabugayan nga magtapna sang aton mga kahadlok samtang kita nagapasad sang aton mga handom kag mga buluhaton sa sadsaran sang Manluluwas paagi sa aton mga ordinansa kag mga kasugtanan.
Magdutdot Pasulong nga may Pagtuo kay Cristo
Si Nephi nagpahayag: ”Gani kinahanglan gid nga magdutdot kamo pasulong upod ang isa ka kalig-on kay Cristo, nga may isa ka himpit nga kasanagan sang paglaum, kag isa ka gugma sang Dios kag sang tanan nga mga tawo. Gani, kon magdutdot kamo pasulong, nga nagapaayaw sa pulong ni Cristo, kag magapadayon tubtob sa katapusan, yari karon, amo ini ang ginasiling sang Amay: Inyo maangkon ang kabuhi nga wala’y katapusan” (2 Nephi 31:20).
Ang may disiplina nga pagpadayon nga ginalarawan sa sining bersikulo amó ang resulta sang espirituhanon nga paghangop kag panan-awon, kaukod, pagkapasensyahon, kag grasya sang Diyos. Ang pagkabuhi suno sa pagtuo kay kag sa ngalan ni Jesu Cristo, mapainubuson nga pagsunod saIya kabubut-on kag husto nga panahon sa aton mga kabuhi, kag mapainubuson nga pagkilala sang Iya pagbulig sa aton sa tanan nga mga butang nagahatag sang mahidaeton nga mga butang sa ginharian sang Diyos nga nagadala sang kalipay kag kabuhi nga walay katapusan (tan-awa ang D&C 42:61). Bisan pa nga kita makasugata sang mga walay kaseguruhan sang palaabuton, malipayon kita nga mag-antus kag magkabuhi sang isa ka ”mahidaeton nga kabuhi sa pagkadiyosnon kag may katampad” (1 Timothy 2:2).
Kita bugayan nga magtapna ang aton mga kahadlok samtang kita nagabaton sang kaisog nga halin sa pagtuon kag pagtuman sang mga prinsipyo sang ebanghelyo kag pat-od nga pagdutdot pasulong sa dalan sang kasugtanan.
Ang Kahadlok sa Ginuo
Laín man apang nagaugyon sa mga kahadlok nga masami naton maagyan amó ang ginasaysay sa balaan nga mga kasulatan nga ”diyosnon nga kahadlok” (Hebrews 12:28) ukon ”ang kahadlok sa Ginuo” (Job 28:28; Proverbs 16:6; Isaiah 11:2–3). Walay sapayan nga ang kalibutanhon nga kahadlok nagatuga sang pagkakugmat, kag kabalaka,, ang diyosnon nga kahadlok amó ang ginahalinan sang paghidaet, kapat-uran, kag pagsalig.
Pero paano balá ang isa ka butang nga nakaapid sa kahadlok mangin maayo ukon espirituhanon nga makabulig?
Ang matarong nga kahadlok nga akon diri ginausoy nagalakip sang madalom nga balatyagon sang pagtahod, pagtaha, kag paghangad para sa Ginuong JesuCristo (tan-awa ang Psalm 33:8; 96:4), pagtuman sa Iya mga kasuguan (tan-awa ang Deuteronomy 5:29; 8:6; 10:12; 13:4; Psalm 112:1), kag ang pagpaabot sang Katapusan nga Paghukom kag paghusgar sa Iya mga kamot. Gani, ang diyosnon nga kahadlok nagatubo halin sa husto nga paghangop sang balaan nga pagkatawo kag misyon sang Ginuong Jesu Cristo, ang pagbuot nga magtugyan sang aton kabubut-on sa Iya, kag sa ihibalo nga ang tagsa ka lalaki kag babaye magasabat sang iya mismo mga kasayupan sa Adlaw sang Paghukom (tan-awa ang D&C 101:78; Articles of Faith 1:2).
Sa pagpamatuod sang balaan nga mga kasulatan, ang diyosnon nga kahadlok ”amó ang ginasusguran sang kaalam” (Proverbs 1:7), ”ang pagtulun-an sang kaalam”(Proverbs 15:33), isa ka ”malig-on nga pagsalig” (Proverbs 14:26), kag “isa ka tuburan sang kabuhi” (Proverbs 14:27).
Kabay nga matalupangdan ninyo nga ang diyosnon nga kahadlok naugyon kag indi maseparar sa paghangop sang Katapusan nga Paghukom kag aton personal nga pagpanabat sa aton mga huyog, mga hunahuna, mga pulong, kag mga buhat (tan-awa ang Mosiah 4:30). Ang kahadlok sa Ginuo indi isa ka indi pagbuót nga kabalaka sa pag-atubang sa Iya para pagahukman. Indi ako nagapati nga mahadlok gid kita sa Iya. Sa tigaylo, ini amó ang pagpaabot sang tion nga mag-atubang sa Iya kag makit-an naton ang mga butang nahanungod sa aton kag may yara kita nga ”himpit nga ihibalo” (2 Nephi 9:14; tan-awa man ang Alma 11:43) sang tanan nga mga pagpanginrason, mga pagpakunokuno, kag mga pagkalimbong sa kaugalingon. Sa hingapusan, walâ kita sang bisan ano nga pamalibad.
Ang tagsa ka tawo nga bisan san-o nagkabuhi kag magkabuhi pa sa ibabaw sang kalibutan ”pagadalhon sa pagtindog sa atubang sang hukmanan sang Dios, agud hukman siya suno sa [iya] mga binuhatan kon ang mga ini maayo ukon ang mga ini malain” (Mosiah 16:10). Kon ang aton mga huyog makatarungan kag ang aton mga buhat maayo, gani ang hukmanan sang Diyos makapahamuot sa aton (tan-awa ang Jacob 6:13; Enos 1:27; Moroni 10:34). Kag sa katapusan nga adlaw kita ”pagapadyaan sang kinamatarong”(Alma 41:6).
Sa tigaylo, kon ang aton mga luyag malain kag ang aton mga buhat malaut, gani ang hukmanan sang Diyos magahatag sang kahadlok. ”Indi kita magpangahas sa pagtulok paibabaw sa aton Dios; kag mangin malipayon kita kon masugo naton ang mga bató kag ang mga bukid nga matiphag sa aton sa pagtago sa aton gikan sa iya atubang” (Alma 12:14). Kag sa katapusan nga adlaw ”maangkon naton ang [aton] padya nga malain” (Alma 41:5).
Sa malip-ot nga pagsaysay sa Ecclesiastes:
”Magkahadlok kamo sa Diyos, kag magtuman sang iya kasuguan: kay amó ini ang kabilogan nga katungdanan sang tawo.
”Kay ang Diyos magadala sang tagsa ka buhat sa hukmanan, upód sang tagsa ka gintago nga butang, kon balá ini maayo ukon balá ini malain” (Ecclesiastes 12:13–14).
Pinalangga ko nga mga kaututran, ang diyosnon nga kahadlok nagadula sang dutan-on nga mga kahadlok. Nagakuha man ini sang ginahunahuna nga kabalaka nga indi gid kita sarang nga mangin espirituhanon nga maayo kag indi gid kita mangin bastante nga takos ukon makapangibabaw kon kita nagasalig lang sa aton abilidad kag binuhatan. Ang aton mga buhat kag mga luyag lang indi sarang makaluwas kag indi magluwas sa aton. ”Pagkatapos sang tanan nga aton mahimo” (2 Nephi 25:23), kita ginapahimpit paagi lang sa kaluoy kag grasya nga ginahatag paagi sa indi matumbasan kag walay katapusan nga halad sang pagpasag-uli sang Manluluwas (tan-awa ang Alma 34:10, 14). Sa kapat-uran, ”Kita nagatuo nga paagi sa Pagpasag-uli ni Cristo, ang tanan nga katawhan maluwas, paagi sa pagtuman sang mga layi kag mga ordinansa sang ebanghelyo” (Mga Artikulo sang Pagtuo 1:3).
Ang diyosnon nga kahadlok amó ang paghigugma kag pagsalig sa Iya. Samtang kita nagakahadlok sing lubos sa Diyos, nagahigugma kita sa Iya sing mas himpit. Kag ”ang himpit nga gugma nagatabog sang tanan nga kahadlok” (Moroni 8:16). Nagasaad ako nga ang masanag nga kapawa sang diyosnon nga kahadlok magtabog sang madulom nga mga landong sang dutan-on nga mga kahadlok (tan-awa ang D&C 50:25) samtang kita nagatulok sa Manluluwas, nagapasad sang aton sadsaran sa Iya, kag nagadutdot pasulong kita sa dalan sang Iya kasugtanan upód sang ginapakabalaan nga pagtuman.
Pagpamatuod kag Panaad
Ginahigugma ko kag ginatahod ang Ginuo. Ang Iya gahum kag paghidaet tunay. Siya ang aton Manunubos, kag nagapamatuod ako nga Siya buhi. Kag bangud sa Iya, ang aton mga tagipusuon dapat nga indi kita matublag ukon mahadlok (tan-awa ang John 14:27), kag kita mabugayan sa pagtapna sang aton mga kahadlok. Ako nagapamatuod gid sa balaan nga ngalan ni Ginuong JesuCristo, amen.