ອານາຈັກຂອງພຣະອົງຕັ້ງຢູ່
ໂດຍ ແອວເດີ ນຽວ ແອວ ແອນເດີເຊັນ
ແຫ່ງກຸ່ມອັກຄະສາວົກສິບສອງ
ການໄດ້ເຫັນ ແລະ ການເຊື່ອສິ່ງມະຫັດສະຈັນຂອງພຣະຜູ້ເປັນເຈົ້າໃນການ ສະຖາປະນາສາດສະໜາຈັກຂອງພຣະອົງຂຶ້ນຢູ່ເທິງໂລກ ສາມາດຊ່ອຍເຮົາໃຫ້ເຫັນ ແລະ ເຊື່ອວ່າພຣະຫັດຂອງພຣະຜູ້ເປັນເຈົ້າມີອິດທິພົນໃນຊີວິດຂອງເຮົາເອງຄືກັນ.
ຕອນເຮົາຮ້ອງເພງ, ຂ້າພະເຈົ້າມີຄວາມປະທັບໃຈຫລາຍ ກັບຄວາມຄິດທີ່ວ່າ ໄພ່ພົນຂອງພຣະເຈົ້າເປັນຈຳນວນ ຫລາຍລ້ານຄົນ ຫລາຍກວ່າ 150 ປະເທດ, ແລະ ເວົ້າໃນ 75 ພາສາ,1 ຮ້ອງເພງສັນລະເສີນພຣະເຈົ້າ ນຳກັນທີ່ວ່າ:
ຈົ່ງມາເຖີດ ໂອ້ ຈອມກະສັດ!
ພວກຂ້ານ້ອຍລໍຄອຍພຣະອົງ,
ໃຫ້ປິ່ນປົວ ດ້ວຍຄວາມເມດຕາ,
ເພື່ອປົດປ່ອຍຜູ້ຄົນຂອງພຣະອົງ.2
“ຈົ່ງມາເຖີດ, ໂອ້ ຈອມກະສັດ!”3 ເຮົາເປັນຄອບຄົວໃຫຍ່ທົ່ວໂລກ ທີ່ເປັນຜູ້ເຊື່ອ, ເປັນສານຸສິດຂອງອົງພຣະເຢຊູຄຣິດເຈົ້າ.
ເຮົາໄດ້ຮັບເອົາພຣະນາມຂອງພຣະອົງ, ແລະ ແຕ່ລະອາທິດຂະນະທີ່ເຮົາຮັບສ່ວນສິນລະລຶກ, ເຮົາສັນຍາວ່າເຮົາຈະລະນຶກເຖິງພຣະອົງ ແລະ ຮັກສາພຣະບັນຍັດຂອງພຣະອົງ. ເຮົາຍັງໄກຈາກຄວາມດີພ້ອມທຸກຢ່າງ, ແຕ່ເຮົາເອົາຈິງເອົາຈັງກ່ຽວກັບຄວາມເຊື່ອຖືຂອງເຮົາ. ເຮົາເຊື່ອໃນພຣະອົງ. ເຮົານະມັດສະການພຣະອົງ. ເຮົາຕິດຕາມພຣະອົງ. ເຮົາຮັກພຣະອົງແທ້ໆ. ອຸດົມການຂອງພຣະອົງແມ່ນຍິ່ງໃຫຍ່ທີ່ສຸດໃນຕະຫລອດທົ່ວໂລກ.
ອ້າຍເອື້ອຍນ້ອງທັງຫລາຍ, ເຮົາມີຊີວິດຢູ່ໃນວັນເວລາກ່ອນການສະເດັດມາຄັ້ງທີສອງຂອງພຣະຜູ້ເປັນເຈົ້າ, ເວລາທີ່ຜູ້ຄົນທີ່ເຊື່ອໄດ້ຄາດຫວັງ ແລະ ລໍຖ້າຕະຫລອດມາໃນປະຫວັດສາດຂອງໂລກ. ເຮົາດຳລົງຊີວິດຢູ່ໃນວັນເວລາແຫ່ງສົງຄາມ ແລະ ຂ່າວລືເລື່ອງສົງຄາມ, ວັນເວລາແຫ່ງໄພທຳມະຊາດ, ວັນເວລາເມື່ອໂລກເຕັມໄປດ້ວຍຄວາມສັບສົນ ແລະ ຄວາມວຸ້ນວາຍ.
ແຕ່ເຮົາຍັງອາໄສຢູ່ໃນວັນເວລາແຫ່ງການຟື້ນຟູນຳອີກ, ເມື່ອພຣະກິດຕິຄຸນກຳລັງຖືກນຳອອກໄປປະກາດໃຫ້ແກ່ຊາວໂລກທັງປວງ—ເວລາເມື່ອພຣະຜູ້ເປັນເຈົ້າໄດ້ສັນຍາວ່າພຣະອົງຈະຍົກ … ຜູ້ຄົນທີ່ບໍລິສຸດຂຶ້ນ,4 ຜູ້ທີ່ພຣະອົງຈະໃຫ້ຖືອາວຸດດ້ວຍ “ຄວາມຊອບທຳ ພ້ອມກັບອຳນາດຂອງພຣະເຈົ້າ.”5
ເຮົາຊື່ນຊົມໃນທຸກວັນນີ້ ແລະ ອະທິຖານວ່າ ເຮົາຈະສາມາດປະເຊີນກັບບັນຫາ. ຄວາມຫຍຸ້ງຍາກບາງຢ່າງກໍໜັກໜ່ວງຫລາຍສຳລັບບາງຄົນ, ແຕ່ບໍ່ມີຄົນໃດຖືກຍົກເວັ້ນ. ແອວເດີ ນຽວ ເອ ແມັກສະແວວ ຄັ້ງໜຶ່ງໄດ້ສອນວ່າ, “ຖ້າຫາກທຸກສິ່ງດຳເນີນໄປດ້ວຍດີສຳລັບທ່ານໃນເວລານີ້, ຂໍໃຫ້ລໍຖ້າເບິ່ງຈັກໜ້ອຍ.”
ເຖິງແມ່ນວ່າພຣະຜູ້ເປັນເຈົ້າໄດ້ໃຫ້ຄວາມໝັ້ນໃຈແກ່ເຮົາເທື່ອແລ້ວເທື່ອອີກວ່າ ເຮົາບໍ່ຈຳເປັນຕ້ອງຢ້ານ,6 ແຕ່ການຮັກສາທັດສະນະທີ່ແຈ່ມແຈ້ງ ດ້ວຍຄວາມເຂົ້າໃຈໄກໄປກວ່າຊີວິດຂອງເຮົາຢູ່ເທິງໂລກມະຕະນີ້ ກໍບໍ່ງ່າຍສະເໝີໄປ ເມື່ອເຮົາຕົກຢູ່ໃນການທົດລອງ.
ປະທານທອມມັສ ແອັສ ມອນສັນ ໄດ້ສອນບົດຮຽນໜຶ່ງທີ່ສຳຄັນໃຫ້ຂ້າພະເຈົ້າ ກ່ຽວກັບການຮັກສາທັດສະນະນິລັນດອນ.
ເມື່ອສິບແປດປີກ່ອນ ຂະນະທີ່ເດີນທາງເທິງລົດໄຟໄປໃນປະເທດສະວິດກັບປະທານມັນສອນ, ຂ້າພະເຈົ້າໄດ້ຖາມເພິ່ນກ່ຽວກັບໜ້າທີ່ຮັບຜິດຊອບທີ່ສຳຄັນຂອງເພິ່ນ. ຄຳຕອບຂອງເພິ່ນໄດ້ເສີມສ້າງສັດທາຂອງຂ້າພະເຈົ້າ. “ໃນຝ່າຍປະທານສູງສຸດ,” ເພິ່ນກ່າວ, “ພວກເຮົາຈະເຮັດທຸກສິ່ງທີ່ພວກເຮົາສາມາດເຮັດໄດ້ ເພື່ອຊ່ອຍໃຫ້ວຽກງານນີ້ກ້າວໄປໜ້າ. ແຕ່ນີ້ແມ່ນວຽກງານຂອງພຣະຜູ້ເປັນເຈົ້າ, ແລະ ພຣະອົງຊີ້ນຳມັນ. ພຣະອົງເປັນຜູ້ຄວບຄຸມ. ເຮົາປະຫລາດໃຈຂະນະທີ່ເຮົາເບິ່ງພຣະອົງສ້າງໂອກາດ ທີ່ເຮົາບໍ່ສາມາດເຮັດໄດ້ ແລະ ເຮັດສິ່ງມະຫັດສະຈັນທີ່ເຮົາບໍ່ສາມາດເຮັດໄດ້.”7
ອ້າຍເອື້ອຍນ້ອງທັງຫລາຍ, ການໄດ້ເຫັນ ແລະ ການເຊື່ອສິ່ງມະຫັດສະຈັນຂອງພຣະຜູ້ເປັນເຈົ້າໃນການ ສະຖາປະນາສາດສະໜາຈັກຂອງພຣະອົງຂຶ້ນຢູ່ເທິງໂລກ ສາມາດຊ່ອຍເຮົາໃຫ້ເຫັນ ແລະ ເຊື່ອວ່າພຣະຫັດຂອງພຣະຜູ້ເປັນເຈົ້າມີອິດທິພົນໃນຊີວິດຂອງເຮົາເອງຄືກັນ.
ພຣະຜູ້ເປັນເຈົ້າໄດ້ປະກາດວ່າ, “ເຮົາສາມາດທຳງານຂອງເຮົາໄດ້.”8 ເຮົາແຕ່ລະຄົນພະຍາຍາມທີ່ຈະເຮັດພາກສ່ວນຂອງເຮົາ, ແຕ່ພຣະອົງເປັນພຣະຜູ້ສ້າງທຸກສິ່ງທັງປວງ. ພາຍໃຕ້ການຊີ້ນຳຂອງພຣະບິດາຂອງພຣະອົງ, ພຣະອົງໄດ້ສ້າງໂລກນີ້. “ພຣະເຈົ້າໄດ້ສ້າງທຸກສິ່ງຂຶ້ນມາໂດຍທາງພຣະທຳ; ໃນບັນດາສິ່ງທີ່ເປັນມານັ້ນ ບໍ່ມີສິ່ງໜຶ່ງສິ່ງໃດທີ່ເປັນມາໂດຍນອກຈາກພຣະທຳ.”9 ເມື່ອເຮົາຕື່ນຂຶ້ນ ແລະ ຮູ້ຕົວທາງວິນຍານ, ເຮົາຈະເຫັນອິດທິພົນຂອງພຣະອົງຕະຫລອດທົ່ວໂລກ ແລະ ເຮົາຈະເຫັນອິດທິພົນຂອງພຣະອົງໃນຊີວິດຂອງເຮົາເອງ.
ຂ້າພະເຈົ້າຂໍແບ່ງປັນຕົວຢ່າງໜຶ່ງ.
ໃນປີ 1831, ໂດຍທີ່ສາດສະໜາຈັກມີສະມາຊິກພຽງແຕ່ 600 ຄົນເທົ່ານັ້ນ, ພຣະຜູ້ເປັນເຈົ້າໄດ້ປະກາດວ່າ, ຂໍກະແຈແຫ່ງອຳນາດຂອງພຣະເຈົ້າໄດ້ຖືກມອບໃຫ້ແກ່ມະນຸດເທິງແຜ່ນດິນໂລກ, ແລະ ຈາກບ່ອນນັ້ນພຣະກິດຕິຄຸນຈະຂະຫຍາຍອອກໄປຈົນເຖິງທີ່ສຸດຂອງແຜ່ນດິນໂລກ, ຄືກັນກັບຫີນກ້ອນໜຶ່ງ ຊຶ່ງແຕກອອກມາເອງຈາກໜ້າຜາໂດຍບໍ່ມີໃຜເຮັດ ຈະກິ້ງອອກໄປຈົນເຕັມແຜ່ນດິນໂລກ.10
ສາດສະດານີໄຟໄດ້ເຫັນລ່ວງໜ້າ ເຖິງວັນເວລາຂອງເຮົາ ວ່າຈະມີສະມາຊິກຂອງສາດສະໜາຈັກ “ພຽງເລັກນ້ອຍ” ເມື່ອປຽບທຽບໃສ່ກັບພົນລະເມືອງຂອງແຜ່ນດິນໂລກ ແຕ່ວ່າເຂົາເຈົ້າຈະມີຢູ່ “ຕາມຜືນແຜ່ນດິນໂລກ.”11
ສາມຕົວຢ່າງທີ່ສວຍງາມຂອງພຣະຫັດຂອງພຣະຜູ້ເປັນເຈົ້າ ໃນການສະຖາປະນາ ອານາຈັກຂອງພຣະອົງ ຫາກໍໄດ້ຖືກປະກາດໂດຍ ປະທານມອນສັນ. ພຽງແຕ່ບໍ່ຫລາຍສິບປີຜ່ານມານີ້, ມີໃຜບໍທີ່ສາມາດວາດພາບໄດ້ວ່າ ພຣະວິຫານຈະຖືກສ້າງຂຶ້ນໃນປະເທດເຮຕີ້, ໃນປະເທດໄທ, ແລະ ໃນປະເທດໄອໂວຣີ ໂຄສ໌?
ສະຖານທີ່ຂອງພຣະວິຫານ ບໍ່ໄດ້ເປັນເລື່ອງງ່າຍທີ່ຈະພິຈາລະນາ. ມັນເປັນການເປີດເຜີຍ ຈາກພຣະຜູ້ເປັນເຈົ້າ ຕໍ່ສາດສະດາຂອງພຣະອົງ, ເປັນວຽກງານທີ່ສຳຄັນຫລາຍ, ເປັນການຮັບຮູ້ເຖິງຄວາມຊື່ສັດຂອງໄພ່ພົນຂອງພຣະເຈົ້າ ຜູ້ໄດ້ທະນຸຖະໜອມ ແລະ ດູແລບ້ານຂອງພຣະອົງ ຕະຫລອດຫລາຍລຸ້ນຄົນ.12
ແຄຕີ້, ພັນລະຍາ ແລະ ຂ້າພະເຈົ້າໄດ້ໄປຢ້ຽມຢາມປະເທດເຮຕີ້ເມື່ອສອງປີຜ່ານມານີ້. ຢູ່ເທິງຈອມພູທີ່ຫລຽວເຫັນເມືອງໂພດ-ໂອ-ພຣິນສ໌, ພວກເຮົາໄດ້ເຂົ້າຮ່ວມກັບໄພ່ພົນຊາວເຮຕີ້ ໃນການລະລຶກເຖິງການອຸທິດປະເທດ ໂດຍທ່ານທອມມັສ ແອັສ ມອນສັນ ພຽງແຕ່ເມື່ອ 30 ປີ ກ່ອນໜ້ານັ້ນ. ບໍ່ມີໃຜໃນພວກເຮົາຈະລືມແຜ່ນດິນໄຫວທີ່ຮ້າຍກາດໃນປີ 2010 ນັ້ນໄດ້ເລີຍ. ພ້ອມດ້ວຍໄພ່ພົນທີ່ຊື່ສັດ ແລະ ກຸ່ມຜູ້ສອນສາດສະໜາທີ່ກ້າຫານ ທີ່ປະກອບດ້ວຍຊາວເຮຕີ້ເກືອບທັງໝົດ, ສາດສະໜາຈັກໃນເກາະເຮຕີ້ໄດ້ເຕີບໂຕ ແລະ ເຂັ້ມແຂງຂຶ້ນຕໍ່ໄປ. ມັນເພີ່ມຄວາມເຂັ້ມແຂງໃຫ້ແກ່ສັດທາຂອງຂ້າພະເຈົ້າ ທີ່ຈະວາດພາບເຫັນໄພ່ພົນທີ່ຊອບທຳເຫລົ່ານີ້ຂອງພຣະເຈົ້າ ນຸ່ງຊຸດຂາວ, ໂດຍມີອຳນາດຂອງຖານະປະໂລຫິດທີ່ສັກສິດນຳພາ ແລະ ປະກອບພິທີການທີ່ສັກສິດ ໃນບ້ານຂອງພຣະຜູ້ເປັນເຈົ້າ.
ບໍ່ມີໃຜສາມາດວາດພາບເຫັນບ້ານຂອງພຣະຜູ້ເປັນເຈົ້າ ຢູ່ໃນບາງກອກ ທີ່ສວຍງາມນັ້ນ. ຊາວຄຣິດມີພຽງຈຳນວນໜຶ່ງເປີເຊັນໃນປະເທດໄທ ທີ່ຄົນສ່ວນໃຫຍ່ເປັນຊາວພຸດເກືອບທັງໝົດ. ເໝືອນດັ່ງປະເທດເຮຕີ້, ເຊັ່ນດຽວກັບໃນກຸງເທບ ພຣະຜູ້ເປັນເຈົ້າໄດ້ເຕົ້າໂຮມຜູ້ຄົນທີ່ຖືກເລືອກຂອງແຜ່ນດິນໂລກ. ຂະນະທີ່ໄດ້ຢ້ຽມຢາມຢູ່ທີ່ນັ້ນເມື່ອສາມສີ່ເດືອນກ່ອນ, ພວກເຮົາໄດ້ພົບ ສາທິດ ແລະ ຈຸດທະມາດ ໄກວັນວັດທະນະ. ສາທິດໄດ້ເຂົ້າຮ່ວມສາດສະໜາຈັກຕອນລາວມີອາຍຸ 17 ປີ ແລະ ໄດ້ໄປຮັບໃຊ້ເຜີຍແຜ່ໃນບ້ານເກີດເມືອງນອນຂອງລາວເອງ. ຕໍ່ມາລາວໄດ້ພົບນາງຈຸດທະມາດຕອນຮຽນຢູ່ທີ່ສະຖາບັນ, ແລະ ເຂົາເຈົ້າໄດ້ຜະນຶກເຂົ້າກັນທີ່ພຣະວິຫານມະນິລາ, ປະເທດຟີລິບປິນ. ໃນປີ 1993, ຄອບຄົວໄກວັນວັດທະນະ ຖືກລົດກະບະຊົນ ໂດຍທີ່ຄົນຂັບລົດໄດ້ເຊືອບຫລັບໄປ ແລະ ສາທິດໄດ້ເປັນອຳມະພາດຕັ້ງແຕ່ເອິກຂອງລາວລົງເຖິງຕີນ. ສັດທາຂອງເຂົາເຈົ້າບໍ່ເຄີຍຫວັ່ນໄຫວເລີຍ. ສາທິດເປັນຄູທີ່ຄົນນັບຖືຢູ່ທີ່ໂຮງຮຽນນາໆຊາດທີ່ກຸງເທບ. ລາວຮັບໃຊ້ເປັນປະທານສະເຕກຂອງເຂດກຸງເທບເໜືອແຫ່ງປະເທດໄທ. ເຮົາເຫັນສິ່ງອັດສະຈັນຂອງພຣະເຈົ້າຢູ່ໃນວຽກງານຂອງພຣະອົງ ແລະ ຢູ່ໃນຊີວິດສ່ວນຕົວຂອງເຮົາເອງ.
ສິ່ງອັດສະຈັນຂອງສາດສະໜາຈັກໃນປະເທດໄອໂວຣີ ໂຄສ໌ ບໍ່ສາມາດຖືກເລົ່າເຖິງໄດ້ປາດສະຈາກຊື່ຂອງສອງຄູ່ສາມີພັນລະຍາ: ຟີລີບ ແລະ ແອນນະລີສ໌ ອາສາດ ແລະ ລູຊຽນ ແລະ ອາກາດ ອາຟູເອ. ເຂົາເຈົ້າໄດ້ເຂົ້າຮ່ວມສາດສະໜາຈັກຕອນເປັນຄູ່ແຕ່ງງານໜຸ່ມສາວ, ຄູ່ໜຶ່ງຢູ່ປະເທດເຢຍລະມັນ ແລະ ອີກຄູ່ໜຶ່ງຢູ່ປະເທດຝະຣັ່ງເສດ. ໃນຊ່ວງປີ 1980, ຟີລິບ ແລະ ລູຊຽນໄດ້ຮູ້ສຶກວ່າເຂົາເຈົ້າຈຳເປັນຕ້ອງກັບໄປບ້ານເກີດຂອງເຂົາເຈົ້າທີ່ອາຟຣິກາ ສຳລັບຈຸດປະສົງຂອງການສ້າງສາອານາຈັກຂອງພຣະເຈົ້າ. ສຳລັບຊິດສະເຕີ ອາສາດ, ຜູ້ທີ່ເປັນຄົນເຢຍລະມັນ, ທີ່ຈະຈາກຄອບຄົວຂອງນາງໄປ, ແລະ ບຣາເດີ ອາສາດ ຕ້ອງລາອອກຈາກວຽກຂອງລາວ ໃນຖານະວິສະວະກອນທີ່ມີຄວາມສຳເລັດຜົນຫລາຍ, ໄດ້ຮຽກຮ້ອງສັດທາທີ່ເຂັ້ມແຂງແທ້ໆ. ທັງສອງຄູ່ນີ້ໄດ້ພົບກັນເປັນເທື່ອທຳອິດໃນປະເທດໄອໂວຣີ ໂຄສ໌ ແລະ ໄດ້ເລີ່ມໂຮງຮຽນວັນອາທິດ. ນັ້ນເປັນເວລາ 30 ປີຜ່ານມາແລ້ວ. ໃນເວລານີ້ກໍມີສະເຕກຢູ່ແປດແຫ່ງ ແລະ ສະມາຊິກຢູ່ 27,000 ຄົນ ໃນປະເທດອາຟຣິກາທີ່ສວຍງາມນີ້. ຄອບຄົວອາຟູເອໄດ້ຮັບໃຊ້ຢ່າງມີກຽດຕໍ່ໄປ, ທັງຄອບຄົວອາສາດດ້ວຍ, ຜູ້ທີ່ໄດ້ຈົບຈາກການຮັບໃຊ້ຢູ່ທີ່ພຣະວິຫານອາຄະຣາ ປະເທດການາ ເມື່ອບໍ່ດົນມານີ້ເອງ.
ທ່ານສາມາດເຫັນອິດທິພົນຂອງພຣະເຈົ້າເຄື່ອນຍ້າຍວຽກງານຂອງພຣະອົງໄປໜ້າບໍ? ທ່ານສາມາດເຫັນ ພຣະຫັດຂອງພຣະເຈົ້າໃນຊີວິດຂອງຜູ້ສອນສາດສະໜາໃນປະເທດເຮຕີ້ ຫລື ໃນຄອບຄົວ ໄກວັນວັດທະນະ ໃນປະເທດໄທບໍ? ທ່ານສາມາດເຫັນພຣະຫັດຂອງພຣະເຈົ້າໃນຊີວິດຂອງຄອບຄົວອາສາດ ແລະ ຄອບຄົວອາຟູເອບໍ? ທ່ານສາມາດເຫັນພຣະຫັດຂອງພຣະເຈົ້າໃນຊີວິດຂອງທ່ານເອງບໍ?
ແລະ ບໍ່ມີສິ່ງໃດທີ່ມະນຸດຈະເຮັດໃຫ້ພຣະເຈົ້າຂຸ່ນເຄືອງ … ຍົກເວັ້ນແຕ່ຜູ້ທີ່ບໍ່ສາລະພາບວ່າພຣະຫັດຂອງພຣະອົງຢູ່ໃນທຸກສິ່ງທັງປວງ.13
ສິ່ງມະຫັດສະຈັນຂອງພຣະເຈົ້າບໍ່ໄດ້ເກີດຂຶ້ນພຽງແຕ່ໃນປະເທດເຮຕີ້, ປະເທດໄທ, ຫລື ປະເທດໄອໂວຣີ ໂຄສ໌ ເທົ່ານັ້ນ. ຂໍໃຫ້ຫລຽວເບິ່ງອ້ອມຂ້າງທ່ານ.14 “ພຣະເຈົ້າເປັນຫ່ວງນຳທຸກຄົນ … ; ແທ້ຈິງແລ້ວ, ພຣະອົງນັບຜູ້ຄົນຂອງພຣະອົງ ແລະ ... ອຸທອນກ້ອນເລືອດແຫ່ງພຣະເມດຕາປານີຂອງພຣະອົງທີ່ມີຢູ່ເທິງແຜ່ນດິນໂລກທັງໝົດ.”15
ບາງເທື່ອເຮົາສາມາດເຫັນພຣະຫັດຂອງພຣະຜູ້ເປັນເຈົ້າໃນຊີວິດຂອງຄົນອື່ນ, ແຕ່ຍັງສົງໄສວ່າ, “ເຮົາຈະສາມາດເຫັນພຣະຫັດຂອງພຣະອົງໃນຊີວິດຂອງເຮົາເອງຢ່າງແຈ່ມແຈ້ງໄດ້ແນວໃດ?”
ພຣະຜູ້ຊ່ອຍໃຫ້ລອດໄດ້ກ່າວວ່າ:
“ບໍ່ສົງໄສ.”16
”ຢ່າວິຕົກເລີຍ.”17
“ແມ່ນແຕ່ [ນົກຈອກ] ໂຕດຽວຈະຕົກລົງດິນກໍບໍ່ໄດ້ ຖ້າພຣະບິດາຂອງພວກເຈົ້າບໍ່ເຫັນພ້ອມ. …
“ດັ່ງນັ້ນ … ຢ່າສູ່ຢ້ານ … ພວກເຈົ້າກໍປະເສີດຫລາຍກວ່ານົກຈອກຫລາຍໂຕ.”18
ທ່ານຈື່ຊາຍໜຸ່ມທີ່ໄດ້ຮ້ອງຫາສາດສະດາເອລີຊາບໍ່ ຂະນະທີ່ເຂົາເຈົ້າຖືກອ້ອມຮອບ ໂດຍສັດຕູວ່າ: “ຕາຍແລ້ວ ນາຍເອີຍ, ພວກເຮົາຈະເຮັດຈັ່ງໃດ?”19
ເອລີຊາໄດ້ຕອບວ່າ:
“ບໍ່ຕ້ອງຢ້ານ: ຝ່າຍຂອງພວກເຮົາມີຫລາຍກວ່າຝ່າຍຂອງພວກເຂົາ.
“ແລ້ວ ເອລີຊາກໍອະທິຖານວ່າ, … ຂ້າແດ່ອົງພຣະຜູ້ເປັນເຈົ້າ, … ຂໍພຣະອົງຈົ່ງເປີດຕາຄົນຮັບໃຊ້ຂອງຂ້ານ້ອຍຄົນນີ້ ໃຫ້ເຫັນກຳລັງຝ່າຍເຮົາແດ່ທ້ອນ; ລາວກໍເຫັນ [ສິ່ງມະຫັດສະຈັນອ້ອມລ້ອມລາວຢູ່].”20
ເມື່ອທ່ານຮັກສາພຣະບັນຍັດ ແລະ ອະທິຖານດ້ວຍສັດທາທີ່ຈະເຫັນພຣະຫັດຂອງພຣະຜູ້ເປັນເຈົ້າ ໃນຊີວິດຂອງທ່ານ, ຂ້າພະເຈົ້າສັນຍາວ່າ ພຣະອົງຈະເປີດຕາແຫ່ງວິນຍານຂອງທ່ານໃຫ້ກວ້າງຂວາງ, ແລະ ທ່ານຈະໄດ້ເຫັນຢ່າງແຈ່ມແຈ້ງຫລາຍຂຶ້ນວ່າ ທ່ານບໍ່ໄດ້ຢູ່ຕາມລຳພັງຢ່າງໂດດດ່ຽວ.
ພຣະຄຳພີສອນວ່າ ເຮົາຄວນ “[ຢືນຢູ່] ຢ່າງໝັ້ນຄົງຢູ່ໃນສັດທາຂອງສິ່ງທີ່ຈະມາເຖິງ.”21 ແມ່ນຫຍັງຈະມາເຖິງ? ພຣະຜູ້ຊ່ອຍໃຫ້ລອດໄດ້ອະທິຖານວ່າ:
“ຂ້າແດ່ພຣະບິດາເຈົ້າ ຂອງພວກຂ້ານ້ອຍທັງຫລາຍ ຜູ້ສະຖິດຢູ່ໃນສະຫວັນ, ຂໍໃຫ້ພຣະນາມຂອງພຣະອົງເປັນທີ່ເຄົາລົບບູຊາ.
“ຂໍໃຫ້ອານາຈັກຂອງພຣະອົງມາຕັ້ງຢູ່ ຂໍໃຫ້ເປັນໄປຕາມນ້ຳພຣະໄທຂອງພຣະອົງ ໃນສະຫວັນຢ່າງໃດ ກໍໃຫ້ເປັນໄປຢ່າງນັ້ນທີ່ແຜ່ນດິນໂລກ.”22
ເຮົາຫາກໍໄດ້ຮ້ອງເພງຊື່ວ່າ “Come, O Thou King of Kings” ແປວ່າ ຈົ່ງມາເຖີດ, ໂອ້ ຈອມກະສັດ.
ສັດທາຂອງເຮົາເຕີບໂຕຂຶ້ນເມື່ອເຮົາຄາດຫວັງການສະເດັດມາອັນຮຸ່ງເຫລື້ອມຂອງພຣະຜູ້ຊ່ອຍໃຫ້ລອດສູ່ແຜ່ນດິນໂລກ. ຄວາມຄິດເຖິງການສະເດັດມາຂອງພຣະອົງເຮັດໃຫ້ຂ້າພະເຈົ້າຕື່ນເຕັ້ນ. ມັນຈະເປັນເລື່ອງທີ່ປະຫລາດໃຈແທ້ໆ! ຄວາມເລິກຊຶ້ງ ແລະ ຄວາມສະຫງ່າງາມ, ຄວາມກວ້າງໃຫຍ່ໄພສານ ແລະ ຄວາມງົດງາມ, ຈະປະເສີດເໜືອສິ່ງໃດໆທີ່ຕາແຫ່ງມະຕະເຄີຍໄດ້ເຫັນມາກ່ອນ ຫລື ໄດ້ປະສົບມາກ່ອນ.
ໃນວັນເວລານັ້ນ, ພຣະອົງຈະບໍ່ສະເດັດມາໃນ “ພັນຜ້າອ້ອມ ນອນຢູ່ໃນຮາງຫຍ້າ,”23 ພຣະອົງຈະປະກົດຢູ່ໃນໝູ່ເມກແຫ່ງຟ້າສະຫວັນ, ຫຸ້ມຫໍ່ດ້ວຍອຳນາດ ແລະ ລັດສະໝີພາບອັນຍິ່ງໃຫຍ່; ພ້ອມດ້ວຍເຫລົ່າທູດທັງໝົດ.24 ເຮົາຈະໄດ້ຍິນ “ສຽງຂອງເຫລົ່າທູດ, ແລະ … ສຽງແກຂອງພຣະເຈົ້າ.”25 ດວງອາທິດ ແລະ ດວງເດືອນຈະຖືກປ່ຽນແປງ, ແລະ ດວງດາວ [ຈະ] ຖືກຊັດອອກຈາກບ່ອນຂອງມັນ.26 ທ່ານ ແລະ ຂ້າພະເຈົ້າ, ຫລື ຜູ້ຄົນທີ່ຕິດຕາມເຮົາ, ໄພ່ພົນຂອງພຣະເຈົ້າ ... ຈາກ [ທຸກສ່ວນ] ຂອງແຜ່ນດິນໂລກ,27 ຈະຖືກເຮັດໃຫ້ມີຊີວິດຄືນອີກ ແລະ … ຖືກພາຂຶ້ນໄປເຝົ້າພຣະອົງ,28 ແລະ ຜູ້ທີ່ໄດ້ຕາຍໃນຄວາມຊອບທຳ, ເຂົາເຈົ້າກໍຈະຖືກພາຂຶ້ນໄປເຝົ້າພຣະອົງຄືກັນໃນທ່າມກາງຟ້າສະຫວັນ.29
ແລ້ວ, ປະສົບການທີ່ເບິ່ງຄືວ່າ ເປັນໄປບໍ່ໄດ້, ແຕ່ພຣະຜູ້ເປັນເຈົ້າໄດ້ກ່າວວ່າ ເນື້ອໜັງທັງປວງຈະໄດ້ເຫັນພຣະອົງພ້ອມກັນ.30 ສິ່ງນີ້ຈະເກີດຂຶ້ນໄດ້ແນວໃດ? ເຮົາບໍ່ຮູ້. ແຕ່ຂ້າພະເຈົ້າເປັນພະຍານວ່າ ມັນຈະເກີດຂຶ້ນ—ຕາມທີ່ໄດ້ທຳນາຍໄວ້ແລ້ວ. ເຮົາຈະຄຸເຂົ່າລົງໃນຄວາມຄາລະວະ. ແລະ ພຣະຜູ້ເປັນເຈົ້າຈະເປັ່ງສຽງ, ແລະ ທີ່ສຸດຂອງແຜ່ນດິນໂລກຈະໄດ້ຍິນສຸລະສຽງຂອງພຣະອົງ.31 ແລະ ສຸລະສຽງຈະເປັນເໝືອນດັ່ງສຽງຂອງແມ່ນ້ຳຫລວງຫລາຍ, ແລະ ຈະເປັນຄືກັນກັບສຽງຟ້າຮ້ອງ.32 [ແລ້ວ] ພຣະຜູ້ເປັນເຈົ້າ, ແມ່ນແຕ່ພຣະຜູ້ຊ່ອຍໃຫ້ລອດ, ຈະປະທັບຢືນຢູ່ໃນທ່າມກາງຜູ້ຄົນຂອງພຣະອົງ.33
ແລ້ວຈະມີການຊຸມນຸມຂອງເຫລົ່າທູດຈາກສະຫວັນ ແລະ ໄພ່ພົນຂອງພຣະເຈົ້າຢ່າງທີ່ລືມບໍ່ໄດ້ຢູ່ເທິງແຜ່ນດິນໂລກ.34 ແຕ່ສຳຄັນທີ່ສຸດ, ເອຊາຢາໄດ້ປະກາດວ່າ, “ພຣະອົງຈະຊ່ອຍປະຊາຊົນຂອງພຣະອົງໃຫ້ພົ້ນໄພ, ໝົດທັງໂລກຈະໄດ້ເຫັນເຫດການນີ້ເກີດຂຶ້ນ,”35 ແລະ ພຣະອົງຈະປົກຄອງເໜືອເນື້ອໜັງທັງປວງ.36
ໃນວັນນັ້ນ, ຜູ້ທີ່ສົງໄສຈະມິດງຽບໄປ, ເພາະທຸກຫູຈະໄດ້ຍິນ … , ແລະ ທຸກຫົວເຂົ່າຈະຄຸລົງ, ແລະ ທຸກລີ້ນຈະສະລະພາບ37 ວ່າພຣະເຢຊູຄືພຣະຄຣິດ, ພຣະບຸດຂອງພຣະເຈົ້າພຣະຜູ້ຊ່ອຍໃຫ້ລອດ ແລະ ພຣະຜູ້ໄຖ່ຂອງໂລກ.
ມື້ນີ້ແມ່ນວັນອິດສະເຕີ. ເຮົາຊື່ນຊົມກັບຊາວຄຣິດທັງປວງຕະຫລອດທົ່ວໂລກ ໃນການຟື້ນຄືນພຣະຊົນຂອງພຣະອົງ ແລະ ໃນການຟື້ນຄືນພຣະຊົນທີ່ຮຸ່ງເຫລື້ອມຂອງພຣະອົງ ແລະ ໃນການຟື້ນຄືນຊີວິດຂອງເຮົາດ້ວຍ. ຂໍໃຫ້ເຮົາຈົ່ງຕຽມສຳລັບການສະເດັດມາຂອງພຣະອົງ ໂດຍການສັນລະເສີນເຫດການທີ່ຮຸ່ງເຫລື້ອມນີ້ ໃນຈິດໃຈຂອງເຮົາ ແລະ ກັບຜູ້ຄົນທີ່ເຮົາຮັກ. ຂໍໃຫ້ຄຳອະທິຖານຂອງພຣະອົງເປັນຂອງເຮົາດ້ວຍ ທີ່ວ່າ: “ຂໍໃຫ້ອານາຈັກຂອງພຣະອົງມາຕັ້ງຢູ່, ຂໍໃຫ້ເປັນໄປຕາມນ້ຳພຣະໄທຂອງພຣະອົງ ໃນສະຫວັນເປັນຢ່າງໃດ ກໍຂໍໃຫ້ເປັນໄປຢ່າງນັ້ນທີ່ແຜ່ນດິນໂລກ.”38 ຂ້າພະເຈົ້າເປັນພະຍານວ່າ ພຣະອົງຊົງພຣະຊົນຢູ່. “ຈົ່ງມາເຖີດ, ໂອ້ ຈອມກະສັດ.” ໃນພຣະນາມຂອງພຣະເຢຊູຄຣິດ, ອາແມນ.