Ia tae to Oe ra hau

A himene ai tatou, ua putapu roa ino vau i te manaʻo e, i teie taime mau, e hanere e hanere tauasini taata, e peneiaʻe e milioni, e Feia Moʻa tiʻaturi i roto i na fenua e 150, e na roto i na reo e 75,¹ e faateitei amui ra i to tatou reo i te Atua, ma te himene :

« A Haere Mai, Te Arii ! »³ E utuafare rahi roa tatou no te feia faaroo, parare na te ao atoa nei, e mau pĭpĭ tatou na te Fatu ra Iesu Mesia.

Ua rave tatou i To’na iʻoa i niʻa ia tatou, e a rave ai tatou i te mau hebedoma i te oroʻa, e fafau tatou e, e haamanaʻo tatou Ia’na e e haapaʻo tatou i Ta’na ra mau faaue. E mea atea roa tatou i te maitai-roa-raa, tera râ mea haapaʻo maitai tatou i to tatou faaroo. Te tiʻaturi nei tatou Ia’na. Te haamori nei tatou Ia’na. Te pee nei tatou Ia’na. Te here roa nei tatou Ia’na. O Ta’na ohipa te ohipa faahiahia roaʻe i te ao taatoa nei.

Te ora nei tatou, te mau taeaʻe e te mau tuahine, i te mau mahana hou te Tae-piti-raa mai o te Fatu, te hoê tau tiaʻi-maoro-hia e te feia faaroo i roto i te mau tau atoa. Te ora nei tatou i te tau o te mau tamaʻi e te parau tamaʻi, te tau o te mau ati natura, te tau e fifi ai to te ao nei na roto i te taʻa-ore-raa e te arepurepuraa.

Te ora atoa nei râ tatou i te tau hanahana no te Faahoʻi-faahou-raa, a porohiaʻi te evanelia i to te ao atoa nei―e tau teie i fafau ai te Fatu e, e « faatupu mai Oia… i te hoê feia viivii ore »,⁴ o Ta’na e faaahu i te « parau tiʻa e i te mana o te Atua ».⁵

Te poupou nei tatou i teie tau e te pure nei hoʻi ia roaa ia tatou i te faaruru ma te itoito i to tatou mau aroraa e to tatou mau manaʻo papu ore. E mea uʻana aʻe to te tahi mau fifi i to te tahi, aita râ e ape-roa-raa. I te hoê taime, ua parau mai o Elder Neal A. Maxwell ia’u, « Mai te mea e mea maitai te mau mea atoa no oe i teie nei, a tiaʻi rii noa ».

Noa’tu â te haapapû mai nei te Fatu ia tatou, faahou e faahou â e, « eita e tiʻa ia tatou ia mataʻu »⁶, e ere i te mea ohie te hiʻo-faaatea-raa papû maitai e te iteraa na niʻa’tu i to teie nei ao, ia roo-anaʻe-hia tatou i te mau tamataraa.

Ua haapii mai te peresideni Thomas S. Monson ia’u i te hoê haapiiraa faufaa rahi no niʻa i te hiʻo-atea-raa i te mure ore.

A ahuru ma vaʻu matahiti i maʻiri aʻenei a tere ai au na muri i te peresideni Monson na niʻa i te hoê pereoʻo auahi i te fenua Helevetia, ua ani au ia’na no niʻa i ta’na mau hopoiʻa teimaha. Ua haapuai ta’na pahonoraa i to’u faaroo. Ua na ô mai oia, « I roto i te Peresideniraa Matamua, e rave matou i te mau mea atoa e nehenehe ia matou no te faahaere i teie ohipa i mua. E ohipa râ teie na te Fatu e te arataʻi e te faatere nei Oia i te reira. Te maere nei matou i te hiʻoraa Ia’na ia iriti i te mau uputa eita e noaa ia matou i te iriti e ia faatupu i te mau semeio e ore roa e noaa ia matou i te feruri ».⁷

Te mau taeaʻe e te mau tuahine, na te ite-mata-raa e te tiʻaturiraa i te mau semeio a te Fatu no te haamauraa i To’na basileia i niʻa i te fenua nei e nehenehe e tauturu ia tatou ia ite e ia tiʻaturi e, te ohipa atoa nei te rima o te Fatu i roto i to tatou iho oraraa.

Ua parau te Fatu, « E tiʻa hoi ia’u ia rave i ta’u ihora ohipa ».⁸ E tamata tatou tataʻitahi i te rave i ta tatou tufaa, o Oia râ te tahuʻa ninoʻa (architecte) rahi. I raro aʻe i te faatereraa a To’na Metua, ua hamani Oia i teie ao. « I hamanihia te mau mea atoa e Ana ; e ia ore Oia aita ïa e mea i hamanihia ».⁹ Ia araara e ia haapaʻo maitai anaʻe tatou i te pae varua, e ite ïa tatou i To’na rima na te ao atoa nei e e ite tatou i To’na ra rima i roto i to tatou iho oraraa.

E faaite atu vau i te hoê hiʻoraa.

I te matahiti 1831, e 600 anaʻe melo no te Ekalesia, ua parau te Fatu, « Ua horoʻahia’tu te mau taviri no te basileia o te Atua i te taata nei i nia i te fenua nei, e mai reira atu te evanelia e tere atu ai e tae noa’tu i te mau hopea o te ao nei mai te hoe ofai i ootihia no roto mai i te mouʻa ma te rima ore e tere atu ai, e tae noa’tu i te taime i î ai te ao nei i te reira ».¹⁰

Ua ite atea te peropheta Nephi e, i to tatou anotau e « mea iti » te mau melo no te Ekalesia ia faaauhia i te huiraatira o te fenua nei, tei « niʻa râ ratou i te ao atoa nei ».¹¹

Toru o te mau hiʻoraa nehenehe no te rima o te Fatu e haamau ra i To’na basileia, oia hoʻi ïa te mau hiero ta te peresideni Monson i faaara i teie mahana. Ia hoʻi tatou a maa ahururaa matahiti na mua aʻe, o vai te feruri e, e hiero tei faatiʻahia i te fenua Haiti, i te fenua Thailande e te fenua Ivori (Côte dʻIvoire).

E ere te faaotiraa no te vahi o te hiero i te faaotiraa ia au i te tanoraa o te vahi. E mea na roto i te heheuraa a te Fatu i To’na peropheta, tapaʻo no te hoê ohipa rahi e rave i reira e no te faʻiraa i te parau tiʻa o te Feia Moʻa o te riro i te poihere e i te atuatu i To’na fare i tera uʻi e tera uʻi.¹²

Hōho’a

Thomas S. Monson of the Quorum of the Twelve Apostles, visiting Haiti. On April 17, 1983 he dedicated Haiti for the preaching of the gospel and also dedicated a site for the first meetinghouse to be built in Haiti. It was the first visit to the island by a member of the Quorum of the Twelve. (Ensign Aug. 1983, p. 79; Church News, May 22, 1983, p. 4)

Hōho’a

A group of Missionaries with Elder Andersen

Ua tere atu vau e Kathy ta’u vahine faaipoipo i Haiti e piti matahiti i teie nei. I niʻa i te mouʻa hiʻo’tu ia Port-au-Prince, ua amui atu maua i te Feia Moʻa no Haiti no te faahanahanaharaa i te haamoʻaraahia te fenua e Elder Thomas S. Monson, i tera ra tau, 30 noa matahiti na mua’tu. E ore roa te hoê o tatou e haamoʻe i te aueueraa fenua ino i Haiti i te matahiti 2010 ra. Na roto i te ohipa a te mau melo haapaʻo e te hoê pŭpŭ misionare itoito, te rahiraa e mau misionare ïa no Haiti iho, ua tamau noa te Ekalesia i te tupu e i te puai i niʻa i teie motu. E ohipa faateitei faaroo te feruriraa i teie nau Feia Moʻa parau tiʻa na te Atua, ma te ahuhia i te ahu uouo, ma te mana o te autahuʻaraa moʻa no te faatere e no te rave i te mau oroʻa moʻa i roto i te fare o te Fatu.

Hōho’a

Sathit and Juthamas Kaivaivatana of Bangkok Thailand.

Hōho’a

President Kaivaivatana and other members of the Thailand Bangkok Thailand North Stake leadership..

O vai pai te nehenehe e feruri e, e tiʻa mai te fare o te Fatu i roto i te oire nehenehe no Bangkok ? Hoê noa i niʻa i te hanere keresetiano i roto i teie fenua no te faaroo Boudha te rahiraa. Mai i Haiti, e ite atoa tatou e, ua haaputuputu te Fatu i Bangkok tei maʻitihia e te Atua i te fenua nei. I to’u tereraa’tu i reira tau avaʻe i teie nei, ua farerei matou ia Sathit e Juthamas Kaivaivatana, e ta raua mau tamarii itoito mau. Ua tomo Sathit i roto i te Ekalesia i te 17raa o to’na matahiti e ua rave i te hoê misioni i roto i to’na fenua aiʻa. I muri mai, ua farerei oia ia Juthamas i te haapiiraa evanelia na te feia api paari (Institu), e ua taatihia raua i roto i te hiero no Manila, i te fenua Filipino. I te matahiti 1993, ua faaûhia te utuafare Kaivaivatanas e te hoê pereoo uta tauihaa, ua vareʻahia te taata faahoro i te taoto e roohia’tura Sathit i te hapepa mai te ouma e tae atu i te avae. Aita roa’tu to raua faaroo i aueue. E orometua haapii auhia o Sathit i te fare haapiiraa piahi na te ara i Bangkok. Te tavini nei oia ei peresideni no te tĭtĭ no Thailande Bangkok Apatoʻerau. Te ite nei tatou i te mau semeio a te Atua i roto i Ta’na ohipa maere e i roto i to tatou iho oraraa.

Hōho’a

Couples in the Ivory Coast

Eita te semeio o te Ekalesia i te fenua Ivori e nehenehe e faatiʻahia ma te ore e faahiti i te iʻoa o na taata faaipoipo e maha : o Philippe raua Annelies Assard e o Lucien raua Agathe Affoue. E taata faaipoipo-apî-hia ratou a tomo ai i roto i te Ekalesia, piti i te fenua Purutia e piti i te fenua Farani. I te mau matahiti 1980, ua hiaai o Philippe e o Lucien i te hoʻi i to raua fenua aiʻa i Afirika ma te hinaaro e patu i te basileia o te Atua. E vahine Purutia te tuahine Assard, e no reira e titauhia ia’na te tahi faaroo taa ê no te faaruʻe i to’na utuafare e faatiʻa i te taeaʻe Assard ia vaiiho i ta’na ohipa ei taata aravihi i te pae matini. Ua farerei teie nau taata faaipoipo no te taime matamua i te fenua Ivori e ua haamata atura i te Haapiiraa Sabati. A 30 matahiti i teie nei. I teie nei, te vai nei e vaʻu tĭtĭ e 27 000 melo i roto i teie nei fenua nehenehe no Afirika. Te tamau noa ra â te utuafare Affoue i te tavini maitai, mai te utuafare Assard atoa hoʻi, tei faaoti iho nei i te hoê misioni i roto i te hiero no Accra i Ghana.

E nehenehe anei ta outou e ite i te rima o te Atua e turaʻi ra i Ta’na ohipa i mua ? E nehenehe anei ta outou e ite i te rima o te Atua i roto i te oraraa o te mau misionare i Haiti e o te utuafare Kaivaivatanas i Thailande ? E nehenehe anei ta outou e ite i te rima o te Atua i roto i te oraraa o te utuafare Assard e te utuafare Affoue ? E nehenehe anei ta outou e ite i te rima o te Atua i roto i to outou iho oraraa ?

« Aita roa to’na riri i hotu i nia i te hoê taata… maori râ o ratou tei ore i faʻi mai i to’na rima ra i roto i te mau mea atoa ».¹³

Aita te mau semeio a te Atua e tupu noa nei i Haiti, i Thailande, aore râ i te fenua Ivori. A hiʻo ati aʻe ia outou.¹⁴ « Te haamanaʻo ra te Atua i te mau taata atoa… ua taiʻohia to’na ra mau taata e ana e tei nia iho to’na ra aau aroha i te mau fenua atoa ».¹⁵

I te tahi mau taime, e nehenehe ta tatou e ite i te rima o te Fatu i roto i te oraraa o te tahi atu mau taata, a ui na râ, « Nahea e nehenehe ai ia’u ia ite maitai i To’na rima i roto i to’u nei iho oraraa ? »

Ua parau te Faaora :

« E faaroo turori ore to outou ».¹⁶

« Eiaha e mataʻu »¹⁷

« E ore… te hoê o taua na manu rii ra e moʻe i to outou Metua ia maʻiri i raro i te repo…

« Eiaha maori outou e mataʻu, e maitai rahi hoʻi to outou i to te manu e ia rahi noa’tu ».¹⁸

A haamanaʻo i te tavini apî ra tei pii i te peropheta Elisaia a ati ai ratou i te enemi : « Auê, e aha tatou nei [e rave] ? »¹⁹

Pahono aʻera Elisaia :

« Eiaha e mătaʻu, e rahi to tatou e iti to ratou.

« Ua pure atura Elisaia… E Iehova… e faaaraara oe i to’na mata a ite oia. Ua faaaraara aʻera Iehova i te mata o taua taata apî ra ; ite atura oia : e inaha, ua î te mouʻa i te [puaahorofenua] e te pereoo (chariot) auahi ».²⁰

A haapaʻo ai outou i te mau faaueraa e a pure ai ma te faaroo no te ite i te rima o te Fatu i roto i to outou oraraa, te parau fafau atu nei ia outou e, e faaaraara rahi atu â Oia i to outou mau mata varua, e e ite ïa outou ma te maramarama rahi e aita outou i vai otahi noa.

Te haapii mai nei te mau papaʻiraa moʻa e, e tiʻa’tu tatou « ma te tamau maite i te faaroo i te tae mai ».²¹ E aha te mea e tae mai ? Ua pure te Faaora :

« E to matou Metua i te ao ra, ia raa to oe iʻoa.

« Ia tae to oe ra hau. Ia haapaohia to oe hinaaro i te fenua nei, mai tei te ao atoa na ».²²

No himene noa a‘e nei tatou « A Haere Mai, Te Arii ».

E tupu to tatou faaroo i te rahi a tiaʻi ai tatou i te mahana hanahana no te hoʻiraa mai o te Faaora i te fenua nei. E oaoa to’u aau i te manaʻoraa e, e hoʻi mai Oia. E mea faahiahia roa ïa ! E hau ïa te aano e te rahi, te ateatea e te nehenehe, i te mau mea atoa ta te mata taata i ite aore râ i ora.

I taua mahana ra, eita ïa Oia e haere mai ma te puʻohuhia i roto i te pahii e te tarava ra i roto i te hoê phatene »²³, e fâ mai râ Oia « i roto i te mau ata o te raʻi ra, faaahuhia i te mana e te hanahana rahi, i pihaʻi iho i te mau melahi moʻa atoa ra ».²⁴ E faaroo ïa tatou i « te reo o te melahi, e… te pu a te Atua ».²⁵ E faahuru-ê-hia te mahana e te avaʻe, e « hurihia’tu te mau fetia mai nia mai i to ratou ra mau vahi ».²⁶ Outou e o vau nei, aore râ o ratou o te pee mai ia tatou, « te feia moʻa atoa… no te na poro e maha ra no te ao nei »,²⁷, e « faaanaanaeahia ïa e… e tahitihia’tu ïa ratou i nia ia farerei Ia’na ra ».²⁸ O ratou o tei pohe i roto i te parau-tiʻa, e « tahiti-atoa-hia ïa ratou i nia ia farerei ia’na i ropu i te raʻi ».²⁹

I muri iho, te hoê ïa ohipa mai te huru ra eita e nehenehe e tupu, ta te Fatu i parau, « e ite amui mai ai te mau mea ora atoa nei ia’u »³⁰ Nahea te reira e tupu ai ? Aita tatou i ite. Te faaʻite papû nei râ vau e, e tupu mau te reira―mai tei tohuhia mai. E e tuturi ïa tatou ma te tura, « e e parau mai te Fatu i to’na ra reʻo, e e faaroo te hopea o te fenua i te reira ».³¹ « E mai… te reo ïa o te mau pape e rave rahi, e mai te reo no te hoe patiri rahi ».³² « [Ei reira] e tiʻa mai te Fatu, oia te Faaora, i rotopu i ta’na iho feia ».³³

E tae mai ai te mau farereiraa e ore e moʻehia e te mau melahi no te raʻi e te Feia Moʻa i niʻa i te fenua.³⁴ Te mea hau atu râ i te faufaa, ua parau Isaia, « E ite ai te mau hopea atoa o te fenua ra i te ora a to tatou Atua »,³⁵ e e « hau hoi Oia i nia i te mau taata atoa ra ».³⁶

Ia taua mahana ra, e faaea mamû noa ïa te feia feaa, « no te mea e faaroo te mau tariʻa atoa… e e piʻo atu te mau turi avae atoa, e e faʻi mai te mau arero atoa »³⁷ e, o Iesu te Mesia, te Tamaiti a te Atua, te Faaora e te Taraehara o to te ao.

E Pasa teie mahana. Te oaoa nei tatou i To’na Tiʻa-faahou-raa hanahana e i to tatou iho tiʻa-faahou-raa tei parau-fafau-hia. Ia faaineine tatou no To’na taeraa mai na roto i te faahiti-noa-raa, faahou e faahou â, i roto i to tatou iho feruriraa e ia ratou atoa ta tatou i here, i teie mau ohipa hanahana e tupu mai, e ia riro Ta’na pure ei pure atoa na tatou : « Ia tae to oe ra hau. Ia haapaʻohia to oe hinaaro i te fenua nei, mai tei tei ao atoa na ».³⁸ Te faaite papû nei au e, te ora nei Oia. « A Haere Mai, Te Arii ». Na roto i te iʻoa o Iesu Mesia, amene.