Zoo Tiag thiab Tsis Muaj Siab Xav Ntxias
Los ntawm Txwj Laug Michael T. Ringwood
Ntawm Pawg Xya Caum
Yexus Khetos txoj moo zoo qhia tias peb hloov tau tej uas peb lub siab xav tau thiab peb txawj kawm thiab kho peb tus kheej.
Tu siab uas twb muaj ib lub sij hawm hauv kuv lub neej thaum kuv xav muaj koob muaj npe. Thaum xub thawj yog ib qho ncaj ncees. Thaum kuv tseem npaj ua ib tug tub txib, kuv tus tij laug raug tsa ua ib tug thawj coj thaj chaw nyob hauv nws qhov chaw tshaj tawm txoj moo zoo. Kuv twb hnov ntau yam zoo uas lwm tus hais txog nws ua rau kuv thiaj xav kom lwm tus hais zoo ib yam li ntawd txog kuv. Kuv cia siab thiab tej zaum kuv tau thov Vajtswv kom lawv tsa kuv ua thawj coj zoo ib yam.
Ua Vajtswv tsaug vim thaum kuv ua tub txib, kuv twb kawm ib qho tseem ceeb. Lub rooj sab laj tas los, ua rau kuv nco txog qhov uas kuv tau kawm.
Thaum lub Kaum Hli Ntuj, Thawj Tswj Hwm Dieter F. Uchtdorf hais tias: “Nyob hauv kuv lub neej, kuv tau muaj cib fim sib tham nrog cov txiv neej thiab poj niam uas txawj ntse tshaj plaws nyob hauv lub ntiaj teb. Thaum kuv tseem hluas, ua rau kuv saib lawv rau nqi heev, cov uas tau kawm ntawv, cov uas muaj peev xwm, cov uas vam meej thiab muaj neeg ntiaj teb qhuas lawv. Tiam sis txij thaum ntawd los, kuv tau kawm hais tias kuv saib lwm tus rau nqi tshaj, cov neeg uas yog neeg zoo tiag thiab cov uas tsis muaj siab xav ntxias.”1
Ib tug phab-ej nyob hauv Phau Ntawv Maumoos yog ib tug uas coj yam ntxwv zoo tiag thiab tsis muaj siab xav ntxias. Sinploos yog Amas tus Hluas ib tug tub. Peb paub ntau txog nws tus tij laug Hilamas, uas, zoo ib yam li nws txiv, tau saib xyuas cov ceev xwm txheej thiab nws yog Vajtswv ib tug yaj saub, thiab peb paub txog nws tus kwv, Khali-atoos, uas peb nco qab hais tias nws txiv tau qhuab ntuas nws thaum nws yog ib tug tub txib. Rau Hilamas, Amas sau 77 nqe (saib Amas 36–37). Rau Khali-atoos, Amas sau 91 nqe (saib Amas 39–42). Rau Sinploos, nws tus tub nrab, Amas sau 15 nqe xwb (saib Amas 38). Tiam sis nyob hauv 15 nqe vaj lug kub ntawd, nws tej lus yeej muaj hwj chim thiab qhia tau peb ntau yam.
“Thiab nim no, kuv tus me tub, kuv cia siab tias kuv yuav muaj kev xyiv fab nyob hauv koj, vim yog koj txoj kev ruaj nrees thiab koj txoj kev ntseeg rau Vajtswv; vim ib yam li koj tau pib thaum koj tseem hluas vam khom ntsoov rau tus Tswv koj tus Vajtswv, tib yam li ntawd kuv cia siab ntsoov tias koj yuav coj nws tej lus txib mus tsis tu ncua; vim tus uas yuav tau koob hmoov yog tus uas nyiaj kom mus txog thaum kawg.
“Kuv hais rau koj, kuv tus me tub es, tias kuv twb tau muaj kev xyiv fab heev nyob hauv koj lawm, vim yog koj txoj kev ntseeg thiab koj txoj kev rau siab, thiab koj txoj kev ua siab ntev thiab koj txoj kev ua siab ntev nyiaj nyob hauv cov neeg” (Amas 38:2–3).
Tsis yog Amas hais rau Sinploos xwb, Amas kuj hais txog Sinploos rau Khali-atoos. Amas hais tias: “Koj tsis tau pom txoj kev ruaj nrees ntawm koj tus tij laug, nws txoj kev ntseeg, thiab nws txoj kev rau siab coj Vajtswv tej lus txib los? Saib seb, nws tsis tau ua ib tug yam ntxwv zoo rau koj los?” (Amas 39:1).2
Zoo li Sinploos yog ib tug tub uas xav ua rau nws txiv zoo siab thiab nws ua zoo vim nws muaj siab xav ua zoo xwb nws tsis ua kom lwm tus qhuas nws, kom muaj koob muaj npe, los yog muaj hwj chim. Nyaj Hilamas paub qhov no txog nws tus kwv, vim nws muab cov ceev xwm txheej dawb ceev uas nws txais los ntawm nws txiv rau Sinploos saib xyuas. Nyaj Hilamas tso siab rau Sinploos vim “nws yog ib tug neeg ncaj, thiab nws tau mus li Vajtswv nyiam; thiab nws tau nrhiav ua zoo tsis tu ncua, coj tej lus txib ntawm tus Tswv nws tus Vajtswv” (Amas 63:2). Tsis muaj ntau uas lawv sau txog Sinploos txij thaum nws txais cov ceev xwm txheej mus txog thaum nws muab cov ntawd rau Hilamas tus tub uas hu ua Hilamas (saib Amas 63:11).
Sinploos yeej zoo tiag thiab tsis muaj siab xav ntxias. Nws yog ib tug uas siv sij hawm, siv nws tej txuj ci thiab siv zog pab thiab txhawb nqa lwm tus vim nws hlub Vajtswv thiab hlub tib neeg (saib Amas 48:17–19; 49:30). Thawj Tswj Hwm Spencer W. Kimball tej lus piav txog nws zoo heev hais tias: “Poj niam zoo thiab txiv neej zoo yeej muaj siab xav pab lwm tus tshaj lawv xav tswj kav lwm tus.”3
Nyob hauv lub ntiaj teb no muaj neeg uas xav kom lwm tus qhuas lawv, xav tau hwj chim, xav muaj koob muaj npe nyob txhua qhov chaw, kuv thiaj li hwm cov neeg uas zoo tiag tiag thiab tsis muaj siab xav ntxias, cov uas hlub Vajtswv thiab lawv cov neeg zej zog, cov poj niam thiab txiv neej zoo uas “muaj siab xav pab lwm tus tshaj lawv xav tswj kav lwm tus.”
Niaj hnub no muaj ib txhia uas xav kom peb ntseeg tias peb yog neeg tseem ceeb tsuas yog peb muaj hwj chim thiab muaj npe. Tiam sis, ua Vajtswv tsaug uas muaj ntau tus uas tsis coj raws li txoj kev ntseeg no. Lawv pom tias kev mob siab ua neeg zoo tiag thiab tsis muaj siab xav ntxias yeej tseem ceeb. Kuv tau ntsib tib neeg zoo li no nyob txhua qhov chaw thiab nyob hauv ntau lub koom txoos. Thiab kuv tau ntsib ntau tus zoo li no los ntawm cov uas tau hloov siab los ntseeg Yexus Khetos tiag tiag.4
Kuv hwm cov uas rau siab ua hauj lwm hauv lawv tej pawg ntseeg thiab ceg ntseeg nyob thoob plaws lub ntiaj teb no. Tiam sis lawv tej hauj lwm hloov tau. Cov uas kuv qhuas ntau tshaj plaws yog cov neeg uas tsis tau raug hu ua hauj lwm dab tsi tiam sis lawv tseem nrhiav kev pab thiab txhawb nqa lwm tus. Ib tug tij laug tuaj ntxov tsa cov rooj zaum thiab nyob tom qab kev sib ntsib tu lub chav teev tiam Vajtswv. Ib tug muam txhob txwm zaum ntawm ib lub rooj zaum ze rau ib tug muam uas dig muag nyob hauv pawg ntseeg, nws thiaj li ntsib tau nws thiab hu zaj nkauj qhuas Vajtswv nrov txaus kom tus muam dig muag thiaj li hnov tau thiab koom nrog lawv hu nkauj. Yog tias nej saib ntsoov hauv nej pawg ntseeg los yog ceg ntseeg, nej yuav pom cov neeg uas ua yam ntxwv zoo li no. Yeej muaj cov mej zeej uas paub tias leej twg xav tau kev pab thiab thaum twg lawv yuav tsum nug seb lawv pab tau li cas.
Tej zaum thawj zaj uas kuv tau kawm txog Haiv Neeg Ntseeg uas zoo tiag thiab tsis muaj siab xav ntxias yog ib qho kuv kawm thaum kuv yog ib tug tub txib. Kuv tau tsiv tsev mus rau hauv ib cheeb tsam nrog ib tug txwj laug uas kuv tsis paub zoo. Kuv twb hnov txog lwm tus tub txib tham txog tus no thiab txog qhov uas nws tsis tau ua ib tug thawj coj thiab nyuaj rau nws hais lus Kaublim txawm nws twb nyob hauv lub teb chaws Kaublim tau ntev lawm. Tiam sis thaum kuv paub tus txwj laug no, kuv kawm tias nws yog ib tug tub txib uas mloog lus thiab rau siab ntseeg tshaj lwm tus. Nws tau kawm ntawv thaum lub sij hawm yuav tsum kawm; nws ua hauj lwm thaum lub sij hawm yuav tsum ua. Nws tawm lub tsev thaum lub sij hawm yog thiab rov qab los thaum lub sij hawm yog. Nws rau siab kawm lus Kaublim txawm yog ib qho nyuaj heev rau nws kawm.
Thaum kuv kawm tias tej lus uas kuv tau hnov tsis muaj tseeb, ua rau kuv xav tias lwm tus txiav txim tsis yog txog tus tub txib no. Kuv tau xav qhia tag nrho cov tub txib txog qhov uas kuv tau kawm txog tus txwj laug no. Kuv qhia kuv qhov chaw tshaj tawm txoj moo zoo tus thawj tswj hwm txog qhov uas kuv xav kho qhov teeb meem no. Nws teb hais tias, “Leej Txiv Saum Ntuj Ceeb Tsheej paub tias tus tub hluas no yog ib tug tub txib zoo, thiab kuv paub ib yam li ntawd.” Nws hais ntxiv hais tias, “Es tam sim no koj paub lawm thiab, yog li ntawd leej twg ntxiv yuav tsum paub?” Qhov chaw tshaj tawm txoj moo zoo tus thawj tswj hwm txawj ntse no twb qhia kuv tias qhov twg yog qhov tseem ceeb ntawm kev pab lwm tus, thiab tsis yog lus qhuas, lub hwj chim, thiab kev muaj koob muaj npe. Nov yog ib qho zoo qhia rau ib tug tub txib hluas uas xav muaj npe.
Thaum kuv xav txog qhov no, ua rau kuv pib xav txog kuv lub neej dhau los thiab kuv nco txog tej lub sij hawm thaum cov txiv neej thiab cov poj niam zoo tau pab kuv txawm lawv tsis tau muaj npe los yog muaj hwj chim heev. Ib tug uas zoo li Sinploos yog kuv tus xib hwb seminary uas tau qhia kuv thaum kuv kawm qib kaum ib hauv lub tsev kawm ntawv high school. Tus txiv neej zoo no twb qhia seminary tau ob peb xyoos xwb, tiam sis nws pab kuv qhib kuv lub siab kuv thiaj li tau ib zaj lus tim khawv. Nws tsis yog tus xib hwb uas muaj npe nrov tshaj nyob hauv lub tsev kawm ntawv, tiam sis nws yeej npaj siab qhia thiab nws tshoov kuv lub siab tau ntev. Ib zaug uas kuv pom tus txiv neej no hauv 40 xyoo txij thaum nws tau qhia kuv yog thaum nws tuaj ntsib kuv ntawm kuv txiv lub ntees tuag. Muaj tseeb tiag, nws tsis tau ua li ntawd kom muaj npe los yog muaj hwj chim.
Kuv qhuas tus xib hwb uas zoo ntawd thiab ntau tus zoo ib yam li nws uas zoo tiag thiab tsis muaj siab xav ntxias. Kuv qhuas tus uas qhia Hnub Caiv Kev Kawm Vaj Lug Kub uas tsis qhia nws cov tub ntxhais kawm ntawv thaum hnub Sunday xwb tiam sis qhia thiab pab cov tub ntxhais kawm ntawv thaum nws caw lawv tuaj koom nws tsev neeg noj tshais. Kuv qhuas cov thawj coj ntawm cov tub ntxhais hluas uas tuaj saib tej yam ntxim saib ntxim ua uas cov tub ntxhais hluas ua hauv lawv tej pawg ntseeg. Kuv hwm tus txiv neej uas sau ntawv txhawb nqa nws cov neeg zej zog thiab tus poj niam uas sau tej daim Christmas thiab muab rau nws tsev neeg thiab phooj ywg uas xav tau leej twg tuaj xyuas lawv. Kuv qhuas tus tij laug uas pheej coj ib tug neeg zej zog mus ncig thaum lub caij uas tus neeg zej zog ntawd muaj Alzheimer’s—pab nws thiab nws tus poj niam ua tej yam txawv me ntsis.
Lawv tsis ua tej no kom lwm tus qhuas lawv. Cov txiv neej thiab cov poj niam no tsis xav kom muaj npe los yog muaj hwj chim. Lawv yog Yexus Khetos cov thwj tim, uas mus ua zoo tsis tu ncua, thiab ib yam li Sinploos, lawv sim ua rau lawv Leej Txiv Saum Ntuj Ceeb Tsheej zoo siab.
Ua rau kuv tu siab thaum kuv hnov txog tej tug neeg uas tsis ua hauj lwm pab los sis tsis koom lub koom txoos ntxiv vim lawv raug tso tsis ua ib txoj hauj lwm los yog lawv tsis tau ib txoj hauj lwm. Kuv cia siab hais tias muaj ib hnub lawv yuav kawm qhov uas kuv kawm thaum kuv yog ib tug tub txib hluas—hais tias kev pab lwm tus uas muaj nqi tshaj yog kev pab uas Vajtswv ib leeg pom xwb. Thaum peb nrhiav kom muaj raws li peb lub siab nyiam, peb puas nco txog Vajtswv lub siab nyiam?
Tej zaum ib txhia yuav hais tias, “Tiam sis kuv yuav tsum ua ntau heev kuv thiaj yuav ua neeg zoo li koj hais.” Yexus Khetos txoj moo zoo qhia tias peb hloov tau tej uas peb lub siab xav tau thiab peb txawj kawm thiab kho peb tus kheej. Thaum peb ua kev cai raus dej los koom Vajtswv pab yaj tseeb, peb pib ua tus txheej txheem kom ua neeg tshiab (saib 2 Kauleethaus 5:17; Mauxiyas 27:26). Txhua lub sij hawm peb rov qab ua kev khi lus ntawm kev cai raus dej thaum peb txais lub cim nco txog, peb yeej mus ze dua li qub kom muaj raws li lub hom phiaj ntawd.5 Thaum peb rau siab ua raws li kev khi lus ntawd, peb muaj zog nyuaj siab nrog cov uas nyuaj siab thiab nplij cov uas xav tau txoj kev nplij siab (saib Mauxiyas 18:9). Los ntawm kev khi lus ntawd, peb nrhiav tau kev tshav ntuj uas pab peb ua hauj lwm rau Vajtswv thiab ua raws li Nws cov lus txib, tsis hais kev hlub Vajtswv kawg siab kawg ntsws thiab kev hlub peb cov neeg zej zog ib yam li peb tus kheej.6 Los ntawm kev khi lus ntawd, Vajtswv thiab Yexus Khetos tsom kwm peb kom peb tsom kwm tau cov uas xav tau peb txoj kev pab (saib Mauxiyas 4:16; kuj saib nqes 11–15).
Nyob hauv kuv lub neej kuv tsuas xav kom kuv ob leej txiv zoo siab—leej txiv nyob hauv ntiaj teb no thiab Leej Txiv Saum Ntuj Ceeb Tsheej—thiab ua neeg zoo li Sinploos.7
Kuv ua kuv Leej Txiv Saum Ntuj Ceeb Tsheej tsaug vim muaj neeg zoo ib yam li Sinploos uas coj yam ntxwv rau peb sawv daws kom peb muaj kev cia siab. Los ntawm lawv lub neej, lawv ua tim khawv txog Leej Txiv Saum Ntuj Ceeb Tsheej uas hlub peb thiab tus Cawm Seej uas muaj siab hlub tshua peb. Kuv koom nrog lawv ua tim khawv ib yam li ntawd thiab cog lus tias kuv yuav sim ua neej zoo ib yam li lawv, los ntawm Yexus Khetos lub npe, amees.