Lelei Moni Lava ma Aunoa ma le Faa’ole’ole

E faanoanoa lava, sa i ai se taimi i lo’u olaga sa uunaia ai au e manao i viiga ma le pule. Sa amata moni lava i ni manatu mama. A o ou sauni e auauna atu o se faifeautalai faamisiona, sa avea lo’u uso matua ma se taitai sone i lana misiona. Sa ou faalogo i le tele o mea lelei e uiga ia te ia lea sa ou le manofo ai ae manao foi ia talanoa tagata faapena ia te au. Sa ou faamoemoe ma tatalo foi mo sea tulaga faapena.

O le mea e faafetai ai, a o ou auauna atu i lau misiona, sa ou aoaoa ai se lesona mamana. I le konafesi talu ai sa faamanatu mai ai ia te au lena lesona.

Ia Oketopa sa saunoa ai Peresitene Dieter F. Uchtdorf: “I le gasologa o lo’u olaga, sa ou maua ai le avanoa e soosoo tauau ai ma nisi o alii ma tamaitai sili ona atamamai ma popoto i lenei lalolagi. A o o’u talavou, sa faagaeetia lava au e i latou o e atamamai, talenia, faamanuiaina, ma viia e le lalolagi. Ae i le aluga o tausaga, ua ou iloa ai ua sili atu le faageetiaina o au e i latou o tagata lelei ma faamanuiaina o e lelei moni lava ma [aunoa ma le faa’ole’ole].”¹

O la’u tagata toa o le Tusi a Mamona o se faataitaiga atoa o se agaga lelei ma faamanuiaina sa lelei moni lava ma aunoa ma le faa’ole’ole. O Sepulona o se tasi o atalii o Alema le Itiiti. E sili atu lo tatou masani i ona uso o Helamana, lea na mulimuli i lona tama e fai ma tausi tusi o talafaamaumau ma le perofeta a le Atua, ma Korianetona, lea sa matua lauiloa o se faifeautalai sa manaomiaina nisi o fautuaga mai lona tama. Ia Helamana, sa tusia ai e Alema fuaiupu e 77 (tagai Alema 36–37). Ia Korianetona, sa ofo alofa atu i ai e Alema fuaiupu e 91 (tagai Alema 39–42). Ia Sepulona, lona atalii ogatotonu, sa na o le 15 fuaiupu na tusi i ai e Alema (tagai Alema 38). Ae o ana upu i na fuaiupu e 15 e mamana tele ma faagaeetia.

“Ma o lenei, lou atalii e, ou te faalagolago o le a ou maua le olioli tele ia te oe, ona o lou maumaututu ma lou faamaoni i le Atua; aua e pei ona e amata mai i lou talavou ona e vaai atu i le Alii lou Atua, ua faapea lava ona ou faamoemoe o le a aveaveai pea ona e tausia o ana poloaiga; aua e amuia lava o ia o le e tumau e oo i le iuga.

“Ou te fai atu ia te oe, lo’u atalii e, ua uma ona ou maua o le olioli tele ia te oe, ona o lou faamaoni ma lou filiga, ma lou onosai ma lou tali-tiga i totonu o tagata” (Alema 38:2–3).

E faaopoopo atu i lana tautalaga ia Sepulona, sa saunoa ai foi Alema e uiga ia te ia ma Korianetona. Fai mai Alema: “E te lei vaai ea i le maumaututu o lou uso, lona faamaoni, ma lona filiga i le tausiga o poloaiga a le Atua? Faauta, sa ia lei faia ea mo oe se faataitaiga lelei?” (Alema 39:1).²

E foliga mai o Sepulona o se atalii sa manao e faafiafia lona tama, sa alu atu ma faia le mea sa’o ona o le mea sa’o lea nai lo viiga, tofiga, malosiaga, mamalu, po o le pule. Atonu sa iloa e Helamana lenei mea e uiga i lona uso ma faaaloalo i ai, aua sa ia tuu atu i le vaavaaiga a Sepulona ia faamaumauga paia na ia maua mai lona tama. E mautinoa lava na faatuatuaina e Helamana Sepulona ona “o ia o se tagata amiotonu, ma sa savali ma le tonu o ia i luma o le Atua; ma sa ia tausi e fai mea lelei e le aunoa, e tausi poloaiga a le Alii lona Atua” (Alema 63:2). E pei ona foliga mai o uiga moni ia o Sepulona, ae e le o tele se mea na faamaumauina e uiga ia te ia mai le taimi na ia taulimaina ai faamaumauga paia seia oo ina ia tuu atu ia Helamana le atalii o Helamana (tagai Alema 63:11).

O Sepulona sa lelei moni lava ma e aunoa ma le faa’ole’ole. Sa avea o ia ma se tagata na ositaulagaina lona taimi, taleni, ma taumafaiga e fesoasoani ai ia siitia isi ona o se alofa mo le Atua ma ona uso a tagata (tagai Alema 48:17–19; 49:30). Ua atoatoa le faamatalaina o ia i upu a Peresitene Spencer W. Kimball: “O tamaitai ma alii maoae e naunau atili i taimi uma ia auauna atu i lo le maua o le pule.”³

I se lalolagi i le mea o loo saili ai viiga, tofiga, malosiaga, mamalu, ma le pule i soo se auala e mafai ai, ou te faamamaluina ai na agaga lelei ma faamanuiaina o ē e lelei moni lava ma e aunoa ma le faa’ole’ole, o i latou o loo uunaia e se alofa i le Atua ma o latou tuaoi, i latou o tamaitai ma alii maoae o e “e naunau atili i taimi uma ia auauna atu i lo le maua o le pule.”

O loo i ai i aso nei nisi e taumafai ia tatou talitonu o la tatou sailiga mo mea taua ua na o le mauaina o tofiga ma le pule e mafai ona faamalieina ai. Ae, o le mea e faafetai ai, e toatele i latou e le o faaseseina e lenei manatu. Latou te mauaina mea taua i le saili atu ia lelei moni lava ma e aunoa ma le faa’ole’ole. Ua ou iloaina i latou na i soo se tulaga o le olaga ma i le tele o faatuatuaga eseese. Ma ou te maua le toatele o i latou i soo liua moni o Keriso.⁴

Ou te faamamalu ia i latou o e auauna atu ma le le manatu faapito i vaiaso taitasi i uarota ma paranesi i le lalolagi atoa e ala i le faia o le tele o mea e faataunuu ai valaauga. Ae o valaauga e omai ma toe o atu. O le isi foi mea e sili ona faagaeetia ai au o le toatele o e e aunoa ma ni valaauga aloaia latou te sailia ni auala e auauna atu ai pea ma siitia isi. E vave alu atu se tasi uso i le lotu e faatulaga nofoa ma nofo pe a maea e toe faamama le falesa. O se tasi o tuafafine e filifili lava o ia e nofo i talaane o se tuafafine tauaso i lana uarota e le gata na te faafeiloai ia te ia ae ia mafai foi ona ia usu leotele viiga ina ia mafai ai e le tuafafine tauaso ona faalogo i upu ma pese mai ai. Afai e te tagatagai totoa i lau uarota po o le paranesi, o le a e mauaina ni faataitaiga faapenei. O loo i ai lava i taimi uma tagata latou te iloaina ē e manaomia le fesoasoani ma le taimi e tuu atu ai.

Masalo o la’u lesona muamua lava e uiga i Au Paia e lelei moni lava e aunoa ma le faa’ole’ole sa aoaoina a o avea au ma se faifeautalai talavou. Sa ou masii atu i se eria faatasi ma se faifeautalai sa ou le iloaina. Sa ou faalogo o talanoa isi faifeautalai e uiga i lona lei mauaina o se tofiga faaletaitai ma lona tauivi ai i le gagana Korea e ui lava sa umi se taimi o i ai i le atunuu. Ae ina ua faasolo ona ou iloaina lenei faifeau, sa ou iloa ai o ia o se tasi o faifeautalai sili ona usiusitai ma faamaoni ua ou iloa. Sa ia suesue pe a oo i le taimi e suesue ai; sa ia galue pe a oo i le taimi e galue ai. Sa ia tuua le fale i le taimi sa’o ma foi mai i le taimi sa’o. Sa filiga o ia i le suesueina o le FaaKorea e ui lava sa matua patino le faigata o le gagana ia te ia.

Ina ua ou iloaina o faamatalaga sa ou faalogo i ai e le moni, sa ou lagonaina e pei lava ua faamasino sese tagata i lenei faifeautalai faapea e le faamanuiaina. Sa ou manao e tau atu i le misiona atoa le mea ua ou iloaina e uiga i lenei faifeau. Sa ou faasoa atu i la’u peresitene o le misiona lo’u manao ia faasa’o le le malamalama lenei. O lana tali, “O loo silafia e le Tama Faalelagi lenei alii talavou o se faifeautalai faamanuiaina, ma e faapena foi a’u.” Sa ia faaopoopo mai, “Ma o lea foi ua e iloaina, o ai la se isi tagata e sili ona taua?” Sa aoao au e lenei peresitene atamai o le misiona i le mea sa taua i le auaunaga, ma sa le o viiga, tofiga, malosiaga, mamalu, po o le pule. O se lesona sili lea mo se faifeautalai talavou sa taulai tele atu i ni faalagiga.

I le manatuaina ai o lenei lesona, sa amata ai ona ou toe tepa i tua i lou olaga ma vaai pe faafia ona faatosinaina a’u e alii ma tamaitai o ē i lena taimi sa leai ni faalagiga tele po o ni tofiga. O se tasi o na tagata e pei o Sepulona, o la’u faiaoga seminare i le taimi o o’u tausaga amata i le aoga maualuga. Sa faiaoga lenei tamalii lelei i le seminare mo na o le lua pe tolu tausaga, ae sa ia tatalaina lo’u loto i se auala na fesoasoani ai ia te au ia maua se molimau. Atonu sa le o ia o se faiaoga na sili ona lauiloa i le aoga, ae sa ia saunia i taimi uma ma o ana faatosinaga ia te au sa mamana ma tumau. O se tasi o na taimi laiti sa ou vaaia ai lenei tamalii i totonu o tausaga e 40 talu ona ia aoaoina au, o le taimi na sau ai o ia e asi au i le maliu o lo’u tama. O le mea moni, o se faatinoga lena sa lei uunaia e se faalagiga po o se pule.

Ou te faamamaluina lena faiaoga tuuto ma le tele o tagata e pei o ia o ē lelei moni lava ma e aunoa ma le faa’ole’ole. Ou te faamamaluina le faiaoga o le Aoga Sa e le na o le taimi o le vasega o le Aso Sa na te aoaoina ai ana tamaiti aoga ae aoaoina foi ma faatosinaina nei lava tamaiti aoga e tasi e ala i le valaauliaina o i latou ia auai atu i lona aiga mo se mālū taeao. Ou te faamamaluina taitai o le autalavou e auai i gaoioiga faaleaganuu ma taaloga faatasi ma alii talavou ma tamaitai talavou i o latou uarota. Ou te faamamaluina le tagata na te tusia ni tusi faamalosiau i tuaoi ma tamaitai e le na o le lafoina o kata Kerisimasi i le meli ae tauaao atu e ia lava i tagata o le aiga ma uo o loo manaomia se asiasiga. Ou te faamamaluina le uso na te fai ma masani le ave o se tuaoi e faatietie i taimi faigata o se tuaoi—ma tuuina atu ia i laua uma ma lona toalua se suiga sili ona manaomia o galuega faisoo o le aso.

O nei mea e le o faia ona o viiga ma mamalu. O nei alii ma tamaitai e le o faaosofia e fai ni mea ina ia maua ai ni faalagiga po o se pule. O i latou o ni soo o Keriso, o loo o atu ma faia e le aunoa le lelei, ma e pei o Sepulona, o loo latou taumafai e faafiafia lo latou Tama i le Lagi.

Ou te faanoanoa pe a ou faalogo atu i nisi ua le toe galulue i tofiga pe le toe auai i le lotu ona ua faamalolo mai se valaauga pe ua le tofiaina foi i se tofiga po o se valaauga na faufau i ai. Ou te faamoemoe o le a i ai se aso latou te aoaoina ai le lesona lava e tasi sa ou aoaoina a o ou avea ma se faifeautalai talavou—o le auaunaga e sili ona taua e masani lava e na o le Atua na te faamamaluina. I la tatou sailiga o mea tatou te mananao i ai, pe ua galo ea ia i tatou mea e finagalo i ai le Atua?

Atonu e fai mai nisi, “Ae e matua tele lava sa’u taumafaiga ia avea ai e pei o i latou ua e faamatalaina.” O le tala fiafia o le talalelei a Iesu Keriso e faapea, o manaoga o o tatou loto e mafai ona suia ma o o tatou faanaunauga e mafai ona aoaoina ma faaleleia. A papatisoina i tatou i le lafu moni a le Atua, ua tatou amataina le faagasologa o le avea ma ni tagata fou (tagai 2 Korinito 5:17; Mosaea 27:26). O taimi uma tatou te faafouina ai le feagaiga o le papatisoga e ala i le aai ma feinu i le faamanatuga, tatou te latalata atili ai lava i lena sini silisili.⁵ A tatou tumau i lena feagaiga, tatou te mauaina le malosi e faanoanoa ai ma i latou o loo faanoanoa ma faamafanafana ia i latou o loo manaomia le faamafanafanaga (tagai Mosaea 18:9). I lena feagaiga, tatou te maua ai le alofatunoa lea e mafai ai ona tatou auauna atu i le Atua ma tausi Ana poloaiga, e aofia ai le alofa atu i le Atua ma o tatou loto atoa ma le alofa atu i o tatou tuaoi e pei o i tatou ia i tatou lava.⁶ I lena feagaiga, e fesoasoani mai ai le Atua ma Keriso ia i tatou ina ia mafai ai ona tatou fesoasoani atu foi ia i latou o loo manaomia la tatou fesoasoani (tagai Mosaea 4:16; tagai foi fuaiupu 11–15).

Na o le pau lava le mea ou te manao ai i le olaga o le faafiafia lea o o’u tama—tama faalelalolagi ma faalelagi—ma avea atili e faapei o Sepulona.⁷

Ou te faafetai i lo’u Tama Faalelagi mo tagata pei o Sepulona e ana faataitaiga ua ofo mai ai ia te au—ma i tatou uma—le faamoemoe. I o latou olaga, tatou te vaaia ai se molimau a se Tama i le Lagi alofa ma se Faaola popole ma agaalofa. Ou te faaopoopo atu la’u molimau i a latou molimau faatasi ai ma se augani ia tauivi e avea atili e faapei o i latou, i le suafa o Iesu Keriso, amene.