Waraki ni Gone Cidroi

A vakayagataka na Nona ilesilesi e vuravura na iVakabula me vakavulica kina na Nona kaukauwa ni veivueti kei na veivakabulai. Ena dua na gauna ena wase 15 ni Luke mai na iVola Tabu Vou, a vakalewai dina ena nona kana ka dau tiko vata kei ira na ivalavala ca (raica na Luke 15:2). A vakayagataka na veivakalewai oqo na iVakabula me i madigi ni nona vakavulici keda kece ena ka meda vakayacora vei ira era sa goletani mai na nodra gaunisala.

A sauma yani vei ira era vakalewai Koya ena Nona tarogi ira ena rua na taro bibi:

“Ko cei vei kemudou na tamata sa dua na drau na nona sipi, kevaka sa vakayalia e dua vei ira ena sega beka ni biuta laivi tu na ciwasagavulu ka ciwa ena veico, ka laki vakasaqarai koya sa yali, me kunea mada?” (Luke 15:4).

“Se ko cei na yalewa sa tini na nona tiki ni siliva, kevaka sa vakayalia e dua na tikina, sa sega beka ni tutuvaka na cina, ka taviraka na vale, ka vakasaqara matua, me kunea mada?” (Luke 15:8).

A qai vakavulica na iVakabula na vosa vakatautauvata ni gone cidroi. E sega ni baleta na 100 na sipi se na 10 na tiki ni siliva na vosa vakatautauvata oqo; e baleta na luvena tagane vakamareqeti e sa yali. Ena vosa vakatautauvata oqo, na cava e vakavulica na iVakabula me baleta na ka meda cakava vei ira na lewe ni matavuvale ke dua vei ira e goletani mai na nona gaunisala?

A kaya vei tamana na gone cidroi ni sa vinakata sara ga o koya na nona ivotavota ni iyau. Sa via biuta o koya na veimaroroi e vale kei nona matavuvale ka laki vaqara na marau e vuravura (raica na Luke 15:12–13). Yalovinaka raica ena nona vosa vakatautauvata oqo na iVakabula a sauma ena yalololoma na tamani gone ena nona solia vua na nona ivotavota. Sega ni vakataratututaki ni a tovolea na tamani gone me vakayacora na ka kece e rawa me kua kina ni lako. Ia, ena gauna sa vakayacora kina na luvena tagane uabula oqo na nona digidigi, sa laivi koya o tamana me lako. Sa qai vakaraitaka o tama na loloma dina, ka mai vakararai ka wawa toka yani (raica na Luke 15:20).

A yaco e dua na ka vata vakaoqo kina noqu matavuvale. Keitou a susugi cake o irau na taciqu tagane yalodina, ganei keitou totoka kei au vei rau e rua na itubutubu ivakaraitaki vinaka. A vakavulici vei keitou e vale na kosipeli, keitou a yacova vinaka yani na gauna ni uabula, ka keimami a vauci kece kei ira na dui wati keimami ena valetabu. Ia, ena 1994 na ganei keitou o Susan, a vakayalolailaitaki ena Lotu kei na so na kena ivakavuvuli. E vakayarayarataki mai vei ira era a vakalialiai ka vakalewai ira na iliuliu ni Lotu eliu. A vakatara me malumalumu yani na nona vakabauti ira na parofita kei na iapositolo bula. Dua ga na gauna lekaleka, sa ulabaleta na nona vakabauta na nona vakatitiqa, ka digia sara me sa biuta na Lotu. E vakadonuya o Susan meu wasea na nona italanoa ena vakanuinui ni na vukea e so.

Keitou a vakadrukai, o irau na taciqu o au kei na tinai keitou. Keitou sega ni vakasamataka rawa se cava a vakavuna vua me biuta na nona vakabauta. Sa vaka me kavoro sara na yaloi tinai keitou ena digidigi oqo nei ganequ.

Keitou a sa veiqaravi oti vakabisopi kei na peresitedi ni kuoramu, o rau na taciqu kei au, ka keitou sa vakila oti na rekitaki ni qaqa kei ira na lewe ni tabanalevu kei na kuoramu ena neitou biuti ira na lewe ciwasagavulu ka ciwa ka vaqara na dua. Ia, vei ganei keitou, na neitou sasaga me keitou vueti koya ka sureti koya lesu mai sa qai vaka me biligi koya vakayawa tikoga yani.

Ni keitou vaqara na veidusimaki vakalomalagi me keitou vukei koya vakacava, e matata ga mai ni sa dodonu me keitou muria ga na ivakaraitaki ni tama ena vosa vakatautauvata ni gone cidroi. Sa mai vakayacora yani o Susan na nona digidigi, ka sa dodonu me keitou laivi koya me vaka ena vosa vakatautauvata me lako—ia me kila deivaki ka vakila tale tikoga o koya ni keitou lomani koya dina. Ia, ena loloma kei na veikauwaitaki e vakavoui, keitou vakararai tu, ka wawa.

E sega ni mudu na nona lomani Susan ka kauwaitaki koya o tinaqu. Veigauna e dau lako i valetabu o tinaqu, ena dau biuta tiko na yacai Susan ena lisi ni masumasu, ka sega ni yali nona vakanuinui. E rau tiko voleka duadua vei Susan e California, o tuakaqu tagane kei watina, rau dau sureti koya kina soqo kece vakamatavuvale. Eratou dau vakarautaka na ivakayakavi e nodra vale e veiyabaki ena siganisucu nei Susan. E rau qarauna me ratou dau veitaratara tikoga kei koya ka vakakina me dau kila tikoga na nodratou lomani koya dina tiko.

Rau a dolele yani o taciqu tagane kei watina vei ira na luvei Susan e Utah ka dau maroroi ira ka lomani ira. Rau dau qarauna mera dau sureti tu ga na luvena ena veisoqoni vakamatavuvale, ka ni qai yaco mai na gauna vei makubui Susan me papitaiso, a tu ekea o taciqu me vakayacora na cakacaka vakalotu. E ratou tu talega na nona dauveituberi ni matavuvale kei na dauveisiko ka ratou sega ni soro.

Ena gauna rau a gole kina i kaulotu na luvei keirau vakakina nodra vakamau, a sureti kina o Susan me tiko talega ena marau vakamatavuvale oqo. Keitou dau tovolea vagumatua tu ga me ra vakayacori tiko na veisoqoni vakavuvale me rawa ni dau tiko ga kina kei keitou o Susan kei iratou na luvena ka vaka me ratou sa dau kila mai, na neitou lomani iratou ka ratou sa lewe ni neitou matavuvale. Ena gauna a ciqoma kina e dua na diqiri torocake o Susan ena univesiti e California, keimami a tu kece kina me keimami tokoni koya ena nona sa taurivola. Dina ga ni keitou sega ni ciqomi ira rawa kece na nona digidigi, sa rawa vinaka tu ni keitou ciqomi koya. Keitou a lomana, vakararai tu, ka wawa.

Ena 2006, ni oti e 12 na yabaki ni nona a mai biuta na Lotu o Susan, rau a toki mai California o luvequ yalewa o Katy kei watina me mai vuli ena koronivuli ni vuli lawa. Ratou a mai korovata sara ga kei Susan. Rau a raici nodrau nei Susan yani na gone oqo me baleta nona veivuke kei na veitokoni, ka rau lomani koya sara. A veivuke o Susan ena nona daumei na makubui keirau yalewa yabaki rua o Lucy, ka dau itavi nei Susan me vukei Lucy ena nona masu ni bogi. A qiriti au mai o Katy ka qai taroga se na lesu tale mai kina Lotu o Susan. Au vakadeitaki niu kila ni na yaco ka sa dodonu me keitou vosota tu ga. Ni mai oti tale e yabaki tolu, ena loloma tomani tikoga, keitou a vakararai tu ga, ka wawa.

Ena ono na yabaki sa oti ena macawa vata oqo, keirau a dabe toka kei watiqu, o, Marcia, kau dabe toka ena imatai ni iyatu ni Vale ni Koniferedi qo. Au sa na tokoni meu dua na Vakaitutu Raraba ena siga oya. O Marcia, ka dauveitaratara tu ga kei na Yalotabu a vola mai vei au e dua na ivola ka volai koto kina, “Au nanuma ni sa kena gauna oqo me sa lesu tale mai o Susan.” A vakatura sara o Katy noqu goneyalewa meu sa biubiu ka qiriti Susan me sureti koya me mai sarava na koniferedi ena siga oya.

Ena veivakauqeti mai vei rau na marama cecere e rua oqo, au a gole yani kina foya ka qiriti ganequ. Au a vakau itukutuku vua kau sureti koya sara yani me gole mai kina soqoni ni koniferedi oya. A taura na itukutuku. A neitou marau levu, na nona a taleitaka me sarava na soqoni kece ni koniferedi. A vakarogoci ira na parofita kei na iapositolo ka dau taleitaka tu mai liu na rogoci ira. A mai raica eso na yaca vovou ka sega ni dau rogoca tu mai liu, me vakataki Peresitedi Uchtdorf kei Elders Bednar, Cook, Christofferson, kei Andersen. Ena gauna oqori kei na so tale na gauna vakarautaki mai lagi, o ganequ—me vakataki koya na gone cidroi—a lesu mai (raica na Luke 15:17). Na nodra vosa na parofita kei ira na iapositolo kei na nodratou loloma na nona matavuvale a yavalati koya me tekivu lesu ki vale. Ni oti e 15 na yabaki na luvei keitou, ganei keitou ka yali tu sa qai kune tale. Sa qai mai cava na vakararai tu kei na wawa.

A vakamacalataka o Susan na ka a mai yaco oqo me vaka saraga na nona a mai vakamacalataka o Liai ena iVola i Momani. A laiva na titoko kaukamea ka qai kunei koya ena butobuto loaloa (raica na 1 Nifai 8:23). A kaya ni a sega ni kila ni sa yali tu me yacova ni sa qai vakayadrati na nona vakabauta ena Rarama i Karisito, ka mai cilava vinaka yani na duidui levu ni bula vakavuravura ka mai bula tiko yani kina kei na ka e vakarautaka tu vua na Turaga kei iratou na nona matavuvale.

A yaco e dua na cakamana ena loma ni yabaki ono sa sivi. Sa mai vakavoutaki kina na ivakadinadina i Susan me baleta na iVola i Momani. Sa taura sara na nona ivolatara ni valetabu. A veiqaravi vakadua na dauveiqaravi ni valetabu, ka sa vakavulica tiko oqo na kalasi ni iVakavuvuli ni Kosipeli ena nona tabanalevu. A dolavi vei ira na luvena kei ira na makubuna na katubaleka kei lomalagi, ka dina ga ni a mai so kina na kena isau bibi, e vaka ga me a sega ni biubiu.

Eso vei kemuni, me vakataki iratou na matavuvale na Nielson, e tu eso ena matavuvale era sa mai yali tu yani ena nodra gaunisala. Na ivakasala ni iVakabula vei kemuni kece na tiko e 100 na nomuni sipi moni laivi ira tu mada na ciwasagavulu ka ciwa ka lako vua ka laki vueti koya mai e dua. Sa nona ivakasala vei kemuni ka tiko e tini na nomuni tiki ni siliva ka vakayalia e dua sai koya moni vakasaqaqara me yacova nomuni kunea. Kevaka me o koya e yali, e luvemu se tacimu se ganemu, ka sa mai digia me biubiu, keitou sa vulica ena neitou matavuvale, ni ke sa mai oti na veika kece keitou rawa ni cakava, keitou na lomani koya ga e vuni yaloi keitou ka vakararai tu, ka masu, ka qai laiva me vakaraitaki na liga ni Turaga.

Rairai na lesoni bibi duadua ka vakavulica vei au na Turaga ena ka e mai yaco oqo, a yaco ena dua na neitou vuli ivolanikalou vakamatavuvale ni oti na nona a mai biuta na Lotu na ganequ. Na luvei keirau o David a wiliwili tiko ena neitou vulica vata tiko na Luke 15. Ena nona mai wilika na vosa vakatautauvata ni gone cidroi, a duatani na kena irogorogo vei au ena siga oya na noqu a dau rogoca tu eliu. Au dau raici au tu vakaikoya na luvena tagane ka tiko ga e vale. Me vaka a wilika ena mataka ni siga oya o David, au a mai vakila yani ena siga oya ni sai au na gone cidroi. Eda sa sega kece ni yacova na ka e vakarokorokotaki kina na Tamada (raica na Roma 3:23). Eda gadreva kece na nona Veisorovaki na iVakabula me vakabulai keda. Eda sa yali kece ka gadreva meda kunei. Ena siga oya a vukei au na ivakatakila oqo meu kila ni keirau a gadreva ruarua kei ganequ na loloma ni iVakabula kei na Nona Veisorovaki. Keirau a gole vata tiko ena sala i vale kei Susan.

Ena nona vosa vakatautauvata na iVakabula e vakamacalataka o Koya na nona kidavaki luvena cidroi o tamana e kaukauwa sara, kau vakabauta ni na rawa ni yaco oya me ivakamacala talega baleti kedaru kei na Tamada ena gauna daru sa na lesu kina ki na nodaru itikotiko vakalomalagi. E vakavulici keda me baleta e dua na tama e loloma, ka vakararai tu, ka wawa. Sa ikoya oqo na vosa ni iVakabula: “Ia ni sa yawa sara, sa raici koya ko tamana, a sa lomana, ka cici, ka mokota, ka reguca” (Luke 15:20).

Me nodaru na ivakatakila me kilai kina na sala vinaka duadua mera vakalesui mai kina o ira era sa yali tu ena noda bula, ena gauna e gadrevi kina, me tu vei kedaru na vosota kei na loloma nei Tamadaru Vakalomalagi kei na Luvena, o Jisu Karisito, ena gauna vata daru loloma, vakararai tu, ka waraka tu kina na gone cidroi. Ena yaca i Jisu Karisito, emeni.