2010–2019
Tos tus Neeg Loj Leeb
April 2015


Tos tus Neeg Loj Leeb

Thov kom peb yuav txais kev tshwm sim kom peb paub yuav ua li cas rau cov uas twb poob lawv txoj kev ntseeg nyob hauv peb lub neej.

Tus Cawm Seej Yexus Khetos twb qhia txog Nws lub hwj chim kho mob thiab kev txhiv dim thaum nws qhuab qhia tib neeg. Muaj ib lub sij hawm nyob hauv phau Lukas tshooj 15 nyob hauv Phau Tshiab, tib neeg thuam nws vim nws noj mov thiab siv sij hawm nrog cov neeg uas ua txhaum (saib Lukas 15:2). Tus Cawm Seej siv tej kev thuam no kom qhia peb hais tias peb yuav tsum ua li cas rau cov uas tau poob lawv txoj kev ntseeg.

Nws nug ob lo lus nug tseem ceeb rau cov uas thuam Nws:

“Nej cov yog leej twg muaj ib puas tus yaj, yog ib tug ploj lawm, tus tswv yuav ua li cas? Nws yeej yuav tso cuaj caum cuaj tug rau tom hav zaub, thiab mus nrhiav tus yaj uas ploj lawm kom tau. (Lukas 15:4).

“Los sis muaj ib tug poj niam muaj kaum lub nyiaj, yog ib lub poob lawm, nws yuav ua li cas? Nws yuav taws teeb, cheb tsev thiab tshawb nrhiav txhua qhov kom tau lub nyiaj ntawd.” (Lukas 15:8).

Ces tus Cawm Seej qhia txog zaj lus piv txwv hais txog tus tub ua txhaum. Zaj lus piv txwv tsis hais txog 100 tus yaj los yog 10 lub nyiaj; zaj no hais txog ib tug tub muaj nqi heev uas poob nws txoj kev ntseeg. Dhau los ntawm zaj lus piv txwv no, tus Cawm Seej qhia kom peb ua li cas thaum ib tug ntawm peb tsev neeg poob nws txoj kev ntseeg?

Tus tub ua txhaum qhia nws txiv tias nws xav tau nws lub cuab tam tam sim ntawd. Nws xav khiav ntawm nws tsev thiab tsev neeg thiab nrhiav tej yam hauv lub ntiaj teb (saib Lukas 15:12–13). Cia li saib hais tias nyob hauv tus Cawm Seej zaj lus piv txwv leej txiv twb pub nws lub cuab tam tej uas yog nws tus tub feem. Muaj tseeb tiag leej txiv twb ua txhua yam uas nws ua tau yaum nws tus tub kom tsis txhob mus. Tiam sis, thaum tus tub txiav txim siab lawm, leej txiv uas muaj tswv yim cia nws mus. Ces leej txiv muaj kev hlub tiag tiag, thiab nws tos ntsoov (saib Lukas 15:20).

Kuv tsev neeg muaj li no thiab. Kuv ob tug kwv tij, ib tug muam, thiab kuv muaj niam txiv zoo. Nkawd qhia peb txog txoj moo zoo nyob hauv peb tsev neeg, peb twb loj hlob tiav lawm, thiab peb plaub leeg twb yuav txiv yuav poj niam nyob hauv lub tuam tsev. Tiam sis, thaum xyoo 1994 peb tus muam, Susan, tsis zoo siab rau lub Koom Txoos thiab ib txhia ntawm tej lus qhia ntawd. Cov uas thuam thiab cem cov thawj coj ntawm lub Koom Txoos thaum ntxov ntxias nws. Nws cia nws txoj kev ntseeg cov yaj saub thiab cov thwj tim ploj mus. Sij hawm dhau mus es nws tej kev ua xyem xyav kov yeej nws txoj kev ntseeg, thiab nws xaiv kom tso lub Koom Txoos tseg. Susan twb tso cai rau kuv qhia nws zaj seb puas yuav pab tau lwm tus.

Kuv ob tug kwv tij thiab kuv thiab kuv niam uas yog poj ntsuam twb poob siab heev. Peb yeej tsis to taub muaj xwm txheej dab tsi uas ua rau nws tso nws txoj kev ntseeg tseg. Tej yam uas kuv tus muam xaiv ntshe twb ua rau peb niam lub siab ntais rhe.

Kuv ob tug kwv tij thiab kuv twb ua npisov thiab tej pawg thawj tswj hwm, thiab peb paub txog kev xyiv fab thaum cov mej zeej hauv pawg ntseeg ncaim cuaj caum tus neeg thiab nrhiav tib tug neeg xwb. Tiam sis, rau peb tus muam, qhov uas peb xav cawm nws thiab caw nws rov qab tuaj ua rau nws txav mus deb deb ntxiv xwb.

Thaum peb thov Vajtswv kom peb yuav paub ua li cas rau nws, ua rau peb paub hais tias peb yuav tsum ua raws li tus yam ntxwv ntawm leej txiv nyob hauv zaj lus piv txwv txog tus tub ua txhaum. Susan twb xaiv tseg lawm, thiab peb yuav tsum cia nws mus—tiam sis nws yuav tsum paub tias peb hlub nws tiag tiag. Yog li ntawd, nrog kev hlub thiab kev ua siab zoo, peb tos ntsoov.

Kuv niam yeej tseem hlub Susan. Txhua lub sij hawm kuv niam mus rau lub tuam tsev, nws sau Susan lub npe rau daim ntawv thov Vajtswv, nws yeej tsis poob siab. Kuv tus tij laug thiab nws tus poj niam, uas nyob ze Susan nyob hauv California, caw nws txhua zaus nkawd tsev neeg tau ua ib yam dab tsi. Nkawd tau ua hmo noj nyob hauv nkawd tsev txhua xyoo thaum txog Susan hnub yug. Nkawd ua tib zoo sib tham nrog nws txhua lub sij hawm thiab ua kom nws paub tias nkawd hlub nws tiag tiag.

Kuv tus kwv thiab nws tus poj niam ncav tes pab Susan cov me nyuam nyob hauv Utah thiab saib xyuas thiab hlub lawv. Nkawd ua tib zoo caw nws cov me nyuam tuaj rau nkawd tsev neeg tej kev sib sau ua ke, thiab thaum txog lub sij hawm yuav muab Susan tus ntxhais xeeb ntxwv ua kev cai raus dej, kuv tus kwv twb ua txoj kab ke ntawd. Susan kuj muaj cov mus qhia tom tsev thiab cov mus saib xyuas tom tsev uas yeej tsis tsum.

Thaum peb cov me nyuam mus ua tub txib thiab yuav poj niam yuav txiv, peb caw Susan tuaj koom peb tsev neeg txoj kev ua koob tsheej. Peb tsev neeg rau siab ua tej yam ntxim saib ntxim ua kom Susan thiab nws cov me nyuam yuav muaj sij hawm nrog peb thiab kom lawv paub tias peb hlub lawv thiab lawv yog peb tsev neeg. Thaum Susan tau txais ib daim ntawv pov thawj siab los ntawm ib lub tsev kawm ntawv qib siab hauv California, peb sawv daws nyob ntawd kom txhawb nqa nws thaum nws kawm tas lawm. Txawm peb txhawb nqa tsis tau txhua yam uas nws xaiv, peb yeej txhawb nqa tau nws. Peb hlub nws, saib nws, thiab tos ntsoov.

Thaum xyoo 2006, 12 xyoos tom qab Susan tso lub Koom Txoos tseg, wb tus ntxhais Katy tsiv tsev nrog nws tus txiv mus rau California thaum nws kawm ntawv ua lij choj. Nkawd nyob tib lub nroog nrog Susan. Ib khub niam txiv no tau thov nkawd phauj Susan pab thiab txhawb nqa nkawd, thiab nkawd hlub nws. Susan tau pab tu wb tus ntxhais xeeb ntxwv uas muaj ob xyoos, hu ua Lucy, thiab Susan tau pab Lucy xyaum thov Vajtswv txhua hmo. Muaj ib hnub Katy hu kuv thiab nug seb kuv puas xav tias Susan yuav rov qab los koom lub Koom Txoos. Kuv qhia nws hais tias kuv yeej xav tias nws yuav rov qab los thiab peb yuav tsum ua siab ntev xwb. Peb xyoos dhau mus, es peb tseem hlub, saib thiab tos ntsoov.

Rau xyoo dhau los, kuv tus poj niam, hu ua Marcia, thiab kuv zaum ntawm thawj kab rooj zaum ntawm lub Tsev rau Rooj Sab Laj no. Hnub ntawd lawv yuav txhawb nqa pom zoo rau kuv ua ib tug Tuam Thawj Coj. Marcia, uas yeej txawj mloog tus Ntsuj Plig hais, tau sau ntawv rau kuv uas hais tias, “Kuv xav tias twb txog lub sij hawm rau Susan rov qab los.” Kuv tus ntxhais Katy hais kom kuv mus hu Susan thiab caw nws saib lub tuam rooj sab laj hnub ntawd.

Vim kuv txais kev tshoov siab los ntawm ob tug poj niam zoo no, kuv tau mus rau hauv qhov chaw tos nyob sab nraud thiab hu kuv tus muam. Kuv kaw ib zaj thiab caw nws saib ib tuas ntawm lub tuam rooj sab laj. Nws tau txais kuv zaj xov. Peb zoo siab heev, vim nws tau xav saib txhua tuas ntawm lub rooj sab laj. Nws mloog cov yaj saub thiab cov thwj tim uas nws ib txwm hlub. Nws tau mloog cov neeg uas nws tsis tau mloog dhau los, xws li Thawj Tswj Hwm Uchtdorf thiab Txwj Laug Bednar, Cook, Christofferson, thiab Andersen. Thaum lub sij hawm no thiab lwm lub sij hawm uas Vajtswv saib xyuas, kuv tus muam—ib yam li tus tub ua txhaum—nws nco dheev (saib Lukas 15:17). Cov lus ntawm cov yaj saub thiab cov thwj tim thiab nws tsev neeg txoj kev hlub twb ua rau nws hloov siab thiab pib rov qab mus tsev. Twb nrhiav tau peb tus muam 15 xyoos tom qab nws poob zoo. Tsis tas saib thiab tos ntsoov ntxiv lawm.

Susan piav txog lub sij hawm no ib yam li Lihais piav nyob hauv Phau Ntawv Maumoos. Nws tau muab tus nqaj hlau tso tseg thiab nws nyob hauv kev tsaus ntuj uas muaj huab zig niab (saib 1 Nifais 8:23). Nws hais tias nws tsis tau paub tias nws poob lawm mus txog thaum Khetos txoj Kev Kaj ua rau nws txoj kev ntseeg rov qab los, es qhov ci ntsa iab ua rau nws pom meej tias nws raug xwm txheej dab tsi hauv lub ntiaj teb thiab tus Tswv thiab nws tsev neeg xav muab dab tsi rau nws.

Txij thaum rau xyoo tas los muaj ib qho txuj ci tseem ceeb tshwm sim. Susan rov qab muaj ib zaj lus tim khawv txog Phau Ntawv Maumoos. Nws tau txais nws daim ntawv tso cai nkag tuam tsev. Nws ua hauj lwm ua kab ke hauv lub tuam tsev, thiab nws qhia txoj Moo Zoo Lus Qhuab Qhia nyob hauv nws pawg ntseeg. Ntuj qhib plho rau nws cov me nyuam thiab cov me nyuam xeeb ntxwv thiab txawm muaj tej xwm txheej nyuaj, zoo li nws tsis tau tso tseg hlo li.

Nej ib txhia, ib yam li tsev neeg Nielson, muaj cov uas tau ploj lawm. Tus Cawm Seej qhia txhua tus uas muaj 100 tus yaj kom lawv ncaim cuaj caum cuaj tus thiab mus nrhiav thiab cawm tus uas tau ploj. Nws qhia cov uas muaj 10 lub nyiaj thiab ua ib lub poob lawm kom lawv nrhiav mus txog thaum yus nrhiav tau. Thaum tus uas tau ploj lawm yog nej tus tub los sis tus ntxhais, nej tus kwv tij los sis nej tus muam thiab nws tau xaiv kom tso tseg lawm, peb tau kawm nyob hauv peb tsev neeg, tom qab peb ua txhua yam peb ua tau, peb yuav tsum hlub tus neeg ntawd kawg siab kawg ntsws thiab peb saib, peb thov Vajtswv, thiab peb tos ntsoov kom txog thaum tus Tswv muab nws txhais tes tshwm sim.

Tej zaum zaj tseem ceeb tshaj plaws uas tus Tswv qhia kuv txog tus txheej txheem no yog thaum peb tsev neeg kawm vaj lug kub tom qab kuv tus muam tau tso lub Koom Txoos tseg. Kuv tus tub David nyeem vaj lug kub thaum peb kawm Lukas 15 ua ke. Thaum nws nyeem zaj lus piv txwv txog tus tub ua txhaum, zoo li hnub ntawd kuv hnov zaj ntawd txawv lwm lub sij hawm uas kuv tau hnov. Xyov ua cas, tiam sis kuv yeej xav tias kuv zoo li tus tub uas tsis tau mus. Thaum David nyeem vaj lug kub tag kis sawv ntxov ntawd, ua rau kuv paub hais tias kuv yog tus tub ua txhaum. Peb txhua tus tu ncua Vajtswv lub hwj chim (saib Loos 3:23). Peb txhua tus xav tau tus Cawm Seej txoj Kev Theej Txhoj kom kho peb. Peb txhua tus poob zoov thiab yuav tsum muaj neeg nrhiav tau peb. Kev tshwm sim hnub ntawd tau pab kuv paub tias kuv tus muam thiab kuv wb ob leeg xav tau tus Cawm Seej txoj kev hlub thiab Nws txoj Kev Theej Txhoj. Susan thiab kuv yeej taug tib txoj kev rov qab mus tsev.

Tus Cawm Seej tej lus nyob hauv zaj lus piv txwv thaum nws piav txog leej txiv uas tos txais nws tus tub ua txhaum yeej muaj hwj chim, thiab kuv ntseeg tias tej zaum nws piav hais tias yuav zoo li cas thaum peb ntsib peb Leej Txiv thaum peb rov qab mus tsev saum ntuj ceeb tsheej. Tej lus no qhia peb txog ib leej txiv uas hlub, tos thiab saib. Tej lus no yog tus Cawm Seej tej lus hais tias: “Thaum nws los tsis tau txog uas tseem nyob hov deb, nws txiv pom nws thiab hlub nws kawg; nws txiv dhia loo mus puag nkaus tus tub nwj” (Lukas 15:20).

Thov kom peb yuav txais kev tshwm sim kom peb paub zoo tias peb yuav ua li cas rau cov neeg uas poob thiab thaum yuav tsum ua, ua siab ntev thiab muaj kev hlub zoo li peb Leej Txiv Saum Ntuj Ceeb Tsheej thiab Nws Leej Tub, Yexus Khetos, thaum peb hlub, saib thiab tos ntsoov tus tub ua txhaum. Los ntawm Yexus Khetos lub npe, amees.