Tuhpan Wen Tuhlac

Mwet Lahngo Jisus Kraist El oruh alu in luti Lal facluh ke kuh in onwelah ac molwelah. Ke sie pacl keLuke sapta (singucul limekohsr) 15ke Wuhlweacng Sasuc an, El isrucnyuck na pwacye ke mongo ac muhtwacta yurin mwet koluk an (liyeLuke 15:2). Mwet Lahngo El orekmakihn ahkkoluk inge oacna sie pacl wowo in luti kuht nohfohn ohiyac in topuk nuh sin mwet ma tiac moulkihn wosasuc uh.

El topuk nuh sin mwet ahkkolukyacl ah ke siyuck selos kihsen siyuck yohk srihpac luo inge:

“Fin sie suwos oasr sheep siofok natul, ac soko tuhlac, mea el ac oru? Ya el ac tia filiya ma eungoul eu inima an ac som suk ma soko ma tuhlac nwe ke na el konauk?” (Luke 15:4).

“Ku sie mutan fin oasr ipin mani singoul lal, ac sie tuhlac, mea el ac oru? Ya el ac tia akosak lam uh, imonla lohm uh, ac moniyuk in suk nwe ke na el konauk?” (Luke 15:8).

Mwet Lahngo El tuh luti puhpuhlyuck ke wen tuhlac sac. Puhpuhlyuck se inge tiac ma ke sip (siofok) 100 kuh ipim silfuh (singucul) 10 ah; ma sie wen sacohk suc tuhlac. Ke puhpuhlyuck se inge, meac Mwet Lahngo El luti kuht ke ohiyac in topuk ke sie mwet ke sucu lasr uh tui in moulkihn wosasuc uh?

Wen tuhlac sac ahkkahlwemye nuh sin pahpah se tuhmwacl ah lah el kena eis usru lal ah ingena. El ke som liki lohm sel ah ac sucu ac som nuh ke sie facl loessuhlah (liyeLuke 15:12–13). Nuhnak muhnahs etuh lah puhpuhlyuck luhn Mwet Lahngo pahpah luhngse sac topuk ke sang nuh sin wen sac usru lal. Pwacyena pahpah sac oruh ma nuh kwewa el kuh in tulokihn tuhlihk mukul sac in muhta. Tuhsruhktuh, ke pacl se tuhlihk mukul mahtuh sac oraclah sulaclah lal ah, pahpah lahlmwetmwet sac lwelah elan som. Na pahpah sac ahkkahlwemye luhngse pwacye, ac el liye ac el tuhpan (liyeLuke 15:20).

Sucu luhk ah puhlakihn pac oacyac sacn. Tuhlihk mukul yohk luhlahlfongi luo, tahmtahel wolacna se wiyuck ah, ac nga tuhfweyucklac sin pahpah ninac na wowo. Lutiyuck kuht wosasuc uh in lohm ah, kuht eklac mahtuhlah, ac kuht nohfohn siliyucki lun tempuhl yurin muhtwacn kuh mukul tuhmasr uh. Tuhsruhk, ke (sie yucfoko yucngucul ahkosr) 1994 ah tahmtahel se wiyacsr ah, Susan, eklac suhpwacrlac ke Alu uh ac kuhtuh lutlut kac uh. El moklweyuck sin kuhtuh mwet kol emet ke Alu uh ma ahkkolukyeyuck ac isrucnyuck. El lwelah luhlahlfongi lal ke mwet pahluh ac mwet sap uh in srihkweni. Ke kuhtuh pacl, tahfuhluo lal uh kuhtanglah luhlahlfongi lal uh, ac el sulaclah in som liki Alu uh. Susan el use lwelah nuh sihk in akacsruhi sramsram lal inge ke finsrak ma kuh in kahsruh mwet sahyac uh.

Nga ac tamuhlwel wiyuck ah ac ninac katinmas se kiyacsr ah ahsor na upac. Kuht koflah nuhnkuh kuhtwena ma kuh in lwelah elan tohllah luhlahlfongi lal uh.

Nga ac tamuhlwel wiyuck ah kuhlwacnsap oacna pisap ac prestuhn ke u uh, ac kuht puhlakihn engan ke oraclah wo ke mempucr ke ward ac u lasr ke kuht sislah ma yucngucul ac yuc ac som tukun ma se luhlah ah. Tuhsruhktuh, sin tahmtahel se wiyacsr ah, kuh in pahtok in molwellah ac in solwacl fohlohk muhkwena pahtokuhllah loesalah liki met ah.

Ke kuht suk kolyuck luhn inkuhsrao ke ohiyac kuht kuh in topuk fal nuh sel uh, pwacyena lah kuht enenuh in ukwe srihkasrak luhn pahpah se puhpuhlyuck se ke wen tuhlac sac. Susan el oraclah sulaclah lal, ac kuht enenuh in luhman fuhlwellah—tuh tiac sahyacn elan etuh ac puhla luhngse pwacye lasr nuh sel. Na oruh, ke luhngse ac kuhlwacng ahksasucyeyucklac, kuht liye ac tuhpan na.

Ninac kiyuck ah tiacna tui ac nuhnkuh kacl Susan. Pacl nuh kwewa ninac kiyuck ah wi nuh tempuhl uh, el sang inel Susan nuh ke prayer roll ah, tiacna fuhlweack finsrak. Tamuhlwel mahtuh se wiyuck ah ac muhtwacn kiyacl ah, suc muhta fototo nuh yohrohl Susan fin acn California, solwacl nuh ke mukwikwi luhn sucu uh pacl nuh kwewa. Elos oraclah mongo in ekuh lun lohm selos ah kais sie yac ke puhtte lal Susan ah. Elos liye ahkwoyac lah elos aetuhi na yohrohl ac lah el etuh lah elos luhngse el na pwacye.

Tuhlihk mukul fuhsr se wiyuck ah ac muhtwacn kiyacl ah sruokyacna kuhpahsr nuh sin tuhlihk nahtuhl Susan fin acn Utah ac karuhnguhnuhlos ac luhngse elos. Elos liye ahkwoyac lah tuhlihk nahtuhl an suliyuck nuh ke toeni luhn sucu an pacl nuh kwewa, ac ke pacl in pacptais luhn granddaughter nahtuhl Susan an, tamuhlwel se wiyuck an ac oasr we in oruh akwuck kac an. Oasr pac mwet luti luhn sucu ac mwet forfor luti sucu lal Susan suc soenna fuhlweack.

Ke tuhlihk nahtuhsr an oruh misin lalos ac pahyuckyak uh, Susan el suliyuck in wi ahkfuhlwact luhn sucu uh. Kuht oaru in srihke in oraclah toeni luhn sucu ma Susan ac tuhlihk nahtuhl an kuh in wi kuht ac elos fah etuh lah, met liki ma nuh kwewa sahyac uh, kuht luhngse elos ac elos ip ke sucu lasr uh. Ke Susan el eis sie advanced degree ke sie university California, kuht nohfohn wi sro se lal ah in ahkkweyacl. Finne kuht koflah eis nohfohn sulaclah lal uh, kuht srwackna kuh in eisacl. Kuht luhngse, kuht liye, ac kuht tuhpan.

Ke (luo tausin ohnkohsr) 2006, tukun yac (singucul luo) 12 somlah ke Susan el som liki Alu uh, tuhlihk muhtwacn se nahtuhsr ah Katy el som wi mukul tuhmwacl ah nuh California elan muh kuh in wi law school. Elos oasr ke siti sepacna ma Susan el oasr we ah. Siyacnyacn fuhsr se inge som nuh yohrohl Susan nuh ke kahsruh ac ahkkweye, ac elos luhngse el. Susan el kahsruh karihngihn granddaughter yac luo se nahtuhsr, Lucy, ac Susan el kahsrwel Lucy ke pruhe in fong lal uh. Katy el pahngonyuc sie lwen ah ac siyuck sihk fin nga nuhnkuh lah Susan el kuh in fohlohk nuh ke Alu uh. Nga ahkkweye nuh sel lah nga puhla lah el fah ac lah kuht enenuh in kalweni in mongfihsrwacsr. Ke yac tolu pac sifil somlah, ke luhngse kalweniyuck, kuht liye ac kuht tuhpan.

Yac ohnkohsr somlah ah mihsenge muhtwacn kiyuck, Marcia, ac nga muhta emet ke siyah ke Conference Center se inge. Nga tuh akmuhsralah in sie General Authority sasuc ke lwen sac. Marcia, suc pacl nuh kwewa puhla moklweyuck luhn Nguhn uh, suhmuhslah sie not nuh sihk ma riti, “Nga muh pacl fal nuh sel Susan in fohlohkoh.” Tuhlihk muhtwacn se nuhtihk Katy el siyuck tuh ngan som liki miting sac pahnglol Susan in solwacl in liye toeni luhlahp ke lwen sac.

Moklweyuck sin muhtwacn wolacna luo inge, nga fahsryak nuh lun acn toeni uh ac pahngon tahmtahel se wiyuck ah. Nga fihliyac voice mail se ac ana solwacl in liye tuhkweni se ke toeni luhlahp sac. El eis pweng sac. Kuht engan lah el puhla moklweyuck in liye nohfohn tuhkweni ke toeni sac. El lohng ke mwet pahluh ac mwet sap ma el tuh luhngse met ah. El lohng ine sasuc el soenna lohng met, ma oacna Prestuhn Uchtdorf ac Elder Bednar, Cook, Christofferson, ac Andersen. Tukun ma inge ac kuhtuh pac moklweyuck usrnguck suhpweyuckme inkuhsrao, tahmtahel se wiyuck ah—oacna wen tuhlac sac—el acsmaklac (liye Luke 15:17). Kahs luhn mwet pahluh ac mwet sap ah ac luhngse luhn sucu lal ah moklweluhlwack in sifilpac auliyak ac muhtwacwacack moulkihn wosasuc uh. Tukun yac (singucul limekohsr) 15 tuhlihk muhtwacn sie wiyuck ma tuhlac ah sukokyak. Pacl in liye ac tuhpan uh sahflah.

Susan el ahkuhtweyac puhlakihnyuck se inge oacna Lehi el ahkuhtweyac ke Puk luhn Mormon ah. El fuhlwelah osra suwohs soko ah ac sokolwack sifacna lun ohkohk in lohsr sac (liye1 Nephi 8:23). El fahk lah el tiacna etuh lah el tuhlac nuh ke luhlahlfongi lal sifil acsmaklac ke Kahlwem luhn Kraist, ma oraclah kahlwem nuh selos ma sielacna inmahsrlon ma el puhlakihn fin facluh ac ma Leum ac sucu lal an kuh in ahkinsewowoyacl kac.

Sie mwe usrnguck sikyak ke yac ohnkohsr somlah ah. Susan el sifil ahksasucye fahkwack luhlahlfongi lal ke Puk luhn Mormon. El eis pwepuh in lwelah nuh tempuhl lal. El kuhlwacnsap oacna mwet orekma ke akwuck lun tempuhl uh, ac tuhfahna luti kuhlahs se ke ward lal ah Gospel Doctrine. Winto inkuhsrao ikacklah nuh sin tuhlihk nahtuhl ac nuhtin nahtuhl, ac tuhsruhk oasr kuhtuh ma lwacne upac kac, ma ingacn oacna elan tiacna som liki Alu uh.

Kuhtuh suwos, oacna sucu Nielson, oasr mempucr ke sucu la an suc kihtin pacl tuhlac ke inkacnek lalos. Kolyuck luhn Mwet Lahngo nuh sin mwet nuh kwewa ma oasr sip 100 nahtuh pa in fihliyac ma yucngucul ac yuc an ac som molwelah ma se luhlah ah. Kolyuck Lal nuh sin mwet suc oasr ipin silfuh 10 la ac tohllah sie pa in suk nuh ke el sokwack. Ke sie sin tuhlihk mukul kuh muhtwacn nuhtum an tuhlac, tamuhlwel kuh tahmtahel wiyom, kuh el sulaclah in som, kuht lotwelah ke sucu lasr uh lah, tukun ma nuh kwewa kuht kuh in oruh, kuht luhngse mwet sacn ke insiyacsr nohfohn ac kuht liye, kuht pruhe, ac kuht tuhpan Leum Elan moklwelosyak.

Sahp lesin yohk srihpac se emet Leum El lutiyuc ke ohiyac se inge sikyak ke puhlan pacl in lutlut ke ma suhmuhslah luhn sucu lasr ah tukun tahmtahel se wiyuck ah tuh som liki Alu uh. Tuhlihk se nahtuhsr David el rit ke kuht tuhkweni lutlutkihnLuke 15. Ke kuht riti puhpuhlyuck ke wen tuhlac sac, nga lohng siena liki lwen se nga lohng met ah. Ke kuhtuh srihpac, nga kwacna puhla oacna wen se ma muhta na lohm ah. Ke David el rit ke lututacng sac, nga akihlen lah ke kuhtuh ohiyacngapa wen tuhlac sac. Kuht nohfohn fototolac ke ma wolacna luhn Pahpah (liye Rome 3:23). Kuht nohfohn enenuh Iwaclah luhn Mwet Lahngo in onwekuhtlac. Kuht nohfohn tuhlac ac enenuh in sukokyak. Fwackyuck se inge ke lwen sac kahsrweyuc in etuh lah nga ac tahmtahel se wiyuck ah kwewana enenuh luhngse luhn Mwet Lahngo ac Iwaclah Lal. Nga ac Susan kwewana fohlohk nuh ye muhtuhn Pahpah Lucng.

Kahs luhn Mwet Lahngo ke puhpuhlyuck sac ke El ahkuhtweyac painyuck luhn pahpah sac nuh sin wen suhnuhntac se nahtuhl ah arlac fokoko, ac nga luhlahlfongi lah ma ingacn pa ahkuhtweyac ke puhlakihnyuck nga ac kom fah eis yurin Pahpah ke kuht ac fohlohk nuh lohm inkuhsrao sesr uh. Elos luti kuht ke sie pahpah suc luhngse, tuhpan, ac liye. Pa inge kahs luhn Mwet Lahngo: “Ke el srakna fahsr loesla liki lohm sel uh, papa tumal ah liyalak ac arulana pakomutal, ac el kasrusr nu yurin wen natul kafiselma inpaol ac ngok mutal” (Luke 15:20).

Nga finsrak tuh kom ac nga in eis fwackyuck in etuh ohiyac wo emet in kahsruh mwet ke moul lasr uh suc tuhlac ac, ke pacl fal, in eis mongfihsrwacsr ac luhngse luhn Pahpah tuhmasr Lucng ac Wen Nahtuhl, Jisus Kraist, ke kuht luhngse, liye, ac tuhpan wen tuhlac. Ke inen Jisus Kraist, amen.