Wb Mam Li Nce Mus Ua Ke
Los ntawm Linda K. Burton
Koom Haum Niam Tsev tus Tuam Thawj Tswj Hwm
Ua ib cov poj niam thiab txiv neej hauv kev khi lus tseg, peb yuav tsum txhawb nqa thiab sib pab kom peb rais tau los ua cov neeg li tus Tswv lub siab xav.
Ntxiv rau cov lus hais uas tshoov peb tej siab, tej nkauj, thiab tej lus thov Vajtswv uas tau ua rau peb zoo siab heev txog lub tuam rooj sab laj, muaj coob tus viv ncaus tau hais rau kuv hais tias lawm nyiam saib Thawj Pawg Thawj Tswm Hwm thiab Pawg Kaum Ob tug Thwj Tim nrog lawv tub khub ua thaum lawv tawm hauv no mus. Thiab peb yeej xav hnov lawv hais tias hlub lawv tus khub npaum li cas, puas yog?
Thawj Tswj Hwm Boyd K. Packer tau hais txog nws tus poj niam Donna hais tias, “Vim hais tias kuv tuav txog hauj lwm no, kuv yuav tsum qhia qhov tseeb: Nws yog ib tug neeg zoo tag nrho.”1
Thawj Tswj Hwm Dieter F. Uchtdorf hais txog nws tus poj niam, Harriet, hais tias, “Nws yog qhov tshav ntuj hauv kuv lub neej.”2
Thawj Tswj Hwm Henry B. Eyring, tau hais txog nws tus poj niam, Kathleen, hais tias, “Nws [yog] ib tug neeg uas yeej ib txwm ua rau kuv xav ua ib tug neeg zoo dua.3
Thiab Thawj Tswj Hwm Thomas S. Monson, tau hais li no txog nws tus hlub uas yog Frances, hais tias: “Nws yog tus hlub hauv kuv lub neej, tus uas kuv ntseeg siab, thiab kuv tus phooj zoo tshaj plaws. Yog kuv hais tias kuv nco nws ces qhov ntawd twb piav tsis tau hais tias kuv lub siab xav li cas tiag.”4
Kuv kuj xav hais rau tus kuv tus khub uas kuv hlub heev uas yog, Craig. Nws yog ib qho khoom pliag muaj nuj nqis heev rau kuv! Thaum hais txog kuv tus txiv, muaj kab lus tseem ceeb thiab dawb ceev heev hauv kuv daim ntawv yawg suab txoj koob hmoov uas cog lus hais tias kuv lub neej thiab kuv cov me nyuam lub neej “nws yuav ceev cia zoo heev.” Kuv pom tau lawm hais tias Craig yog tus uas ua tau raws li cov lus cog tseg no hais. Qiv Mark Twain cov lus hais, Kuv hais tias “lub neej uas tsis muaj [Craig] ces tsis yog ib lub neej hlo li.”5 Kuv hlub nws tag, siab thiab ntsws!
Tej Luag Hawm Lwm thiab tej Ntiag Tug Los Saum Ntuj Los
Hnub no kuv xav hawm cov txiv, cov txiv tsev, cov nus, cov tub, thiab cov txiv hlob txiv ntxawm uas paub hais tias lawv yog leej twg thiab rau siab ua lawv tej hauj lwm ntawm Vajtswv tau muaj rau lawv uas muaj sau tseg rau hauv daim ntawv tshaj tawm txog tsev neeg, xws li kev coj kav ncaj ncees thiab kev saib xyuas thiab tiv thaiv lawv tsev neeg. Thov kom nej paub hais tias kuv yeej paub tias txoj kev hais txog txiv tsev, niam tsev thiab kev sib yuav yeej ua rau coob tus ntxhov siab heev. Kuv yeej paub hais tias ib txhia mej zeej hauv lub Koom Txoos yeej xav hais tias lawv tej tsev yuav zoo tsis tau li lawv lub siab xav. Muaj coob tus tu siab vim kev tsis muaj neeg saib xyuas, kev ua phem, kev quav ub no, thiab tej kab lig kev cai tsis yog. Kuv yeej tsis zam txim rau tej uas cov poj niam thiab txiv neej uas xav ua los sis tsis paub hais tias lawv tau ua rau lawv tsev neeg muaj mob, kev nyuaj siab, thiab kev poob siab. Tab sis hnub no, kuv yuav hais txog lwm yam.
Kuv ntseeg tau hais tias ib tug txiv yuav zoo nraug heev rau nws tus poj niam thaum nws ua nws txoj hauj lwm uas Vajtswv muaj rau nws uas ua ib tug tsim nyog los tuav lub pov thawj hwm—qhov tseem ceeb tshaj yog hauv lub tsev. Kuv nyiam thiab ntseeg cov lus uas Thawj Tswj Hwm Packer hais rau txiv thiab cov txiv tsev zoo: “Nej muaj lub hwj chim ntawm lub pov thawj hwj uas los kiag ntawm tus Tswv los tiv thaiv nej lub tsev. Yeej yuav muaj tej lub sij hawm uas tib qhov uas tiv thaiv tau nej tsev neeg ntawm tub yeeb ncuab tej kev haub txias yuav yog log lub hwj chim ntawm xwb.”6
Cov Thawj Coj ntawm Sab Ntsuj Plig thiab Xib Hwb hauv Tsev
Xyoo no kuv mus koom ib lub ntees rau ib tug txiv neej zoo heev—yog kuv tus txiv tus txiv hlob hu ua Don. Txiv hlob Don ib tug tub tau qhia txog ib qho uas nws nco tau thaum nws tseem yau, uas tau muaj tsis ntev tom qab nws niam thiab nws txiv nkawd yuav nkawd thawj lub tsev. Vim hais tias lawv muaj tsib tug me nyuam yuav noj thiab yuav hnav, ces tsis muaj nyiaj txaus los xov laj kab rau lub tsev. Nws yeej saib nws txoj hauj lwm ua tus saib xyuas nws tsev neeg, Txiv Hlob Don txhos ib co ncej, thiab khi hlua cab ntawm ib tug ncej rau ib tug ncej xov ua laj kab ncig lub tsev. Ces nws hu nws cov me nyuam los ua ke. Nws hais kom me nyuam saib cov ncej thiab txoj hlua thiab piav rau nws cov me nyuam hais tias yog lawv nyob rau ntawm tus laj kab no saub hauv no, ces lawv yuav tsis raug teeb meem dab tsi.
Muaj ib hnub ob tug mus saib xyuas tom tsev tuaj pom thiab ntseeg tsis tau li hais tias tsib tug me nyuam no sawv zoo ntawm ntug laj kab, thiab ntsia ntsoov lub npas uas tau ntog dhau mus rau sab nraud thiab rau nram kev lawm. Ib tug me nyuam mam li khiav mus hu lawv txiv, ces nws, mam li khiav tuaj muab lub npas.
Tus tub hlob, tau hais uas kua muag poob dawb vog hais tias hauv lub neej no nws tsuas vam tias kom nws coj tau zoo li nws txiv xwb.
Thawj Tswj Hwm Ezra Taft Benson hais tias:
“Aub, cov txiv thiab cov txiv tsev ntawm Ixayees, nej ua tau ntau yam rau txoj kev cawm txoj sia thiab txoj kev tsa nto ntawm nej tsev neeg! …
“Nco qab ntsoov nej txoj hauj lwm dawb huv yog raug hu los mus ua ib leej txiv hauv Ixayees—nej txoj hauj lwm tseem ceeb tshaj plaws hauv lub neej no thiab lub neej nyob mus ib txhis li—ib txoj hauj lwm uas nej yeej yuav tsis raug tso tawm ntawm.”
“Nej yuav tsum pab tsim kom tau ib lub tsev uas tus Tswv tus Ntsuj Pliag yuav los nyob tau.”7
Cov lus ntuas zoo heev no yeej yog rau lub sij hawm no ntag.
Yeej nyuab heev rau cov txiv neej ntawm kev khi lus tseg nyob rau hauv ib lub ntiaj teb uas twb tsis saib lawv tej luag hawj lwm thiab tej kev saib xyuas uas los saum ntuj los tseem ceeb li thiab tseem muaj tej lus dag ntxiv hais tias ib tug “txiv neej tiag” zoo li cas. Ib zaj lus dag qhia hais tias yus yuav tsum xav txog yus tus kheej xwb. Thiab lwm zej hais lus thuam hais tias tej txiv thiab txiv tsev tsis tseem ceeb lawm. Kuv thov nej tiag tiag kom tsis txhob mloog Dab Ntxwg Nyoog tej lus dag no! Nws yeej yuav ua tsis tau ib tug txiv los sis ib leej txiv ib zaug li. Vim hais tias nws khib heev rau cov uas tau txoj hauj lwm uas nws yeej yuav ua tsis tau ib zaug li, ces yeej yuav rau siab ua kom “tag nrho cov txiv neej.....phem li nws”!8
Kev Txhawb Nqa thiab Kev Sib Pab hauv Peb tej Hauj Lwm uas Ob Leeg Ua Ke
Cov nus thiab cov viv ncaus, peb ib leeg toob kas ib leeg! Ua ib cov poj niam thiab txiv neej hauv kev khi lus tseg, peb yuav tsum txhawb nqa thiab sib pab kom peb rais tau los ua cov neeg li tus Tswv lub siab xav. Thiab peb yuav tsum ua hauj lwm ua ke kom thiaj li txhawb nqa tau tiam neeg tom ntej thiab pab lawv kom muaj feem ncav tau txoj sia nyob mus ib txhis. Peb yuav tsum ua li Txwj Laug Robert D. Hales thiab nws tus poj niam, Mary, tau ua lawm raws li hais hauv paj lug “koj txhawb nqa kuv thiab kuv txhawb nqa koj, ces wb mam li nce mus ua ke.”9
Peb paub hais tias nyob hauv vaj lug kub twb qhia tias “tsis tsim nyog … tus txiv neej nyob ib leeg xwb.” Vim li ntawd peb Leej Txiv Saum Ntuj Ceeb Tsheej thiaj li tsim dua “ib tug los pab nws.”10 Cov lus uas hais tias los pab nws txhais tau hais tias “ib tug tsim nyog los pab, los txhawb nqa, los txuas lus nrog nws.”11 Piv txwv hais tias, peb muaj ob txhais tes tab sis ob txhais tes tsis zoo ib yam nkaus. Muaj tseeb tiag, ob txhais tes sib txawv, thiab nkawd sib pab thiab sib phim. Ua hauj lwm ua ke ob txhais tes muaj zog dua.12
Nyob hauv lub Koom Txoos phau ntawv qhia kev, hauv tshooj uas piav txog tsev neeg, qhia hais tias: “Txiv neej thiab poj niam ntsuj plig ua ke ua rau ob leeg zoo tag nrho.”13 Ua tib zoo mloog qhov no hais tias nkawd “ua rau ob leeg zoo tag nrho”, tsis yog hais tias, “ua rau nkawd sib xeem”! Peb los nyob hauv no los sib pab, txhawb nqa, thiab pab sawv daws muaj kev zoo siab thaum peb xyaum los ua neeg zoo. Viv Ncaus Barbara B. Smith tau qhia hais tias, “Yuav muaj kev zoo siab ntau dua thaum peb pab lwm tus neeg zoo siab rau lawv tej kev vam meej es tsis yog zoo siab rau peb tej xwb.”14 Thaum peb pab lwm tus kom “zoo tag nrho” es txhob sib “xeem” ces yuav yooj yim dua rau peb pab txhawb nqa lawv!
Thaum kuv tseem yog ib tug niam tsev hluas thiab muaj ob peb tug me nyuam me heev, tom qab ib hnub uas hloov diaper, ntxuav tais diav, thiab qhuab qhia cov me nyuam tas, ces kuv zoo siab kawg li uas zaj nkauj hais, “Kuv zoo siab heev thaum txiv los tsev.”15 Kuv tu siab kawg uas yuav tau lees hais tias kuv yeej tsis luag ntxi li thaum Craig ua hauj lwm ib hnub xab xab es los txog tsev. Nws yeej ib txwm los puag thiab hnia peb ces yeej ua rau tej lub sij hawm nyuab siab thiab tej hnub uas tsis muaj kev zoo siab li rais los ua tej kev zoo siab nrog txiv ua si ua ke. Kuv xav kom thaum ntawm kuv tsis txhob txhawj txhawj txog tej hauj lwm uas yuav tsum ua es siv kuv lub sij hawm ua tej yam uas tseem ceeb dua, li nws tau ua. Ces ntshe tej zaum kuv yuav pom tej yam dawb ceev hauv tsev neeg thiab yuav ua nws tsaug ntau dau vim nws foom koob hmoov ntau heev rau peb lub neej!
Cia Peb Hais Lus Zoo Ib Leeg rau Ib Leeg
Tsis ntev tas los no, ib tug viv ncaus uas muaj siab ntseeg heev hauv lub Koom Txoos tau qhia rau kuv txog ib qho kev txhawj heev uas nws twb rau siab thov Vajtswv los ntev lawm. Nws txhawj txog cov viv ncaus hauv nws pawg ntseeg. Nws hais tias ua rau nws tu siab kawg li thaum nws pom lawv hais lus tsis saib lawv tus txiv thiab lawv yeej hais li no tab meeg lawv cov me nyuam. Ces nws qhia rau kuv hais tias thaum nws tseem yog ib tug ntxhais hluas nws yeej rau siab thov Vajtswv kom pab nws nrhiav ib tug txiv uas tsim nyog tuav lub pov thawj hwj los nrog nws ua neej ua ke. Hauv nws tseg neeg nws niam “coj nruj heev” thiab nws txiv nyoo xwb kom thiaj li muaj kev thaj yeeb hauv tsev. Nws xav hais tias yuav tsum muaj lwm txoj kev zoo dua. Tsis muaj tus yam ntxwv zoo hauv lub tsev uas nws loj hlob, tab sis nws rau siab thov kom Vajtswv pab coj nws kev, tus Tswv pab coj nws txoj hau kev kom nws thiab nws tus txiv nkawd muaj ib lub tsev uas tus Ntsuj Plig yuav los nyob tau. Kuv yeej tau muaj rau hauv lub tsev no lawm thiab ua tim khawv hais tias yeej yog ib qho chaw dawb huv!
Cov viv ncaus thiab cov nus, muaj pes tsawg zaus uas peb txhob txwm “hais lus zoo ib leeg rau ib leeg”?16
Tej zaum peb yuav tsum nug peb tus kheej li cov lus no. Yog kho me ntsis, ces cov lus nug no yuav haum rau peb sawv daws feem coob, txawm hais tias peb sib yuav lawm los sis tsis tau sib yuav los sis peb lub tsev zoo li cas.
-
Zaum kawg tas los no uas kuv hais lus qhuas kuv tus khub, txawm hais tias hais thaum kuv nyob ib leeg xwb los sis tab meeg wb cov me nyuam, yog thaum twg?
-
Zaum kawg tas los no uas kuv ua tsuag, hais tias kuv hlub nws, los sis rau siab thov Vajtswv rau nws, yog thaum twg?
-
Zaum kawg tas los no uas kuv cheem kuv tus kheej kom tsis txhob hais tej lus mob siab, yog thaum twg?
-
Zaum kawg tas los no uas kuv thov txim thiab txo hwj chim thov kev zam txim--es tsis txhob hais “tab sis mam yog koj tau ua li” los sis “tab sis yog koj tsis tau ua li ntawd” yog thaum twg?
-
Zaum kawg tas los no uas kuv cia li zoo siab xwb es tsis txhob pheej cam kom “yeej” xwb, yog thawg twg?
Yog hais tias cov lus nug no uas rau nej txaj muag los sis muaj txim, ces nco ntsoov tias Txwj laug David A. Bednar tau qhia hais tias “kev muaj txim ua rau peb sab ntsuj plig paub tias muaj xwm txheej ib yam li kev hnov mob yog qhov uas ceeb toom peb lub cev.”17
Kuv caw peb sawv daws kom mloog Txwj Laug Jeffrey R. Holland cov lus thov: “Cov kwv tij thiab cov muam, nyob hauv txoj kev ntev nyob mus ib txhis uas peb xyuas coj li tus Cawm Seej, thov kom peb xyuas ua cov txiv neej thiab poj niam ‘zoo tag nrho’ ntawm txoj kev hais lus—los hais lus zoo, xws li hais tias hais ib yam lus ntshiab, hais cov lus li cov tim tswv.”18
Thaum kuv npaj los hais lus hnub no, tus Ntsuj Plig tau qhia kuv, thiab kuv txiav txim siab lawm los hais lus zoo ntau dua rau kuv tus hlub thiab hais zoo txog nws, los txhawb nqa cov txiv neej hauv kuv tsev neeg thiab qhuas lawv rau lawv tej kev ua txoj hauj lwm uas los saum ntuj los. Thiab kuv txiav txim siab lawm los ua li cov paj lug hais “Koj txhawb nqa thiab kuv txhawb nqa koj, ces wb mam li nce mus ua ke.”
Nej puas kam los koom nrog kuv es peb nrhiav kev pab ntawm tus Vaj Ntsuj Plig Dawb Huv kom los qhia peb saib peb yuav txhawb nqa ib leeg rau ib leeg li cas ntawm peb lub luag hauj lwm los ua ib cov tub ntxhais khi lus tseg ntawm peb Leej Txiv Saum Ntuj Ceeb Tsheej uas hlub peb?
Kuv paub hais tias los ntawm lub hwj chim ntawm Yexus Khetos txoj kev Theej Txhoj thiab peb txoj kev ntseeg Nws, peb yeej ua tau xwb. Kuv thov Vajtswv kom peb tso siab rau Nws los pab peb pab lwm tus kom ua neej zoo thiab nyob mus ib txhis thaum peb nce mus ua ke, los ntawm Yexus Khetos lub npe, amees. .