2010–2019
O Le A Tatou O Ae Faatasi i Luga
Aperila 2015


O Le A Tatou O Ae Faatasi i Luga

I le avea ai ma tamaitai ma alii tausi feagaiga, tatou te manaomia e siitia ma fesoasoani i le tasi ma le isi ma avea ma tagata e finagalo le Atua e avea ai i tatou.

E faaopoopo atu i saunoaga, musika, ma tatalo musuia lea e ootia ai o tatou loto e le aunoa i le taimi o konafesi aoao, na ta’u mai ai ia te au e le toatele o tamaitai le mea e sili ona latou fiafia i ai o le matamata lea i le Au Peresitene Sili ma le Korama a Aposetolo e Toasefululua pe a latou tuua lenei tulaga ma a latou soa faavavau. Ma e tatou te le fiafia uma ea e faalogologo i le Usoga o faailoa mai ma le faamemelo lo latou alolofa mo i latou?

Ata
President Boyd K. Packer and his wife, Donna, at the Brigham City Utah Temple cornerstone ceremony, 23 September 2012.

I lana saunoaga e uiga i lona faletua, o Donna, na saunoa mai ai Peresitene Boyd K. Packer, “Ona o le tofi o loo ou umia, ua ia te au se matafaioi paia e tau atu le mea moni: E atoatoa o ia.”1

Ata
President Dieter F. Uchtdorf and his wife.

“O ia o se la susulu o lo’u olaga,”2 na saunoa ai Peresitene Dieter F. Uchtdorf e uiga i lona faletua, o Harriet.

Ata
President Henry B. Eyring and Sister Eyring at their wedding.

O Peresitene Henry B. Eyring, a o faasino i lona faletua, o Kathleen, na ia saunoa, “O ia o se tagata e naunau ina ia faamanao a’u ou te faia le mea e sili ona ou mafaia.”3

Ata
LDS Church President Thomas S. Monson gives his wife, Frances, a kiss at their 60th anniversary celebration, 10/6/2008, at the Lion House. The two met in 1944 and were married in the Salt Lake Temple on Oct. 7, 1948.

Ma Peresitene Thomas S. Monson, a o saunoa ai i lana manamea o Frances: “O ia o lo’u ola atoa, o la’u soa faatuatuaina, ma la’u uo mamae. I lo’u fai atu ai ua ou misia lava o ia, e le o amata ai ona ou faamatalaina le loloto o ou lagona.”4

Ou te fia faailoa atu foi lo’u alofa mo la’u soa pele, o Craig. O ia o se meaalofa taua ia te a’u! O le faatatauga i lo’u toalua, o se fuaitau taua ma paia lea o folafolaga i lo’u faamanuiaga faapeteriaka e faapea o lo’u olaga ma olaga o la’u fanau o le a “lelei le tausiga e ia.” Ua manino ia te au o Craig o se faataunuuga o lena folafolaga. O le siiina mai o upu a Mark Twain, ou te faapea atu ai “o le olaga e aunoa ma [Craig] o le a le pei o se olaga.”5 Ou te alofa tele lava ia te ia!

Matafaioi ma Tiutetauave Paia

I le asō ou te manao ina ia faamamaluina tane, tamā, tuagane, atalii, ma tamā o aiga o e o silafia po o ai i latou ma o i latou o loo faia le mea sili latou te mafaia e faataunuu ai o latou matafaioi ua tuu mai e le Atua e pei ona faamatalaina i le folafolaga i aiga, e aofia ai le pulefaamalumalu ma le amiotonu ma le tausia ma le puipuia o o latou aiga. Faamolemole ia silafia ou te matua iloa lelei lava o autu e uiga i tulaga faatama, faatina, ma faaipoipoga e ono faapopoleina ai le toatele. Ou te iloa o lagona o nisi o tagata o le Ekalesia o le a le mafai e o latou aiga ona ausia le tulaga latou te manatu o se tulaga sili ona lelei. O le toatele o loo tiga ona o le tuulafoaiina, sauaina, o vaisu, ma tu ma aganuu le sa’o. Ou te le fiafia i faatinoga a alii po o tamaitai o e ua faia ma le iloa po o le leiloa foi ua mafua ai ona i ai le tiga, mafatia, ma faanoanoaga i o latou aiga. Peitai ou te tautala atu i le asō e uiga i se isi mea.

Ou te mautinoa e leai se taimi ua sili atu ai ona aulelei se tane i lana ava nai lo le taimi o loo ia auauna atu ai i ana matafaioi na tuu mai e le Atua e avea o sē agavaa e umia le perisitua—e matua taua lava i totonu o le aiga. Ou te fiafia ma talitonu i upu nei mai ia Peresitene Packer i tane ma tamā agavaa: “Ua ia te oe le mana o le perisitua ua tuusao mai le Alii e puipui ai lou aiga. O le a i ai taimi e na o le pau lava le mea e tulai atu e fai ma talipupuni i le va o lou aiga ma mea faalavefau a le fili, o le mana lena.”6

Taitai ma Faiaoga Faaleagaga i le Aiga

I le amataga o lenei tausaga sa ou auai atu ai i se falelauasiga o se tagata tulaga ese le taualoa—o si toeaina o le aiga o si ou toalua o Uncle Don. Na faasoa mai e se tasi o atalii o Uncle Don se aafiaga sa ia maua a o latitiiti, i se taimi e lei leva ona faatau e ona matua lo latou fale muamua. Talu ai e toalima tamaiti laiti e fafaga ma faalavalava, sa le lava se tupe e faapa ai le fanua. O le faamaoni i se tasi o ana matafaioi paia o se leoleo mo lona aiga, sa tutu’i ai e Uncle Don ni nai tamai fasi laau i le palapala, aumai ni manoa, ma nonoa le manoa mai lea fasi laau i lea fasi laau faataamilo i le fanua. Ona ia valaauina lea o lana fanau e o mai. Sa ia faasino atu ia i latou ia laau ma le manoa ma fai atu ia i latou afai latou te nonofo i totonu o lena pa le tumau, o le a latou saogalemu.

I se tasi aso sa matamata atu ma le ofo ni faiaoga asiasi a o latou agai atu i le fale ma iloa atu ni tamaiti laiti se toalima o tutu ma le usiusitai i le taufaasiusiuga o le manoa, ma tilotilo faananau atu i le polo lea na pau atu i tua o lo latou tuaoi ma alu atu ai i le auala. Sa tamoe se tasi o tamaiti e aumai lo latou tama, o le na tali mai, i le tamoe atu ma aumai le polo.

Mulimuli ane i le falelauasiga, sa faailoa mai ma loimata e le atalii matua, na pau lava lona faamoemoega i le olaga ia avea faapei o lona tama pele.

Ata
Sister Burton's son and grandson reading together.

Na saunoa mai Peresitene Ezra Taft Benson:

“Ia, tane ma tamā i Isaraelu, e mafai ona outou faia ni mea se tele mo le faaolataga ma le faaeaga o o outou aiga! …

“Manatua lou valaauga paia o se tamā i Isaraelu—lou valaauga sili ona taua i le taimi nei ma le faavavau—o se valaauga o le a le mafai ona faamalolo mai ai outou.”

Ata
Sister Burton's son and grandson on a bed together.

“E tatau ona outou fesoasoani e fausia se aiga e mafai ona mafuta ai le Agaga o le Alii.”7

Oka se talafeagai o nei upu faaperofeta i lenei vaitaimi.

Ai se faigata, i le tulaga sili, mo alii o le feagaiga ona ola i se lalolagi e le gata ina le faatauaina o latou matafaioi paia ma tiutetauave ae o loo auina atu ai foi ni savali sese e uiga i le avea ai ma se “alii moni.” O se tasi savali sese o le “O mea uma e faatatau ia te a’u.” I le isi itu, o loo i ai ni savali faamaasiasi ma faatauemu faapea e le o toe manaomia ni tane ma ni tama. Ou te aioi atu ia te outou e aua nei faalogo i pepelo a Satani! Ua uma ona ia aveesea lona avanoa paia o le avea ma se tane po o se tama. Talu ai e lotoleaga o ia ia i latou o e ua maua matafaioi paia na te le mafai ona ausia, ua ia naunau ai ina ia “pagatia tagata uma e pei o ia lava”!8

Siitiaina ma Fesoasoani i o Tatou Matafaioi e Faaatoatoa ai Isi

Uso e ma tuagane, tatou te manaomia le tasi ma le isi! I le avea ai ma tamaitai ma alii tausi feagaiga, tatou te manaomia e siitia ma fesoasoani i le tasi ma le isi ma avea ma tagata e finagalo le Atua e avea ai i tatou. Ma e tatau ona tatou galulue faatasi e siitia le tupulaga faiae ma fesoasoani ia latou ausia o latou gafatia paia o ni tagata mautofi o le ola e faavavau. E mafai ona tatou faia e pei ona faia e Elder Robert D. Hales ma lona faletua o Mary, ma mulimuli i le faataoto “Ia e siitia a’u, ona ou siitia ai lea o oe, ona ta o a’e faatasi ai lea i luga.”9

Ua tatou iloa mai tusitusiga paia “e le lelei ina toatasi o le tagata.” O le mafuaaga lena na faia ai e le Tama Faalelagi “sona fesoasoani.”10 O le upu fesoasoani o lona uiga “o se fesoasoani e talafeagai, agavaa, pe fetaui lelei mo ia.”11 Mo se faataitaiga, e talitutusa lava o tatou lima e lua peitai e le tutusa lelei. O le mea moni, o le faafeagai o le tasi le isi, ae e faaatoatoaina e le tasi le isi ma e fetaui lelei lava mo le tasi ma le isi. O le galulue faatasi, ua la malolosi atili ai.12

I se mataupu e uiga i aiga, o loo i ai i le tusitaulima a le Ekalesia le faamatalaga lenei: “O le natura o agaga tane ma fafine ua faia ina ia faaatoatoaina ai e le tasi le isi.”13 Faamolemole ia matau o loo fai mai “faaatoatoa e le tasi le isi,” ae le o le “fiatautavā o le tasi i le isi”! Ua tatou i ai iinei e fesoasoani, siitia, ma olioli le tasi i le isi a o tatou taumafai ia avea ma o tatou tagata sili ona lelei. Na aoao mai ma le atamai Sister Barbara B. Smith, “E matua tele lava o le fiafia tatou te maua pe a mafai ona tatou olioli i tulaga faamanuiaina o le isi ae le na o i tatou lava.”14 A tatou saili e “faaatoatoa” nai lo le “fiatautavā,” o le a matua faigofie lava ona tatou fefaamalosiau atu i le tasi ma le isi!

A o avea au ma se tina talavou o se fanau iti toatele, i le faatumulia ai i le faaiuga o aso i suiga o napekini, fufuluina o ipu, aoaiina, e leai se tasi na sili ona usuina ma le naunautai le pese Peraimeri lenei i lo a’u, “I’m so glad when daddy comes home.”15 Ou te faanoanoa e tautino atu ou te lei fiafia i taimi uma na oso fiafia mai ai i totonu o le faitotoa ia Craig ina ua mavae se aso o ni galuega faigata. Na te faafeiloaia i matou taitoatasi e le aunoa ma se opo ma se kisi ma faaliliuina le tele o aso faigata ma aso le lelei i taimi fiafia ma tamā. Maimau pe ana ou faaitiitia lou popole i le mau mea e lei faia i lena aso ae taulai atili atu ma le atamai, e pei o ia, i mea e sili ona taua. Semanu e faatele ona ou tu ma fiafia i taimi paia faaleaiga ma ou faafetai atili ai ia te ia mo faamanuiaga i o matou olaga!

Ia Tatou Fai Soo Upu Alofa i le Tasi ma le Isi

E lei mamao tele atu, na faasoa mai ai e se tamaitai faamaoni i le Ekalesia se popolega tele sa ia tatalo ai mo sina taimi. O lona popolega e mo nisi o tamaitai i lana uarota. Sa ia tau mai ia te au lona lototiga tele i le matauina o lo latou tautatala atu ma le le migao i nisi taimi i a latou tane ma le faia o tala o a latou tane, e oo lava i luma o a latou fanau. Ona ia tau mai lea ia te au a o avea ma se tamaitai talavou sa ia moomoo ma tatalo ma le faamaoni ina ia maua ma faaipoipo i se alii agavaa e umia le perisitua ma fausia se aiga fiafia faatasi ma ia. Sa ia ola ae i se aiga lea na “pulea [e lona tina]” ae faataunuu ma le fefe e lona tama faatonuga a lona tina ina ia tausia le filemu i totonu o le aiga. Sa ia lagona e i ai se auala sili atu. Na te lei vaai o faataitaia i totonu o le aiga sa ia ola ae ai, ae a o ia tatalo faatauanau mo le taitaiga, na faamanuiaina o ia e le Alii ia iloa le ala e fatu ai ma lana tane se aiga lea o le a talia ai ma le toafimalie le Agaga. Na ou i ai i lena aiga ma ou te molimau atu o se nofoaga paia!

Uso e ma tuagane, na faafia ona tatou “fai [atu ni] upu alofa i le tasi” ma le loto i ai”?16

Atonu tatou te suesueina i tatou lava i le faia o ni nai fesili. O sina fetuunaiga, e mafai ai ona faatatau nei fesili i le toatele o i tatou, pe ua tatou faaipoipo po o nofofua ma po o le a lava le tulaga o i ai o tatou aiga.

  1. O le a le taimi mulimuli na ou faamalo faamaoni ai i la’u soa, a le na o ia pe i luma o le maua fanau?

  2. O le a le taimi mulimuli sa ou faafetai atu ai, faailoa atu le alofa, pe aioi atu faamaoni mo ia i le tatalo?

  3. O le a le taimi mulimuli sa ou taofia ai au mai le fai atu o se upu ou te iloa e ono faatiga?

  4. O le a le taimi mulimuli sa ou faatoese atu ai ma aioi ma le faamaulalo mo se faamagaloga—e aunoa ma le faaopoopo atu o upu “ae pe ana e” po o le “ae pe ana e le”?

  5. O le a le taimi mulimuli sa ou filifili ai ia fiafia nai lo le pulunaunau ia “sa’o”?

Ia, afai o nisi o nei fesili o le a taitai atu ai oe i le le toafimalie po o se lagona o le ta’usalaina, ia manatua na aoao mai Elder David A. Bednar o le “aafiaga o le ta’usalaina i o tatou agaga e faapei foi o le aafiaga o le tiga i o tatou tino—o se lapataiga i se tulaga matautia ma o se puipuiga mai nisi faataumaoiga.”17

Ou te valaau atu ia te outou taitoatasi ina ia usitaia le aioi faamaoni mai a Elder Jeffrey R. Holland: “Uso e ma tuafafine, i lenei sailiga umi e faavavau ina ia avea atili e faapei o lo tatou Faaola, ia tatou taumafai ina ia avea o ni alii ma ni tamaitai “atoatoa” a itiiti i le ala lenei e tasi i le taimi nei—ia le faatiga lava i se upu po o i se isi tulaga lelei e faaupu ai, e ala i se gagana fou, le gagana lea a agelu.”18

A o ou sauni mo lenei avanoa i le asō, na aoao au e le Agaga, ma na ou tautino atu ia tautala atili e le aunoa i upu agalelei i la’u soa faapelepele ma e uiga ia te ia, ina ia siitia ai alii o lo’u aiga ma faailoa atu le faafetai mo auala o loo latou faataunuuina ai a latou matafaioi paia ma faaatoatoaina. Ma ua ou tautino e mulimuli i le faataoto “Ia e siitia a’u, ona ou siitia ai lea o oe, ona ta o a’e faatasi ai lea i luga.”

Tou te fia auai faatasi ma au i le sailia o le fesoasoani a le Agaga Paia e aoao i tatou i le auala e sili ona lelei e siitia ai le tasi ma le isi i a tatou matafaioi faaatoatoaina o ni atalii ma afafine o le feagaiga a ō tatou matua faalelagi alofa?

Ou te iloa e ala atu i mana gafatia o le Togiola ma lo tatou faatuatua ia Iesu Keriso, e mafai ai ona tatou faia. Ou te tatalo o le a tatou faatuatuaina o Ia ia fesoasoani ia i tatou e fesoasoani i le tasi ma le isi ina ia ola fiafia ma le faavavau a o tatou o a’e faatasi i luga, i le suafa o Iesu Keriso, amene.

Faamatalaga

  1. Boyd K. Packer, in “Donna Smith Packer Receives Family History Certificate from BYU,” news.byu.edu/archive12-jun-packer.aspx.

  2. Dieter F. Uchtdorf, in Jeffrey R. Holland, “Elder Dieter F. Uchtdorf: I Ni Vaaiga Fou,” Liahona, Mat. 2005, 10.

  3. Henry B. Eyring, in Gerald N. Lund, “Elder Henry B. Eyring: Aoaoina e ‘Aafiaga Iloga,’” Liahona, Ape. 1996, 31.

  4. Thomas S. Monson, “Ou Te Le Tuua Lava Oe, Ou Te Le Tuulafoai Lava ia te Oe,” Liahona, Nov. 2013, 85.

  5. Mark Twain, Eve’s Diary (1905), 107.

  6. Boyd K. Packer, “O Le Mana o le Perisitua,” Liahona, Me 2010, 9.

  7. Ezra Taft Benson, “To the Fathers in Israel,” Ensign, Nov. 1987, 51, 50.

  8. 2 Nifae 2:27.

  9. Tagai Robert D. Hales, “Faamalolosia o Aiga: O Lo Tatou Tiute Paia,” Liahona, Iulai 1999, 40; tagai foi LaRene Gaunt, “Elder Robert D. Hales: ‘Return with Honor,’” Liahona, Apr. 1995, 31.

  10. Kenese 2:18.

  11. Kenese 2:18, vaefaamatalaga e.

  12. Tagai Bruce K. Satterfield, “The Family under Siege: The Role of Man and Woman” (presentation given at Ricks College Education Week, June 7, 2001), 4; emp.byui.edu/SATTERFIELDB/PDF/RoleManWoman2.pdf.

  13. Tusitaulima 2: Taitaiina o le Ekalesia (2010), 1.3.1.

  14. Barbara B. Smith, “Hearts So Similar,” Ensign, May 1982, 97.

  15. “Daddy’s Homecoming,” Children’s Songbook, 210.

  16. “Fai Upu Alofa i le Tasi,” Viiga, nu. 147.

  17. David A. Bednar, “Matou Te Talitonu i le Nofomama,” Liahona, Me 2013, 44.

  18. Jeffrey R. Holland, “O Gagana a Agelu,” Liahona, Me 2007, 18.