Acn Ma Masap, Luhngse, ac Pahkotwen Ohsun

Ke wacngihn sucl in sef, harness, kuh kuhfa in fanfan ke kuhtwena kain, tamuhlwel luo—Jimmy, matwac 14, ac John, matwac 19 (tuh tiac pa ingacn inelos na pwacye)—srihke in fanuhkyac sie canyon oactu fin acn Snow Canyon State Park ke southern Utah yen nga mahtuhlah we. Apkuhran nuh fin fan upac se lalos an, elos sokwack lah sie yot tuhpahsrpahsr kohsrwaclah acn in fanyak lalos an. Elos koflah fanuhkyac, tuh oacyacpac ingena koflah fani liki. Elos srwemlah. Tukun orekma kahkahsrihk, John el sokwack fal rum in sang niacl nuh ke sie acn elan pahtokwack tuhlihk mukul fuhsr se wiyacl ah in sef fin yot sac. Tuh wacngihn na pwacye inkacnek el kuh in oruh in sifacna sruhkuhlwack. Ke el kampare lihksrweni in sokwack acn in fanyak an, kwekwelac luhn mahnol upaclah pac. El muhtwacwacack in sesseslah ke puhla ke elyah, ac el muhtwacwack in sahngweng ke moul lal.

Ke el koflah sruok paht, John el sulaclah muh ohiyac sefanna lal in srihke pa in ahttu saciklac ke sie kuh fokoko in sruokyac fin mahngon yot ahtaht sac. Fin oraclah wo, sahp el kuh, ke kuhiyen ma motkweyuck ke pahol, olluhllah sifacna nuh ke sef.

Ke kahs lal sifacna, el fahk:

“Met liki el ahttu an, nga fahk nuh sel Jimmy elan som suk soko lah in sahk fokoko fal ah in kolyucki nuh yuruk, finne nga etuh lah wacngihn kain ohingacn ke acn yotyot e lucng uh. Ma na oruh elan fahlac liki acn sac. Fin puhtatlac se luhk ah koluk ohiyac, ma se na nga kuh in oruh pa in oruh tuh tamuhlwel srihsrihk se wiyuck ah in tiac liyeyuc puhtatlac nuh ke misac luhk.

“Sang pacl yohk nuh sel in wacngihnlac, nga fahk pruhe sahflah se luhk ah—lah nga kena sucu luhk ah in etuh lah nga luhngse elos ac lah Jimmy el kuh in sifacna sef sun lohm ah—na nga ahttu. Nga ahtulac ke kuh fal ma oruh ahttu sac in ahsrwelah pouk ahluhkwelah sraho sac apkuhran nuh ke kapihn pouk. Tuh ke pouk sruokyac acn lucng ke yot sac, wacngihn ma nga puhla sahyacn puckpuck na fin yot tuhpahsrpahsr sac. Nga kuh in srwackna esam puhla tiacna wo ke wacngihn ma in sruokyac ah—wacngihn acn raun, wacngihn sraho, wacngin ma in tulokihn kuh sruok. Nga puhla lah kufun pouk muhtwacwacack kahkahsrihk in mihsrwelac nuh fin acn lucng puhkpuhk sac. Nga etuh lah moul luhk uh sahflah.

“Tuh pacl sac na, oacna sie sahrom puhtati ke sie pahkah ke summer, paho luo sikme liki sie acn lucng liki sraho se ke ohl sac, sruokyac pouk ke sie kuh ac nuhnak ma fokoko liki luhpahlos uh. Tuhlihk mukul yohk luhlahlfongi se wiyuck ah tiacna som suk pohloh sahk soko ma wacngihn ingacn uh. Etuhna ma nga plwacni in oruh ah, el tiacna som likiyuc. El mongfihswacsr in sano—ke mihs, apkuhran in tiac momong—etuh na pwacye lah nga wel in srihke in oraclah ahttu sac. Ke nga oruh ah, el saplakme nuh sihk, sruokyucwi, ac sruhnga in fihliyuclac. Paho fokoko luhn tuhlihk mukul sac moliyuclac ke lwen sac ke nga ahtaht e lucng liki infohk uh lah fin puhtatlac ac uniyucwi na pwacye.”¹

Mihsenge pa Istuh in Sacnri. Finne kuht enenuh in esampacl nuh kwewa (kuht olwelah ke pruhe lasr ke kuhfa luhn Leum ke wik nuh kwewa lah kuht fah), ne ohinge pa inge lwen muhtahl se emet ke yac uh nuh ke mukwikwi in luhngse kuhiyen poun tamuhlwel wiyacsr suc kahsrwe kuht suc ac ituckang nuh ke misac luhn nguhn ac mahno, in molikuhtlac liki ma suhfal muhnahs lasr, ac liki ahsor ac ma koluk lasr uh. Ke koanon sramsram soko ma sruhmuhnyuck sin sucu lal John ac Jimmy ah, nga ahkkahlwemye tarilacna nuh ke Iwaclah ac Sifil Moulyak luhn Leum Jisus Kraist ac akihlen ma sikyak ke plwacn wolacna luhn God ma kol nuh ke ac sang kalmeyac nuh ke “luhngse ma Jisus El use nuh [sesr].”²

Ke mwet uh fahsr yohk ke luhngse luhn facluh inge, ac kuh in tiac arlac fihsus kuh pwengpweng in sramsram kacl Adam ac Eve kuh ke “puhtatlac wo ohiyac” lalos nuh ke moul suhkawihl uh. Ne ohinge ma fihsrwacsr pwacye uh pa lah kuhtkoflahkahlwem nohfohn ke Iwaclah ac Sifil Moulyak luhn Kraist, ac kuhtfah tiacluhngkihn fal srihpac usrnguck ke isuslac Lal kuh misac Lal—ke kahs sahyac uh, wacngihn inkacnek sahyac in ahkfuhlwactye na pwacye KristmaskuhIstuh—sahyacn kahlwem kac lah oasr na pwacye Adam ac Eve suc puhtatlac liki Eden, wi mwacta nuh kwewa ma puhtatlac sacn utuck wi uh.

Nga tiacna etuh koanon ma sikayk ke placnet se inge met liki ma ingacn, tuh nga etuh mwet luo inge oreklac ke paho wolacna luhn God, lah ke sie pacl elos muhkwena muhta ke sie acn pacruhtais ma wacngihn misac luhn mwet kuh sucu tohkoh uh, ac lah ke sie tahk luhn sulaclah elos kuhnahoslah sie masap luhn God ma enenweyuck tuh elos in som liki imac sac tuh ma lwelah elos in isus tuhlihk met liki elos misac.³In sang pac ahsor ac ma upac nuh ke ohiyac lalos uh, tahfonglac lalos oasr mwacta ke ma luhn nguhn pac, esacloslac liki ye muhtuhn God nwe tok. Ke srihpen pacl sacn kuht puhtatyang nuh ke facluh puhtatlac sac ac ke srihpen kuht ac oacyacpac kuhnahoslah masap luhn God uh, kuht ac oacyacpac ahkolah in eis mwacta se pacna ma Adam ac Eve elos sun ah.

Ma na upac se! Mwet fin facluh nohfohn puhtatlac—kais sie mukul, muhtwacn ac tuhlihk oasr uh fototoeni nuh ke misac luhn mahno na pwacye, fototoeni pacl nuh kwewa ke kweok luhn nguhn ma pahtpaht. Kuh pa ingacn kalmacn moul uh? Kuh pa ingacn ip sahflah luhn moul uh? Kuh kuht nohfohn ahtaht ke canyon mihsrihsr ke facluh ma tiac elyah kacsr, ac kais sie sesr suk acn in kahsruh, kais sie sesr suk ma in sruok—ke wacngihn sahyacn kuht puhla puhkpuhk puhtati ke kufun pahosr uh, wacngihn ma in molikuhtlac, wacngihn ma in sruokyac, ac wacngihn ma in sruokkuhti. Kuh kalmacn moul lasr uh pa in wacngihn ma kuht lotwelah ac puhla—kuh in lihksrweni ahttu nuh lucng ke kuhiacsr, ac kampare ke lusen yac itngucul, na kuf ac puhtatlac, ac puhtatlac na ne tok?

Top nuh ke kihsen siyuck inge sie moh na kahlwem ac stuhuh ne tok! Wi mwet pahluh mahtuh ac sasuc uh, nga fahkwack lah “ma nuh kewa oreklac ke etuh luhn mwet se suc etuh ma nuh kewa.”⁴ Pwacnacng, ke puhlan pacl pahpah ninac se emet ah tifoklac liki Imac luhn Eden, God ac Pahpah tuhmacsr nohfohn, ke etwacack sulwaclah lal Adam ac Eve, El suhpwaclah lipufacn luhn inkuhsrao in fahkwack nuh selos—ac nuh ke pacl nuh inge—lah plwacn se inge ma nuh ke moul in engan lasr ne tok. Pa sie ip ke plwacn wolacna Lal, in oruh in oasr sie Mwet Lahngo suc pa Wen nuhtin God Sifacna—sie pac “Adam,” Mwet Sap Paul el pahnglol⁵—suc ac tuhkuh ke infulwen lwen in iwe tahfonglac se met lal Adam. Iwaclah sac kuh in kuhtanglah misac luhn mahno, ac sang sifil moulyak nuh sin mwet nuh kwewa suc isuslac tari kuh fah isuslac nuh ke facluh se inge. Ke pahkomuhta ac sang pac nuhnak muhnas ke ma koluk luhn kais sie mwet nuh kwewa, e kacl Adam me nuh ke sahflah luhn facluh, wiwina ke auliyak ac ahkostwen nuh ke masap wolacna uh.

In oacna sie mwet lohoh akmuhsralah, nga fahkwack ke lututang in Istuh se inge lah Jisus luhn Nazareth pa Mwet Lahngo luhn facluh, tuh “Adam sahflah,”⁶ mwet suc suhmuhslah ac ahksahfyelah luhlahlfongi lasr, Alpha ac Omega ke moul ma pahtpaht. “Ke sriphacl Adam mwet nuh kewa fah misac, ke srihpacn Kraist mwet nuh kewa fah sifil moulyak,”⁷Paul el fahk. Ac oacyacpac mwet pahluh Lehi: “Adam el puhtatlac tuh mwet uh in kuh in moul. … Ac Messiah El tuhkuh ke fohnlah luhn pacl uh, tuh Elan kuh in molwelah tuhlihk nuhtin mwet liki puhtatlac sac.”⁸Ma pwacye nuh kwewa, ke Puk luhn Mormon mwet pahluh Jacob el luti ke ip ke mwe luti ke lwen luo ke Iwaclah luhn Jisus Kraist lah “sifilpac moulyak uh enenuh in tuhkuh … ke srihpen puhtatlac sac.”⁹

Oruh mihsenge kuht ahkfuhlwactye mwe sang ke kuhtanglah fin puhtatlac nuh kewa kuht puhlakihn uh, kweok nuh kewa kuht etuh, ke pacl wacngihnlac finsrak lasr nuh kwewa, ke kais sie pacl kuht sahngweng—ac in sruhmuhn ma nuhke sifil moulyak luhn misac ac nuhnak muhnas luhn ma koluk lasr. Kuhtanglah se inge utuckuh nuh sesr ke srihpen ma sikyak ke weekend kain se inge ke millennia luo somlah ah fin acn Jerusalem.

Muhtwacwacack ke kasrkuhsrak ke ma luhn nguhn ke Imac Gethsemane, som nuh ke Srihpsrsrihpyak uh nuh fin soko sahksin Calvary, ac ahksahfyelah ke sie lututacng in Sacnri kahto lun sie kuclyuck ituckyang nuh Sel, sie mukul wacngihn ma koluk la, nwacsnwacs, ac muhtahl, Wen na pwacye nuhtin God Sifacna, El oruh ma wacngihn mwet misac sahyac tuh oruh kuh kuh in oruh. Ye kuh Lal sifacna, El otyak liki misac, tiacna sifil lwelah mahnol in som liki nguhnal. Ke kena Lal sifacna, El eslah nuknuk in misac Lal ma nokomuhllah, kahkahsrihk fihliyac ipin nuknuk ma fihliyucki fin muhtahl “ke sie acn nuh se sifacna,”¹⁰ma suhmuhslah uh fahk.

Tahkiyacn Istuh se emet ke Iwaclah ac Sifil Moulyak sac oraclah pacl yohk srihpac emet uh, mwet sang wowo emet, ngal kweok emet, ac mwe fahkwack yohk srihpac emet ke luhngse nwacsnwacs ma tuh ahkkahlwemyeyuck ke ma mahtuh luhn facluh se inge. Jisus Kraist, Wen Kuloh Sefanna nuhtin God, El kweok, misac, ac otyak liki misac El in muh kuh in, oacna sie sahrom puhtati ke sie pahkah ke summer, saukkuhtlac ke kuht puhtatlac uh sruokkuht ke kuht Lal, ac ke ahkostwen lasr nuh ke masap Lal, sruhkkuhtyak nuh ke moul ma pahtpaht.

Istuh se inge nga kuloh nuh Sel ac Pahpah suc usacluh nuh sesr tuh Jisus elan srwackna kuhtanglah misac, finne El tu ke niac kihneta. Istuh se inge nga kuloh nuh Sel ac Pahpah suc usacluh nuh sesr, tuh El srwackna tahfwelah pahkomuhta ma pahtpaht, finne El tahfwema ke sie lun paho fakfucki ac paho kihneta. Istuh se inge nga kuloh nuh Sel ac Pahpah suc usacluh nuh sesr tuh kuht kuh in on ke imac tuhnlah ke fiohn srah, ac patpucti ke sahksin, ac sie kuclyuck oalal wolacna:

Ke ine muhtahl luhn Jisus Kraist suc sifil moulyak uh, amen.