I reira te parau tiʻa, te here e te aroha e farerei ai

Ua tamata e piti na taeaʻe o Jimmy 14 matahiti, e o John 19 matahiti (e ere to raua iʻoa mau) i te paʻuma i niʻa i te hoê mouʻa topa tarere i Snow Canyon State Park i to’u fenua aiʻa i te pae apatoʻa no Utaha, ma te taura e te hatua taamu ore, e aore roa hoê aʻe mauhaa no te paʻuma. I to raua piriraa’tu i te hopea o ta raua taʻumaraa fifi, ua ite ihora raua e, te vai ra te hoê poro mouʻa o te tapeʻa ia raua ia faaoti i na metera e toe ra hou a tae atu ai i niʻa i te tupuaʻi mouʻa. Eita e nehenehe ia raua ia ape i te reira, eita atoa e nehenehe ia raua ia otohe i muri. Ua topa raua i roto i te herepata. I muri aʻe i te nuu-mărû-raa’tu, ua noaa ia John i te tuu atu i to’na avae no te turaʻi atu i to’na teina i te vahi papû i niʻa i te poro. Aita râ e raveʻa no te huti ia’na iho i niʻa i te poro. A faaitoito ai oia i te imi i te vahi no te tapeʻa i te rima aore râ no te tuu atu i te avae, ua haamata to’na mau uaua i te etaeta. Ua tupu to’na riʻariʻa rahi e ua haamata oia i te manaʻo e, e pohe oia.

Eita e nehenehe ia’na ia tapeʻa maoro atu â, ua faaoti o John e ta’na noa raveʻa e toe ra o te tamataraa ïa i te ouʻa i niʻa, no te tamata i te haru i te poro mouʻa e tarere ra. Mai te mea e manuïa, e nehenehe ïa ia’na ia huti ia’na na roto i te puai rahi o to’na na rima i te vahi papû.

Teie ta’na iho i parau :

« Hou a ouʻa ai au, ua parau atu vau ia Jimmy ia haere e maʻimi i te hoê amaa raau paari no te faatoro mai ia’u, noa’tu e, ua ite au e, aita hoê aʻe amaa raau i niʻa i teie poro mouʻa. E raveʻa noa te reira no te faaatea ê atu. Ia ore anaʻe au e manuïa i te ouʻaraa, ua papû ïa ia’u e eita to’u teina e ite ia’u ia pohe na roto i te maruaraa.

« Ua tiaʻi rii au ia moʻe atu oia i to’u mata, e ua faahiti au i ta’u pure hopea―oia hoʻi ïa, ua hinaaro vau ia ite to’u nei utuafare e, ua here au ia ratou e ia roaa ia Jimmy i te hoʻi atu i te fare ma te paruruhia―e ua ouʻa atura vau. Ma te puai rahi, ua tapae atu to’u na rima i niʻa’tu i te poro mouʻa. A haru ai to’u na rima i te poro mouʻa, te mea noa ta’u i fafa, e one ïa i niʻa i te ofaʻi mânina. Te haamanaʻo noa nei â vau i to’u manaʻo horuhoru a tarere ai au i reira e aore roa e ofaʻi e aore roa hoê aʻe mea no te haru e no te tapeʻa i niʻa iho. Ua ite au i to’u mau manimani rima i te haamataraa i te hee-mărû-noa-raa i niʻa i te one. Ua ite au e, e pohe au.

« I tera ihoa taime, mai te uira anapa i roto i te vero i te tau veʻaveʻa, ua toro taʻue noa mai e piti na rima i niʻaʻe i te hiti o te poro mouʻa, ma te haru mai i to’u na fatiraa rima ma te puai e te papû noa’tu te naʻinaʻi o taua mau rima ra. Aita to’u teina iti i haere e maʻimi i te tahi amaa raau aore e vai ra. No to’na ite-maite-raa e aha ta’u e opua ra i te rave, aita ïa oia i faaruʻe mai ia’u. Ua tiaʻi noa oia―ma te maniania ore, ma te haʻutiʻuti ore―ma te ite papû e, e tamata ihoa vau i te ouʻa. I to’u ouʻaraa, ua haru mai oia ia’u, ua tauturu ia’u, e aita i hinaaro ia marua vau. Ua faaora taua na rima taeaʻe puai ra i to’u ora i taua mahana ra a tarere ai au, e te pohe mau e tiaʻi mai ra ia’u ».¹

E au mau taeaʻe, e au mau tuahine, e Sabati Pasa teie mahana. Noa’tu e tiʻa ia tatou ia haamanaʻo noa (ua fafau tatou i roto i ta tatou pure oroʻa i te mau hebedoma atoa e e na reira tatou), teie ïa te mahana moʻa roaʻe o te matahiti no te haamanaʻo taa ê i to tatou taeaʻe tei toro mai i to’na na rima here e te papû no te faaora ia tatou i to tatou mau paruparu, mau mauiui e i ta tatou mau hara. Te faaʻite nei au, na roto i teie aamu tei faaʻitehia mai e te utuafare o John e o Jimmy, i to’u mauruuru rahi no te Taraehara e te Tiʻa-faahou-raa o te Fatu ra o Iesu Mesia e te faʻi nei au i teie mau ohipa i tupu i roto i te opuaraa hanahana a te Atua, tei arataʻi ia tatou e tei horoʻa i te auraa i « te aroha ta Iesu i pûpû [no tatou] ».²

I roto i to tatou sotaiete, o te rahi noa’tura te paieti ore, e ere i te mea mâtau e e ere atoa i te mea auhia ia faahiti i te parau no Adamu e no Eva e aore râ no te ô i Edene e aore râ no to raua « hiʻaraa maitai » i roto i te oraraa tahuti nei. Te parau mau râ, eita ïa e nehenehe ia tatou ia taa maitai i te Taraehara e te Tiʻa-faahou-raa o te Mesia e eita e noaa maitai ia tatou te mauruuru i te tumu mau no To’na fanauraa aore râ To’na poheraa―oia hoʻi aita’tu e raveʻa no te faahanahana i te Noera aore râ te Pasa―ma te ore e taa e, e ua vai mau na te hoê tane o Adamu e te hoê vahine o Eva tei hiʻa mau i Edene e te mau utuʻa atoa i apitihia’tu i taua hiʻaraa ra.

Aita vau i ite i te mau mea atoa tei tupu na mua’tu i niʻa i teie nei palaneta, ua ite râ vau e, ua hamanihia raua e piti e te Atua hanahana, e ua ora raua anaʻe no te hoê tau i roto i te hoê vahi paradaiso e aore roa hoʻi e pohe aore râ e utuafare, e ua ofati raua na roto i te tahi mau maʻitiraa i te hoê faaueraa a te Atua o tei titau hoʻi ia raua ia faaruʻe i to raua nohoraa e o tei faatiʻa râ ia raua ia fanau i te mau tamarii hou a faaruru atu ai i te pohe o te tino.³ No te faarahi atu â i te oto e te fifi o to raua oraraa, ua noaa atoa mai, na roto i ta raua ofatiraa i te ture, te mau utuʻa i te pae varua, tei tiʻavaru atu ia raua mai mua’tu i te aro o te Atua e a muri noa’tu. No te mea hoʻi e, ua fanauhia mai tatou i roto i taua ao hiʻa ra e no te mea atoa hoʻi e ofati atoa tatou i te mau ture a te Atua, e farii atoa ïa tatou i te mau faautuʻaraa ta Adamu e o Eva i farii.

Auê ïa ohipa peʻapeʻa e ! Te faaatea ê nei te taatoaraa o te nunaa taata i te Atua―te mau tane, te mau vahine e te mau tamarii atoa o te nunaa taata, ma te tapiri atu i te pohe tamau i te pae tino, e te ahoaho i te pae varua. O tera anei te oraraa ? O teie anei te hopearaa o te oraraa taata ? E tarere noa anei tatou i niʻa i te tahi poro mouʻa toʻetoʻe o te hoê ao tauʻa ore ma te imi i te tahi mea no te tapeʻa atu i niʻa iho―aore hoʻi hoê aʻe mea maori râ te fafaraa i te one e hee ra i to tatou mau rima, aore e mea no te faaora ia tatou, aore e taoʻa no te tapeʻa atu i niʻa iho. E ohipa faufaa ore anei te tumu o to tatou oraraa ma te rave i te mea e nehenehe noa ia tatou ia rave, ma te faaoromai noa i na hitu ahuru matahiti e hau atu, e te manuïa ore e te tamau-noa-raa i te topa e a muri noa’tu ?

Mea maramarama maitai e te mure ore te pahonoraa i taua mau uiraa ra : Eita roa ïa ! Te faaʻite papû nei au mai te mau peropheta tahito e tera no teie tau e « ua ravehia te mau mea atoa i te paari no’na tei ite i te mau mea atoa ».⁴ No reira, mai te taime a taahi ai taua na metua matamua ra i rapae au i te ô i Edene, no to’na ite-atea-raa i te faaotiraa a Adamu e a Eva, ua tono haere te Atua e to tatou Metua i te mau melahi no te raʻi ia poro i te reira―e tae noa mai i to tatou nei tau―e ua faanahohia teie mau ohipa tei tupu no to tatou popou mure ore. E tufaa te reira no Ta’na opuaraa hanahana o tei faanaho mai i te hoê Faaora, te Tamaiti mau a te Atua iho, te tahi atu « Adamu » mai ta Paulo i pii Ia’na⁵―o te haere mai i te afa tiʻa o te mau tau no te aufau i ta Adamu ofatiraa matamua. E faatupu ïa taua Taraehara ra i te upootiʻaraa i niʻa i te pohe o te tino, o te horoʻa i te tiʻa-faahou-raa i te mau taata atoa tei ora e aore râ o te fanauhia mai i roto i teie nei ao. Auaʻe râ, na roto i te aroha, e horoʻa atoa mai te reira i te faaoreraa i te mau hara a te taata tataʻitahi mai ia Adamu mai â e tae noa’tu i te hopea no teie nei ao, mai te au râ i te tatarahaparaa e te haapaʻoraa i te mau faaueraa a te Atua.

Ei hoê no Ta’na mau ite faatoroʻahia, te parau nei au i teie nei poʻipoʻi Pasa e, o Iesu no Nazareta, i mutaa e i teie nei, taua Faaora ra no te ao nei, taua « Adamu hopea » ra,⁶ te Tumu e te Faaoti i to tatou faaroo, te Alepha e te Omega no te ora mure ore. Te parau ra Paulo « Mai te taata i hope i te pohe ia Adamu, e hope atoa i te faaorahia i te Mesia ».⁷ Ua parau atoa te peropheta patereareha o Lehi : « Ua hiʻa Adamu ia vai te mau taata… E e haere mai te Mesia i te tau mau ra, ia tiʻa Ia’na ia faaora i te mau tamarii a te taata i te hiʻaraa ».⁸ E ua haapii huʻahuʻa roa’toa mai o Iakoba te peropheta no te Buka a Moromona, ei tufaa no te hoê aʻoraa e piti mahana te maoro, no niʻa i te Taraehara a Iesu Mesia e « e tae mai hoʻi te tia-faahou-raa o te taata nei… no te hiʻaraa o te taata ra ».⁹

No reira tatou e faahanahana nei i teie mahana i te horoʻa no te upootiʻaraa i niʻa i te mau manuïaraa ore atoa ta tatou e farerei, te mau oto atoa ta tatou e ite, te mau faataiâraa atoa ta tatou e farii, te mau riʻariʻa atoa ta tatou e faaruru atu―e faahanahana tatou i to tatou tiʻa-faahou-raa mai te pohe mai e te faaoreraa i ta tatou mau hara. E noaa ia tatou taua upootiʻaraa no te mau ohipa tei tupu i te hoê hopea hebedoma a hau atu i te piti tauasini matahiti i teie nei i Ierusalema.

Ma te haamata na roto i te ahoaho varua i roto i te ô no Gesetemane, e e haere atu i te Faasatauroraa i niʻa i te satauro i Kalavaria, e tae roa’tu i te hoperaa i te poʻipoʻi sabati nehenehe i roto i te tahi menema tei horoʻahia mai, ua rave te hoê taata hara ore, mâ e te moʻa, te Tamaiti mau a te Atua iho, i te mea aore roa e taata ê atu tei pohe i rave e e riro i te rave mai. Na roto i To’na iho mana, ua tiʻa mai Oia mai te pohe mai, e eita roa To’na tino e faataa-ê-faahou-hia i To’na ra varua. Na roto i to’na iho hinaaro, ua iriti Oia i to’na ahu pohe i faaahuhiaʻi Oia, ma te tufetu maite i te ahu vehî tei tuuhia i niʻaʻe i to’na mata i « vaiiho-ê-hia te vairaa ê »,¹⁰ mai ta te papaʻiraa moʻa i parau.

Ua riro tera na taahiraa matamua no te Pasa, te Taraehara e te Tiʻa-faahou-raa, ei taime no te faahopearaa rahi roa aʻe, ei taoʻa rahi roa aʻe no te aau horoʻa, ei mauiui riʻariʻa roa aʻe e ei faaʻiteraa hanahana rahi roa aʻe no te aroha mau, tei pûpûhia aʻenei i roto i te tuaaai o te ao nei. Ua mauiui Iesu Mesia, te Tamaiti Fanau Tahi a te Atua, e ua pohe e ua tiʻa Oia mai te pohe mai, ia nehenehe Ia’na, mai te uira anapa i roto i te vero i te tau veʻaveʻa, e tapeʻa ia tatou a topa ai, ma te tapeʻa maite e To’na puai, e na roto i ta tatou haapaʻoraa i Ta’na mau faaueraa, e faateitei ia tatou i te ora mure ore.

I teie Pasa, te haamauruuru nei au Ia’na e i te Metua tei horoʻa mai Ia’na ia tatou, i te mea e, te tiʻa upootiʻa noa ra Iesu i niʻa i te pohe, noa’tu te tiʻa nei Oia i niʻa i na avae mamae. I teie Pasa, te haamauruuru nei au Ia’na e i te Metua tei horoʻa mai Ia’na ia tatou, i te mea e, te toro noa maira Oia i te maitai hope ore, noa’tu te faatae noa mai nei Oia i te reira ma te apu rima puta e te fatiraa rima pêpê. I teie Pasa, te haamauruuru nei au Ia’na e te Metua tei horoʻa mai Ia’na ia tatou, i te mea e, ua nehenehe ia tatou ia himene no niʻa i te hoê aua i tahe ai te toto, te hoê satauro patitihia e te naero, e te hoê menema hanahana aore e taata :

I te iʻoa moʻa o te Fatu Iesu Mesia tei tiʻa faahou mai, amene.