Vim Li Cas Kev Sib Yuav thiab Tsev Neeg Muaj Nuj Nqi—Nyob Txhua Qhov Txhia Chaw hauv lub Ntiaj Teb

Lub Kaum Ib Hlis Ntuj, kuv tau muaj lub cib fim txais lus caw—ua ke nrog Thawj Tswj Hwm Henry B. Eyring thiab Npis Sov Gérald Caussé—los mus koom ib lub rooj sab laj hais txog kev sib yuav thiab tsev neeg nyob ntawm lub Vatican hauv Loos, Italias teb chaws. Cov neeg sawv cev rau 14 qho kev ntseeg teev uas tuaj ntau lub teb chaws tuaj tau tuaj koom, es lawv puav leej yog tuaj hais lus txog tej yam uas tau muaj los rau tsev neeg hauv lub ntiaj teb niaj hnub nim no.

Daim Duab

President Henry B. Eyring, Bishop Gerald Causse and Elder Perry in Rome

Thawj Txiv Plig Francis tau qhib tuas thib ib ntawm lub rooj sab laj thaum nws hais tias: “Peb ua neej nyob hauv ib lub xam khoo uas saib qhov uas kav tsis ntev rau nqi heev, uas muaj neeg coob heev uas tso txoj kev sib yuav tseg ua ib qho uas tsim nyog saib rau nqi. Qhov kev ntxeev tej kev cai zoo feem ntau tsa tus chij ntawm kev ywj pheej, tiam sis tiag tiag qhov uas lawv ua ntawd tau coj kev puas tsuaj ntawm sab ntsuj plig thiab lub cev nqaij daim tawv los rau neeg coob heev, twb yog cov pluag thiab cov uas tsis muaj zog. … Twb yog lawv uas raug txom nyem ntau tshaj plaws vim yog qhov teeb meem loj kawg nkaus no.”¹

Thaum nws hais txog cov tub hluas ntxhais hluas uas tab tom loj hlob tuaj, nws hais tias tseem ceeb heev uas lawv yuav tsum “tsis txhob nyoo rau qhov uas saib qhov uas kav tsis ntev rau nqi, tiam sis ua neeg siab loj nrhiav kom tau qhov kev hlub uas muaj tseeb thiab kav ntev, es tawm tsam tus qauv uas tib neeg coj raws li niaj hnub nim no”; peb yuav tsum ua li no.²

Daim Duab

Synod hall with the faith leaders on the marriage summit

Ces tom qab no txawm muaj peb hnub uas cov neeg sawv cev rau tej kev ntseeg teev tau sib qhia sib sab laj txog kev sib yuav ntawm ib tug txiv neej thiab ib tug poj niam. Thaum kuv mloog cov neeg sawv cev rau tej kev ntseeg teev sib txawv ntau sib tham sib sab laj, kuv txawm hnov lawv sib hais haum thiab sib txhawb nqa rau ntawm qhov uas txoj kev sib yuav yog ib yam dawb ceev thiab qhov uas tsev neeg tseem ceeb heev ua lub hauv paus ntawm lub xam khoo. Kuv kuj nrog lawv koom siab koom ntsws thiab.

Yeej muaj neeg coob heev uas hais txog tej kev sib koom siab no, thiab lawv ua li no ua ntau yam. Ib qho uas kuv nyiam heev yog thaum ib tug kws tshawb fawb Muslim uas tuaj Iran tuaj tau nyeem ob nqes lus raws nraim li los ntawm peb daim ntawv tshaj tawm hais txog tsev neeg.

Nyob ntawm lub rooj sab laj ntawd, kuv pom tias thaum tej kev ntseeg teev koom siab koom tes hais txog kev sib yuav thiab tsev neeg, lawv kuj koom siab koom tes hais txog tej kev txiaj ntsim ntawm kev coj ncaj ncees thiab kev mob siab ua dab tsi uas yeej los ntawm tej kev cob qhia uas txais tau hauv tsev neeg. Ua rau kuv xav tsis thoob uas kuv pom tej kev saib kev sib yuav thiab tsev neeg rau nqi ua ib yam tseem ceeb dua tej yam uas tej zaum peb sawv daws hais tsis sib haum txog los yog saib sib txawv xws li kam teb kam chaws, kev ua lag luam, thiab kev ntseeg teev. Thaum hais txog kev hlub yus tus khub thiab tej kev cia siab, kev txhawj xeeb, thiab tej kev ua npau suav rau peb cov me nyuam, peb puav leej zoo ib yam.

Daim Duab

President Henry B. Eyring speaking in a news room.

Yeej zoo heev uas tau nrog cov neeg no sib koom ua ke thaum lawv hais txog qhov uas lawv saib txoj kev sib yuav ntawm ib tug txiv neej thiab ib tug poj niam ua ib qho tseem ceeb heev. Tom qab cov neeg no hais lus tas lwm cov thawj coj ntawm tej kev ntseeg teev tau hais lus ua tim khawv. Thawj Tswj Hwm Henry B. Eyring tau ua tim khawv xaus lub rooj sab laj no. Nws ua tim khawv muaj zog heev hais txog qhov zoo nkauj ntawm ib txoj kev ua txij ua nkawm uas ib leeg muab siab npuab ib leeg thiab hais txog peb txoj kev ntseeg rau ntawm qhov uas tsev neeg nyob tau ua ke mus ib txhis li.

Thawj Tswj Hwm Eyring zaj lus tim khawv yog ib qho kev xaus lus zoo kawg rau peb hnub tshwj xeeb ntawd..

Nim no, tej zaum nej yuav noog hais tias, “Yog tias cov neeg ntawd feem coob saib tsev neeg rau nqi, yog tias tag nrho tej kev ntseeg teev ntawd pom zoo hais tias kev sib yuav yuav tsum yog ntawm ib tug txiv neej thiab ib tug poj niam, thiab yog tias lawv pom zoo hais tias peb yuav tsum saib tsev neeg thiab kev sib raug zoo hauv tsev neeg rau nqi, ces peb ho sib txawv li cas? Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua li cas kom nws txawv lwm haiv neeg hauv lub ntiaj teb no?”

Nov yog lo lus teb: txawm hais tias yeej zoo heev uas peb nrog lwm haiv neeg sib hais haum txog peb tej tsev neeg, tsuas yog peb xwb thiaj muaj txoj moo zoo uas hais txog tsev neeg nyob mus ib txhis.

Qhov uas txoj moo zoo coj los rau tej kev sib tham txog kev sib yuav thiab tsev neeg yeej loj kawg thiab tseem ceeb heev: peb hais txog qhov uas tsev neeg nyob tau ua ke mus ib txhis li! Peb mob siab hais txog qhov uas kev sib yuav dawb ceev heev vim peb ntseeg thiab to taub hais tias tsev neeg yeej muaj txij thaum ua ntej ntuj tsim teb raug thiab tsev neeg yeej yuav muaj mus nyob mus ib txhis li.

Txoj lus qhuab qhia no yog qhia yam yooj yim heev li hauv Ruth Gardner zaj nkauj rau Koom Haum Me Nyuam Yaus hu ua “Tsev Neeg Nyob Tau Ua Ke Mus Tas Ib Txhis.” Cia li nres ib pliag thiab xav txog cov me nyuam hauv Koom Haum Me Nyuam Yaus nyob thoob plaws lub ntiaj teb hu zaj nkauj no ua nyias yam lus, hu nrov heev, thiab muaj kev zoo siab uas tsuas yog kev hlub txog tsev neeg thiaj txhib tau:

Tag nrho peb txoj kev ntseeg ntuj ntawm txoj moo zoo uas txum tim rov qab los tsom ntsoov tsev neeg thiab txoj kev sib khi lus ntawm kev sib yuav. Hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb ntseeg tias tau muaj ib lub neej ua ntej lub neej no uas nyob ntawd peb tau nrog Peb Leej Txiv Saum Ntuj Ceeb Tsheej nyob ua me nyuam ntsuj plig. Peb ntseeg tias peb tau koom, thiab tseem koom niaj hnub nim no, Nws tsev neeg.

Peb ntseeg tias kev sib yuav thiab tsev neeg yuav muaj mus tom qab lub neej no—hais tias tej kev sib yuav dhau los ntawm cov neeg uas tuav txoj cai yog hauv tus Tswv tej tuam tsev yuav tseem muaj feem hauv lub neej tom ntej. Peb tej kev cai sib txis tsis siv cov lus hais tias “mus txog thaum peb sib ncaim thaum tas sim neej” tiam sis hais tias, “rau lub neej no thiab lub neej nyob mus ib txhis li.”

Peb kuj ntseeg hais tias tej tsev neeg raws li tus qauv qub tsis yog lub hauv paus pawg neeg hauv ib lub xam khoo khov kho—tiam sis tej tsev neeg kuj yog lub hauv paus ntawm Vajtswv lub nceeg vaj thiab tseem fwv nyob mus ib txhis li.

Peb ntseeg hais tias lub ntuj ceeb tsheej tej kev coj ua thiab tej tseem fwv yuav tsom ntsoov tsev neeg thiab kwv tij neej tsa.

Twb yog vim peb ntseeg hais tias tej kev sib yuav thiab tsev neeg nyob mus ib txhis, peb thiaj, ua ib lub koom txoos, xav ua tus thawj coj thiab ib tug nrog lwm pawg neeg koom tes ua ke cov ntxiv dag zog rau tej kev txhawb nqa kev sib yuav thiab tsev neeg. Peb paub tias tsis yog cov neeg uas ntseeg ntuj xwb uas saib txoj kev sib yuav kom kav ntev thiab tsev neeg uas muaj zog rau nqi. Yeej muaj cov neeg uas tsis ntseeg ntuj uas tau txiav txim siab tias ib txoj kev ua txij ua nkawm uas kav ntev thiab ib tsev neeg uas nyob ua ke yog txoj kev ua neej zoo tshaj plaws, zoo rau nyiaj txiag, thiab coj kev zoo siab zoo tshaj plaws rau yus.

Tsis muaj leej twg uas tau tsim dua ib txoj kev kom cob qhia tiam neeg tom ntej uas zoo dua ib tsev neeg uas muaj niam thiab txiv uas sib yuav raws li kev cai thiab uas muaj me nyuam.

Yog vim li cas kev sib yuav thiab tsev neeg muaj feem li no—nyob txhua qhov txhia chaw? Tej kev xam luaj cov pej xeem qhia tias kev sib yuav raws li qhov qub tseem yog lub tswv yim zoo tshaj plaws thiab tseem yog kev cia siab ntawm neeg feem coob hauv txhua pawg neeg raws li hnub nyoog—twb yog li no hauv cov tub hluas ntxhais hluas ntawm tiam neeg no, uas yeej muaj ib txhia uas xaiv nyob lawv ib leeg, saib kev ywj pheej rau nqi, thiab xum nyob ua ke tsis sib yuav. Qhov tseeb yog neeg feem coob nyob thoob plaws lub ntiaj teb no tseem xav muaj me nyuam thiab tsim tej tsev neeg uas kav ntev.

Thaum peb tau ua txij ua nkawm thiab tau muaj me nyuam, noob neej ntiaj teb qhov uas lawv sib koom siab sib koom tes yeej tshwm sim rau peb pom tau. Ua ib co neeg uas “saib tsev neeg rau nqi”—txawm tias peb nyob qhov twg los yog ntseeg teev li cas—peb yeej muaj tej kev cov nyom ib yam, tej kev hloov, thiab tej kev cia siab, kev txhawj xeeb, thiab tej kev ua npau suav ib yam rau peb cov me nyuam.

Ib yam li New York Times tus kws sau ntawv David Brooks tau hais tias: “Tib neeg tsis nyob zoo dua thaum lawv muaj kev ywj siab ntau heev kom ua txhua yam uas lawv xav ua. Lawv noj qab nyob zoo dua thaum lawv muab siab npuab tej kev cog lus uas tseem ceeb dua tej yam uas lawv muaj siab xav ua—tej kev cog lus rau tsev neeg, Vajtswv, hauj lwm thiab teb chaws.”⁴

Ib qho teeb meem yog tej media thiab tej kev ua yeeb yam niaj hnub nim no uas lub ntiaj teb tso tawm tsis qhia tej yam uas cov neeg feem coob saib rau nqi. Txawm yog li cas, los feem ntau tej yam hauv peb lub this vis, tej muv vim, tej nkauj, thiab Internet qhia tias yog ib co neeg tsawg uas ua txuj ua cov neeg feem coob tso tej yam tawm. Kev ua plees ua yi thiab kev tsis muaj lub siab xaiv qhov zoo, txawm yog kev ua lwj ua liam los yog kev deev ua si, yog qhia tawm ua qhov zoo hauj sim thiab li no ua rau peb cov uas saib tej yam dawb huv rau nqi xav hais tias peb tsis muaj nqis lawm los yog coj kev cai qub. Vim yog tej media thiab qhov Internet nyob txhua qhov txhia chaw, yeej nyuaj heev uas peb cob qhia cov me nyuam uas yuav coj ncaj ncees thiab yeej nyuaj uas peb ceev kom tej kev ua txij ua nkawm thiab tej tsev neeg nyob ua ke kom kav ntev.

Txawm hais tias tej media thiab tej muv vim hais li cas, thiab txawm hais tias yeej muaj tib neeg uas tsis saib kev sib yuav thiab tsev neeg rau nqi li yav nram ntej los, cov neeg feem coob tseem ntseeg hais tias kev sib yuav yuav tsum yog nyob ntawm ib tug txiv neej thiab ib tug poj niam xwb. Lawv ntseeg rau ntawm txoj kev muab siab npuab ib leeg rau ib leeg hauv txoj kev ua txij ua nkawm, thiab lawv ntseeg hais tias ib leej niam thiab ib leej txiv yuav tsum ua raws li nkawd tej kev cog lus uas nkawd cog thaum sib yuav, txawm yog “muaj mob muaj nkeeg” thiab “mus txog thaum sib ncaim thaum tas sim neej.”

Peb yuav tsum nco qab ntsoov qee zaum, ib yam li kuv nco tau thaum kuv mus xyuas lub nroog Loos, hais tias neeg feem coob hauv lub ntiaj teb saib kev sib yuav raws li qhov qub thiab tsev neeg rau nqi thiab peb tsis yog tib haiv neeg uas ntseeg li ntawd. Yeej tsis tau muaj dua kev cov nyom npaum li niaj hnub nim no rau ntawm kev ua hauj lwm, tsev neeg, thiab tej yam peb tus kheej xav ua. Ua ib lub koom txoos, peb xav pab txhua tus neeg thiab ua tag nrho tej yam uas peb ua tau kom txhawb nqa kev ua txij ua nkawm thiab tsev neeg uas muaj zog.

Yog vim li ntawd lub Koom Txoos thiaj li koom tes nrog thiab coj kev rau ob peb txoj kev ntxiv dag zog rau tsev neeg. Yog vim li ntawd peb thiaj qhia tawm hauv tej media thiab tej media sau sau hais tias peb tsom ntsoov tsev neeg. Yog vim li ntawd peb thiaj faib peb tej ntawv ceev xwm txheej thiab tej tsev neeg zaj keeb kwm rau txhua lub teb chaws.

Peb xav tsa peb lub suab kom luag tej hnov tau kom tawm tsam tag nrho tej kev ua neej cuav uas sim pauv tsev neeg qhov chaw uas Vajtswv Nws tus kheej tau txhim tsa. Peb kuj xav kom peb lub suab nrov hais txog qhov kev zoo siab uas los tau los ntawm qhov uas muaj tsev neeg raws li qhov qub. Peb yuav tsum yeej meem tsa peb lub suab nyob thoob plaws lub ntiaj teb es tshaj tawm yog vim li cas kev sib yuav raws li qhov qub thiab tsev neeg thiaj tseem ceeb, yog vim li cas kev sib yuav thiab tsev neeg thiaj muaj feem, thiab yog vim li cas ob qho no yeej yuav muaj feem tom ntej mus.

Kuv cov kwv tij thiab cov muam, txoj moo zoo uas txum tim rov qab los tsom ntsoov kev sib yuav thiab tsev neeg. Thiab kuj yog rau ntawm kev sib yuav thiab tsev neeg uas peb nrog lwm cov neeg ntseeg koom siab koom tes tau. Thiab kuj yog rau ntawm kev sib yuav thiab tsev neeg uas peb nrog neeg feem coob hauv lub ntiaj teb koom siab tau. Thiab kuj yog rau ntawm kev sib yuav thiab tsev neeg uas Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiaj muaj lub cib fim ua ib qho teeb saum ib lub toj.

Cia kuv xaus lus ua tim khawv (thiab vim kuv muaj cuaj caum xyoo kuv thiaj hais tau li no) kuv yim laus zuj zus tuaj, kuv yim pom tau tias tsev neeg yog lub ntsiab ntawm lub neej no thiab yog tus yawm sij ntawm txoj kev zoo siab nyob mus ib txhis li.

Kuv ua Vajtswv tsaug rau kuv poj niam, rau kuv cov me nyuam, thiab kuv cov me nyuam xeeb ntxwv, thiab rau tag nrho cov kwv npawg thiab kwv tij neej tsa uas ua rau kuv lub neej zoo kawg thiab nyob mus ib txhis li. Kuv ua tim khawv txog qhov tseeb nyob mus ib txhis thiab dawb ceev no los ntawm Yexus Khetos lub npe zoo, amees.