Efuh Pahyuck ac Sucu Yohk Srihpac—Acn Nuh Kwewa fin Facluh

Nohfuhmpuh tari ah nga insewowo in suliyuck—weluhl Prestuhn Henry  B. Eyring ac Pisap Gérald Caussé—nuh ke sie toeni ke pahyuck ac sucu uh luhn mwet fuhlwact ke Vatican fin acn Rome, Italy. Mwet suc wi pac pa mwet alu ma tuhkuh sin kain alu [singucul ahkosr] 14 ac ke continent ohnkohsr likina itkohsr, nohfohn selos suliyuck in sramsram ke luhlahlfongi lalos ke ma sikyak nuh ke sucu fin facluh mihsenge.

Petsac

President Henry B. Eyring, Bishop Gerald Causse and Elder Perry in Rome

Pope Francis el ikacslah toeni se met ke tuhkweni uh ke fahkwack se inge: “Kuht moul ingena ke facsin tuh ma tiac oasr lusacn pacl paht, ke pacl yohk likina met mwet fuhlweack ke pahyuck ke sie olwelah luhn mwet. Eklac se inge ke kain mukwikwi ac facsin luhngse ahkkahlwemye sukohsohk, tuhsruhktuh ma pwacye pa use kuhnaoslah luhn ma muhtahl ac ma luhn facluh nuh sin mwet puhspuhs, yohk nuh sin mwet suhkahsruhp ac muhnahs. … Elos kweok yohk pacl nuh kwewa ke kain ongaiyac se inge.”¹

In sramsramkihn elos ke fihl luhn tuhlihk nahtuhsr, el fahk lah yohk srihpac lah elos “tiac lwelah elos sifacna in som nuh ke ohiyacn luhn wacngihn ma pahtpaht, tuhsruhktuh in tu kuh ke puhlaik in suk ma pwacye ac luhngse pahtpaht, in som liki atacn facluh”; ma inge enenuh sikyak.²

Petsac

Synod hall with the faith leaders on the marriage summit

Tukun sramsram inge oasr lusen lwen tolu sramsram sahyac ke mwet kol luhn alu suc sramsram ke sifacn pahyuck infulwacn mukul ac muhtwacn se. Ke nga lohng sin mwet kol luhn alu puhspuhs fin facluh nohfohn, nga lohng elos insese sie sin sie ac ahkkweye luhlahlfongi luhn sie sin sie ke ma muhtahl luhn pahyuck ac ma yohk srihpac ke sucu ke u srihsrihk emet luhn facluh. Nga puhla kuh yohk ke luhlahlfongi oacna sie ac sefannalac yohrohlos.

Oasr mwet puhspuhs suc liye ac ahkkahlwemye sefannalac se inge, ac elos oruh ke ohiyac puhspuhs. Sie sin ma se nga luhngse yohk tuhkuh sin mwet lutlut Muslim suc mwet Iran se ke el fahkwack suwohs kihtin ip luo ke fahkwack luhn sucu ke alu lasr uh.

Ke toeni an, nga liye lah ke alu siena puhspuhs oracni in sefannalac ke pahyuck ac sucu, elos oacyacpac sefannalac ke ip yohk ac oaru ac olwelah ke kain ma inge ma nuh ke u luhn sucu. Nga lut in liye fuhkah ma yohk ke pahyuck ac sucu som ahluhkwelah ma siena ke kafucrmacn, mani, kuh alu. Ke kuht liye luhngse luhn mukul tuhma kuh muhtwacn kiyac ac finsrak, ma sensen, ac mwemwe ke tuhlihk, kuht nohfohn oacna sie.

Petsac

President Henry B. Eyring speaking in a news room.

Arulacna wolacna in wi toeni ke mwet sramsram ke acn puhspuhs facluh ac elos ma sefanna ke puhla lalos ke ma yohk srihpac luhn pahyuck infulwacn mukul ac muhtwacn se. Kais sie sramsram lalos ahksahfye ke fahkwack luhlahlfongi luhn mwet kol ke alu sahyac. Prestuhn Henry  B. Eyring el oruh fahkwack luhlahlfongi sahflah ke toeni uh. El sang fahkwack kuh ke kahtoiyacn sie pahyuck fokoko uh ac nuh ke luhlahlfongi lasr ke olwelah luhn insewowo luhn sucu ma pahtpaht.

Luhlahlfongi lal Prestuhn Eyring arulacna fal nuh ke sahflahiyacn lwen tolu wolacna ingen.

Ingena, sahp kom siyuck, “Fin inkaiyacn selos fin puhla oacna sie ke ma yohk ac luhlahlfongi luhn sucu, fin luhlahlfongi ingacn insese ke ma enenweyuck luhn pahyuck, ac elos fin insese ke yohk srihpaciyacn kuhpahsr ke lohm ac sucu uh, na kuht siena luhkwelos fuhkah? Piyac ma siena ke Alu luhn Jisus Kraist luhn Mwet Luhlahlfongi Lal ke Lwen-sahflah liki acn nuh kwewa sahyac luhn facluh?”

Pa inge top se uh: finne toeni uh arulacna wolacna in liye ac puhla lah oasr ma puhs kuht akacsruhi yurin mwet sahyac luhn facluh ke sucu lasr, oasr muhkwena yohrohsr liyeyuck ma pahtpaht ke wosasuc fohlohkihnyuckyak uh.

Ma utuckuh sin wosasuc fohlohkihnyuckyak nuh ke sramsram ke pahyuck ac sucu uh pa ma na yohk srihpac nuh pwacye tuh tiac kuh in fahk yohklac: kuh etuh ma inge pa ma pahtpaht! Kuht us olwelah ac muhtahliyacn pahyuck uh nuh ke acn lucng ke srihpen luhlahlfongi ac kahlwem lasr ke sucu som met liki facluh inge oasr nuh ke pacl tok ma pahtpaht.

Mwe luti se inge lutiyuck arlac fihsrwacsr, fokoko, ac kahto ke kahs lal Ruth Garthner ke on luhn Primary “Families Can Be Together Forever.” Tui kihtin pacl ac nuhnkuh ke tuhlihk Primary nuh kwewa fin facluh onkihn kahs inge ke kahs lalos sifacna, ke insiaclos nohfohn, ke sie kampare ma luhngse muhkwena luhn sucu uh kuh in oraclah sikyak.

Luhlahlfongi nohfohn ke wosasuc fohlohkihnyuckyak lasr muhsahiyuckyak ke sucu ac wuhlweacng sasuc ac ma pahtpaht luhn pahyuck. Ke Alu luhn Jisus Kraist luhn Mwet Luhlahlfongi Lal ke Lwen-sahflah, kuht luhlahlfongi ke moul se met liki kuht tuhkuh nuh facluh ke kuht moul ke nguhn nuhtin God Pahpah tuhmasr Inkuhsrao. Kuht luhlahlfongi muh ke acn we ah, ac ingena, kuht mempucr ke sucu Lal.

Kuht luhlahlfongi lah kuhpahsr luhn pahyuck ac sucu kalweni tukun kuht misac—tuh pahyuck ma oreklac sin sie suc oasr wal fal lun tempuhl Lal kuh in kalweni in oasr ke facluh fahsruh. Pahyuck lasr uh eslah kahs “nuh ke misac kuht fahsrelihk” ac eklac nuh ke “nuh ke pacl ac ma pahtpaht.”

Kuht oacyacpac luhlahlfongi lah sucu fokoko ke pahpah, ninac, ac tuhlihk tiac u fihsracsr ke un mwet ke acn, economy wo, ac facsin kuh ke ohiyac an—tuhsruhktuh elos oacyacpac u fihsracsr ke ma pahtpaht ac ke tohkohsrahi ac kafucrmacn luhn God.

Kuht luhlahlfongi lah ohiyacn u ac kafucrmacn luhn inkuhsrao fah muhsahiyuckyak ke sucu nohfohn uh.

Ke srihpen luhlahlfongi lasr lah pahyuck uh ac sucu uh som nuh ke ma pahtpaht tuh kuht, ke alu se, kena in kol ac wi mukwikwi luhn facluh in ahkfokokoye ma ingen. Kuht etuh lah tiac elos muhkwena suc mukwikwi ke alu suc akacsruhi luhlahlfongi ac kena oacna sie ke pahyuck ac kuhpahsr luhn sucu kuh. Puhslac mwet ke wacngihn alu luhlahlfongi lah in moul ke pahyuck ac sucu kuh orekma wo emet, economical yohk emet, ac ohiyac engan emet in moul.

Wacngihn mwet sahyac oraclah ohiyac wo liki na in tuhfahlah fihl fahsruh ke un mwet ke lohm” ke pahpah, ninac ac tuhlihk uh.

Efuh pahyuck and sucu enenuh in yohk srihpac—acn nuh kwewa? Poll ma tuhkuh sin mwet uh ahkkahlwemye lah pahyuck srackna luhngseyuck ac pa finsrak luhn inkaiyacn mwet ke mwet fuhsr nuh ke mahtuh—finne mwet isuslac tukun yac [sie yucfoko alngucul] 1980, mwet suc kuht lohng ma puhs ke elos sulwaclah in lolacp, sukohsohk sifacna, ac moul tuhkweni ac tiac pahyuck. Ma pwacye pa inkaiyacn mwet fin facluh srackna luhngse in isus tuhlihk ac oraclah sucu kuh.

Ke pacl se kuht pahyuck ac isus tuhlihk, ma oacna sie ke mwet nuh kwewa fihsracsr likina met in liye. Ke “mwet luhn sucu”—finne acn kuht muhta kuh alu kuht wi luhlahlfongi kac—kuht akacsruhi mwe upac oacna sie, eklac oacna sie, ac finsrak, sensen, ac mwemwe oacna sie ke tuhlihk nahtuhsr.

Oacna mwet sihm David Brooks ke New York Times el fahk: “Mwet tiac wo likina ke elos eis sukohsohk sifacna yohk in oruh ma luhngse lalos. Elos wo likina met ke elos oasr ke kunohkohn ma yohk srihpac likina ma luhngse lalos—kunohkohn nuh sin sucu, God, orekma, ac muhtuhnfacl.”⁴

Sie ma elyah pa ma yohk akacsruhi ke facluh ke media ac entertainment tiac insese ke ip yohk ac luhlahlfongi luhn inkaiyacn mwet uh. Ke srihpac oacna sie, inkaiyacn television, petsac, on, ac Internet ahkkahlwemye ma sikyak met tuh u srihk ahol u luhlahp. Mukwikwi fohkfohk, petsac ke acnwuck ac orek kosro, ahkkahlwemye oacna mwet nuh kwewa oruh ac oruh mwet uh finfacluh in puhla oacna elos ukwe facsin mahtuh kuh ma luhn pacl mahtuh. Ke sie facluh ma kolyuck ke media ac Internet, oruh in upac likina met in tuhfahlah tuhlihk ke ohiyac wo ac karihngihn pahyuck and sucu in muhta tuhkweni.

Finne ma yohk luhn media ac entertainment luhngse kuht in luhlahlfongi, tuhsruhktuh, ac finne oasr semuhiyac ohiyacn wo ke pahyuck ac sucu, inkaiyacn mwet srackna luhlahlfongi lah pahyuck enenuh in sikyak ke mukul se ac muhtwacn se. Elos luhlahlfongi ke suwohswohs infulwacn pahyuck, ac elos luhlahlfongi ke olwelah luhn pahyuck “ke pacl mas ac wo” ac “nuh ke misac kuht fahsrelihk.”

Kuht enenuh ahkacsmakihnye kuht sifacna kais kuhtuh pacl, oacna ke nga ahkacsmakihnye ke acn Rome, ke ma wolacna ac ahkkweyeyuck lah pahyuck ac sucu srackna pa ma luhngseyuck luhn inkaiyacn mwet ac kuht tiac tu muhkwena ke luhlahlfongi inge. Pwacye lah pacl inge arulacna upac in akacsruhi pacl wo ke orekma, sucu, ac enenuh sifacna likina pacl met ah. Ke alu uh, kuht ke kahsruh ke ma nuh kwewa kuht kuh in oraclah ac ahkkweye pahyuck ac sucu fokoko.

Pa oruh Alu mukwikwi in wi ac sang kolyuck nuh ke u in kahsruh an ac u luhn alu ekahsr in ahkfokokoye sucu uh. Pa oruh kuht akacsruhi luhlahlfongi lasr ke sucu lasr ke media ac social media. Pa oruh kuht akacsruhi ma sihmlac lasr ke genealogy ac sucu nuh ke muhtuhnfacl nuh kwewa.

Kuht luhngse puhsracsr in lohngyuck likina ohiyac koluk ac ohiyac in moul nohfohn sahyac ma srihke in ahollah u in sucu ma God El sifacna oraclah. Kuht luhngse puhsracsr in lohngyuck in ahkkweye ma engan ac ahkfalye ma facsin luhn sucu use uh. Kuht enenuh kalweni fahkwack puhsra inge nuh ke facluh nohfohn in fahkwack efuh pahyuck ac sucu ma yohk srihpac, efuh pahyuck ac sucu ma pwacye, ac efuh ohiyac inge fah sikyak nuh ke pacl ma pahtpaht.

Tamuhlwel ac tahmtahel, wosasuc ma fohlohkihnyuckyak uh sramsram yohk ke pahyuck ac sucu uh. Pahyuck ac sucu uh pac pa ma kuht kuh in oracni inkaiyac uh wi alu sahyac uh. Ma raunwelah pahyuck ac sucu ma kuht kuh in sokwack ohiyac sefanna yurin mwet nuh kwewa fin facluh Ma raunwelah pahyuck ac sucu uh ma Alu luhn Jisus Kraist luhn Mwet Luhlahlfongi ke Lwen-sahflah oasr pacl wowo la in sie kahlwem ke inging soko.

Lwelah nga in fahkwack mwe loh luhk (ac yac yucngucul nga muhta ke facluh se inge in oruh nga in fahk ohinge) lah ke ngwac mahtuhlah uh, nga akihlen yohk likina met ah lah sucu pa ma yohk srihpac emet ke moul ac pa ki nuh ke engan ma pahtpaht.

Nga sang kuloh nuh sin muhtwacn kiyuck, tuhlihk nuhtihk, ac tuhlihk nuhtin tuhlihk nahtuhlos, ac ke cousin ac in-law ac sucu yohklac luhk suc oruh moul luhk in arulacna wo ac, ahok, finne ma pahtpaht. Ke ma pwacye inge nga fahkwack ma pwacye ke mwe loh fokoko ac muhtahl emet luhk ke inen Jisus Kraist, amen.