2010–2019
Aisea e Taua ai le Faaipoipoga ma le Aiga—I Soo se Mea i le Lalolagi
Aperila 2015


Aisea e Taua ai le Faaipoipoga ma le Aiga—I Soo se Mea i le Lalolagi

O le aiga o le totonugalemu o le olaga ma o le ki lea o le fiafia e faavavau.

Ia Novema talu ai, sa ou maua ai le avanoa i se valaaulia—faatasi ma Peresitene Henry B. Eyring ma Bishop Gérald Caussé—e auai i se fonotaga faapitoa e uiga i faaipoipoga ma aiga i le Vatikana i Roma, Italia. Sa auai ai sui o lotu ma faatuatuaga eseese e 14 mai le ono o konitineta e fitu, ma sa valaaulia uma i latou ia faailoa atu o latou talitonuga i le mea o loo tupu i le aiga i le lalolagi i le taimi nei.

Ata
President Henry B. Eyring, Bishop Gerald Causse and Elder Perry in Rome

Sa tatalaina e Pope Faranisisi le sauniga muamua o le faatasiga i le saunoaga lenei: “Ua tatou ola nei i se aganuu o mea lē tumau, lea ua faateleina ai le lafoaia e tagata o le faaipoipoga o se tautinoga a tagata lautele. O lenei fetauaiga i uiga ma amioga mama ua tele lava ina faapea nisi o le faailoaga lea o lo latou saolotoga, ae o le mea moni, ua aumaia ai le faatamaiaga faaleagaga ma faaletino i le anoanoai o tagata soifua, aemaise lava i tagata sili ona matitiva ma sili ona vaivai. … O i latou lava ia e sili ona mafatia i nei faiga faalēalofa.”1

I le faasino atu ai i le tupulaga faia’e, sa ia saunoa ai e faapea e taua le “aua nei o latou lolo atu i lena manatu faataumaoi o mea lē tumau, ae ia avea ma tagata e tetee atu ma le lototele e saili le alofa moni ma tumau, ia faasagatau atu i faiga masani ua i ai nei; ma e tatau ona faia lenei mea.2

Ata
Synod hall with the faith leaders on the marriage summit

Sa sosoo ai ma aso e tolu o aoaoga ma talanoaga faatasi ma taitai faalelotu e uiga i le mataupu o le faaipoipoga i le va o se alii ma se tamaitai. A o ou faalogologo atu i manatu loloto eseese o taitai faalelotu i le lalolagi atoa, sa ou faalogo atu o latou ioe atoa i le tasi ma le isi ma faailoa le lagolago i talitonuga o le tasi ma le isi e uiga i le paia o le faavae o le faaipoipoga ma le taua o aiga i le avea ai ma iunite faavae o malo. Sa ou lagonaina se lagona mamana o le manatu tasi ma le lotogatasi faatasi ma i latou.

Sa toatele taitai na iloaina ma faailoaina lenei lotogatasi, ma sa latou faia lea mea i le tele o auala eseese. O se tasi o ia auala na sili ona ou fiafia i ai o le taimi sa sii mai ai e se polofesa Mosalemi mai Irani ni parakalafa maoti se lua mai la tatou lava folafolaga i le aiga.

I le taimi o le fonotaga faapitoa, sa ou matauina ai a oo ina lotogatasi faatuatuaga ma tapuaiga ma lotu eseese e uiga i le faaipoipoga ma le aiga, ua lotogatasi foi uma i latou i tulaga faatauaina ma le faamaoni ma tautinoga ia e fesootai pea ma iunite faaleaiga. Sa ofoofogia lava mo au le vaaia o le auala e sili atu ai mea e faamuamua i faaipoipoga ma le faaogatotonuina o le aiga i lo isi lava eseesega faaupufai, faaletamaoaiga, pe faalelotu. A oo mai i le alofa i le toalua ma faamoemoega, popolega, ma miti mo fanau, ua tutusa i tatou uma.

Ata
President Henry B. Eyring speaking in a news room.

Sa ofoofogia lava le faatasi ai i ia fonotaga ma faiaoga i le lalolagi atoa a o latou talanoaina lautele o latou lagona e uiga i le taua o le faaipoipoga i le va o se alii ma se tamaitai. Sa sosoo ai ma a latou saunoaga taitasi ia molimau mai isi taitai faalelotu. Sa saunoa Peresitene Henry B. Eyring i le molimau faaiu o le fonotaga faapitoa. Sa ia tuu atua se molimau mamana e uiga i le matagofie o se faaipoipoga tuuto ma e uiga i lo tatou talitonuga i faamanuiaga folafolaina o aiga e faavavau.

O le molimau a Peresitene Eyring sa matua talafeagai lelei e tapunia ai na aso faapitoa e tolu.

Ia, atonu la tou te fesili, “Afai la na lagonaina e le toatele lena lagona tutusa e uiga i mea e faamuamua i le aiga ma talitonuga, afai na ioeina moni uma e na faatuatuaga ma tapuaiga le tulaga e tatau ona i ai faaipoipoga, ma afai na latou ioe uma i le faataua e tatau ona tuu atu i aiga ma sootaga faaleaiga, e faapefea la ona ese mai ai i tatou? O faapefea ona iloagofie ma ese mai le Ekalesia a Iesu Keriso o le Au Paia o Aso e Gata Ai lava ia mai le toatele o le lalolagi?”

O le tali la lenei: e ui sa matagofie le vaaia ma le lagonaina, e tele naua mea tatou te tutusa ai ma le toatele o le lalolagi e faatatau i o tatou aiga, ae ua na o i tatou o loo i ai se vaaiga e faavavau o le talalelei toefuataiina.

O le mea ua aumaia e le talalelei toefuataiina i talanoaga e uiga i le faaipoipoga ma le aiga e matua lautele lava ma fitoitonu tele lea e ao ai ona faamanino lelei: tatou te talanoaina lea mataupu [i lona tulaga] e faavavau! Tatou te talanoaina le tautinoga ma le paia o le faaipoipoga i se tulaga sili atu ona o lo tatou talitonuga ma le malamalamaaga e faapea o aiga na amata mai lava a o lei faavaeina le lalolagi ma e mafai ona agai pea i luma i le faavavau.

O lenei aoaoga faavae ua faigofie lona aoaoina ma le mamana ma le matagofie e le tusiga a Ruth Gardner o le pese a le Peraimeri “E Mafai Ona Faavavau Aiga.” Taofi lava mo sina taimi ma mafaufau e uiga i tamaiti Peraimeri i le lalolagi atoa o loo usuina nei upu i la latou lava gagana, ma le leotetele, faatasi ma se faanaunautaiga lea e na o le alofa o le aiga e mafai ona manatua ai:

E mafai na faavavau aiga

I le ala a le Tama.

Ou te fia mau ma lo’u lava aiga,

Ua faaali mai e le Alii le ala ou te ausia ai.3

O le talitonuga atoa o le tatou talalelei toefuataiina ua faatotonugalemu i aiga ma le feagaiga fou ma le faavavau o le faaipoipoga. I Le Ekalesia a Iesu Keriso o le Au Paia o Aso e Gata Ai, tatou te talitonu i se muai olaga lea sa tatou ola uma ai o ni fanau agaga moni a le Atua lo tatou Tama Faalelagi. Tatou te talitonu sa avea i tatou, ma o loo avea pea i tatou ma tagata o Lona aiga.

Tatou te talitonu e mafai ona faaauau pea faaipoipoga ma sootaga faaleaiga i talaatu o le tuugamau—ma o faaipopoga e faatinoina e i latou ua i ai le pule tatau i Ona malumalu o le a faaauau pea ona aoga i le lalolagi a sau. E le o i ai i a tatou sauniga o faaipoipoga ia upu “seia tetea ta’ua i le oti” ae o loo faapea mai “mo le olaga nei ma le faavavau atoa.”

Tatou te talitonu foi o aiga malolosi ua masani ai e le gata o iunite faavae ia o se malo mautu, o se tamaoaiga mautu, ma se aganuu mautu o tulaga faatauaina—ae o i latou foi o iunite faavae o le faavavau ma le malo ma le faigamalo a le Atua.

Tatou te talitonu o le faatulagaga ma le faigamalo o le lagi o le a fausiaina i aiga ma aiga lautele.

O lea tulaga ona o lo tatou talitonuga e faapea o faaipoipoga ma aiga e faavavau lea o i tatou, o se ekalesia, e mananao ia avea ma se taitai ma se tagata auai i taumafaiga i le lalolagi atoa ia faamalosia i latou. Tatou te iloa e na o i latou foi o loo toaaga i lotu e tutusa o latou tulaga faatauaina ma mea e faamuamua i faaipoipoga tumau ma sootaga malolosi faaleaiga. O se aofaiga tele o tagata le lolotu ua talitonu o se faaipoipoga tuuto ma se olaga faaleaiga o le ala aupito sili lea ona aoga, ma sili ona tamaoaiga, ma sili ona fiafia e ola ai.

E leai ma se tasi ua ia maua se isi auala sili atu ona lelei e tausi a’e ai le isi tupulaga e sosoo ai i lo se aiga o ni matua faaipoipoina faatasi ma se fanau.

Aisea e tatau ai ona taua le faaipoipoga ma le aiga—i soo se mea? Ua faaalia i manatu o tagata lautele e faapea o le faaipoipoga o loo avea pea ma se tulaga sili ona lelei, ma se mea e faamoemoe i ai se vaega toatele o vaitausaga uma—e oo lava i le augatupulaga fou o le meleniuma lea ua tele ina faalogo ai i le au lē fia faaipoipo, saolotoga o le tagata lava ia, ma le nonofo faapouliuli nai lo le faaipoipo. O le mea moni e matua toatele lava tagata i le lalolagi atoa o loo mananao pea ia fai ni fanau ma fatua’i ni aiga malolosi.

O le taimi lava tatou te faaipoipo ai ma faia ai a tatou fanau, o le taimi foi lea o le a atili faamaonia ai le tulaga tutusa i tagata uma. I le avea ai ma “tagata e talitonu i le faatulagaga o aiga”—po o fea lava tatou te nonofo ai pe o a foi o tatou talitonuga faalelotu o i ai—tatou te tausoa faatasi lava le tele o faigata e tasi, o fetuunaiga e tasi, ma faamoemoega e tasi, popolega, ma miti mo a tatou fanau.

E pei ona saunoa le tusitala o le New York Times o David Brooks e faapea: “e le sili atu ona lelei tagata pe a faamatuu i ai se saolotoga sili mo i latou lava e faia ai le mea latou te mananao i ai. E sili atu lo latou lelei pe a noatia i ni tautinoga e faamuamua mea taua i lo mea e fiafia i ai i latou lava—o tautinoga i le aiga, Atua, galuega ma le atunuu.”4

O se tasi faafitauli o le tele lea o ala o faasalalauga ma faafiafiaga i le lalolagi atoa e le o talafeagai lea ma mea faamuamua ma tulaga faatauaina o le toatele o tagata. Po o le a lava le mafuaaga, o le tele naua o televise, atatifaga, musika, ma le Initoneti ua maua ai se tulaga masani o se vaega toalaiti o tagata ua manatu o latou o se vaega toatele. O le ola le mama ma le leai o ni uiga mama, e sau mai fetauaiga matuia i feusuaiga faataaloga, ua fai e pei lava o se mea masani ma e mafai ona faatupuina ai se lagona ia i tatou o loo ola i tulaga faatauaina lelei e pei ua pasiā a tatou amio pe tatou te o mai mai se vaitau ua leva lava. I sea lalolagi ua puleaina e ala o faasalalauga ma Initoneti, ua matuai faigata ai lava ona tausia fanau e tali atu mo i latou lava ma le faatumauina faatasi o faaipoipoga ma aiga.

Peitai, e tusa lava po o le a le tele naua o auala o faasalalauga ma faafiafiaga e ono fautua mai, ma e tusa lava po o le a le tulaga moni o le faaitiitia o le mananao o tagata ia faaipoipo ma faia ni aiga, ae o le vaega toatele o tagata o loo talitonu pea o le faaipoipoga e tatau ona faia i le va o le alii e toatasi ma le tamaitai e toatasi. Latou te talitonu i le faamaoni a’ia’i i totonu o le faaipoipoga, ma latou te talitonu i tautoga o le faaipoipoga, “i le ma’i ma le malosi” ma le “seia tetea ta’ua i le oti.”

E ao ona tatou faamanatu ifo ia i tatou lava i lea taimi ma lea taimi, e pei ona faamanatu mai ia te au i Roma, o le mea moni mautinoa ma le mafanafana matagofie e faapea, o le faaipoipoga ma le aiga o loo avea pea ma taulaiga ma faamoemoega atoa o le toatele o tagata ma e le tuua ai na o i tatou i na talitonuga. E le i i ai lava se isi taimi muamua ua sili atu ai ona luitauina le sailia o se paleni moni i le va o galuega, aiga, ma manaoga faaletagata lava ia i lo tatou nei aso. I la tatou matafaioi i le ekalesia, tatou te mananao ai ia fesoasoani atu i mea uma tatou te mafaia e fatua’i ai ma lagolago atu i faaipoipoga malolosi ma aiga.

O le mafuaaga lena o loo auai ai ma le mataalia le Ekalesia ma tuuina atu le taitaiga i taumafaiga eseese a vaega soofaatasi ma ekalesia soofaatasi ina ia faamalosia ai le aiga. O le mafuaaga lea tatou te faasoa atu ai a tatou tulaga faatauaina e taulai i aiga i ala o faasalalauga ma luga o ala o fesootaiga. O le mafuaaga lea tatou te faasoa atu ai a tatou gafa ma faamaumauga o aiga lautele i malo uma.

Tatou te mananao ia lagonaina lo tatou leo e faasagatau atu i sitaili eseese taufaasese o le olaga ia ua taumafai e suia le faalapotopotoga o le aiga lea na faavaeina e le Atua Lava Ia. Tatou te mananao foi ia lagonaina lo tatou leo i le lagolagoina o le olioli ma le faamalieina lea e aumai e aiga ua masani ai. E tatau ona tatou faaauau pea ona faailoa atu o tatou manatu i le lalolagi atoa i le tautino atu lea o le mafuaaga e taua tele ai le faaipoipoga ma le aiga, le mafuaaga e matuai afaina moni ai lava le faaipoipoga ma le aiga, ma le mafuaaga o le a taua ai pea.

Ou uso e ma tuafafine, o le talalelei toefuataiina ua totonugalemu i le faaipoipoga ma le aiga. E faapena foi, o faaipoipoga ma aiga lea e mafai ona tatou lotogatasi sili ai ma isi faatuatuaga. O le faaipoipoga ma le aiga foi lea o le a tatou maua ai lo tatou tulaga tutusa silisili faatasi ma le isi vaega atoa o le lalolagi. O le faaipoipoga foi ma le aiga lea o loo maua ai e Le Ekalesia a Iesu Keriso o le Au Paia o Aso e Gata Ai le avanoa silisili e avea ai ma malamalama i luga o le mauga.

Sei ou faamaea atu i le tuuina atu o le molimau (ma o lo’u ivasefulu tausaga i luga o lenei lalolagi ua ou agavaa atoa ai e ta’u atu lenei mea) e faapea o le matua lava ou te oo i ai, o le faateleina foi lena o lo’u iloaina o le aiga o le totonugalemu o le olaga ma o le ki lea i le fiafia e faavavau.

Ou te faafetai lava i lo’u toalua, mo la’u fanau, mo fanau a la’u fanau, ma fanau a fanau a la’u fanau, ma mo ou tausoga uma ma aiga faaletulafono ma aiga lautele lea ua matuai faamanuiaina ai lava lo’u lava ia olaga ma, ioe, e oo lava i le faavavau. Ou te tuu atu ai la’u molimau sili ona malosi ma paia e uiga i lenei upumoni e faavavau i le suafa o Iesu Keriso, amene.

Faamatalaga

  1. Pope Francis, saunoaga i le Humanum: An International Interreligious Colloquium on the Complementarity of Man and Woman, Nov. 17, 2014, humanum.it/en/videos; tagai foi zenit.org/en/articles/pope-francis-address-at-opening-of-colloquium-on-complementarity-of-man-and-woman.

  2. Pope Francis, Colloquium on the Complementarity of Man and Woman.

  3. “E Mafai na Faavavau Aiga,” Viiga, nu. 183.

  4. David Brooks, “The Age of Possibility,” New York Times, Nov. 16, 2012, A35, nytimes.com/2012/11/16/opinion/brooks-the-age-of-possibility.html.