2010–2019
Tau, Peb Yeej Ua Tau thiab Yuav Kov Yeej!
April 2015


Tau, Peb Yeej Ua Tau thiab Yuav Kov Yeej!

Peb yuav tsum haj yam sib zog zoo tuav rawv peb zaj lus tim khawv txog Yexus Khetos txoj moo zoo. Ua li ntawd peb thiaj yuav kov yeej kev phem txhua txhia hnub.

Cov kwv tij es, kuv txo hwj chim vim kuv muaj cib fim los hais lus rau nej, cov uas tuav Vajtswv lub pov thawj hwj hauv lub Koom Txoos niaj hnub nim no.

Muaj ib zaug Thawj Tswj Hwm Thomas S. Monson hais tias:

“Tej thaum lub ntiaj teb yog ib qho chaw txaus ntshai ua neej nyob. Tib neeg ntiaj teb lub xam khoo tab tom raug kev puas tsuaj sai kawg nkaus li. Tsis muaj ib tug—txawm laus los hluas los yog tus nruab nrab los xij—uas yuav tsis raug tej yam xwm txheej uas sim ua kom peb swb thiab piam sij mus. …

“… Tiam sis peb tsis tas yuav poob siab. … Peb tab tom ntaus tsov ntaus rog nrog txoj kev ua txhaum. … Nws yog ib nplua rog uas peb muaj cuab kav thiab yeej yuav kov yeej. Peb Leej Txiv Saum Ntuj Ceeb Tsheej tau muab tej cuab yeej cuab tam uas peb xav tau kom peb ua tau li no.”1

Peb txhua leej txhua tus, cov laus cov hluas, niaj hnub raug tej yam uas Thawj Tswj Hwm Monson tham txog. Tus yeeb ncuab thiab nws cov tim tswv tab tom sim tab kaum peb. Lawv lub hom phiaj twb yog kom peb yuav khiav ntawm peb tej kev nrog tus Tswv sib khi lus tseg, ces ua rau peb tsis nco qab txog peb qhov qub txeeg qub teg uas nyob mus ib txhis. Lawv yeej paub peb Leej Txiv Saum Ntuj Ceeb Tsheej txoj hau kev rau Nws cov me nyuam, vim lawv tau nyob nrog peb thaum peb muaj lub Rooj Sab Laj saum Ntuj Ceeb Tsheej thaum qhia tawm txog txoj hau kev ntawd. Lawv xav siv peb tej kev qaug zog thiab tej kev ua tsis taus, ntxias peb thaum muab “tej kev tsaus ntuj uas muaj huab zig niab …, uas tau npog noob neej tej qhov muag thiab ua kom noob neej tej siab tej ntsws tsis mloog lus, thiab coj lawv mus rau tej kev dav, kom lawv piam sij thiab ploj mus.”2

Txawm peb raug kev tsim txom li no los, zoo li Thawj Tswj Hwm Monson qhia, nov yog ib nplua rog uas peb muaj cuab kav thiab yeej yuav kov yeej. Tus Tswv tso siab rau peb txoj kev txawj thiab kev rau siab ntso ua kom tau.

Cov vaj lug kub muaj ntau qhov piv txwv txog cov neeg uas tau yeej lawv tej npluav rog tab txawm lawv ntsib kev tawm tsam ntau npaum li cas los xij. Ib tug yam ntxwv txog qhov no yog tus Thawj Tub Rog Maulaunais hauv Phau Ntawv Maumoos. Tus tub hluas zoo kawg nkaus no tau ua siab loj tiv thaiv qhov tseeb thaum muaj kev tsis sib haum xeeb thiab tej kev tsov rog ntau uas tab tom ua rau haiv neeg Nifais puas tsuaj mus. Txawm nws ua tib zoo khiav nws tej hauj lwm zoo zoo, Maulaunais tseem ua siab mos siab muag. Qhov no thiab ntau yam cwj pwm ntxiv ua rau nws ua ib rab cuab yeej hauv Vajtswv txhais tes uas zoo siv lub sij hawm ntawd. Phau ntawv Amas piav hais tias yog tias txhua tus neeg uas neeg zoo li Maulaunais ces, “txhua lub hwj chim hauv ntuj txiag teb tsaus yuav raug tshee hnyo mus ib txhis; muaj tseeb tiag, tus dab yuav tsis muaj hwj chim kav noob neej tej siab ib zaug li.”3 Maulaunais txhua tus cwj pwm yeej los ntawm nws txoj kev ntseeg Vajtswv thiab tus Tswv Yexus Khetos4 thiab los ntawm nws txoj kev rau siab ntso ua raws li Vajtswv thiab Nws cov yaj saub cov lus qhia.5

Tiag tiag mas, peb txhua tus yuav tsum hloov peb tus kheej los ua neeg zoo li tus Thawj Tub Rog Maulaunais kom peb thiaj kov yeej tau tej kev phem. Kuv paub ib tug dikas hluas uas rau siab ntseeg uas tau rais los ua ib tug Thawj Tub Rog Maulaunais hauv lub caij nyoog no. Tam li nws sim ua raws li nws niam txiv thiab cov thawj coj hauv lub Koom Txoos cov lus qhuab qhia, ces nws txoj kev ntseeg thiab kev rau siab ntso yeej raug kev sim siab txhua txhua hnub, tab txawm nws tseem hluas. Nws qhia kuv tias muaj ib hnub thaum nws xav tsis thoob vim muaj ib qho nyuaj thiab tsis xis nyob—nws cov phooj ywg ntawd tab tom saib cov dub liab qab hauv lawv cov xov tooj uas nqa ntawm tes. Tib pliag ntawd, tus tub hluas no tau txiav txim seb yam twg thiaj tseem ceeb rau nws—nws puas yuav ua neeg uas nto moo los sis nws puas yuav ua ncaj ncees. Lub sij hawm ntawd, nws tau ua siab loj thiab tau qhia nws cov phooj ywg hais tias lawv tab tom ua tej yam tsis zoo. Tsis tas li ntawd xwb, nws qhia lawv tias lawv yuav tau tsum los yog lawv yuav ua qhev rau tej yam tsis zoo ntawd. Cov tub kawm ntawv ntawd feem coob tau luag thuam nws cov lus ntuas ntawd, es lawv hais tias tej ntawd tsuas yog tej yam hauv lub neej no thiab tej ntawd yeej tsis yog kev txhaum dab tsi li. Tiam sis, muaj ib tug ntawd uas mloog tus tub hluas cov lus ntuas ntawd thiab tau txiav txim tsum tsis saib tej ntawd lawm.

Tus dikas no tus yam ntxwv tau pab nws ib tug khub kawm ntawv ua zoo dua. Tej zaum, nws thiab nws tus phooj ywg raug kev luag thuam thiab kev tsim txom vim nkawd txiav txim ua li ntawd. Tab sis mas, nkawd tau ua raws li Amas txoj lus qhuab qhia rau nws cov neeg thaum nws hais tias, “Nej cia li tawm hauv cov neeg phem los, thiab nej cia li nrug, thiab tsis txhob tuav lawv tej khoom tsis dawb huv.”6

Phau ntawv Kev Ntxiv Dag Zog rau cov Tub Hluas Ntxhais Hluas muaj cov lus nutas no, uas Thawj Pawg Thawj Tswj Hwm pom zoo rau cov tub thiab ntxhais hluas hauv lub Koom Txoos hais tias: “Koj muaj kev lav ris rau koj tej kev xaiv. Vajtswv yeej paub txog koj thiab yuav pab koj txiav txim ua tej yam zoo, tab txawm koj tsev neeg thiab cov phooj ywg siv lawv txoj kev ywj siab xaiv ua tej yam tsis zoo los xij. Cia li ua siab loj ua raws li Vajtswv lub siab nyiam, tab txawm koj sawv koj ib leeg xwb los xij peem. Thaum koj ua li no, koj ua ib tug yam ntxwv rau lwm tus raws qab.”7

Tseem muaj qhov zoo thiab qhov phem ua tsov ua rog hauv peb lub neej no vim hais tias dab ntxwg nyoog sim ua kom txhua tus neeg yuav txom nyem ib yam li nws. Dab Ntxwg Nyoog thiab nws cov tim tswv yuav sim tswj kav peb tej kev xav thiab ntxias peb los ua txog ua txhaum. Yog tias lawv ua tau li ntawd ces, lawv yuav ua kom txhua yam uas zoo pauv los ua qhov phem. Txawm li ntawd los, peb yuav tsum to taub hais tias lawv tsuas muaj hwj chim tswj kav pab yog tias peb cia lawv ua li ntawd.

Cov vaj lug kub muaj ntau qhov piv txwv txog cov neeg uas tau tso lus rau dab ntxwg nyoog los tswj kav lawv thiab thaum kawg lawv tau muaj kev kub ntxhov thiab raug kev piam sij, zoo li Nihos, Khaulihos, thiab Sawmlaj. Peb yuav tsum ceev faj txog txoj kev xwm txheej no. Peb yuav tsum tsis txhob cia tej zaj xov uas lub ntiaj teb tshaj tawm ua rau peb ntxhov siab vim hais tias tej ntawd tawm tsam Yexus Khetos txoj moo zoo cov lus qhuab qhia thiab tej ntsiab cai tseeb. Ntau zaj xov ntawm lub ntiaj teb no tsuas yog peb lub xam khoo tej lus uas sim ua kev pom zoo rau tej kev txog kev txhaum. Peb yuav tsum nco qab ntsoov, thaum kawg ces, txhua tus yuav sawv rau ntawm Khetos lub xub ntiag los txiav txim txog lawv tej hauj lwm, txawm lawv yuav zoo los sis txawm lawv yuav phem.8 Thaum peb hnov tej zaj xov ntawm lub ntiaj teb no, peb yuav tsum ua siab loj thiab paub zoo txog peb Leej Txiv Saum Ntuj Ceeb Tsheej txoj hau kev los xaiv qhov zoo.

Peb txhua tus yuav tau dag tau zog los xaiv qhov zoo yog hais tias peb nrhiav tus Tswv txoj kev pab thiab tso siab plhuav thiab ntseeg Nws. Tiam sis raws li cov vaj lug kub qhia, peb yuav tsum muaj “lub siab dawb paug” thiab “thov tiag tiag.” Ces tus Tswv, vim Nws muaj kev hlub tshua, “tus Vaj Ntsuj Plig Dawb Huv lub hwj chim yuav ua kom peb paub tau qhov tseeb. Thiab los ntawm lub hwj chim ntawm tus Vaj Ntsuj Plig Dawb Huv [peb] yuav paub qhov tseeb ntawm tag nrho txhua yam.”9

Qhov uas peb kawm paub dhau ntawm tus Vaj Ntsuj Plig Dawb Huv yog peb zaj lus tim khawv, uas txhawb pab peb txoj kev ntseeg thiab kom peb rau siab ntso ua raws li cov lus qhia hauv txoj moo zoo uas raug txum tim rov qab los hauv lub caij nyoog kawg no, tab txawm muaj tej zaj xov uas peb niaj hnub hnov hauv ntiaj teb no. Peb zaj lus tim khawv yuav rais los ua ib yam uas tiv thaiv peb ntawm dab ntxwg nyoog tej xib xub thaum nws sim tua peb.10 Nws yuav coj peb kev mus dhau plaws txoj kev tsaus ntuj thiab kev kub ntxhov uas nyob hauv lub ntiaj teb niaj hnub nim no.11

Kuv kawm txog txoj ntsiab cai no thaum kuv yog ib tug tub txib hluas hluas. Kuv thiab kuv tus khub tseem ua hauj lwm hauv lub Koom Txoos ib ceg ntseeg me me. Peb tau sim nrog txhua tus neeg hauv lub nroog ntawd tham. Lawv tau tos txais peb, tiam sis lawv nyiam sib cav txog cov vaj lug kub thiab xav tau puav pheej uas qhia qhov tseeb txog tej yam uas peb qhia ntawd.

Kuv nco qab hais tias txhua lub sij hawm uas kuv thiab kuv tus khub sim qhia qhov tseeb rau tib neeg, ces Vajtswv tus Ntsuj Plig khiav ntawm wb thiab wb txawm tsis pom qab xav thiab tau kev ntxhov siab xwb. Wb xav tias yuav tsum ua kom peb tej zaj lus tim khawv ua zoo ib yam nkaus li txoj moo zoo tej kev tseeb uas wb tab tom qhia. Txij thaum ntawd mus, kuv nco qab thaum wb ua tim khawv tag siab tag ntsws, ces txawm hnov ib lub hwj chim uas los ntawm tus Vaj Ntsuj Plig Dawb Huv los, uas puv chav tsev ces tsis muaj chaw ntxhov siab los sis kev sib cav li. Kuv kawm tau hais tias tej kev phem twg yeej tsis muaj cuab kav ua kom neeg yuav ntxhov siab, raug ntxias, los sis kov yeej lub hwj chim uas los ntawm tus Cawm Seej Yexus Khetos ib tug thwj tim ib zaj lus tim khawv.

Raws li tus Cawm Seej Kiag qhia, dab ntxwg nyoog xav muab vab ntxuaj cov npluag tawm ntawm pawg nplej, uas ua rau peb tsis muaj cuab kav ua zoo rau lub ntiaj teb.12

Kuv cov kwv tij, vim hais tias niaj hnub nim no muaj kev kub ntxhov thiab tej kev poob siab thoob plaws ntiaj teb no, peb yuav tsum ua tib zoo tuav raws peb zaj lus tim khawv txog Yexus Khetos txoj moo zoo. Li ntawd peb haj yam yuav muaj cuab kav tiv thaiv qhov tseeb thiab kev txim lij. Peb yuav yeej kev tsov kev rog nrog kev phem, ces yuav tsis tuag mus hauv tej kev sib tawm tsam hauv lub neej no, tiam sis yuav coj lwm tus los ua raws li tus Xib Hwb zoo tej kev cai.

Kuv caw txhua leej txhua tus los nrhiav kev puaj phais uas nyob hauv cov vaj lug kub tej lus qhia. Tus Thawj Tub Rog Maulaunais tau muab nws txoj kev ntseeg Vajtswv thiab nws zaj lus tim khawv txog qhov tseeb coj los ua qhov kev pab thiab kev txawj ntse uas yus nrhiav tau hauv cov vaj lug kub. Ua li no, nws cia siab hais tias nws yuav txais tus Tswv tej koob hmoov thiab yuav kov yeej ntau yam, tiag tiag mas, nws twb ua li ntawd lawm tiag.

Kuv caw txhua tus los nrhiav kev puaj phais hauv peb cov yaj saub uas muaj sia nyob tej lus qhuab qhia. Thawj Tswj Hwm Thomas S. Monson hais tias: “Peb cov uas tau txais Vajtswv lub pov thawj hwj pab tau. Thaum peb yog neeg huv thiab saib peb lub pov thawj hwj rau nqi, peb yog cov uas coj yam ntxwv ncaj ncees rau lwm tus tau raws qab … [thiab peb] pab ua ib lub teeb ci rau lub ntiaj teb uas tsaus ntuj nti.”13

Kuv caw txhua tus los muaj kev cia siab rau tej nqi thiab lub hwj chim ntawm Yexus Khetos txoj Kev Theej Txhoj. Dhau ntawm Nws txoj kev txi theej txhoj no, peb thiaj yuav muaj siab loj txaus los yeej txhua txoj kev ua tsov ua rog hauv peb lub caij nyoog, twb yuav nyiaj mus dhau peb tej teeb meem, tej kev cov nyom, thiab tej kev haub ntxias. Cia peb tso siab rau Nws txoj kev hlub thiab lub hwj chim uas cawm tau peb dim. Khetos kiag hais tias:

“Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”14

“Kuv yog qhov kaj rau neeg ntiaj teb. Tus uas raws kuv qab yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig.”15

“Kuv qhia tej no rau nej kom nej cov uas nrog kuv yuav muaj kev kaj siab lug. Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”16

Kuv hais lus tim khawv tias tej no muaj tseeb los ntawm tus Tswv Yexus Khetos lub npe dawb ceev, amees.