2010–2019
Ahok, Kuht Kuh ac Fah Itto!
April 2015


Ahok, Kuht Kuh ac Fah Itto!

Kuht enenuh in sruokyac fokoko likina met ah fahkwack luhlahlfongi lasr ke wosasuc luhn Jisus Kraist. Na kuht fah kuhtanglah mweun lwen nuh kwewa lain ma koluk.

Tamuhlwel sacohk, nga ahkpuhsisaclyeyuck ke pacl wowo luhk in sramsram nuh suwos, mwet suc sruok pristut luhn God ke Alu uh nohfohn mihsenge.

Prestuhn Thomas S . Monson el fahk sie pacl ah:

“Facluh kuh in kuhtuh pacl uh kuh in sie acn sahngweng ma kuht muhta we. Ma suwohs yohk srihpac uh oacna in koluklac arlac sa. Wacngihn sie mwet—finne fuhsr kuh mahtuh kuh infulwac—kuh in kahingkihn ma sikyak nuh ke ma ma oasr kuh la in ahkmuhnahsye kuht ac kuhnauskuhtlac. …

“… Tuhsruhk kuht tiac enenuh in fuhlweack. … Kuht kalweni sie mweun lain ma koluk. … Pa sie mweun kuht kuh ac fah itto kac. Pahpah tuhmasr Lucng El use nuh sesr kuhfa kuht enenuh in muh kuh in oraclah.”1

Kuht nohfohn, fuhsr ac mahtuh, sun lwen nuh kwewa mweun fwackyuck sel Prestuhn Monson uh. Mwet lokoalok ac lihpufacn lal uh srihke in ahklohsrye kuht. Srihpac lalos pa in ahkpuhlaikye kuht in som liki olwelah ma kuht oraclah yurin Leum, oruh kuht in muhlkuhnlah ke usruiyacn ma pahtpaht lasr. Elos etuh wo plwacn luhn Pahpah tuhmasr Lucng nuh sin tuhlihk Nahtuhl uh, tuh elos oasr yohrohsr ke Miting luhlahp se Inkuhsrao ah ke nohfohn ahkkahlwemyeyuck ah. Elos srihke in kiacpwelah ma kuht muhnahs kuh suhpah kac, kiacpwekuhtlac ke infulwen lohsr uh, ma ohkohkyelah muhtahsr, ac ahkupacyelah insiyacn tuhlihk nuhtin mwet uh, ac kohlohloslac nuh inkacnek sralacp uh, tuh elos fah misac ac tuhlac we.”2

Sahyacn na kihsruhngyacn ma kuht puhlakihn oacna Prestuhn Monson el luti ah, pa inge mweun se ma kuht kuh ac fah itto kac. Leum El luhlahlfongi kuhiyacsr nuhnkwacsr in oruh oacna.

Ma suhmuhslah uh nein srihkasrak puhkantwen luhn mwet suc kuhtanglah mweun lalos finne ke infulwacn ohiyac koluk uh. Sie sin srihkasrak ingacn pa Kacptin Moroni lun Puk luhn Mormon. Mukul fuhsr na wowo se inge oasr puhlaik lal in ahkkweye ma pwacye ke pacl se oasr lainyuck ac mweun ma kuh in kuhnahoslah muhtuhnfacl luhn mwet lal Nephite nohfohn. Tuh el suhmaht na pwacye in oraclah kunohkohn lal, Moroni el srwackna inse puhsisacl. Ma se inge elah sahyac uh oraclah elan sie kuhfa sacohk ke poun God ke pacl sac. Mwet pahluh Alma el fahkwack lah fin mukul ac muhtwacn nuh kwewa oacna Moroni, kuh luhn hell ac usrusryak ne tok ma pahtpaht; ahok, ac fah wacngihn kuh luhn devil nuh ke insiyacn tuhlihk nuhtin mwet.3Ohiyac lal Moroni nuh kwewa tuhkuh ke luhlahlfongi yohk lal ke God ac ke Leum Jisus Kraist4ac nuhnak fokoko lal in ukwe puhsrwen God ac mwet pahluh Lal uh.5

Nuh ke mwe srihkasrak, kuht nuh kwewa enenuh in ikihl kuhtlac sifacna mihsenge nuh ke kain mwet se Kacptin Moroni uh in kuh in kuhtanglah mweun uh lain ma koluk mokle moul lasr uh. Nga etuh sie tikin fuhsr suc ekuhluhllah sifacna nuh ke sie Kacptin Moroni mihsenge. Mukul fuhsr se inge yohk luhlahlfongi lal ac suk in ukwe kahsruh luhn pahpah ninac kiyacl ah ac mwet ke kol ke Alu uh. Luhlahlfongi ac nuhnkwacl srihkeyuck lwen nuh kwewa, finne ke matwac fuhsr lal. El fahk nuh sihk lah el lut na pwacye ke sie ohiyac na upac ac suhfal—kawuck lal ah liye petsac koluk uh ke cell phone nahtuhlos ah. Ke pacl sac na, mukul fuhsr se inge enenuh in sulaclah ma yohk srihpac emet uh—pwengpweng lal kuh suwohswohs lal. Tukun seconds ekahsr na tohkoh ah, el sesseslah ke puhlaik ac fahk nuh sin kawuck lal ah lah ma elos oruh ah tiacna suwohs. Yohk likina, el fahk nuh selos lah elos enenuh in tulokihnyac ma elos oruh ah kuh elos ac eklac pahlah nuh kac. Inkaiyacn tuhlihk weluhl lutlut ah isrucn fahk lal ah, fahk lah ma ingacn pa sie ip ke moul uh ma wacngihn ma koluk kac. Tuhsruhk, oasr sie inmahsrlolos suc lohng nuh ke kahsruh luhn mukul fuhsr sacn ac sulaclah in tulokihnyac ma el oruh ah.

Srihkasrak se luhn tikin sac sang sie moklweyuck wowo nuh sin sie tuhlihk weluhl lutlut ah. Pwacyena, el ac kawuck se lal ah isrucnyuck ac ahkkolukyeyuck ke srihpen sulaclah sac. Ke ohiyac se sahyac an, elos ukwe kaiyuck lal Alma nuh sin mwet lal ke el fahk, “Som liki ma koluk, ac srisrilac, ac tiac kahl ma fohkfohk lalos uh.”6

Puk srihsrihk Mwe Ahkkweye luhn Mwet Fuhsr nein kahs in kahsruh luhn Prestuhnsi Se Met nuh sin mwet fuhsr ke Alu uh: “Kowos ac eis mwacta nuh ke sulaclah kowos oraclah uh. God El etwekowos ac fah kahsrwe kowos in oraclah sulaclah wowo, finne ke sucu ac kawuck lowos orekmakihn sulaclah lalos ke inkacnek ma tiac pwacye. Eis puhlaik in luhlahlfongi in tuna kuh ke ahkosyen kena luhn God, finne kom muhkwena tu. Ke kom oruh ma inge, kom oraclah sie srihkasrak nuh sin mwet sahyac uh in ukwe.”7

Mweun ke ma wo lain ma koluk fah kalweniyuck ke moul lasr uh ke srihpac lal setuhn pa in oruh mwet nuh kwewa in kweok oacna el. Setuhn ac lihpufacn lal uh fah srihke in ahkfohsye nuhnak lasr uh ac sapkihn kuh ke srihfe kuht in oruh ma koluk. Elos fin kuh, elos fah ahkkolukye ma wo uh. Ne ohinge, yohk srihpac na pwacye in etuh lah elos fah eis kuh muhkwena kacsr kuht fin lwelah.

Kuht koflah lwelah kuht sifacna in fohsack ke pweng eye ma fihsrwacsr in eisyuck sin facluh ac tiac insese ke mwe luti ac ip yohk pwacye ke wosasuc luhn Jisus Kraist. Pweng puhs luhn facluh inge sifil ahol srihke wacngihn srihpac luhn u lasr in ahksuwohsye ma koluk. Kuht enenuh in esam lah, ke sahflahiyac ah, mwet nuh kwewa fah tu ye muhtuhn Kraist “in nuhnuhnkweyuck ke orekma [lasr] uh, finne elos pa wo kuh finne elos pa koluk.”8 Ke kuht lain pweng facluh inge, puhlaik yohk ac sie etwacack fokoko ke plwacn luhn Pahpah tuhmasr Lucng fah enenweyuck in sulaclah ma pwacye uh.

Kuht nohfohn kuh in eis kuh in sulaclah ma pwacye kuht fin suk Leum ac fihliyac luhlahlfongi lasr nohfohn ac luhlahlfongi in El. Tuhsruhk, ke ma suhmuhslah uh luti, enenuh in oasr inse pwacye lasr ac srihke na pwacye.” Na Leum, ke pahkotwen ma pahtpaht Lal, “fah ahkkahlwemye ma pwacye” nuh [sesr], ke kuh luhn Nguhn Muhtahl. Ac ke kuh luhn Nguhn Muhtahl, kuht fah etuh ma pwacye nuh kwewa.”9

Etwacack eisyuck ke Nguhn Muhtahl se inge pa wacngihn ma yohk liki oacna fahkwack luhlahlfongi lasr uh, ma ahkfokokoye luhlahlfongi ac nuhnak in ukwe luti ke wosasuc fohlohkyak ke lwen sahflah uh, macnsiskihn pweng pwengpweng kuht lohng fin facluh uh. Fahkwack luhlahlfongi lasr uh enenuh in sie mwe loang in karihngihn kuhtyang lain mwe pihsr fihrihr luhn setuhn ke srihke lal in uni kuht.10 Ma inge fah kol kuht sef nuh ke lohsr ac fohs ma oasr ke facluh mihsenge.11

Nga lotwelah ip yohk se inge ke nga kuhlwacnsap oacna sie misineri fuhsr ah. Companion se luhk ah ac nga kuhlwacnsap ke sie pracns srihsrihk ac loeslac ke Alu uh. Kuht srihke in sramsram yurin mwet nuh kwewa lun siti sac. Elos eis kuht arlac wo, tuhsruhk elos luhngse in akuhkuhinkihn ma suhmuhslah uh ac siyuck sesr mwe ahkpwacye ma upac ke ma pwacye ke ma kuht luti uh.

Nga esam lah kais sie pacl companion se luhk ah ac nga ahkfahsrye in srihke in ahkpwacyelah sie ma nuh sin mwet uh, Nguhn luhn God som liki kuht ac kuht puhla tuhlac ac fohsack na pwacye. Kuht puhla lah kuht enenuh in tahkuhnlah fokoko fahkwack luhlahlfongi lasr wi ma pwacye ke wosasuc kuht luti uh. Ke pacl sac me, nga esam lah ke kuht fahkwack sie fahkwack luhlahlfongi ke insiyacsr nohfohn, sie kuh mihs ahkkweye, tuhkuh sin Nguhn Muhtahl, nwacklah infuckihl sac ac wacngihn inkacnek lalos in fohsack kuh akuhkuhin kac. Nga lotwelah lah wacngihn kuh luhn ma koluk ma kuh in ahkfohsye, kiacpuh, kuh ahkmuhnahsyelah kuh ke sie fahkwack luhlahlfongi pwacye ke sie mwet tuhma lutlut luhn Jisus Kraist.

Ke Mwet Lahngo Sifacna El luti, setuhn el kena in srihkuhtlac oacna wheat uh, oraclah in eslah kuhiyacsr in mokle facluh nuh ke ma wo.12

Tamuhlwel sacohk wiyuck, ke srihpac luhpan fohsack ac tahfuhluo fahsrwelihk fin facluh mihsenge, kuht enenuh in sruokyac fokoko likina met ah fahkwack luhlahlfongi lasr ke wosasuc luhn Jisus Kraist. Na kuh lasr in karihngihn ma pwacye ac suwohs ac yohkwelihk. Kuht fah kuhtanglah mweun lwen nuh kwewa lain ma koluk, ac likina in kuhtangyucklac sin ma upac ke moul uh, kuht fah pahtok mwet sahyac in moulkihn ohiyac lal Mwet Kol.

Nga suli mwet nuh kwewa in sokwack mwe karihngihn ke mwe luti lun ma suhmuhslah uh. Kacptin Moroni el sang luhlahlfongi lal ke God ac fahkwack luhlahlfongi lal ke ma pwacye nuh ke etwacack ac lahlmwetmwet ke ma suhmuhslah uh. Ke ohiyac se inge, el luhlahlfongi lah el fah eis mwe insewowo luhn Leum ac fah eis kuhtanglah pucspucs, suc ma, pwacyena, sikyak tari.

Nga suli mwet nuh kwewa in sokwack mwe karihngihn ke kahs lahlmwetmwet luhn mwet pahluh ingacna lasr. Prestuhn Thomas S. Monson el fahk: “Kuht suc akmuhsralah nuh ke pristut luhn God kuh in oraclah eklac se. Ke kuht kalweni suwohswohs, ac ahkfuhlwact pristut lasr, kuht eklac srihkasrak suwohswohs nuh sin mwet sahyac in ukwe … [ac kuht] sang ma wo nuh ke facluh muh eklac koluk emet.”13

Nga suli kuht nuh kwewa in luhlahlfongi ke ma wo ac ke kuh luhn Iwaclah luhn Jisus Kraist. Ke kihsac in iwaclah Lal, kuht kuh in eis puhlaik in kuhtanglah mweun ke pacl lasr, fin ke ma upac, srihfeyuck, ac mwe sruhf lasr. Lwelah kuht in luhlahlfongi luhngse Lal ac kuh in molikuhtlac. Kraist Sifacna fahk:

“Nga pa inkanek, ac pwaye, ac moul; wangin mwet som nu yurin Papa fin tia ke nga.”14

“Nga kalem lun faclu. Kutena mwet su fahsr tukuk fah oasr kalem lun moul yorol, ac el fah tiana fahsr in lohsr.”15

“Nga fahkot nu suwos ma inge tuh in oasr misla yuruwos ke kowos kupasrme nu sik. Ke kowos muta faclu kowos ac keok. Tusruktu kowos in pulaik na! Nga kutangla faclu tari!”16

Nga fahkwack luhlahlfongi luhk ke ma pwacye inge ke ine muhtahl luhn Jisus Kraist, amen.