ແມ່ນແລ້ວ, ເຮົາສາມາດ ແລະ ຈະເອົາຊະນະໄດ້!

ໂດຍ ແອວເດີ ຢູລິດຊິສ໌ ໂຊອາເຣສ໌

ຈາກຝ່າຍປະທານສາວົກເຈັດສິບ

ຮູບພາບ

ເຮົາຈຶ່ງຕ້ອງຍຶດໝັ້ນປະຈັກພະຍານຂອງເຮົາ ໃນພຣະກິດຕິຄຸນຂອງພຣະເຢຊູຄຣິດໄວ້ໃຫ້ແໜ້ນ. ແລ້ວ ເຮົາຈະເອົາຊະນະສົງຄາມກັບຄວາມຊົ່ວຮ້າຍ ໃນແຕ່ລະວັນໄດ້.

ອ້າຍນ້ອງທັງຫລາຍ, ຂ້າພະເຈົ້າຖ່ອມຕົນ ໂດຍສິດທິພິເສດ ທີ່ຂ້າພະເຈົ້າໄດ້ມາກ່າວກັບທ່ານ, ຜູ້ດຳລົງຖານະປະໂລຫິດຂອງພຣະເຈົ້າ ຕະຫລອດທົ່ວສາດສະໜາຈັກ ໃນມື້ນີ້.

ປະທານທອມມັສ ແອັສ ມອນສັນ ເຄີຍກ່າວວ່າ:

“ໂລກນີ້ບາງເທື່ອກໍເປັນບ່ອນທີ່ໜ້າຢ້ານກົວທີ່ຈະອາໄສຢູ່. ຄຸນຄ່າເລື່ອງສິນທຳຂອງສັງຄົມ ເບິ່ງຄືວ່າ ກຳລັງລຸດນ້ອຍຖອຍລົງຢ່າງວ່ອງໄວ. ບໍ່ມີໃຜ—ບໍ່ວ່າຈະໜຸ່ມ ຫລື ເຖົ້າ ຫລື ໄວກາງຄົນ—ຈະຖືກຍົກເວັ້ນຈາກການກະທົບກະເທືອນຂອງສິ່ງເຫລົ່ານັ້ນໄດ້ ຊຶ່ງຫວັງທີ່ຈະດຶງເຮົາລົງ ແລະ ທຳລາຍເຮົາ. …

“… ແຕ່ເຮົາບໍ່ຕ້ອງທໍ້ຖອຍ. … ເຮົາກຳລັງເຮັດສົງຄາມກັບຄວາມບາບ. … ມັນເປັນສົງຄາມທີ່ເຮົາສາມາດ ແລະ ຈະເອົາຊະນະໄດ້. ພຣະບິດາເທິງສະຫວັນຂອງເຮົາໄດ້ມອບເຄື່ອງມືທີ່ຈຳເປັນໃຫ້ເຮົາ ເພື່ອວ່າເຮົາຈະສາມາດເຮັດສິ່ງນີ້ໄດ້.”¹

ເຮົາທຸກຄົນ, ທັງໜຸ່ມ ແລະ ແກ່, ກຳລັງປະເຊີນກັບສົງຄາມ ໃນແຕ່ລະວັນ ທີ່ປະທານມອນສັນໄດ້ກ່າວເຖິງ. ສັດຕູ ແລະ ບໍລິວານຂອງມັນ ພະຍາຍາມກີດກັນເຮົາ. ຈຸດປະສົງຂອງພວກມັນແມ່ນ ທີ່ຈະຊັກຊວນເຮົາ ໃຫ້ໜີໄປຈາກພັນທະສັນຍາທີ່ເຮົາໄດ້ເຮັດໄວ້ນຳພຣະຜູ້ເປັນເຈົ້າ, ເຮັດໃຫ້ເຮົາລືມມໍລະດົກນິລັນດອນຂອງເຮົາ. ພວກມັນຮູ້ຈັກແຜນຂອງພຣະບິດາສຳລັບລູກຂອງພຣະອົງ ເປັນຢ່າງດີ, ເພາະພວກມັນໄດ້ຢູ່ນຳເຮົາ ໃນສະພາມະຫາສານຢູ່ສະຫວັນ ຕອນແຜນຖືກມອບໃຫ້. ພວກມັນພະຍາຍາມເອົາປຽບຈຸດອ່ອນ ແລະ ຄວາມອ່ອນແອຂອງເຮົາ, ໂດຍການຫລອກລວງເຮົາ ດ້ວຍ “ໝອກແຫ່ງຄວາມມືດ ..., ທີ່ເຮັດໃຫ້ຕາບອດ ແລະ ເຮັດໃຫ້ໃຈຂອງລູກຫລານມະນຸດແຂງກະດ້າງ, ແລະ ນຳພາພວກເຂົາໄປໃນເສັ້ນທາງອັນກວ້າງຂວາງ, ເພື່ອພວກເຂົາຈະຕາຍ ແລະ ຫາຍສາບສູນໄປ.”²

ເຖິງແມ່ນເຮົາຕ້ອງປະເຊີນກັບສິ່ງກົງກັນຂ້າມ, ດັ່ງທີ່ປະທານມອນສັນໄດ້ສອນ, ນີ້ແມ່ນສົງຄາມທີ່ເຮົາສາມາດ ແລະ ຈະເອົາຊະນະໄດ້. ພຣະຜູ້ເປັນເຈົ້າໄວ້ວາງໃຈໃນຄວາມສາມາດ ແລະ ຄວາມຕັ້ງໃຈຂອງເຮົາ ທີ່ຈະເອົາຊະນະໄດ້.

ພຣະຄຳພີບັນຈຸຕົວຢ່າງຈົນນັບບໍ່ຖ້ວນ ກ່ຽວກັບຜູ້ໄດ້ເອົາຊະນະສົງຄາມ, ແມ່ນແຕ່ໃນລະຫວ່າງສະພາບການທີ່ຮ້າຍແຮງທີ່ສຸດ. ຕົວຢ່າງໜຶ່ງແມ່ນ ນາຍທັບໂມໂຣໄນ ຢູ່ໃນພຣະຄຳພີມໍມອນ. ຊາຍໜຸ່ມທີ່ໜ້າປະຫລາດໃຈຄົນນີ້ ມີຄວາມກ້າຫານ ທີ່ຈະປົກປ້ອງຄວາມຈິງ ໃນເວລາທີ່ມີການແຕກແຍກ, ແລະ ສົງຄາມ, ຊຶ່ງອາດທຳລາຍປະຊາຊາດຊາວນີໄຟທັງໝົດ. ເຖິງແມ່ນວ່າ ເພິ່ນເກັ່ງກ້າເລື່ອງການເຮັດໜ້າທີ່ຮັບຜິດຊອບຂອງເພິ່ນ, ແຕ່ໂມໂຣໄນຍັງຖ່ອມຕົນຄືເກົ່າ. ສິ່ງນີ້ ແລະ ຄຸນສົມບັດຢ່າງອື່ນໆຂອງເພິ່ນ ເຮັດໃຫ້ເພິ່ນເປັນເຄື່ອງມືໃນພຣະຫັດຂອງພຣະເຈົ້າ ທີ່ດີເດັ່ນ ໃນເວລານັ້ນ. ໜັງສືຂອງແອວມາ ໄດ້ອະທິບາຍວ່າ ຖ້າຫາກຊາຍທຸກຄົນ ໄດ້ເປັນເໝືອນດັ່ງໂມໂຣໄນ, “ອຳນາດຂອງນະລົກນັ້ນຈະສັ່ນສະເທືອນຕະຫລອດການ; [ແລະ] ມານຈະບໍ່ມີອຳນາດເໜືອໃຈຂອງລູກຫລານມະນຸດເລີຍ.”³ ຄຸນສົມບັດທັງໝົດຂອງໂມໂຣໄນ ມາຈາກສັດທາອັນຍິ່ງໃຫຍ່ຂອງເພິ່ນໃນພຣະເຈົ້າ ແລະ ໃນອົງພຣະເຢຊູຄຣິດເຈົ້າ⁴ ແລະ ຄວາມຕັ້ງໃຈອັນໜັກແໜ້ນຂອງເພິ່ນ ທີ່ຈະເຮັດຕາມສຸລະສຽງຂອງພຣະເຈົ້າ ແລະ ສາດສະດາຂອງພຣະອົງ.⁵

ປຽບປະມາແລ້ວ, ເຮົາທຸກຄົນຕ້ອງແປງຕົວເປັນນາຍທັບໂມໂຣໄນ ໃນປະຈຸບັນ ເພື່ອຈະເອົາຊະນະສົງຄາມ ກັບອິດທິພົນທີ່ຊົ່ວຮ້າຍໃນຊີວິດຂອງເຮົາ. ຂ້າພະເຈົ້າຮູ້ຈັກ ມັກຄະນາຍົກຄົນໜຶ່ງ ຜູ້ໄດ້ແປງຕົວ ເປັນນາຍທັບໂມໂຣໄນ ໃນປະຈຸບັນ. ຊາຍໜຸ່ມຄົນນີ້ ຊື່ສັດແທ້ໆ ແລະ ໄດ້ພະຍາຍາມເຮັດຕາມຄຳແນະນຳຂອງພໍ່ແມ່ ແລະ ຜູ້ນຳໃນສາດສະໜາຈັກຂອງລາວ. ສັດທາ ແລະ ຄວາມຕັ້ງໃຈຂອງລາວ ໄດ້ຖືກທົດສອບ ທຸກວັນ, ແມ່ນແຕ່ຕອນຍັງນ້ອຍ. ລາວໄດ້ບອກຂ້າພະເຈົ້າວ່າ ລາວຕົກໃຈ ເມື່ອປະເຊີນກັບສະພາບການທີ່ຫຍຸ້ງຍາກ ແລະ ບໍ່ສະບາຍໃຈ—ໝູ່ເພື່ອນຂອງລາວກຳລັງເບິ່ງຮູບພາບລາມົກ ຢູ່ໃນມືຖືຂອງພວກເຂົາ. ໃນເວລານັ້ນເອງ, ຊາຍໜຸ່ມຄົນນີ້ ຕ້ອງໄດ້ຕັດສິນໃຈວ່າ ສິ່ງໃດທີ່ສຳຄັນທີ່ສຸດ—ຄວາມໂດ່ງດັງຂອງລາວ ຫລື ຄວາມຊອບທຳຂອງລາວ. ໃນສອງສາມວິນາທີ ຫລັງຈາກນັ້ນ, ລາວໄດ້ເຕັມໄປດ້ວຍຄວາມກ້າຫານ ແລະ ໄດ້ບອກໝູ່ເພື່ອນຂອງລາວວ່າ ສິ່ງທີ່ພວກເຂົາກຳລັງເຮັດຢູ່ນັ້ນ ເປັນສິ່ງບໍ່ດີ. ຍິ່ງໄປກວ່ານັ້ນ, ລາວໄດ້ບອກພວກເຂົາວ່າ ພວກເຂົາຄວນຢຸດເຮັດສິ່ງທີ່ພວກເຂົາກຳລັງເຮັດຢູ່ນັ້ນ, ຖ້າບໍ່ດັ່ງນັ້ນ ພວກເຂົາຈະກາຍເປັນຂ້າທາດຂອງມັນ. ໝູ່ຫລາຍຄົນໄດ້ເວົ້າເຍາະເຍີ້ຍລາວ, ໂດຍກ່າວວ່າ ມັນເປັນພາກສ່ວນໜຶ່ງຂອງຊີວິດ ແລະ ກໍບໍ່ແມ່ນເລື່ອງເສຍຫາຍແນວໃດ. ເຖິງຢ່າງໃດກໍຕາມ, ຄົນໜຶ່ງໃນພວກເຂົາໄດ້ເຊື່ອຟັງຄຳແນະນຳຂອງຊາຍໜຸ່ມຄົນນີ້ ແລະ ໄດ້ເຊົາເຮັດ.

ຕົວຢ່າງຂອງມັກຄະນາຍົກຄົນນີ້ ໄດ້ເປັນອິດທິພົນທີ່ດີ ຢ່າງໜ້ອຍຕໍ່ເພື່ອນນັກຮຽນຄົນໜຶ່ງ. ຢ່າງບໍ່ຕ້ອງສົງໃສ, ລາວ ແລະ ເພື່ອນຂອງລາວຕ້ອງຖືກເຍາະເຍີ້ຍ ແລະ ຖືກຂົ່ມເຫັງ ເພາະການຕັດສິນໃຈນັ້ນ. ກົງກັນຂ້າມ, ພວກເຂົາໄດ້ເຮັດຕາມຄຳແນະນຳຂອງແອວມາ ຕໍ່ຜູ້ຄົນຂອງເພິ່ນ ເມື່ອເພິ່ນກ່າວວ່າ, “ຈົ່ງຢ່າແຕະຕ້ອງສິ່ງທີ່ບໍ່ສະອາດຂອງພວກເຂົາ.”⁶

ປຶ້ມນ້ອຍ ທີ່ຊື່ວ່າ ສຳລັບຄວາມເຂັ້ມແຂງຂອງຊາວໜຸ່ມ ບັນຈຸຄຳແນະນຳດັ່ງຕໍ່ໄປນີ້ ຈາກຝ່າຍປະທານສູງສຸດ ຕໍ່ຊາວໜຸ່ມຂອງສາດສະໜາຈັກ: “ເຈົ້າເປັນຜູ້ຮັບຜິດຊອບຕໍ່ການເລືອກຂອງເຈົ້າ. ພຣະເຈົ້າຮູ້ຈັກເຈົ້າດີ ແລະ ຈະຊ່ອຍເຈົ້າເລືອກສິ່ງດີ, ເຖິງແມ່ນຄອບຄົວຂອງເຈົ້າ ແລະ ໝູ່ເພື່ອນຂອງເຈົ້າ ໃຊ້ອຳເພີໃຈຂອງເຂົາເຈົ້າ ໃນທາງທີ່ບໍ່ຖືກຕ້ອງກໍຕາມ. ຈົ່ງມີຄວາມກ້າຫານທາງສິນທຳ ທີ່ຈະຍຶດໝັ້ນໃນການເຊື່ອຟັງຕໍ່ພຣະປະສົງຂອງພຣະເຈົ້າ, ເຖິງແມ່ນເຈົ້າຕ້ອງຢືນຢູ່ຄົນດຽວກໍຕາມ. ເມື່ອເຈົ້າເຮັດສິ່ງນີ້, ເຈົ້າຈະເປັນແບບຢ່າງໃຫ້ແກ່ຄົນອື່ນ ທີ່ຈະເຮັດຕາມ.”⁷

ສົງຄາມລະຫວ່າງຄວາມດີ ແລະ ຄວາມຊົ່ວ ຈະດຳເນີນຕໍ່ໄປ ຕະຫລອດຊົ່ວຊີວິດຂອງເຮົາ, ເພາະມັນເປັນຈຸດປະສົງຂອງຜູ້ປໍລະປັກ ທີ່ຈະເຮັດໃຫ້ທຸກຄົນທຸກທໍລະມານຄືກັນກັບມັນ. ຊາຕານ ແລະ ບໍລິວານຂອງມັນ ຈະພະຍາຍາມເຮັດໃຫ້ເຮົາສັບສົນ ແລະ ຢາກຄວບຄຸມເຮົາໂດຍການລໍ້ລວງເຮົາໃຫ້ເຮັດຄວາມຜິດບາບ. ຖ້າພວກມັນເຮັດໄດ້, ພວກມັນຈະທຳລາຍທຸກສິ່ງທີ່ດີ. ເຖິງຢ່າງໃດກໍຕາມ, ມັນສຳຄັນທີ່ເຮົາຈະເຂົ້າໃຈວ່າ ພວກມັນບໍ່ມີອຳນາດເໜືອເຮົາ ຍົກເວັ້ນແຕ່ເຮົາຈະອະນຸຍາດໃຫ້ມັນມີ.

ພຣະຄຳພີກໍມີຫລາຍໆຕົວຢ່າງ ກ່ຽວກັບຜູ້ຄົນທີ່ໄດ້ອະນຸຍາດໃຫ້ຜູ້ປໍລະປັກມີອຳນາດ ແລະ ໃນທີ່ສຸດ ໄດ້ມີຄວາມສັບສົນ ແລະ ຖືກທຳລາຍ ເຊັ່ນ ນີຮໍ, ໂຄຣິຫໍ, ແລະ ເຊເຣັມ. ເຮົາຕ້ອງລະວັງສິ່ງອັນຕະລາຍນີ້. ເຮົາບໍ່ຄວນປ່ອຍໃຫ້ຕົນເອງສັບສົນໂດຍຂ່າວສານອັນທີ່ຜູ້ຄົນໃນໂລກນິຍົມກັນຢ່າງງ່າຍດາຍ ອັນທີ່ກົງກັນຂ້າມກັບຄຳສອນ ແລະ ຫລັກທຳທີ່ແທ້ຈິງຂອງພຣະກິດຕິຄຸນຂອງພຣະເຢຊູຄຣິດ. ຂ່າວສານທາງໂລກຫລາຍຢ່າງເຫລົ່ານີ້ ບໍ່ເປັນຕົວແທນໃຫ້ສິ່ງໃດ ນອກຈາກການລໍ້ລວງສັງຄົມໃຫ້ແກ້ຕົວໃຫ້ຄວາມຜິດບາບ. ເຮົາຕ້ອງຈື່ຈຳວ່າ, ໃນທີ່ສຸດ, ທຸກຄົນຈະຢືນຢູ່ຕໍ່ພຣະພັກຂອງພຣະຄຣິດ ແລະ ຖືກພິພາກສາຕາມວຽກງານຂອງເຮົາ, ບໍ່ວ່າຈະດີ ຫລື ຊົ່ວກໍຕາມ.⁸ ເມື່ອເຮົາປະເຊີນກັບຂ່າວສານທາງໂລກເຫລົ່ານີ້, ເຮົາຈະຕ້ອງມີຄວາມກ້າຫານ ແລະ ມີຄວາມຮູ້ທີ່ໝັ້ນຄົງ ກ່ຽວກັບແຜນຂອງພຣະບິດາເທິງສະຫວັນ ທີ່ຈະເລືອກສິ່ງດີ.

ເຮົາທຸກຄົນສາມາດໄດ້ຮັບພະລັງທີ່ຈະເລືອກສິ່ງດີ ຖ້າຫາກເຮົາສະແຫວງຫາພຣະຜູ້ເປັນເຈົ້າ ແລະ ໄວ້ວາງໃຈທັງໝົດ ແລະ ມີສັດທາໃນພຣະອົງ. ແຕ່, ດັ່ງທີ່ພຣະຄຳພີສອນ, ເຮົາຕ້ອງຈິງໃຈ ແລະ ມີຄວາມຕັ້ງໃຈແທ້ໆ, ແລ້ວພຣະຜູ້ເປັນເຈົ້າ, ໃນຄວາມເມດຕາອັນເປັນນິດຂອງພຣະອົງ, ຈະສະແດງຄວາມຈິງໃຫ້ປະຈັກແກ່ເຮົາ “ໂດຍອຳນາດຂອງພຣະວິນຍານບໍລິສຸດ. ແລະ ໂດຍອຳນາດຂອງພຣະວິນຍານບໍລິສຸດ ເຮົາຈະຮູ້ຈັກຄວາມຈິງຂອງທຸກເລື່ອງ.”⁹

ຄວາມຮູ້ນີ້ທີ່ໄດ້ມາຜ່ານທາງພຣະວິນຍານບໍລິສຸດ ບໍ່ແມ່ນສິ່ງອື່ນ ນອກຈາກຈະເປັນປະຈັກພະຍານຂອງເຮົາ, ຊຶ່ງເປັນພະລັງໃຫ້ແກ່ສັດທາ ແລະ ຄວາມຕັ້ງໃຈຂອງເຮົາ ທີ່ຈະເຮັດຕາມຄຳສອນຂອງພຣະກິດຕິຄຸນທີ່ຖືກຟື້ນຟູຄືນມາໃໝ່ ໃນຍຸກສຸດທ້າຍນີ້, ບໍ່ວ່າຂ່າວສານທີ່ເຮົາໄດ້ຍິນຈາກໂລກ ຈະມີຄົນນິຍົມກັນຫລາຍປານໃດກໍຕາມ. ປະຈັກພະຍານຂອງເຮົາ ຈະເປັນເຄື່ອງກຳບັງ ເພື່ອປົກປ້ອງເຮົາ ຈາກລູກສອນໄຟ ຂອງຜູ້ປໍລະປັກ ໃນຄວາມພະຍາຍາມຂອງມັນ ທີ່ຈະໂຈມຕີເຮົາ.¹⁰ ມັນຈະນຳພາເຮົາ ຜ່ານຜ່າຄວາມມືດ ແລະ ຄວາມສັບສົນ ທີ່ມີຢູ່ໃນໂລກ ໃນທຸກວັນນີ້.¹¹

ຂ້າພະເຈົ້າໄດ້ຮຽນຮູ້ຫລັກທຳນີ້ ຕອນຂ້າພະເຈົ້າໄດ້ໄປຮັບໃຊ້ເປັນຜູ້ສອນສາດສະໜາໜຸ່ມ. ຄູ່ສອນຂອງຂ້າພະເຈົ້າກັບຂ້າພະເຈົ້າ ໄດ້ຮັບໃຊ້ຢູ່ໃນສາຂານ້ອຍໆແຫ່ງໜຶ່ງທີ່ຢູ່ຫ່າງໄກ ຂອງສາດສະໜາຈັກ. ພວກເຮົາໄດ້ພະຍາຍາມເວົ້າລົມນຳທຸກຄົນຢູ່ໃນເມືອງ. ເຂົາເຈົ້າກໍຮັບເອົາມັນເປັນຢ່າງດີ, ແຕ່ເຂົາເຈົ້າມັກ ໂຕ້ຖຽງກ່ຽວກັບພຣະຄຳພີ ແລະ ໄດ້ສອບຖາມພວກເຮົາເລື່ອງຫລັກຖານທີ່ແນ່ນອນ ກ່ຽວກັບຄວາມເປັນຈິງ ຂອງສິ່ງທີ່ພວກເຮົາສອນ.

ຂ້າພະເຈົ້າຈື່ໄດ້ວ່າ ທຸກເທື່ອທີ່ຄູ່ສອນກັບຂ້າພະເຈົ້າໄດ້ພະຍາຍາມພິສູດບາງສິ່ງໃຫ້ຜູ້ຄົນເຫັນ, ພຣະວິນຍານຂອງພຣະເຈົ້າ ໄດ້ໜີຈາກພວກເຮົາໄປ ແລະ ພວກເຮົາຮູ້ສຶກທໍ້ຖອຍໃຈ ແລະ ສັບສົນ. ພວກເຮົາໄດ້ຮູ້ສຶກວ່າ ພວກເຮົາຄວນໃຫ້ປະຈັກພະຍານຂອງພວກເຮົາຄຽງຄູ່ໄປກັບຄວາມຈິງຂອງພຣະກິດຕິຄຸນທີ່ພວກເຮົາສອນ. ນັບແຕ່ນັ້ນມາ, ຂ້າພະເຈົ້າຈື່ໄດ້ວ່າ ເມື່ອພວກເຮົາໄດ້ສະແດງປະຈັກພະຍານດ້ວຍສຸດໃຈ, ພະລັງຢືນຢັນທີ່ງຽບໆ, ຊຶ່ງມາຈາກພຣະວິນຍານບໍລິສຸດ, ໄດ້ເຕັມຢູ່ໃນຫ້ອງ ແລະ ບໍ່ມີຊ່ອງວ່າງສຳລັບຄວາມສັບສົນ ຫລື ໂຕ້ຖຽງກັນ. ຂ້າພະເຈົ້າໄດ້ຮຽນຮູ້ວ່າ ພະລັງຊົ່ວຮ້າຍບໍ່ສາມາດຢູ່ທີ່ນັ້ນ ທີ່ສາມາດສ້າງຄວາມສັບສົນ, ຫລອກລວງ, ຫລື ທຳລາຍປະຈັກພະຍານ ທີ່ຈິງໃຈຂອງສານຸສິດທີ່ແທ້ຈິງຂອງພຣະເຢຊູຄຣິດ.

ດັ່ງທີ່ພຣະຜູ້ຊ່ອຍໃຫ້ລອດໄດ້ສອນ, ຜູ້ປໍລະປັກຢາກຝັດຮ່ອນເຮົາເໝືອນຝັດເຂົ້າເປືອກ, ເຮັດໃຫ້ເຮົາສູນເສຍຄວາມສາມາດ ທີ່ຈະເປັນອິດທິພົນໃຫ້ແກ່ໂລກ ໃນທາງດີ.¹²

ອ້າຍນ້ອງທີ່ຮັກແພງຂອງຂ້າພະເຈົ້າ, ເພາະຈຳນວນຂອງຄວາມສັບສົນ ແລະ ຄວາມສົງໄສ ກຳລັງຂະຫຍາຍອອກໄປຕະຫລອດທົ່ວໂລກ ໃນທຸກວັນນີ້, ເຮົາຈຶ່ງຕ້ອງຍຶດໝັ້ນປະຈັກພະຍານຂອງເຮົາ ໃນພຣະກິດຕິຄຸນຂອງພຣະເຢຊູຄຣິດໄວ້ໃຫ້ແໜ້ນ. ແລ້ວເຮົາຈະສາມາດປົກປ້ອງຄວາມຈິງ ແລະ ຄວາມຍຸດຕິທຳໄດ້ຫລາຍກວ່າເກົ່າ. ເຮົາຈະເອົາຊະນະສົງຄາມກັບຄວາມຊົ່ວຮ້າຍ ໃນແຕ່ລະວັນໄດ້, ແລະ ແທນທີ່ຈະທໍ້ຖອຍໃຈໃນຊີວິດ, ເຮົາຈະລວມກຳລັງເຂົ້າກັນ ເພື່ອຂຶ້ນໃຫ້ເຖິງມາດຕະຖານຂອງພຣະອາຈານ.

ຂ້າພະເຈົ້າເຊື້ອເຊີນທ່ານທັງຫລາຍ ໃຫ້ພົບຄວາມປອດໄພໃນຄຳສອນທີ່ບັນຈຸຢູ່ໃນພຣະຄຳພີ. ນາຍທັບໂມໂຣໄນໄດ້ໃຫ້ສັດທາຂອງເພິ່ນຄຽງຄູ່ໄປກັບພຣະເຈົ້າ ແລະ ໃຫ້ປະຈັກພະຍານຂອງເພິ່ນເຖິງຄວາມຈິງ ຄຽງຄູ່ໄປກັບຄວາມຮູ້ ແລະ ສະຕິປັນຍາ ທີ່ພົບເຫັນຢູ່ໃນພຣະຄຳພີ. ໃນວິທີນີ້, ເພິ່ນໄດ້ໝັ້ນໃຈວ່າ ເພິ່ນຈະໄດ້ຮັບພອນຈາກພຣະຜູ້ເປັນເຈົ້າ ແລະ ຈະໄດ້ຮັບໄຊຊະນະ, ຊຶ່ງມັນກໍໄດ້ເປັນໄປດັ່ງນັ້ນ.

ຂ້າພະເຈົ້າຂໍເຊື້ອເຊີນທ່ານທັງຫລາຍ ໃຫ້ພົບຄວາມປອດໄພໃນຖ້ອຍຄຳທີ່ສະຫລາດຂອງສາດສະດາ ໃນປະຈຸບັນ. ປະທານທອມມັສ ແອັສ ມອນສັນ ໄດ້ກ່າວວ່າ: “ເຮົາຜູ້ທີ່ໄດ້ຖືກແຕ່ງຕັ້ງຕໍ່ຖານະປະໂລຫິດຂອງພຣະເຈົ້າ ສາມາດສ້າງຄວາມແຕກຕ່າງໄດ້. ເມື່ອເຮົາຮັກສາຄວາມບໍລິສຸດສ່ວນຕົວ ແລະ ຮັກສາກຽດຂອງຖານະປະໂລຫິດໄວ້, ແລ້ວເຮົາຈະກາຍເປັນຕົວຢ່າງທີ່ຊອບທຳໃຫ້ແກ່ຄົນອື່ນທີ່ຈະຕິດຕາມ … [ແລະ ເຮົາ] ຊ່ອຍສ່ອງແສງໃນໂລກທີ່ມືດມົວນີ້ໄດ້.”¹³

ຂ້າພະເຈົ້າຂໍເຊື້ອເຊີນທ່ານທັງຫລາຍ ໃຫ້ໄວ້ວາງໃຈໃນຄຸນງາມຄວາມດີ ແລະ ອຳນາດແຫ່ງການຊົດໃຊ້ຂອງພຣະເຢຊູຄຣິດ. ຜ່ານການເສຍສະລະຊົດໃຊ້ຂອງພຣະອົງ, ເຮົາຈະສາມາດມີຄວາມກ້າຫານ ທີ່ຈະເອົາຊະນະສົງຄາມ ໃນວັນເວລາຂອງເຮົາ, ແມ່ນແຕ່ໃນທ່າມກາງຄວາມຫຍຸ້ງຍາກ, ການທ້າທາຍ, ແລະ ການລໍ້ລວງ. ຂໍໃຫ້ເຮົາຈົ່ງໄວ້ວາງໃຈໃນຄວາມຮັກ ແລະ ອຳນາດຂອງພຣະອົງ ທີ່ຈະຊ່ອຍເຮົາໃຫ້ລອດ. ອົງພຣະຄຣິດເອງໄດ້ກ່າວວ່າ:

“ເຮົານີ້ແຫລະ ເປັນທາງນັ້ນ, ເປັນຄວາມຈິງ, ແລະ ເປັນຊີວິດ: ບໍ່ມີຜູ້ໃດມາເຖິງພຣະບິດາ, ນອກຈາກມາທາງເຮົາ.”¹⁴

“ເຮົານີ້ແຫລະ ເປັນຄວາມສະຫວ່າງຂອງໂລກ: ຜູ້ທີ່ຕາມເຮົາມາຈະມີຄວາມສະຫວ່າງແຫ່ງຊີວິດ ແລະ ຈະບໍ່ເດີນຢູ່ໃນຄວາມມືດຈັກເທື່ອ.”¹⁵

“ເຮົາບອກເລື່ອງນີ້ແກ່ເຈົ້າທັງຫລາຍ ເພື່ອພວກເຈົ້າຈະມີຄວາມສະຫງົບສຸກໃນເຮົາ. ໃນໂລກນີ້ພວກເຈົ້າຈະມີຄວາມທຸກລຳບາກ: ແຕ່ຈົ່ງຊື່ນໃຈເທາະ; ເພາະຝ່າຍເຮົາໄດ້ຊະນະໂລກແລ້ວ.”¹⁶

ຂ້າພະເຈົ້າຂໍເປັນພະຍານເຖິງຄວາມຈິງເຫລົ່ານີ້ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.