2010–2019
Ei, Se Kak oh Se Pahn Kana!
April 2015


Ei, Se Kak oh Se Pahn Kana!

Kitail anahne koledi teng atail kadehde en rongamwahu en Sises Krais. Kitail ahpw pahn kak kana nan atail mahwiniong suwed rahn koaros.

Maing riei ohl akan, I karakarahk kilahr ansou mwahu me I ahneki pwehn koasoaieng kumwail, me kolokol priesthood en Kauno, nan mwomwohdiso wet rahnwet.

Presiden Thomas S. Monson ehu ansou koasoaia:

“Sampah wet ekei ansou kak wia wasahn kousoan kamasepwehk. Dahme mwahu ohng aramas, kopwuriamwei, solahr wia mehkot kesempwal. Sohte emen—menda ma pwulopwul de mah de ohl oh lih mehlel—pahn sohte iang lelehng soahng kan me kak kesehdi oh kamwomw kitail la.

“... Ahpw kitail sohte anahne ahneki kapwunod. Kitail mahmahwen iengdihp. Mahwen wet kitail kak oh pahn kana. Samatail nanleng ketkiheng kitailehr kepwehn doadoahk anahn akan pwe kitail en kak kana.”1

Kitail koaros, me pwulopwul oh mah, kin sohpai rahn koaros mahwen me Presiden Monson koasoaiahier. Atail imwintihtio oh nah tohnleng kan kin songosong kedirapwai kitail. Kahrepen arail doadoahk iei en kangoange kitailen pwupwisang nan inou kan me kitail wiahngehr Kauno, kahreieng atail pahn moanokehla atail sohso poatoapoat. Irail inenen ese sapwelimen Kauno pilahn ohng sapwelime serihkan, pwe irail iang mih rehtail nan mihting lap en nanleng ansou me pilahno kasansaladahu.2

Mendahte atail kin sohpai apwal, ni duwen Presiden Monson ah padahngki, mahwen iou met me kitail kak oh pahn kana. Kauno koapwoaroapwoarki atail kak oh koasoanehdi en wia.

Nan pwuhk sarawi kan tohto karasaras en me kanahier nan arail mahwen kan mendahte arail mih nan eilepen irair keper. Emen me wia karasaras iei Keptin Moroni nan Pwuhken Mormon. Pwutak pwulopwul menet ahneki komwad en doare dahme mehlel ni ansou ieu me tohto me uhwongada oh mahwen me kerenieng kamwomwala tohn wein Nephi pwon. Mendahte eh ahneki marain en doadoahngki ah pwukoah kan, Moroni ahnekihte aktikitik. Met kiheng en wia dipwisoun doadoahk kesempwal oh kaselel nan limen Kauno ni ansouo. Alma koasoia ma aramas koaros duwehte Moroni, manaman en ehl pahn rerada kohkohlate, oh sehdan sohte pahn ahneki manaman ohng mohngiong en aramas.3 Wiwia mwahu koaros me Moroni ahneki kohsang ni ah pwoson laud Koht oh Sises Krais4oh ah nantiheng loaloapoateng en idawehn kapitien Kauno oh sapwelime Soukohp akan.5

Kitail koaros anahne wiahla Keptin Moroni en mwehi wet pwe kitail en kak kana nan mahwen en kasongosong kan nan atail mour. I ese emen dihken pwulopwul me wekidala pein ih ohng Keptin Moroni en mwehi wet. Pwutak pwulopwul menet inenen pwoson oh kin nantiheng idawehn kaweid en eh pahpa oh nohno oh kaun en mwomwohdiso kan. Ah pwoson oh kin nantiheng kin lelehng songisong rahn koaros, mendahte ah pwulopwul. Ih kelehpw me wia tohn mwomwohdiso wet nan ah perehn sukuhl. E ndahngie ehu rahno e ahpw pwuriamweikihla irair apwal oh kapwunod ieu—kempoakapah ko kilkilang kilel suwed nan neirail cellphone ko. Nan ansouohte, pwutak pwulopwul menet anahne medewehda dahme keioun kesempwal—ah tantal de ah momourki dahme pwung. Mwurin seken depe, e ahpw ahnekihda komwad oh indahng kempoakepah koa me dahme re wiewiahu sohte pwung. E pil indahng irail me re anahne uhdi dahme re wiewiahu pwe re de wiahla lidu ohng kilel suwed kan. Pali tohtohn ienge tohn sukuhl koa kepitiki ah kaweid, ni ahr nda me e wia kisehn mour oh e sohte wia mehkot suwed. Ah mie emen nan pwungarail me rong kaweid en pwutak pwulopwul menet oh tokedihsang wia.

En dihken menet ah karasaras wia kaweid mwahu ohng emen ienge tohn sukuhl ko. Ih oh kempoakepahu alehdi kepit oh kahpwal pwehki ara pilipilo. Ahpw ira idawehn kaweid en Alma ni ah koasoaia, “Oh met I indahiengkumwail, kumwail koaros me anahne kohsang rehn me suwed akan, oh tohrohrla, oh dehr doahke arail me samin akan.”6

Pwuhk en For the Strength of Youth audaudki kaweid sang Keieun Presidensi ong me pwulopwul kan: “Ke pwukoahki pilipil kan me ke pahn wiahda. Koht mwangih iuk oh pahn sewese iuk wiahda pilipil mwahu, mendahte ma omw peneinei de kempoakepahmw kan sohte pilada dahme pwung. Ahniki komwad en doare dahme ke kamehlele pwe ken tengedihte kapwaiada kupwuren Kauno, mendahte ma ke pahn kelehpw. Ni omw pahn wia met, ke wia karasaras mwahu ohng ekei en idawehn.”7

Mahwen wet nan pwungen mwahu oh suwed pahn wiewiawi erein atail mour, pwe ih en sehdan ah pwukoah en wia koaros en insensuwed duwehte ih, Sehdan ih nah tongleng kan pahn song en kapingada atail madamadau oh kaun kitailda sang ni arail pahn kasongosong ih kitail en wiahda dihp. Ma re kak, irail pahn kasaminehla soahng koaros me mwahu. E kesempwal kitail en wehwehki me irail kak ahneki manaman pohtail ma kitail mweidada.

Nan pwuhk sarawi kan pil mie ekei karasaras en irail kan me mweidehng sehdan manamano oh imwikihla pingiping oh kamwomwila ni imwin arail mour, duwehte Nehor, Korihor, oh Sherem. Kitail anahne keper kin kitail soangen kahpwal wet.Kitail sohte kak mweidehng pein kitail en pingkihda rohng dehde kan me mengei en alahlda nan sampah oh me uhwong padahk mehlel kan en rongamwahu en Sises Krais. Tohto rohng dehde pwukat kasalepen en aramas songosong en doarehla dihp. Kitail anahne tamataman me, ni imwio, koaros pahn uh mwohn Krais pwehn kadeik atail doadoahk kan, ma irail mwahu de suwed.8Ansou me kitail pahn loieng soangen rohng pwukat, komwad laud pahn anahn pwehn pilada me pwung.

Kitail koaros kak alehdi kehlail en pilada me pwung ma kitail rapahki Kauno oh kiheng ih atail koapwoaroapwoar oh pwoson unsek. Ahpw, pwuhk sarawi kan padahngki, me kitail anahne ahniki mohngiong mehlel oh ineng mehlel, oh Kauno, nan Ah kalahngan kowahlap, pahn kasalehda me pwung ohng kitail sang ni manaman en Ngehn Sarawi. Oh sang ni manaman en Ngehn Sarawi kitail pahn esehla duwen mehlel en mehkoaros.9

Marain wet me alahldier sang rehn Ngehn Sarawi iei aht kadehde, me kin kakehlailih aht pwoson oh nanantiheng pwehn idawehn padahk kan en rongamwahu kopwurupwurdo wet nan imwin rahn akan, mendahte rohng tohto kan kitail kin rong nan sampah. Atail pwoson oh kadehde pahn wekidekila wiahla mehn perehre pwehn pereh kitail sang doadoahk en sehdan kan ni eh kin nantiheng peieng kitail.10Atail kadehde anahne kaweid kitail safely nan rotorot oh pingiping me mie nan sampah rahnwet.11

I esehla kosonned wet ni ahi wia misineri pwulopwul men. I taman me ngehi oh iengeio mih nan branch tikitik ieu. Se songen lokaiahng aramas koaros nan kahnihmwo. Irail kasamwoih kit mwahu, ahpw re mwahuki akamaiki pwuhk sarawi oh kin nahng kiht en kasalehieng irail dahme se kin padahngki.

I taman me ansou koaros ngehi oh iengeio kin song en kasalehieng emen mehkot, ngehn en Kauno kin mwesel sang kit oh se kin ahniki pepehm en pingida oh salongala. Se pehm me se anahne kapahrekieng aht kadehde ohng padahk mehlel kan me se wie padpadahngki. I taman ansou se wia aht kadehde sang nan mongiong unsek, pepehm kehlail ehu sang Ngehn Sarawi mihla nan perehu oh sohla ansou en peikasal oh akamai. I esehla me sohte suwed ehu me kak kasalongehla, pitihdi, de powehdi kehlail en kadehde mehlel en sounpadahk mehlel en Sises Krais.

Pein atail Sounkomour padahki, me atail imwintihtio inangih sihpih kitail duwehte wihd, kahrehieng atail sohla kak sowese kamwahiala sampah.12

Riei ohl akan, pwehki pingiping oh peikasal laud me kohpesengehr nan sampah rahnwet, kitail anahne kehlail nan atail kadehde en rongamwahu en Sises Krais. Eri atail kak en doare mehlel oh pwung pahn inenen laudila kin kana nan mahwen en ehu ehu rahn ohng me suwed, oh kitail en dehr lohdieng nan kahpwal kan en mour, kitail pahn kamahntikodo ekei en momourki en Kauno kosonned akan.

I luke koaros en diar paiamwahu nan padahk sang nan pwuhk sarawi kan. Captain Moroni kainenehieng ah pwoson Koht oh ah kadehdehieng me mehlel ohng marain oh eripit me kin dierek nan pwuhk sarawi. Wiepe wet, e kamehlele me e pahn alehdi kapai en Kauno oh pahn alehdi kana tohto, iei me ni mehlel, e wiawi.

I luke koaros en diar paiamwahu nan mahsen eripit en atail soukohp en rahn pwukat. Presiden Thomas S. Monson kosoia: “Kitail me kasarawihengehr priesthood en Kauno kak wia karasaras mwahu. Ansou me kitail mwakelekel oh waunki atail priesthood, kitail kak wia karasaras mwahu ong mehteikan en idawehn … [oh] sowesehda sampah me wie rotorotala.”13

I luke koaros en kamehlele manamanen tomw en Sises Krais. Pwehki Ih, kitail kak alehdi komwad en kana nan mahwen koaros en atail ansou, nan atail ahnsou apwal oh kasongosong. Kitail likih Sapwelime limpoak oh manaman en kapitkitailla. He ketin pein Mahsanih:

“Ngehi me ahl, ngehi me mehlel, ngehi me mour; sohte me kak kolahng Semei ma soh ngehi.”14

“Ngehi me marain en sampah: Mehmen me pahn idaweniehdo pahn ahneki marain en mour, oh sohte pahn weweid nan rotorot.”15

“I padahkiong kumwail mepwukat pwe kumwail en ahneki popohl ni amwail miniminiong ie. Sampah pahn kalokei kumwail, ahpw kumwail koapwoaroapwoar, pwe I kalowehdier sampah.”16

I wia ahi kadehde ohng mehlel pwukat ni mwahr sarawi en Sises Krais, amen.