Lub Caij Ntuj Sov nrog Niam Tais Rose
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Thaum nej taug nej txoj kev ua ib tug thwj tim, kuv thov Vajtswv hais tias kev cia siab yuav txhawb nqa nej txhua lub sij hawm.
Kuv cov muam thiab cov phooj ywg zoo, kuv zoo siab koom nrog nej hnub no, thiab kuv zoo siab nrog peb tus yaj saub nyob, Thawj Tswj Hwm Thomas S. Monson. Thawj Tswj Hwm, peb hlub koj. Peb tu siab uas peb cov phooj ywg zoo thiab tus Tswv peb tug Thwj Tim tau tas sim neej lawm. Peb nco Thawj Tswj Hwm Packer, Txwj Laug Perry, thiab Txwj Laug Scott; peb hlub lawv. Peb thov Vajtswv pab lawv tsev neeg thiab phooj ywg.
Kuv yeej zoo siab xav koom tuam rooj sab laj no—cov nkauj zoo mloog thiab tej lus ntuas los ntawm cov muam uas txais kev tshoov siab no ua rau peb muaj tus Ntsuj Plig puv npo. Kuv rais los ua ib tug neeg zoo dua tom qab kuv koom nrog nej.
Thaum kuv xav txog tej yam uas kuv yuav hais rau nej hnub no, kuv xav txog tus Cawm Seej txoj kev qhia. Kuv nyiam qhov uas Nws txawj siv tej zaj dab neeg yooj yim qhia txog qhov tseem ceeb uas muaj tseeb. Nws zaj lus piv txwv caw Nws cov thwj tim txais qhov tseeb nrog lawv lub siab lub ntsws, thiab muab tej lub ntsiab cai uas nyob mus ib txhis txuas rau lawv lub neej niaj hnub.1 Peb tus Thawj Tswj Hwm Monson uas peb hlub kuj txawj siv dab neeg txog nws lub neej qhia peb thiab tshoov peb lub siab.2
Hnub no, kuv kuj yuav qhia kuv zaj lus los ntawm kev siv dab neeg qhia txog kuv tej kev xav. Kuv caw nej mloog tus Ntsuj Plig lus. Tus Vaj Ntsuj Plig Dawb Huv yuav pab nej nrhiav ib zaj lus qhia rau nej nyob hauv zaj lus piv txwv no.
Niam Tais Rose
Zaj dab neeg no hais txog ib tug ntxhais hluas hu ua Eva. Muaj ob qho tseem ceeb uas nej yuav tsum paub txog Eva. Qhov thib ib nyob hauv zaj dab neeg no nws muaj 11 xyoos. Thiab qhov thib ob nws yeej tsis xav mus nrog nws tus niam tais Rose nyob hlo li. Nws yeej tsis kam mus. Tsis kam mus tiag tiag li.
Tiam sis Eva niam yuav tau mus phais mob thiab tom qab ntawd nws yuav tsum nyob ntxiv thiaj li yuav pab nws zoo. Yog li ntawd Eva niam thiab txiv xa nws mus nyob nrog nws tus Niam Tais Rose thaum lub caij ntuj sov.
Raws li Eva xav, muaj ntau yam uas qhia vim li cas nov yog ib lub tswv yim tsis zoo. Qhov thib ib, nws yuav tsis nyob ze nws niam. Nws kuj yuav tsis nyob ze nws tsev neeg thiab phooj ywg. Thiab tsis tas li ntawd xwb, nws twb tsis paub Niam Tais Rose. Eva txaus siab nyob hauv nws lub tsev xwb, nws tsis xav mus qhov twg li.
Txawm nws cav ncauj npaum li cas los nws niam nws txiv yeej yuav tsis hloov siab. Yog li ntawd Eva tau ntim khaub ncaws rau hauv nws lub thawv thiab caij tsheb nrog nws txiv mus rau Niam Tais Rose lub tsev.
Txij thaum Eva xub thawj nkag mus rau hauv lub tsev, nws ntxub heev.
Txhua yam qub heev! Muaj cov ntawv qub, cov hwj txawv heev, thiab muaj ib co thawv yas uas muaj hlaws, txoj hlua thiab tej lub khawm puv nkaus.
Niam Tais Rose nyob nws ib leeg; nws yeej tsis tau yuav txiv. Tsuas muaj ib tug miv xim tshau uas nyiam pw saum qhov chaw siab tshaj plaws hauv txhua chav, ntsia ntsoov txhua yam zoo li nws yog ib tug tsov tshaib plab.
Ua rau Eva xav tias ntshe lub tsev no yuav kho siab heev thiab. Nws niam tais lub tsev nyob puag tom ntug nroog, nyias nyob nyias deb heev. Tsis muaj leej twg uas muaj hnub nyoog zoo li Eva. Ua rau Eva kho siab thiab.
Thaum xub thawj nws tsis tshua nrog Niam Tais Rose tham. Nws xav txog nws niam xwb. Tej lub sij hawm, thaum tsaus ntuj nws tsis tsaug zog, es nws thov Vajtswv kawg siab kawg ntsws hais tias nws niam yuav rov qab zoo. Thiab txawm tsis tau pib kiag thaum ntawd los, Eva pib xav hais tias Vajtswv saib xyuas nws niam.
Nws txawm hnov xov hais tias nws niam phais mob zoo, ces tsuas tshuav qhov uas Eva yuav tsum tos mus txog thaum lub caij ntuj sov kawg xwb. Tiam sis, ua rau nws tsis nyiam tos hlo li!
Vim nws tsis tshua txhawj txog nws niam lawm, Eva pib paub txog Niam Tais Rose ntau me ntsis. Nws yog ib tug poj niam loj—txhua yam txog nws yeej loj heev: nws lub suab, nws txoj kev luag, nws tus cwj pwm. Tsis yooj yim rau nws mus ub mus no, tiam sis nws pheej hu nkauj thiab luag thaum nws ua hauj lwm, thiab nws txoj kev luag nrov mus puv nws lub tsev. Txhua hmo nws zaum saum nws lub rooj zaum sofa, qhib nws phau vaj lug kub, thiab txawm nyeem nrov. Thaum nws nyeem, tej lub sij hawm nws hais lus xws li “Auj, tsis tsim nyog nws ua li ntawd!” los sis “Auj kheev lam kuv nyob ntawd!” los sis “Hais li ntawd mas zoo nkauj kawg!” Thiab txhua hmo thaum nkawd ob leeg txhos caug thov Vajtswv, Niam Tais Rose yuav thov Vajtswv hais tej lus zoo nkauj, nws ua nws Leej Txiv Saum Ntuj Ceeb Tsheej tsaug rau cov noog xim xiav thiab cov ntoo thuv, hnub liab ploog thiab cov hnub qub, thiab “tej yam uas muaj sia nyob.” Ua rau Eva xav hais tias Rose yog Vajtswv ib tug phooj ywg.
Sij hawm dhau mus es Eva tau paub txog ib qho uas nws xav tsis thoob: Niam Tais Rose yog ib tug poj niam zoo siab tshaj txhua tus uas nws ntsib dhau los!
Tiam sis ua cas yuav zoo li ntawd?
Muaj dab tsi ua rau nws zoo siab ua luaj?
Nws yeej tsis tau yuav txiv, nws tsis muaj me nyuam, nws tsis muaj ib tug ua nws luag tsuas muaj ib tug miv uas ntxim ntxim ntshai xwb, thiab nyuaj rau nws ua tej yam yooj yim xws li khi nws nkawm khau thiab nce ntaiv.
Thaum nws mus tom nroog, nws ntoo tej kaus mom uas loj uas muaj ntau xim. Tiam sis yeej tsis muaj tib neeg luag rau nws. Lawv nyob ib puag ncig; lawv xav nrog nws tham. Rose yog ib tug kws qhia ntawv, thiab nws cov tub ntxhais kawm ntawv dhau los—tam sim no lawv twb loj hlob thiab muaj me nyuam lawm—lawv nyiam nrog nws sib tham. Lawv ua nws tsaug vim nws coj yam ntxwv zoo rau lawv lub neej. Feem ntau lawv luag. Tej lub sij hawm lawv quaj.
Thaum lub caij ntuj sov dhau mus, Eva siv sij hawm ntxiv nrog Rose. Nkawd taug kev ntev, thiab Eva tau kawm qhov txawv ntawm cov noog sparrow thiab cov noog finch. Nws tau de ib co txiv qus thiab muab cov txiv kab ntxwv coj los ua cov pleev bread noj. Nws kawm txog nws tus niam tais thaum ub uas tau ncaim nws lub teb chaws los hla hiav txwv, thiab taug kev hla tej tiaj nrag kom nrog Tsoom Haiv Neeg Ntseeg nyob.
Tom qab ntawd Eva kawm ib qho xav tsis thoob ntxiv: nws Niam Tais Rose yog tus neeg zoo siab tshaj, thiab Eva kuj zoo siab dua thaum uas Niam Tais Rose nyob ze.
Nim no lub caij ntuj sov yuav luag tag lawm. Niam Tais Rose hais tias tsis ntev yuav txog sij hawm rau Eva rov qab mus tsev. Txawm Eva twb tos ntsoov rov qab mus tsev txij thaum hnub nws tuaj los, nws tsis paub nws xav li cas tam sim no. Ua rau nws xav hais tias nws yuav nco lub tsev txawv no heev uas muaj tus miv uas ntsia nruj nrees thiab nws niam tais Rose.
Hnub ua ntej nws txiv yuav tuaj tos nws, Eva nug qhov uas nws xav txog tau ob peb lim tiam lawm hais tias: “Niam Tais Rose, vim li cas koj zoo siab ua luaj?”
Niam Tais Rose ntsia ntsoov ces coj nws mus rau ib daim duab uas nws muab dai nyob rau hauv chav nyob. Ib tug phooj ywg zoo tau muab daim duab ntawd rau nws.
“Koj pom dab tsi?” nws nug.
Eva twb pom daim duab no ua ntej lawm, tiam sis nws ntsia tsis qha heev. Ib tug me nyuam ntxhais pioneer taug ib txoj kev uas xim xiav. Cov nyom thiab cov ntoo yog xim ntsuab xiab. Eva hais tias, “Yog ib daim duab txog ib tug me nyuam ntxhais. Zoo li nws dhia ib ruam dhau ib ruam.”
Niam tais Rose hais tias, “Yog lawm, yog ib tug me nyuam ntxhais pioneer uas nws zoo siab dhia ib ruam dhau ib ruam. Kuv xav tias tej zaum muaj tej hnub tsaus ntuj nti thiab nyuaj siab rau cov pioneer no. Lawv lub neej yeej nyuaj heev—peb tsis paub nyuaj npaum li cas. Tiam sis nyob hauv daim duab no, txhua yam yeej ci ntsa iab thiab muaj kev cia siab. Tus me nyuam ntxhais zoo siab heev taug kev, thiab mus rau pem hauv ntej.”
Eva tsis hais dab tsi, Niam Tais Rose txawm hais tias, “Muaj ntau yam tsis zoo nyob hauv lub neej no, ntshe txhua tus txawj xav phem txog yav tom ntej thiab muaj kev tu siab. Tiam sis kuv paub tib neeg uas xav ntsoov rau tej txuj ci tseem ceeb nyob hauv lub neej no, txawm muaj tej xwm txheej tsis zoo los. Cov neeg no yog cov neeg zoo siab tshaj txhua tus kuv paub.”
Eva hais tias, “Tiam sis yus tsis txawj zoo siab kiag thaum yus muaj kev tu siab nev.”
Niam Tais Rose luag ntxhi thiab hais tias, “Tej zaum ua tsis tau li ntawd, tiam sis Vajtswv tsis xav kom peb tu siab. Nws xav kom peb muaj kev xyiv fab!3 Yog peb tso siab rau Nws, Nws yuav pab peb pom tej yam zoo thiab pom tej kev cia siab nyob hauv lub neej no. Thiab muaj tseeb tiag, lub ntiaj teb no yuav ci ntsa iab zuj zus tuaj. Yuav tsis muaj li no thaum tib pliag nkaus xwb, tiam sis tsis muaj ntau yam zoo uas zoo li ntawd. Kuv xav hais tias tej yam uas zoo tshaj plaws, xws li ua mov mog los sis khoom qab zib pleev bread mas yuav tsum ua siab ntev thiab siv zog ua hauj lwm thiaj ua tau.”
Eva xav txog qhov ntawd me ntsis thiab hais tias, “Tej zaum tsis yooj yim rau tib neeg uas muaj teeb meem hauv lawv lub neej.”
“Kuv tus me Eva, koj xav hais tias kuv tsis muaj teeb meem hauv kuv lub neej los?” Niam Tais Rose zaum nrog Eva saum lub rooj sofa. “Muaj ib lub sij hawm kuv poob siab heev ua rau kuv tsis xav ua neej.”
“Koj los?” Eva nug.
Niam Tais Rose nyo hau. “Muaj ntau yam uas kuv xav ua hauv kuv lub neej.” Nws hais lus tu siab heev zoo li Eva twb tsis tau pom dhau los. “Tej yam uas kuv xav tau feem ntau los yeej tsis tau muaj dhau los. Ua rau kuv lub siab mob heev. Muaj ib hnub kuv paub hais tias kuv lub neej yeej yuav tsis zoo li kuv xav. Hnub ntawd ua rau kuv nyuaj siab heev. Ua rau kuv poob siab xav tso txhua yam tseg.”
“Ces koj tau ua li cas?”
“Tau ib ntus kuv tsis tau ua dab tsi li. Kuv npau taws heev. Yeej tsis muaj leej twg kam nyob ze kuv.” Ces nws luag me ntsis, tiam sis nws tsis luag nrov zoo li nws ib txwm luag. Kuv pheej xav tias kuv lub neej tsis raws li kuv lub siab xav. Tiam sis kuv twb kawm txog ib qho uas tau hloov kuv lub neej tag nrho.”
“Koj kawm dab tsi?”
Niam Tais Rose luag hais tias, “Yog txoj kev ntseeg. Kuv kawm txog txoj kev ntseeg. Thaib kev ntseeg ua rau kuv muaj kev cia siab. Thiab kev ntseeg thiab kev cia siab ua rau kuv muaj siab rau ntseeg hais tias muaj ib hnub txhua yam yuav zoo, vim muaj tus Cawm Seej, Nws yuav kho txhua yam kom zoo. Tom qab ntawd, kuv pom hais tias kuv lub neej yuav tsis nyuaj thiab phem npaum li kuv xav. Kuv pib pom tau xim xiav uas tshiab heev, xim ntsuab xiab, thiab xim liab ploog, thiab kuv txiav txim siab tias kuv muaj kev xaiv—kuv yuav nyob twj ywm thiab tu siab rau kuv tus kheej, los sis kuv yuav muaj ib qho kev ntseeg me me, thiab hnav kuv ib daim tiab tshiab tshiab, rau nkawm khau seev cev, thiab hu nkauj dhia ib ruam rau ib ruam mus rau kuv lub neej rau yav tom ntej. Tam sim no nws tus niam tais hais lus zoo siab heev zoo ib yam li tus me nyuam ntxhais nyob hauv daim duab.
Niam Tais Rose ncav tes mus rau lub rooj thiab rau los tso nws cov vaj lug kub rau ntawm nws lub xub ntiag. “Kuv tsis xav tias kuv muaj kev mob tu siab—ntshe yus dim tsis taus kev mob ntawd yog yus hais lus xwb. Tiam sis kuv twb ua rau kuv tus kheej muaj kev nyuaj siab ntawd! Yog lawm, kuv twb muaj tej hnub tsaus ntuj nti, tiam sis kuv tej kev nyuaj siab txhawj xeeb yuav tsis pab kuv—ua rau haj yam kom nyuaj ntxiv xwb. Kev ntseeg tus Cawm Seej qhia hais tias txawm yav tas zoo li cas los, thaum kawg yeej muaj kev zoo siab.”
“Yog vim li cas koj ho paub?” Eva nug.
Niam Tais Rose nthuav mus ntxiv nyob hauv nws phau Npainpaum thiab hais tias, “Vaj lug kub hais tias:
“‘Vajtswv … yuav nrog lawv nyob, lawv yuav ua nws haiv neeg thiab nws yuav nrog lawv nyob thiab yuav ua lawv tus Vajtswv.
“‘Nws yuav so lawv tej kua muag huv tib si mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm. Tej uas sawv daws ib txwm muaj los twb ploj tas lawm.’”4
Niam Tais Rose ntsia Eva. Nws luag loj heev thaum nws hais lus ntxhi hais tias “Qhov ntawd puas yog ib qho zoo nkauj tshaj plaws uas koj tau hnov dhau los li?”
Eva xav hais tias nqe vaj lug kub ntawd yeej zoo heev.
Niam Tais Rose nthuav ob peb nplooj mus ntxiv thiab taw tes rau ib nqe rau Eva nyeem hais tias: “Tej uas qhov muag tsis tau pom los sis qhov ntsej tsis tau hnov, thiab tej uas neeg lub siab xav tsis txog hais tias yuav muaj los. Vajtswv npaj tej ntawd tseg rau cov neeg uas hlub Vajtswv lawm.”5
Niam Tais Rose hais tias, “Yog yav tom ntej yuav zoo npaum li ntawd, vim li cas peb yuav xav ntsoov txog lub sij hawm no los sis yav tas los thaum peb lub neej yeej tsis zoo li peb tau xav?”
Eva nyab thiab xav. Nws hais tias, “Tos me ntsis ntxiv. Koj puas hais tias kev zoo siab yog kev cia siab tias yuav zoo siab los yav tom ntej xwb? Peb yuav tau kev zoo siab thaum muaj txoj sia nyob mus ib txhis xwb los? Peb yuav txais tsis tau kev zoo siab tam sim no los?”
“Yeej txais tau kawg!” Niam Tais Rose hais. “Me ntxhais, lub sij hawm no yog ib feem ntawm kev nyob mus ib txhis. Nws tsis yog pib tom qab thaum peb tam sim neej xwb! Kev ntseeg thiab kev cia siab yuav pab qhib koj lub qhov muag pom txoj kev zoo siab uas koj muaj lawm.
“Kuv paub ib zaj paj lug uas hais tias, ‘Kev nyob tas mus li yog tej lub sij hawm yus muaj tam sim no uas muab tso ua ke.’6 Kuv tsis tau xav kom kuv txoj kev nyob tas mus li muaj qhov kev tsaus ntuj thiab kev ntshai tam sim no. Thiab kuv tsis tau xav qi qhov muag nyob hauv lub qhov taub tsaus ntuj nti, thiab zom hniav qees, thiab muaj kev nyuaj siab nyiaj kom mus txog thaum kawg. Kev ntseeg ua rau kuv cia siab tias kuv yuav tsum muaj kev xyiv fab tam sim no!”
“Es koj ua li cas thaum ntawd?” Eva nug.
“Kuv muab siab rau ntseeg Vajtswv tej lus cog tseg thaum kuv ua tej yam uas muaj nqi nyob hauv kuv lub neej. Kuv tau mus kawm ntawv. Kuv thiaj tau ib txoj hauj lwm uas kuv nyiam.”
Eva xav txog qhov no ib me pliag thiab hais tias, “Tiam sis qhov uas koj muaj hauj lwm ua tsis yog qhov uas ua rau koj zoo siab nev. Muaj ntau tus uas ua hauj lwm es lawv tsis zoo siab hlo.”
“Ua cas koj me es koj yuav txawj ntse ua luaj li?” Niam Tais Rose hais. “Koj hais yog mas. Thiab cov uas muaj hauj lwm ntau thiab tsis zoo siab lawv twb xav tsis txog qhov tseem ceeb tshaj plaws nyob hauv lub ntiaj teb no—qhov uas Yexus hais tias yog lub hauv paus ntawm Nws txoj moo zoo.”
“Qhov ntawd yog dab tsi?” Eva nug.
Rose hais tias, “Yog txoj kev hlub, Khetos txoj kev hlub dawb paug. Koj puas paub hais tias, txhua yam txhua tsav nyob hauv txoj moo zoo—tag nrho tej lus txib uas yuav tau ua thiab yuav tsum ua thiab yuav tsum tsis txhob ua —yeej kom yus hlub lwm tus. Thaum peb hlub Vajtswv, peb xav ua hauj lwm pab Nws. Peb xav rais los ua neeg zoo li Nws. Thaum peb hlub peb cov neeg zej zog, peb tsum tsis txhob xav txog peb tej teeb meem thiab pab lwm tus kho lawv tej teeb meem xwb.”7
“Li ntawd ua rau peb zoo siab los?” Eva nug.
Niam Tais Rose nyo hau thiab luag, nws pib los kua muag. “Yog mas, me ntxhais. Ua li ntawd ua rau peb zoo siab mog.”
Yeej Tsis Zoo Ib Yam Ntxiv
Hnub tom qab ntawd Eva khawm niam tais Rose thiab ua nws tsaug rau ib puas tsav yam nws tau ua. Nws rov qab mus tsev rau nws tsev neeg thiab nws cov phooj ywg thiab nws lub zej zog.
Tiam sis nws yeej tsis zoo ib yam.
Thaum Eva loj hlob tuaj, nws pheej xav txog nws niam tais Rose tej lus. Eva yuav txiv, muaj me nyuam, thiab ua lub neej muaj sia nyob ntev heev.
Thiab muaj ib hnub, thaum nws nyob hauv nws lub tsev saib ib daim duab txog ib tus me nyuam ntxhais pioneer uas dhia ib ruam mus ib ruam taug ib txoj kev xim xiav, nws paub hais tias nws muaj hnub nyoog zoo ib yam li nws tus niam tais Rose puag thaum nws mus xyuas thaum nws tseem yaus.
Thaum nws xav txog qhov no, nws thov Vajtswv twj ywm hauv nws lub siab. Thiab Eva ua Vajtswv tsaug rau nws lub neej, nws tsev neeg, Yexus Khetos txoj moo zoo, thiab rau lub caij ntuj sov ntev los lawm thaum Niam Tais Rose8 qhia nws txog kev cia siab, kev ntseeg, thiab kev hlub.9
Ib txoj Koob Hmoov
Kuv cov muam, cov uas koom nrog kuv ntseeg Khetos, kuv vam thiab cia siab hais tias muaj ib yam dab tsi nyob hauv zaj dab neeg no uas tau tshoov nej lub siab. Kuv paub tias Vajtswv muaj txoj sia nyob thiab Nws hlub nej txhua leej txhua tus.
Thaum nej taug nej txoj kev rais los ua ib tug neeg ntseeg, kuv thov Vajtswv hais tias kev ntseeg yuav txhawb nqa nej txhua lub sij hawm thaum nej taug kev; kev cia siab yuav qhib nej qhov muag kom pom kev yeeb koob uas Leej Txiv Saum Ntuj Ceeb Tsheej tau npaj rau nej; thiab Vajtswv txoj kev hlub rau nej thiab tag nrho Nws cov me nyuam yuav nyob hauv nej lub siab puv npo. Vim kuv yog tus Tswv ib tug Thwj Tim, kuv foom koob hmoov thiab hais lus tim khawv rau nej li no, los ntawm Yexus Khetos lub npe, amees.