Stap Wan Eksampol mo Wan Laet

Ol brata mo sista, hem i gud blong stap wetem yu bakegen. Olsem we yufala i save, stat long taem we yumi bin stap tugeta long Epril, yumi bin harem nogud long ded blong trifala Aposol we yumi lavem tumas- Presiden Boed K. Peka, Elda L. Tom Peri, mo Elda Rijad G. Skot. Oli gobak long hom long heven. Yumi misim olgeta. Yumi talem tangkyu from eksampol blong olgeta we i soem lav olsem hemia blong Kraes, mo from ol tijing blong insperesen we oli livim i stap blong yumi evriwan.

Yumi welkamem tu ol niufala Aposol blong yumi, Elda Ronal A. Rasban, Elda Geri E. Stivenson, mo Elda Del G. Renlan. Ol man ia oli bin putum tingting mo taem blong olgeta long wok blong Lod. Oli kwalifae gud blong fulumap impoten posisen we God i singaotem olgeta long hem.

I no longtaem, taem mi stap ridim mo tingting hevi long ol skripja, tu ves ia i bin stap long tingting blong mi. Yumi save gud long tufala ia. Faswan i kamaot long Toktok Antap long Hil: “Yufala i mas letem laet ia i saenaot i kasem ol man, blong oli save luk ol gudfala wok we yufala i stap mekem, nao bae oli leftemap nem blong Papa we i stap long heven.”¹ Nambatu skripja i wan we i kam long maen blong mi taem mi bin stap tingting hevi long mining blong fas skripja. I kam long leta blong Pol i go long Timoti: Stap wan eksampol long ol Kristin man tru long toktok, storian, jareti, spirit, fet mo klin fasin.”²

Mi biliv se nambatu skripja i eksplenem bigwan olsem wanem yumi save mekem faswan. Yumi kam ol eksampol blong ol Kristin man taem yumi laef folem gospel blong Jisas Kraes, tru long toktok, storian, jareti, spirit, fet mo klin fasin. Taem yumi mekem olsem, laet blong yumi i saen blong ol narawan oli luk.

Wanwan long yumi i kam long wol ia wetem Laet blong Kraes. Taem yumi folem eksampol blong Sevya mo laef olsem we Hem i bin laef mo tijim, laet ia bae i laet insaed long yumi mo bae i saenem rod blong ol narawan.

Aposol Pol i listim sikis fasin blong wan Kristin man, ol fasin ia we bae i mekem se laet blong yumi i saen. Yumi lukluk long wanwan long olgeta.

Mi tokbaot tufala fas fasin tugeta—stap wan eksampol long toktok mo long storian. Toktok we yumi yusum i save leftemap tingting mo givim insperesen, o oli save mekem man i harem nogud o daonem hem. Long wol tedei, fasin blong swea i kam bigwan, mo yumi faenem long evri kona. Hem i had blong no harem we oli yusum nem blong Hae God long fasin we i no stret mo olsem samting nating. Ol raf toktok oli kam olsem stamba blong televisen, buk mo miusik. Oli sakem ol toktok we i no stret mo ol rabis toktok blong kros. Yumi mas toktok long narawan wetem lav mo respek, mo kipim oltaem lanwis blong yumi i klin, mo no talem ol toktok o tingting we bae i mekem man i harem nogud. Bae yumi folem eksampol blong Sevya, we i toktok wetem tingting long man, mo fasin we i kaen long taem blong seves blong Hem.

Nekis fasin we Pol i tokbaot i jareti, we oli talem se i klin lav blong Kraes.”³ Mi trastem se raon long yumi, i gat olgeta we oli stap olgetawan, we oli sik, mo tingting i kam slak. Janis i blong yumi, blong helpem olgeta mo leftemap spirit blong olgeta. Sevya i tekem hop i go long olgeta we oli nomo gat hop, mo paoa long olgeta we oli slak. Hem i hilim ol sikman; Hem i mekem man i wokbaot bakegen, ol blaen man oli luk bakegen, mo hilim sora we i fas. Mo tu, i mekem man i laef bakegen long ded. Long taem blong seves blong hem, Hem i stretem han blong Hem wetem jareti long eniwan long nid. Taem yumi mekem folem eksampol blong Hem, bae yumi blesem ol laef, mo laef blong yumi tu.

Nekiswan, yumi mas stap wan eksampol long saed blong spirit. Long mi, i minim se yumi traehad blong mas gat, long laef blong yumi, fasin we i kaen, talem tangkyu, fogivnes, mo gud hat. Ol kwaliti ia i givim wan spirit we bae i tajem laef blong olgeta raon long yumi. I bin janis blong mi, long ol pas yia, blong wok wetem fulap man o woman we oli gat kaen spirit ia. Mifala i bin kasem wan spesel filing taem mifala i bin stap wetem olgeta, wan filing we i mekem yumi wantem joen wetem olgeta mo folem eksampol blong olgeta. Laet blong Kraes i saenaot long olgeta mo i helpem mifala blong filim lav we Hem i gat long mifala.

Blong soem se ol narawan oli luksave laet we i kam long wan spirit we i gat klin lav mo spirit blong lav, bae mi serem wan eksperiens we i hapen plante yia i pas.

Long tetaem ia, ol lida blong Jos oli mitim ol man blong gavman long Jerusalem blong stretem lis blong graon we Jerusalem Senta blong Jos bae i stanap long hem. Blong kasem ol raet we Jos i nidim, Jos i mas agri se ol memba bae oli no mekem misinari wok long ples blong senta ia. Afta we oli agri long hemia, wan long ol man blong gavman blong Isrel, we i savegud Jos mo ol memba blong Jos, i talem se Jos bae i folem agrimen ia blong no mekem misinari wok. Nao i tokbaot ol studen we oli stadi long ples ia, i talem: “?be bae yumi mekem olsem wanem long laet we i stap long ae blong ol studen ia?”⁴ Mi prea se spesel laet ia bae i saen oltaem insaed long yumi, blong man i luksave mo i laekem.

Blong stap wan eksampol blong fet, i minim se yumi trastem Lod mo toktok blong Hem. I minim se yumi gat, mo yumi fidim ol bilif we bae i lidim ol tingting mo ol aksen blong yumi. Fet blong yumi long Lod Jisas Kraes mo long Papa long Heven bae i lidim evri samting we yumi mekem. Long medel blong miks tingting long taem blong yumi, ol faet blong tingting blong yumi, trabol blong evri dei laef, blong obei long fet, i kam olsem wan angka long laef blong yumi. Tingbaot se fet mo tu tingting i no save stap long semfala maen long semtaem, from wan bae i ronemaot narawan. Mi talem bakegen wanem we mi bin talem fulap taem—blong yumi save kasem mo kipim fet we yumi nidim, i nid blong yumi ridim, mo stadi, mo tingting hevi long ol skripja. I nid blong toktok wetem Papa blong yumi long Heven tru long prea. Yumi no save sarem ae long olgeta samting ia from enemi mo ol pipol blong hem oli no stop blong lukaotem smol hol long klos blong faet blong yumi, wan slak taem long fasin blong stap fetful. Lod i talem se: “Lukaot strong wetem strong tingting, prea oltaem, mo stap biliv, mo evri samting bambae oli wok tugeta blong gud blong yufala, sapos yufala i wokbaot long stret laef mo tingbaot kavenan we yufala i bin mekem wetem wanwan long yufala bakegen.”⁵

Laswan, yumi mas klin gud, we i minim se yumi klin long bodi, maen mo spirit. Yumi save se bodi blong yumi i wan tempol, we yumi tritim wetem wosip mo respek. Maen blong yumi i fulap long tingting we i leftemap tingting mo i gud tumas, mo i no gat ol samting ia we i mekem tingting i doti. Blong save gat Tabu Spirit olsem kompanion oltaem, yumi mas klin inaf. Ol brata mo sista. Blong stap klin gud i tekem pis long maen, mo i mekem yumi kwalifae blong kasem ol promes blong Sevya. Hem i talem: “Olgeta we tingting blong olgeta i klin gud, oli save harem gud from we bambae oli save luk God.”⁶

Taem yumi pruvum se yumi ol eksampol blong ol Kristin man tru long toktok, storian, jareti, spirit, fet, mi klin fasin bae yumi kwalifae blong stap ol laet long wol.

Bae mi talem long yufala evriwan, mo speseli long yufala ol yang pipol, se taem wol ia i muv i go longwe mo longwe moa long ol prinsipol mo gaedlaen we Papa long Heven i givim long yumi, bae yumi stanap we yumi defren long bigfala grup we i stap from se bae yumi defren. Bae yumi stanap we yumi defren from yumi dresap gud. Bae yumi defren from se yumi no spolem nem blong God, mo from se yumi no tekem ol samting ia we oli spolem bodi blong yumi. Bae yumi defren from se yumi no talem ol fani toktok we i no stret mo no sakem ol toktok blong daonem man. Bae yumi defren taem yumi disaed blong no fulumap maen blong yumi wetem ol joes blong media we oli nogud mo stap spolem man, mo bae i tekemaot spirit long hom mo laef blong yumi. Bae yumi stanap we yumi defren taem yumi mekem ol joes long saed blong fasin we i klin mo stret—ol joes we i folem ol gospel prinsipol mo standet. Olgeta samting ia we oli mekem yumi defren long wol i givim tu laet ia mo spirit ia we bae i saen long wan wol we i stap kam fulap long tudak.

Plante taem i had blong stap defren mo stanap yuwan long medel blong grup. I fasin blong man blong fraet long wanem narawan bae i tingting o talem. Toktok long Ol Sam i mekem hat i kwaet, i talem: “[Lod i laet blong mi mo i sevem mi; ?bae mi fraet long hu? Lod i paoa long laef blong mi; ?Bae mi fraet long hu?”⁷ Taem yumi mekem Kraes i stap long medel blong laef blong yumi, fraet blong yumi bae i lus mo strong paoa blong ol tingting blong yumi i stap.]”

I no gat wan we laef i stret gud, mo samtaem, jalenj mo hadtaem i bigwan tumas, i mekem laet blong yumi i godaon. Be, wetem help we i kam long Papa long Heven, wetem sapot blong ol nara man, yumi save mekem laet i saen moa, mo i saenem rod blong yumi bakegen mo givim laet long ol narawan we oli nidim.

Blong soem eksampol, mi serem wetem yufala ol toktok blong wan poem mi laekem we mi ridim plante yia i pas:

Ol brata mo sista blong mi. Ol janis blong yumi oli raonem yumi evri dei, long wanem situesen we yumi stap long hem. Taem yumi folem eksampol blong Sevya, bae i janis blong yumi blong stap wan laet long laef blong ol narawan, we oli ol famle blong yumi, ol fren, ol fren blong wok, ol man we yumi save olgeta, o ol strenja.

Long wanwan long yufala, mi talem se yu wan boe o gel blong Papa long Heven. Yu kamaot long ples blong Hem blong laef long wol ia blong smol taem, blong soemaot lav mo tijing blong Sevya mo blong stap strong blong saenem laet blong evriwan i luk. Taem we taem ia i finis, sapos yu bin mekem pat blong yu, bae yu kasem bigfala blesing blong gobak stap wetem Hem blong oltaem.

Ol toktok blong Sevya i gud tumas: “Mi nao mi laet blong wol; hem we i folem mi bae i no wokbaot long tudak, be i kasem laet blong laef.”⁹ Mi testifae abaot Hem. Hem i Sevya mo Ridima blong yumi, i loya blong yumi long fored blong Papa. Hem i Eksampol, mo paoa blong yumi. Hem i “laet ia we i saen long tudak.”¹⁰ Mi prea se evriwan long yumi we i stap harem voes blong mi, i mekem promes blong folem Hem, mo kam wan laet we i saen long wol, hemia i prea blong mi long tabu nem blong Jisas Kraes. Amen.