Mo iVakaraitaki ka Dua na Rarama

Kemuni na taciqu kei na ganequ, sa dua na ka talei na mai duavata tale kei kemuni. Me vaka ko ni sa kila tiko, ena noda a duavata tiko ena Epereli, eda rarawataka na nodratou sa mai takali e tolu na noda iApositolo lomani: o Peresitedi Boyd K. Packer, Elder L. Tom Perry, kei Elder Richard G. Scott. Eratou sa lesu tale ki na nodratou itikotiko vakalomalagi. Eda nanumi iratou. Eda vakavinavinakataka vakalevu na nodratou ivakaraitaki ni loloma Vakarisito kei na ivakavuvuli vakauqeti eratou sa biuta koto mai vei keda kece.

Eda kidavaki iratou kina ena yalomarau na noda iApositolo vovou duadua, o Elder Ronald A. Rasband, Elder Gary E. Stevenson, kei Elder Dale G. Renlund. O iratou oqo na turaga yalodina ki na cakacaka ni Turaga. Sa ganiti iratou me ratou mai tawana na itutu bibi eratou sa mai kacivi kina.

Ena dua na gauna ga oqo, niu wilika ka vakasamataka vakatitobu na ivolanikalou, e rua na malanivosa au nanuma vinaka tiko. Erau kilai vakavinaka ruarua vei keda. Na imatai mai na iVunau ena Ulunivanua: “Me caudre vakakina na nomudou rarama e matadra na tamata, me ra raica na nomudou ivalavala vinaka ka vakarokorokotaka na Tamamudou sa tiko mai lomalagi.”¹ Na ikarua ni ivolanikalou a votu mai noqu vakasama niu vakasamataka tiko na ibalebale ni imatai. E tiko ena nona ivola na iApositolo o Paula vei Timoci: “Mo yaco mo nodra ivakarau era sa vakabauta, ena vosa, ena ivalavala, ena loloma, ena lomadina, ena yalosavasava.”²

Au vakabauta na ikarua ni ivolanikalou e vakamacalataka, vakalevu, na ivakarau e rawa ni da vakataucokotaka kina na imatai. Sa yaco me da nodra ivakarau na vakabauta ena noda bulataka na kosipeli i Jisu Karisito ena vosa, ena ivalavala, ena loloma, ena lomadina, kei na yalosavasava. Ni da sa cakava oqo, ena caudre yani na noda rarama me ra raica na tani.

O keda yadua eda lako mai ki vuravura ni sa soli mai vei keda na Rarama i Karisito. Ni da muria na nona ivakaraitaki na iVakabula ka bula me vaka na Nona bula kei na Nona ivakavuvuli, ena caudre e lomada na rarama oqori ka vakararamataka na sala vei ira na tani.

E vola na iApositolo o Paula e ono na itovo ni bula ni dua na tamata vakabauta, na itovonibula ka na rawa kina ni serau yani na noda rarama. Me da raica yadudua mada.

Au na cavuta vata na imatai ni rua na itovonibula—me ivakarau ena vosa kei na ivalavala. Na vosa eda vakayagataka e rawa ni veilaveti ka veivakauqeti, se e rawa ni veivakamavoataki ka veivakalailaitaki. Sa sinai tu ko vuravura nikua ena vosaca ka voleka ni wavokiti keda ena veivanua kecega. E dredre me da levea noda rogoca na kena vakayagataki vakasabalia ka vakawaleni na yaca ni Kalou. Na vosa kaukauwa e tiki tudei ni retioyaloyalo, iyaloyalo yavala, ivola, kei na ivakatagi. Sa rawarawa wale tu na kena cavuti na vosa e veivakacudrui kei na vosa karakara. Me da dau veivosaki ena loloma kei na vakarokoroko, me savasava tikoga noda ivosavosa ka levei na vosa se malanivosa ena veivakamavoataki se veivakacudrui. Me da muria nona ivakaraitaki na iVakabula, ka dau vosa ena veinanumi kei na yalovinaka ena Nona gauna taucoko ni veiqaravi.

Na itovonibula tarava e cavuta o Paula, na loloma cecere, sa vakamacalataki ni loloma savasava i Karisito.”³ Au vakabauta deivaki ni ra tu wavoliti keda ena vanua eda veiqaravi kina o ira era galili, o ira na tauvimate, kei ira era yalolailai. E noda na madigi me ra vukei ka laveti na yalodra. Na iVakabula e kauta mai na inuinui vei ira sa sega na nodra inuinui kei na kaukauwa vei ira na malumalumu. E vakabulai ira na tauvimate; e vakavuna me ra lako na gera, rai na mataboko, ka rogo na didivara. E vakaturi ira cake mada ga na sa mate me ra bula. Ena Nona gauna taucoko ni veiqaravi e dolele yani ena loloma cecere vei ira kece era gadreva tu. Ni da vakatotomuria na Nona ivakaraitaki, eda na vakalougatataka na bula, oka kina na noda.

Tarava, me da na ivakaraitaki ena lomadina. Vei au oya na kena ibalebale me da segata me tu ena noda bula na yalovinaka, na vakavinavinaka, na veivosoti, kei na vakanuinui vinaka. Na itovonibula vinaka oqo ena vakarautaka vei keda e dua na yalo ena tara na nodra bula o ira era tuwavoliti keda. Sa noqu madigi ena veiyabaki sa sivi meu veimaliwai kei na vuqa ka tu vei ira na mataqali yalo vaqo. Eda vakila e dua na yalo digitaki ni da tiko vata kei ira, na yalo e vinakata me da veimaliwai kei ira ka muria na nodra ivakaraitaki. Era vakacilava mai na Rarama i Karisito ka vukea noda vakila na Nona loloma vei keda.

Me vakaraitaka ni ra dau vakila na tani na rarama e cila mai na yalo e savasava ka dauloloma, au na wasea vei kemuni e dua na ka au sotava ena vuqa na yabaki sa oti.

Ena gauna oya, era a dabe tiko na iliuliu ni Lotu kei ira na vakailesilesi mai Jerusalemi me ra cakacakataka e dua na veidinadinati ni lisi me baleta na qele me na tara kina na Jerusalem Centre ni Lotu. Me rawati na veivakadonui e gadrevi, me na vakadonuya na Lotu me kua ni dua na kaulotu i veivale era cakava na noda lewenilotu era na tiko ena vale oqo. Ni sa caka oti na veidinadinati, a kaya e dua na vakailesilesi vakamatanitu ni Isireli, ka kila vakavinaka na Lotu kei ira na lewena, ni kila ni na rokovi na veidinadinati me kua na kaulotu i veivale. “Ia,” a kaya o koya, ni nanumi ira tiko na gonevuli era na vuli kina, “na cava eda na cakava me baleta na rarama e tu e matadra?”⁴ Me cila tikoga e lomada na rarama digitaki oya, me rawa ni ra kila ka vakavinavinakataka o ira tale eso.

Me da ivakaraitaki ni vakabauta e kena ibalebale me da vakabauta na Turaga kei na Nona vosa. E kena ibalebale me da taura ka da vakamareqeta na vakabauta ena tubera na noda vakanananu kei na noda cakacaka. Na noda vakabauta na Turaga o Jisu Karisito kei na Tamada Vakalomalagi ena vakauqeta na veika eda na cakava. Ena loma ni veilecayaki ni noda gauna, na duidui ni vakasama, kei na veilecayaki ni bula e veisiga, ena yaco me iyaqa ki na noda bula na vakabauta e veivauci. Nanuma tiko e sega ni rawa ni tu ena dua na vakasama ena dua vata ga na gauna na vakabauta kei na vakatitiqa, baleta o koya kadua ena vakatala na kena ikarua. Au na tokaruataka ni sa dau tukuni wasoma vei keda—me rawa ni da maroroya tiko na vakabauta eda gadreva, sa yaga me da wilika ka vulica ka vakasamataka vakatitobu na ivolanikalou. Sa ka bibi sara na veitaratara vata kei na Tamada Vakalomalagi ena masu. Ena sega ni rawa ni da vakaweleweletaka na veika oqo, baleta o vunica kei ira na nona ilawalawa era sa segata sara tiko vakaukauwa me da malumalumu, me da guce ena yalodina. E kaya na Turaga, “Dou vakasaqaqara vagumatua ka daumasu tikoga ena vakabauta, ena rawa vakavinaka na veika kece e baleti kemudou.”⁵

Kena iotioti, me da yalosavasava, kena ibalebale ni da sa savasava ena yago, ena vakasama, kei na yalo. Eda kila ni valetabu na yagoda, me vakayagataki ena vakarokoroko kei na veidokai. E dodonu me vakasinaiti na noda vakasama ena vakanananu veilaveti ka vakaturaga ka vagalalataki tiko mai na veika e dau vakadukadukalitaka. Me rawa ni noda itokani tudei na Yalo Tabu, sa dodonu me da kilikili kaya. Kemuni na tacqiu kei na ganequ, na yalosavasava ena kauta mai vei keda na vakacegu ni vakasama ka da na vakadonui kina me noda na yalayala ni iVakabula. E kaya o Koya, “Sa kalougata ko ira sa yalosavasava ni ra na raica na Kalou.”⁶

Ni da sa yaco me nodra ivakarau ena vosa, ena ivalavala, ena loloma, ena lomadina, ena yalosavasava, sa na vakadonui me da rarama ki vuravura.

Meu tukuna mada vei kemuni, vakauasivi vei kemuni na itabagone, ni sa vakayawaki koya tikoga ko vuravura mai na ivakavuvuli kei na idusidusi e solia mai vei keda na Tamada Vakalomalagi dau loloma, eda na kilaitani mai vei ira na lewevuqa baleta ni da duatani. Eda na duatani baleta ni da vakaisulu rakorako. Eda na duatani baleta ni da sega ni dauvosaca ka sega ni dau vakayagataka na veika e ca ki na yagoda. Eda na duatani baleta ni da na lako tani mai na veiwalica kei na vosa veivakalailaitaki. Eda na duatani baleta ni da sa lewa me da kakua ni vakatawana e noda vakasama na iyaloyalo vakasisila ka lolovira, oqori ena kauta tani na Yalotabu mai na noda veivale kei na noda bula. Eda na duatani ni da digidigi ena vuku ni savasava—na digidigi ka salavata kei na ivakavuvuli kei na ivakatagedegede ni kosipeli. Na veika oqori ka vakaduiduitaki keda mai na iwaselevu ni vuravura ena vakarautaka talega vei keda na rarama oya kei na yalo oya ka na serau yani ki na dua na vuravura sa butobuto tikoga mai.

E vakavuqa ni dau dredre me da duatani ka tu duadua ena kedra maliwa na lewevuqa. Sa matau tu me da rerevaka na ka era nanuma se tukuna na tani. E veivakacegui na vosa ni same: “A noqu rarama ka noqu ivakabula ko Jiova; ko cei meu rerevaka? A kaukauwa ni noqu bula ko Jiova; meu taqaya ena vuku i cei?”⁷ Ni da kitaka me itakele ni noda bula na Karisito, ena vakaisosomitaki na noda rere ena yaloqaqa ni noda yalodina.

E sega ni dua vei keda e taucoko tu vua na bula, ka so na gauna ena veivakadrukai beka vei keda na dredre kei na bolebole eda sotava, ka vakavuna me kataremoremo mai na noda rarama. Ia, ena veivuke ni Tamada Vakalomalagi, kei na veitokoni mai vei ira tale eso, eda rawa ni taura tale mai na rarama oqori ka na vakararamataka tale na noda sala ka solia na rarama era na gadreva beka eso.

Meu vakaraitaka, au na wasea vei kemuni na veimalanivosa laulau ni dua na serekali taleitaki au a qai wilika vakadua ena vuqa na yabaki sa oti:

Kemuni na taciqu kei na ganequ, na noda madigi me da serau yani e wavoliti keda e veisiga, ena ituvaki cava ga eda kunei keda kina. Ni da muria na nona ivakaraitaki na iVakabula, ena noda na madigi me da vakacilava na rarama ena nodra bula eso, se noda lewe ga ni matavuvale kei na itokani, ira eda cakacaka vata, noda veikilai ga, se o ira era vulagi sara ga.

Vei kemuni yadua, au kaya, o iko e dua na luvena tagane se luvena yalewa na Tamada Vakalomalagi. O lako mai na Nona iserau mo mai bula e vuravura ena dua na tabagauna, mo vakaraitaka yani na nona loloma kei na ivakavuvuli na iVakabula ka vakacilava na nomu rarama ena yaloqaqa me ra raica na tamata kecega. Ni sa cava na gauna oya e vuravura, kevaka o sa cakava na nomu itavi, ena nomu na veivakalougatataki lagilagi mo lesu tale ka bula vata kei Koya me tawamudu.

E veivakadeitaki na nona vosa na iVakabula: “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula.”⁹ Au vakadinadinataki Koya. O Koya na noda iVakabula ka Dauveisereki, na noda Dautataro vei Tamana. O Koya na noda iVakaraitaki ka noda kaukauwa. Sai Koya na “rarama sa cilava na butobuto.”¹⁰ Me da yalataka o keda yadua eda rogoca tiko na noqu vosa me da muri Koya, ka yaco me rarama serau ki vuravura, sa noqu masu ena Yacana tabu, io ko Jisu Karisito na Turaga, emeni.