2010–2019
Ua ib tug Yam Ntxwv thiab Ib Qho Kaj
October 2015


Ua ib tug Yam Ntxwv thiab Ib Qho Kaj

Thaum peb ua raws li tus Cawm Seej tus yam ntxwv, peb yuav muaj cib fim ua ib qho kaj rau hauv lwm tus lub neej.

Cov kwv tij thiab cov muam, kuv zoo siab los nrog nej nyob dua. Xws li nej paub, txij li peb nyob ua ke thaum lub Plaub Hlis Ntuj los, peb tu siab kawg vim peb xiam peb tug Thwj Tim uas peb hlub:Thawj Tswj Hwm Boyd K. Packer, Txwj Laug L. Tom Perry, thiab Txwj Laug Richard G. Scott. Lawv tau rov mus rau lawv lub tsev saum ntuj ceeb tsheej. Peb nco lawv. Peb muaj kev ris txiaj rau lawv tus yam ntxwv txog Yexus txoj kev hlub thiab rau tej kev qhia uas lawv tau muab rau peb sawv daws.

Peb zoo siab tos txais peb cov Thwj Tim tshiab, Txwj Laug Ronald A. Rasband, Txwj Laug Gary E. Stevenson, thiab Txwj Laug Dale G. Renlund. Cov txiv neej no yeej rau siab ntso ua tus Tswv txoj hauj lwm. Lawv yeej tsim nyog ua tej hauj lwm tseem ceeb uas lawv raug hu los ua no.

Tsis ntev tas los no, thaum kuv nyeem thiab xav txog cov vaj lug kub, muaj ob nqe uas kuv pheej xav txog. Peb yeej paub ob nqes no. Thawj nqe yog los ntawm Zaj Lus Qhia Nyob Pem Roob: “Ib yam li ntawd, nej yuav tsum ci rau sawv daws pom tej hauj lwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceeb tsheej.”1 Nqe thib ob los rau hauv kuv lub paj hlwb thaum kuv tseem xav txog lub ntsiab rau nqe thib ib. Nws yog hauv tus Thwj Tim Pov Lauj Tsab Ntawv rau Timautes: “Yuav tsum ua lub neej rau cov ntseeg xyaum, tsis hais tej lus uas hais, tej hauj lwm uas ua, hlub lwm tus, muab siab rau ntseeg thiab ua neeg zoo.”2

Kuv xav tias nqe thib ob no piav seb, peb yuav ua li cas thiaj ua tau raws li nqe thib ib. Peb ua yam ntxwv rau cov neeg ntseeg xyaum thaum peb ua raws li Yexus Khetos txoj moo zoo hais txog tej lus uas peb hais, tej hauj lwm uas peb ua, hlub lwm tus, muab siab rau ntseeg thiab ua neeg zoo. Thaum peb ua li no, peb qhov kev kaj yuav ci rau lwm tus neeg pom.

Peb txhua tus uas los nyob hauv ntiaj teb yeej muaj Khetos txoj Kev Kaj. Thaum peb ua raws li tus Cawm Seej tus yam ntxwv thiab ua neej ib yam li Nws tau ua thiab Nws tau qhia, qhov kaj ntawd yuav ci tuaj hauv peb nruab siab thiab yuav taw teeb rau lwm tus neeg pom kev.

Tus Thwj Tim Pov Lauj qhia txog rau yam uas ib tug ntseeg muaj, tej yam uas yuav cia peb qhov kaj ci ntsa iab. Cia peb xav txog txhua yam no.

Cia kuv hais txog thawj ob qho ua ke—ua ib tug yam ntxwv txog tej lus uas peb hais thiab tej hauj lwm uas peb ua. Tej lus uas peb hais yuav txhawb nqa thiab pab, los yog tej ntawd ua tau rau neeg raug mob thiab tsim txom luag. Niaj hnub nim no hauv ntiaj teb no muaj neeg coob uas hais lus dev nyob ib puag peb ncig. Nyuaj heev kom tsis txhob hnov luag hais lus dog lus dig thiab tsis zoo hais txog Vajtswv. Yeej hnov tej lus tsis zoo hauv TV, cov yeeb yaj kiab, hauv cov ntawv thiab cov nkauj. Tib neeg pheej hais lus dag thiab chim siab taug xaiv li ub li no. Cia peb muaj kev hlub thiab saib tau lwm tus neeg rau nqi thaum peb hais lus, hais tej lus zoo thiab tsis txhob hais tej lus uas yuav ua rau neeg mob los sis tu siab. Thov kom peb yuav ua raws li tus Cawm Seej tus yam ntxwv, vim nws ua siab ntev thiab siab zoo hauv tag nrho Nws txoj kev qhuab qhia tib neeg.

Lwm yam uas Pov Lauj hais txog yog kev siab hlub, uas txhais tau hais tias “txoj kev hlub dawb paug ntawm Khetos.”3 Kuv paub hais tias muaj cov neeg uas nyob ntawm peb ib ncig uas yeej kho siab, cov uas muaj mob, thiab cov uas tau poob siab. Peb los muaj cib fim pab lawv thiab nplij lawv siab. Tus Cawm Seej tau coj kev cia siab los rau cov uas poob siab thiab ntxiv zog rau cov uas qaug zog. Nws tau kho cov neeg mob; Nws pab cov neeg ceg tawv mus tau kev, cov dig muag kom pom kev, cov neeg lag ntseg kom hnov tau lus. Nws twb tsa cov neeg tuag sawv rov qab los. Hauv nws txoj kev qhuab qhia Nws tau muaj kev siab hlub rau txhua tus uas xav tau. Thaum peb ua raws li Nws tus yam ntxwv, peb yuav foom koob hmoov rau tib neeg, kuj foom koob hmoov rau peb tus kheej thiab.

Qhov tom ntej, peb yuav tsum ua yam ntxwv ntawm sab ntsuj plig. Rau kuv mas qhov no txhais tau hais tias peb yuav tsum ua siab zoo, muaj kev ris txiaj, zam txim, thiab ua zoo rau lwm tus. Tej cwj pwm no yuav ua rau peb tus ntsuj plig muaj hwj chim pab tau cov neeg uas nyob ntawm peb ib ncig. Kuv muaj hmoov vim ntau xyoo no kuv tau nrog neeg coob uas muaj tus ntsuj plig li no sib raug zoo. Peb hnov tau ib txoj kev xav tshwj xeeb thaum peb nrog lawv nyob ua ke, ib txoj kev xav kom peb yuav nrog lawv sib raug zoo thiab xav ua raws li lawv tus yam ntxwv. Lawv muaj Khetos txoj Kev Kaj thiab pab peb hnov tau Nws txoj kev hlub rau peb.

Vim xav qhia tias lwm tus neeg yeej pom tau qhov kaj uas los ntawm ib tug ntsuj plig uas muaj kev hlub, kuv xav qhia nej txog ib zaj uas kawj los ntau xyoo tas los lawm.

Lub sij hawm ntawd, cov thawj coj hauv lub Koom Txoos tau mus ntsib cov nom tswv hauv Yeluxalees kom sib yeem lus hais txog kev xaub ib thaj av rau lub Koom Txoos ua ib qho chaw kawm ntawv hauv Yeluxalees. Kom thiaj tau daim ntawv tso cai, lub Koom Txoos tau yeem lus hais tias peb cov mej zeej uas nyob hauv qhov chaw ntawd yuav tsum tsis txhob sim tshaj tawm txoj moo zoo. Tom qab sib yeem lus li no lawm, haiv neeg Ixayees ib tug nom tswv, uas paub lub Koom Txoos thiab ib co mej zeej zoo, hais tias nws yeej paub tias lub Koom Txoos yuav ua raws li txoj kev sib yeem lus kom txhob tshaj tawm txoj moo zoo. “Tiam sis,” nws hais txog cov tub kawm ntawv uas yuav los nyob ntawd hais tias, “peb yuav ua li cas rau qhov uas ci ci ntawm lawv lub qhov muag li?”4 Thov kom qhov kaj ntawd yuav ci ntsa iab ntawm peb tsis tu tsis tseg, xws kom lwm tus neeg yuav pom tau.

Ua ib tug yam ntxwv txog kev ntseeg txhais tau tias peb tso siab rau tus Tswv thiab Nws txoj lus. Nws txhais tau tias peb yeej muaj thiab ua tib zoo tu tej kev ntseeg uas coj peb tej kev xav thiab tej yam uas peb ua. Peb txoj kev ntseeg tus Tswv Yexus Khetos thiab peb Leej Txiv Saum Ntuj Ceeb Tsheej yuav coj kav txhua yam uas peb ua. Nyob ntawm tej kev kub ntxhov hauv peb lub caij nyoog, tej kev tsis sib haum xeeb hauv peb lub paj hlwb, thiab tej kev ntxhov siab hauv peb lub neej, txoj kev ntseeg yog qhov uas ua rau peb nyob ruaj nrees. Nco qab hais tias kev ntseeg thiab kev ua xyem xyav nyob tsis tau tib txhij hauv ib lub paj hlwb, rau qhov ib yam yeej yuav ua rau lwm yam ntawd ploj mus. Kuv rov qab qhia qhov uas peb twb hnov ntau zaus lawm hais tias—yog peb yuav tau thiab ceev txoj kev ntseeg uas peb xav tau, ces peb yuav tsum nyeem thiab kawm thiab xav txog cov vaj lug kub. Txoj kev nrog peb Leej Txiv Saum Ntuj Ceeb Tsheej sib txuas lus thaum thov Vajtswv yeej tseem ceeb heev. Peb muab tej ntawd xyeej pov tseg tsis tau, vim tus yeeb ncuab thiab nws cov dab pheej ntaus peb tej ris tsho ua rog tsis tu tsis tseg, lawv nrhiav kom tau peb txoj tsis ntseeg. Tus Tswv hais kom peb mob siab nrhiav, thov Vajtswv tas mus li, thiab cia li ntseeg, ces txhua yam yuav ua hauj lwm ua ke kom zoo rau peb.5

Qhov kawg, peb yuav tsum ua neeg zoo, uas txhais tau hais tias peb lub cev, sab paj hlwb, thiab tus ntsuj plig yuav tsum huv huv. Peb los paub hais tias peb lub cev yog ib lub tuam tsev, yuav tsum ua tib zoo hwm thiab saib nws rau nqi. Yuav tsum muab tej kev xav zoo thiab cov tswv yim zoo tso rau hauv peb lub paj hlwb tsis txhob xav txog tej yam kev phem kev qias. Xwv kom tus Vaj Ntsuj Plig Dawb Huv yuav pheej ua peb tus khub ces, peb yuav tsum ua neeg txim txiaj. Cov kwv tij thiab cov muam, kev huv huv yuav coj kev kaj siab lug los thiab yuav ua rau peb tsim nyog tau tej yam uas tus Cawm Seej tau cog lus tseg. Nws hais tias, “Cov uas muaj lub siab ncaj ncees, cov ntawd tau koob hmoov; lawv yuav pom Vajtswv.”6

Thaum peb qhia tias peb yog cov yam ntxwv hais txog tej lus uas peb hais, tej hauj lwm uas peb ua, hlub lwm tus, muab siab rau ntseeg thiab ua neeg zoo, peb thiaj yuav tsim nyog ua qhov kaj rau lub ntiaj teb tau pom kev.

Kuv xav hais rau nej sawv daws, qhov tseem ceeb yog rau nej cov neeg hluas tias, thaum lub ntiaj teb haj yam khiav deb ntawm tej ntsiab cai thiab kev coj qhia uas peb Leej Txiv Saum Ntuj Ceeb Tsheej muab rau peb lawm, lwm tus neeg yuav pom tau peb hauv ib pab neeg coob coob vim peb yeej ua txawv. Peb yuav txawv vim hais tias peb hnav tej khaub ncaws uas npog lub cev. Peb yuav txawv vim peb tsis hais lus dev thiab peb tsis noj tsis haus tej yam uas phem rau peb lub cev. Peb yuav txawv vim peb tsis hais tej lus qias thiab cov lus uas thuam lwm tus neeg. Peb yuav txawv thaum peb txiav txim kom txhob saib tej yam phem thiab qias hauv TV thiab cov duab uas yuav tshem tus ntsuj plig tawm ntawm peb lub tsev thiab peb lub neej. Peb yeej yuav txawv txav thaum peb xaiv los ua tej yam tsim txiaj—xaiv los ua raws li txoj moo zoo tej ntsiab cai thiab kev cai. Tej yam uas ua rau peb txawv txav ntawm lub ntiaj teb kuj muab qhov kaj rau peb thiab tus ntsuj plig ntawd yuav ci ntsa iab rau ib lub ntiaj teb uas tsuas haj yam tsaus ntuj tuaj xwb.

Feem ntau mas nyuaj nyuaj kom ua neeg txawv txav thiab ua rau lwm tus pom tau yus hauv ib pab neeg coob coob. Peb ib txwm ntshai tsam luag tej xav tsis zoo txog peb. Kuv nyiam cov lus hauv Phau Ntawv Nkauj hais tias: “Tus Tswv yog lub teeb rau kuv pom kev thiab yog kuv tus cawm seej; yog li ntawd kuv yuav ntshai leej twg? tus Tswv tsom kwm kuv, kuv thiaj tsis raug kev puas tsuaj kuv yuav tsis ntshai dab tsi li?”7 Thaum peb tso Yexus nruab plawv peb lub neej, txoj kev ua siab loj ua raws li peb txoj kev ntseeg yuav los pauv txoj kev ntshai chaw.

Lub neej no tsis zoo tag nrho rau leej twg li, thiab tej thaum tej kev cov nyom thiab tej teeb meem uas peb muaj yuav kov yeej peb, es ua rau peb qhov kaj tsaus me ntsis. Tiam sis, yog tias tau kev pab los ntawm peb Leej Txiv Saum Ntuj Ceeb Tsheej, nrog rau lwm tus neeg txoj kev pab, peb yuav rov qab muaj qhov kaj uas yuav pab peb pom kev dua thiab yuav ci ntsa iab rau lwm tus neeg pom kev thiab.

Kom qhia tau ntxiv txog qhov no kuv xav nyeem ib co lus uas kuv nyiam hauv ib zaj paj huam uas kuv tau nyeem ntau xyoo tas los lawm hais tias:

Kuv ntsib ib tug neeg qhuas thaum yav tsaus ntuj

Uas lub teeb twb tuag tas.

Kuv nres thiab cia nws taw

Nws lub teeb los ntawm kuv li.

Txawm muaj cua dab cua dub

Uas ua rau lub ntiaj teb tshee hnyo,

Ces thaum cua tu lawm

Kuv lub teeb tuag lawm!

Tiam sis tus neeg qhuas txawm rov qab los—

Nws lub teeb ci ntsa iab!

Nws tuav rawv lub teeb uas ci lawm lug

Thiab cev los taw kuv lub teeb thiab!8

Kuv cov kwv tij thiab cov muam, txhua txhia hnub peb muaj cib fim ci ntsa iab, tab txawm peb nyob qhov twg los xij. Thaum peb ua raws li tus Cawm Seej tus yam ntxwv, peb yuav muaj cib fim ua ib lub teeb rau cov neeg nyob ze peb, txawm yog lawv nyob hauv peb tsev neeg thiab cov phooj ywg, cov neeg ua hauj lwm nrog peb, cov neeg uas peb tsis paub zoo, los sis cov neeg qhuas los xij.

Rau nej sawv daws kuv qhia nej tias nej yog peb Leej Txiv Saum Ntuj Ceeb Tsheej ib tug tub los sis ntxhais. Nej tawm ntawm Nws xub ntiag los nyob hauv lub ntiaj teb no rau ib lub caij, kom los coj yam ntxwv txog tus Cawm Seej txoj kev hlub thiab tej lus qhia thiab kom nej yuav ua siab loj ci ntsa iab rau txhua tus neeg tau pom kev. Thaum lub caij hauv ntiaj teb no tiav tas, yog tias nej tau ua nej txoj hauj lwm, nej yuav muaj hmoov rov qab mus nrog Nws nyob tas mus ib txhis.

Tus Cawm Seej nplij peb siab hais tias: “Kuv yog qhov kaj rau neeg ntiaj teb. Tus uas raws kuv qab yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig.”9 Kuv hais lus tim khawv txog Nws. Nws yog peb tus Cawm Seej thiab tus Txhiv Dim, tus uas Sawv Cev nrog Leej Txiv rau peb. Nws yog peb tus yam ntxwv thiab peb lub zog. Nws yog “qhov kaj uas ci hauv kev tsaus ntuj.”10 Thov kom txhua tus uas hnov tau kuv lub suab yuav cog lus tseg hais tias yuav raws Nws qab, es thiaj rais los mus ua ib qho kaj rau lub ntiaj teb, kuv thov kom muaj li no hauv Nws lub npe dawb hav, tus uas yog tus Tswv Yexus Khetos, amees.