Sea un Ehèmpel i un Lus

Rumannan, esta bon ta pa ta huntu ku boso un biaha mas. Manera boso sa, for di aprel ku nos tabata huntu, nos a wòrdu entristesé dor di e pèrdida di tres di nos Apòstelnan stimá----Presidente Boyd K. Packer, Elder L. Tom Perry, i Elder Richard G. Scott. Nan a regresá na nan hogar selestial. Nos ta sinti nan falta. Nos ta masha agradesido pa nan ehèmpel di amor manera di Cristu i pa enseñansanan inspiradó ku nan a laga na nos tur.

Nos ta ekstendé un kaluroso bonbiní na nos Apòstelnan nobo, Elder Ronald A. Rasband, Elder Gary E. Stevenson y Elder Dale G. Renlund. Esakinan ta hòmbernan dediká na e obra di Señor. Nan ta bon kualifiká pa yena e posishonnan importante pa kua nan a wòrdu yamá.

Resientemente, segun mi tabata lesa i meditá riba e skrituranan, dos pasashi en partikular a keda ku mi. Tur dos ta familiar pa nos. Esun di promé ta di e Sermon riba e Seru: “Laga boso lus bria pa otro hende, pa nan mira boso bon obranan, i alabá boso Tata ku ta den shelu.”¹ E di dos skritura ta un ku a bini na mi mente ora mi tabata meditá riba e nifikashon di esun di promé. E ta di e Epístola di Apòstel Pablo na Timoteo: “Sea un ehèmpel pa e kreyentenan, den palabra, den kombersashon, den karidat, den spiritu, den fe i den puresa.”²

Mi ta kere ku e di dos skritura ta splika, den gran parti, kon nos por logra esun di promé. Nos ta bira ehèmpelnan di e kreyentenan dor di biba e evangelio di JesuCristu den palabra, den kombersashon, den karidat, den spiritu, den fe i den puresa. Ora nos hasi asina, nos lus lo bria pa otronan por mira.

Kada un di nos a bini na tera a risibí e Lus di Cristu. Segun nos sigui e ehèmpel di e Salbador i biba manera E a biba i manera E a siña, e lus ei lo kima den nos i lo lusá e kaminda pa otronan.

E Apòstel Pablo ta nombra seis atributo di un kreyente, kual lo pèrmití nos lus pa bria. Laga nos wak kada un di nan.

Mi ta menshoná e promé dos atributonan huntu---siendo un ehèmpel den palabra i kombersashon. E palabranan ku nos ta usa por elevá i inspirá, òf hasi daño i degradá. Awendia tin den e mundu un ekseso di profanidat ku ta parse di ta rondoná nos unda ku nos ta. Ta difísil pa evitá di tende e nòmbernan di Deidat wòrdu usá kasualmente i sin pensa. Komentarionan vulgar ta parse di ta bira un parti normal di televishon, pelíkulanan, bukinan, i músika. Hopi na moda ta deklarashonnan ku ta kalumniá i retórika rabiá. Laga nos papia na otronan ku amor i rèspèt, teniendo nos lenguahe limpi i evitá palabranan i komentario ku por heridá òf ofendé. Laga nos sigui e ehèmpel di nos Salbador, Kende a papia ku toleransia i amabilidat durante Su ministerio.

E siguiente atributo menshoná pa Pablo ta karidat, ku a wòrdu definí komo “e amor puru di Cristu.”³ Mi tin konfiansa ku den nos esfera di influensia tin esnan ku ta sinti soledat, esnan ku ta malu, i esnan ku ta sinti [nan mes] desanimá. Ta nos oportunidat pa yuda nan i pa elevá nan spiritu. E Salbador a trese speransa pa esnan sin speransa i forsa pa yuda esnan suak. El a kura esnan malu; a laga e lam kana atrobe, e siegu pa mira, e surdu pa tende. El a hasta lanta e morto na bida. Durante di Su ministerio El a saka man den karidat na kualke den nesesidat. Ora nos ta sigui Su ehèmpel, nos lo bendishoná bidanan, inkluso di nos mes.

Siguiente, nos mester ta ehèmpel den spiritu. Pa mi esei ta nifiká ku nos ta purba pa den nos bida nos tin bondat, gratitut, pordonamentu, i bon boluntat. E kualidatnan aki lo duna nos un spiritu ku lo toka e bidanan di esnan rònt di nos. Tabata un oportunidat pa mi durante di e añanan pa asosiá ku inkontabel hende ku ta poseé tal spiritu. Nos ta eksperensiá un sentimentu spesial ora nos ta huntu ku nan, un sentimentu ku ta duna nos e deseo pa asosiá ku nan i pa sigui nan ehèmpel. Nan ta radia e Lus di Cristu i ta yuda nos sinti Su amor pa nos.

Pa ilustrá ku e lus ku ta bini for di un spiritu puru i amoroso ta rekonosé pa otronan, mi ta kompartí ku boso un eksperensia di hopi aña pasá.

Den e tempu ei, lidernan di Iglesia a reuní ku outoridatnan na Yerusalèm pa traha un akuerdo di hür pa un tereno riba kua Iglesia su Sentro na Yerusalèm lo wòrdu konstruí. Pa por optené e pèrmitnan nesesario, Iglesia mester a bai di akuerdo ku lo no bai tin proselitismo dor di e miembronan ku lo okupá e sentro. Despues ku e akuerdo a wòrdu hasí, un di e outoridatnan Israelita, ku tabata hopi konosí ku Iglesia i su miembronan, a remarká ku e sa ku e Iglesia lo honra e akuerdo pa no hasi proselitismo. “Pero,” el a bisa, referiendo na e studiantenan ku lo bai ayanan, “kiko nos lo hasi tokante e lus ku ta den nan wowonan?”⁴ Laga e lus spesial ei bria semper den nos, ku e por wòrdu rekonosé i apresiá pa otronan.

Pa ta un ehèmpel di fe ta nifiká ku nos ta konfia den Señor i Su palabra. Ku nos ta poseé i ta kuida e kreensianan ku lo guia nos pensamentunan i akshonnan. Nos fe den Señor JesuCristu i nos Tata Selestial lo influensiá tur lokual nos hasi. Mei mei di e konfushon di nos tempu, e konfliktonan di konsenshi, i e disturbio di bida diario, un fe duradero ta bira un anker pa nos bida. Kòrda ku fe i duda no por eksistí den mes un mente na mes momentu, pasó un lo koré ku e otro. Mi ta reiterá ku a wòrdu bisa repetidamente---ku pa por haña i manten’é fe ku nos mester, ta esensial pa nos lesa i studia i meditá e skrituranan. Komunikashon ku nos Tata Selestial pa medio di orashon ta vital. Nos no por pèrmití pa neglishá e kosnan aki, pasó e atversario i su ehérsito ta buska sin kansa pa un debilidat den nos armadura, un dekadensia den nos fieldat. Señor a bisa, ku nos mester “buska ku diligensia, hasi orashon semper, i sea kreyente, i tur kos lo ta pa boso benefisio.”⁵

Por último, nos mester ta puru, ku kermen ku nos ta limpi den kurpa, mente, i spiritu. Nos sa ku nos kurpa ta un tèmpel, ku mester wòrdu tratá ku reverensia i rèspèt. Nos mente mester ta yená ku pensamentunan konstruktivo, i noble i liber di e kosnan ku lo polushon’é. Pa por tin e Spiritu Santu komo un kompañero konstante, nos mester ta digno. Rumannan, puresa lo trese nos pas mental i lo kualifiká nos pa risibí e promesanan di e Salbador. El a bisa, “Bendishoná ta esnan puru di kurason: pasobra nan lo mira Dios.”⁶

Si nos proba di ta ehèmpelnan den palabra, kombersashon, karidat, spiritu, fe i den puresa, nos lo kualifiká pa ta lusnan pa e mundu.

Mi por bisa e bosonan tur i partikularmente pa nos hóbennan, ku segun e mundu ta move bai kada biaha mas leu for di e prinsipionan i normanan duná na nos pa un Tata Selestial amoroso, nos lo resaltá di e multitut pasobra nos ta diferente. Nos lo resaltá pa motibu di nos bistimentu modesto. Nos lo ta diferente pasó nos no ta papia vulgar i no ta tuma supstansianan ku ta malu pa nos kurpa. Nos ta evitá chistenan di dòbel sentido i remarkenan dekadente. Nos ta disidí pa no eksponé nos mes ku media inmoral ku lo alehá e spiritu for di nos hogarnan i nos bida. Nos lo resaltá sigur ora nos hasi skohensia tokante moralidat---ku lo ta den harmonia ku prinsipionan i normanan di evangelio. E kosnan aki ku por hasi nos diferente for di mayoria di e mundu por duna nos tambe e lus i e Spiritu ku lo bria den un mundu ku ta birando mas maligno.

Hopi biaha ta difísil pa ta diferente i pa para bo so den un multitut. Ta natural pa tin miedu pa loke otronan por pensa òf bisa. E palabranan di e salmo ta konsolador: “Señor ta mi lus i mi salbashon; ken lo mi teme? Señor ta fortalesa di mi bida; pa ken lo mi tembla?”⁷ Ora nos hasi Cristu e sentro di nos bida, nos miedu lo wòrdu remplasá pa e kurashi i nos konvikshonnan.

Bida no ta perfekto pa nos niun, i tin biaha e desafionan i difikultatnan ku nos ta enfrentá por ta demasiado, kousando ku nos lus ta skuresé. Sinembargo, ku yudansa di nos Tata Selestial, huntu ku sosten di otronan, nos por haña e lus atrobe ku lo iluminá nos kaminda atrobe i duna e lus ku otronan por tin mester.

Pa ilustrá, mi ta kompartí ku boso e palabranan konmovedor di un poesia faborito ku mi a lesa hopi aña pasá:

Mi rumannan, nos oportunidat pa bria ta rondoná nos tur dia, den kualke sirkunstansia ku nos por ta. Ora nos ta sigui e ehèmpel di e Salbador, lo ta nos oportunidat pa ta un lus den e bidanan di otronan, sea ku nan ta miembro di nos famia i amigunan, òf koleganan,konosínan, òf kompletamente straño.

Na boso kada un, mi ta bisa ku boso ta un yu hòmber òf yu muhé di nos Tata Selestial. Boso a bini for di su presensia pa biba riba e mundu aki pa un temporada, pa reflehá riba e amor, siñansanan di e Salbador i ku balor laga boso lus bria pa tur hende por mira. Ora e temporada riba e mundu aki kaba, si boso a hasi boso parti, lo ta boso bendishon glorioso pa regresá pa biba ku n’E pa semper.

Esta trankilisante ta e palabranan di e Salbador: “Ami ta e lus di mundu: esun ku sigui Mi lo no kana den skuridat, pero lo tin lus di bida.”⁹ Di Dje mi ta testifiká. E ta nos Salbador i Redentor, nos Abogado dilanti di e Tata. E ta nos Ehèmpel i nos fortalesa. E ta “e lus ku ta bria den skuridat.”¹⁰ Ku kada un di nos ku ta skucha mi papia mi ta roga pa sigui E, asina ku bira un lus briante na e mundu, ta mi orashon den Su santu nòmber, hasta Jesucristu e Señor, amèn.