2010–2019
Wia ehu mehn Karasaras oh ehu Marain
October 2015


Wia ehu mehn Karasaras oh ehu Marain

Ni atail kin idawehn karasaras en Sounkomouro, atail pahn iei ansou mwahu en wia ehu marain nan an mehteikan mour kan.

Riei ohl akan oh lih akan, mehd mwahu ei pwurehng patehng kumwail. Ni duwen amwail wehwehkiher, sang atail patpenehr nan Epreil teio, kitail pahtoukihla kepelsalehdalahn silimen riatail Wahnparon ko---President Boyd K. Packer, Elder Elder L. Tom Perry, oh Elder Richard G. Scott. Irail pwuralahr ni arail wasahn kouson en Nanlengo. Kitail sohlahr patehng irail. Soangen atail kapingki arail karasaras en limpoak en Krais ko oh padahk sair kitail me re kidiengehr kitail koaruhsie.

Se wia aht kosomw mehlel ong iangat Wahnparon kapw akan, Elder Ronald A. Rasband, Elder Gary E. Stevenson, oh Elder Dale G. Renlund. Metakan iei ohl kei me poadidiong doadoahk en Kauno. Re warohng audehda audehda sehr kesempwal kei me re malipilipiengehr.

E sohte werei, ni ei wie wadewadek oh doudouloale iren pwuhk sarawi kan, passages riau in particular tengala nan ahi madamadau. Koaros iren pwuhk sarawi pwukat kitail wehwehki. Keieuo sang ni Padahk en pohn Nahnao: “Mweidehng ahmw marain en marainpeseng mwohn aramas, pwe ren kak kilang ahmw doadoahk mwahu kan, oh lingan en Sememwo me mie nanleng.”1 Keriaun iren pwuhk sarawio iei ehu me I tamanda ni ei douloale wehwehn keieuo. E kohsang ni nein Wahnparon Paul‘s Kisinlikou ong Timothy: “Kumwail wia karasaras en aramas kei me kamehlele, ni lokaia, ni koasoai, ni limpoak mehlel, ni palingehn, ni pwoson, ni mwakelekel.”2

I kamehlele keriaun iren pwuhk sarawio me kawehwe, ni pali laud, duwen atail kak kapwaiada keieuo. Kitail wia karasaras kei en me kamehlele ko sang momourki rongamwahu en Sises Krais ni lokaia, ni koasoai, ni limpoak mehlel, ni palingehn, ni pwoson, oh ni mwakelekel. Ma kitail wia, atail marain kan pahn marainpeseng ong mehteikan en kilang.

Emen emen kitail kodohng sampah ni atail aledahr Marain en Krais Ni atail kin idawehn karasaras en Sounkomouro oh momour duwehte Sapwellime Ieiaso oh duwehte dahme E ketin padahngkiher, me maraino pahn lullul nan loaleta kat oh pahn wia ehu karasaras ong mehteikan pwe ren alasang.

Wahnparon Paul kilelehdi mehn kahlamengi weneu en emen me kamehlele, mehn kahlamengi me pahn kahrehieng atail marain kat en marainpeseng. Kitail koasoaiapene ehu ehu.

I koasoaia keieun mehn kahlamangih riau ko—wia ehu karasaras ni lokaia oh ni koasoai. Lepin lokaia kan me kitail kin doadoahngki kak pwekada oh kaperenda, de kak kawehla oh katikala. Nan sampah wet rahnwet mie diren koasoai pwelipwel me mwomwen kapelkitailpene wasa koaros me kitail kohlaie. E apwal soikala rongorong eden Koht me kin kalap doadoahk oh soh-kauti. Iren kaweid kelingeringer kan mwomwen wialahr ehu utupen telepeisin, kasdo kan, pwuhk kan, oh keseng. Kaweliali en lokaia kelingeringer kan oh koasoain lingeringer. Kitail uhdahn anahne koasoaieng aramas teikan ni limpoak oh wahu, ansou koaros koasoai mwahu oh dehr doadoahngki lokaia kan de iren madamadau kan me pahn kamadakala de kansensuwediala. Kitail uhdahn pahn idawehn karasaras en Sounkomouro, me kin mahsenki karakarahk oh kadek nan Sapwellime padahk koaros.

Mehn kahlamangih en met me Paul koasoaia iei limpoak mehlel, me kawehwehpe iei limpoak mwakelekel en Krais.3 I mehlelki me mie irail me kitail kak sewesehda me sangat, irail kan me soumwahu, oh irail kan me sohte arail kopworopworf. Kitail ahniki ansou mwahu en seweseirail oh kangongeirail. Sounkomouro ketikihdo kopworopwor ong irail me sohte arail kopworopwor oh kehl ong irail me luwet. E kamwahuiala me soumwahu; E sewesehda me mwator ren kakala alu, me masukun kan ren kak kilangada wasa, me salengopon en rongada wasa. E pil kamaurada me melahr. Nan Sapwellime kalohk E ketin ketla, ni limpoak mehlel, rehn koaros me mie arail anahn. Ni atail kin idawehn Sapwellime karasaraso, kitail pahn kapaiada mour kan, iangahki pein atail.

Kitail pil uhdahn pahn wia karasaras sang ni atail wiewia kan. Ongie mwo wehwehki kitail itail en nantiheng ansou koaros momourki kadek, karakarehk, mahk, oh limpoak mehlel. Soahng pwukat pahn wadohng kitail ehu ngehn me pahn lipwalipw ong mour en irail kan me kitail karanih. I ahnikiher ansou mwahu nan ahi mour I en patehng aramas tohto me ahniki soangen ineng wet. Kitail ahnikiher soangen pepehm tohrohr ehu ni atail kin patehng irail, pepehm ehu me kin wiahieng kitailineng en men patehng irail oh idawehn arail karasaras. Irail kin kasalehda Marain en Kraiso oh seweseikitail en kehn Sapwellime limpoak ong kitail.

En kawehwehda me marain me kin kohdo sang emen aramas me mwakelekel oh limpoak aramas teikan kin kak kasawiada, I ehukiheng kumwail mehkot me wereilahr eh wiawi.

Ansouo, kaun kan en Mwomwohdiso patehng lapalap oko nan Jerusalem pwe ren wiahda ehu nanpwungpene en doadoahngki oh isehla sahpw me ahn Mwhmwohdiso Jerusalem Center pahn wiawihdaie. Pwehn alehdi mweimwei kan me mie anahnepe, Mwomwohdiso anahne pwungkihla me sohte-weliakapw pahn wiawihda sang irail towe kan me pahn kouson wasao. Mwurin nanpwungpeneo eh wiawidahro, emen lapalap oko en Israeli, me wehwehki mwahu Mwomwohdiso oh towe ko, koasoaia me e wehwehki me Mwomwohdiso pahn wahuniki wiepen sohte-weliakapwo. “Ahpw,” e koasoaia, ong me pid to tohn sukuhl ko me pahn kouson wasao, “dahme kitail pahn wiahieng marain en nan meserail ko?”4 Soangen marain tohrohro kin ansou koaros dakerpeseng nan loaletail kat, pwe en kak alahlda oh pweida kansenamwahu rehn mehteikan.

En wia karasepen pwoson wehwehki me kitail trust Kauno oh Sapwellime mahsen. E wehwehki me kitail ahniki oh me kitail pahn apwalih dahme mehlel me mwo pahn kahluwa atail madamadau kan oh atail mwekid kan. Atail pwoson Kauno Sises Krais oh Samatailo Nanleng pahn kaweid mehkoaros me kitail kin wia. Nan soh-pwungpene me mie nan mour wet, pingiping en mour en ansouet, Tamataman me pwoson oh soh-kopworopwor sohte kak pwarada nan ehu lamalam nan ehu ansou, pwe ehu pahn kameleileidi mehteio. I kapwurehiong dahme kitail pwurehng rongehro—me pwe kitail en alehda oh kolokol pwoson me kitail anahneo, e kesempwal kitail en wadek oh onop oh douloale pwuhk sarawi kan. Kepehsehieng Samatailo Nanleng ni kapakap inenen kesempwal. Kitail sohte kak en pohnsehse soahng pwukat, pwehki imwintihtio oh irail ko me kin ieiang ih udahn sohte mahk en raparapahki atail luwet akan, ehu madap nan atail pwoson. Kauno ketin mahsanih, “Pwersek en rapahki, kapakap ansou koaros, oh kamehlele, oh mehkoaros ahpw pahn doadoahkpene ong kamwahupemw.”5

Eri, kitail pahn ahniki mwakelekel, me wehwehki me kitail mwakelel nan paliwar, madamadaw, oh ngenetail. Kitail ese me paliwaratail iei tehnpas sarawi ehu, e anahne en epwel ni meleilei oh wahu. Atail madamadaw pahn audaukihdahr lamalam kan me kin kakehlailada kitail oh kihsang kitail sang soahngkan me pahn kasaminehla. Pwe kitail en ahniki Ngehn Sarawio en wia iengetail, kitail anahne warohng. Riei ohloko oh lihoko, mwakelel pahn wahdohng kitail meleilei oh kahreiong atail pahn alehdi sapwellimen Sounkomouro inou kan. E masanih, “Mehn pai me ahniki mohngiong mwakelekel: pwe re pahn kilang Koht.”6

Ni atail kin kadehdehda me kitail wia karasaras ekei en aramas ekei me kamehlele ni lokaia, ni koasoai, ni limpoak mehlel, ni palingehn, ni pwoson, oh ni mwakelekel, kitail pahn warohngala wiahla kamarainpen sampah.

I men koasoaiahieng kumwail koaros, oh mehlel ong kumwail me pwulopwul kan, me ni sampah eh mwekimwekidla mwowe sang ni kosondi pwung oh mehlel kan oh kaweid kan me kodohng kitail sang Sahmo Nanleng me ketin limpoak, kitail pahn sansal nan pwungen pokon en aramas pwehki kitail sohte duweirail. Kitail pahn sansal pwehki kitail kin likou mwahu. Kitail pahn ehusoahng pwehki kitail sohte kin doadoahngki lokaia suwed oh pwehki kitail sohte kin kang soahng kan me keperieng paliwaratail. Kitail pahn weksang mehteikan pwehki kitail sohte kin nda koasoai kaperen oh kaweid sapwung kan. Kitail pahn weksang irail ni atail pahn pilada kitail en dehr kaparahkinkitail soangen mehn kepehse kan me sohte sansal oh kahrehda sohla wawpe oh me pahn kahrehieng ngeno en lipasang ni imwatail kan oh atail mour kan. Kitail pahn mehlel sansalada ni atail pahn wia atail pilipil kan me pid mour wet—pilipil kan me pahrekieng kosondi pwung oh mehel kan en rongamwahuo oh kosondi teikan. Soahng ko me kin kahrehda atail weksang pelilaud en mehteikan pil kin eledohng kitail maraino oh ngehno me pahn kasalehda lipwalipw mwahu nan sampah me dihp kadirelahr.

E kalap apwal weksang mehteikan oh doare dahme kitail kamehlel. E kalapw wiawi masak dahme mehteikan pahn medewe de nda. Kosoin kameleilei iei koasoai en Melkahka kan: “Kauno iei kamarainpei oh komourpei; ihs me I pahn masak? Kauno iei kehlepen ahi mour; ih me I pahn masak?”7 Ni atail pahn wiahki Krais poahsoan en atail mour kan, eimah en dahme pwung oh mehlelo pahn weliandi atail masepwehk kan.

Mour mwahu ong sohte emen kitail, oh ekei ansou soahngkan me pahn uhong oh apwal me kitail lelohng pahn udahn laud, kahrehiong atail marain ah rotorotala. Ahpw, sawas sang Samatail Nanleng, kapatahieng utuht sang mehteikan, kitail kak pilehu alehdi maraino me pahn kamarainiada pein atail ahl oh sawaskihda maraino me mehteikan anahne.

Pwehn kawehwehda, I men ehukiheng kumwail koasoai kei me inenen sair ahi lamalam duwen ehu poem kaselel me I tepin wadek sounpar tohto kei samwalahro.

I tuhong aramas en kohdo men nihpwongo

Me nah lampo sohla linge.

I uhdi oh mweidehng en isikada

Nah lampo sang ni neio.

Lapalahn kisinieng ieu kohda mwuri

Oh kahrehda sampah eh rerada .

Oh ni ansou me kisiniengo uhdi

Nei lampo kunla !

Ahpw aramas en kohdohu eri pwurodo rehi —

Nah lamp wie lullulte !

E kolada umpwul kesempwalo

Oh isikada neio!8

Riei ohloko oh lihoko, atail ansou mwahu en ahniki karasaras rehtail nan ehu ehu rahn, nan sohte lipilip dahme kitail pahn lelohng loale. Ni atail pahn idawehn karasaras en Sounkomouro, kitail pahn ahniki ansou mwahu en ahniki marain nan mour en mehteikan, pein atail peneinei oh kempoketail kan, iengetail tohndoadoahk kan, ekei me kapw, de aramas en kohdo kan.

Ong emen kumwail I nda me kowe sapwellimen Samatail Nanleng seri, Ke kohdosang Reh pwe ken mih pohn sampah ansou kis, wia karasaras en limpoak oh padahk kan en Sounkomouro pwe arail marain en sansal mwohn aramas akan. Ansou amwail mour en sampah pahn nekier, ma kumwail wiahdahr amwail pali, amwail kapai pahn udahn kaselel en pwurala kousonla Reh kohkohlahte.

Ia wen mwahu en sapwellimen Sounkomouro mahsen kan: “Ngehi kamarainpen sampah: meh men me pahn idawehn ie sohte pahn alu nan rotorot, ahpw pahn ahniki marain en mour.”9 I kadehdeki Ih. Ihme atail Sounkomour oh Soundor, sounsawasapatail rehn Samatailo. Ihme atail Kaun oh kehlapatail. Ihme atail “maraino me lullul nan rotorot.”10 I kopworopworki me koaruhsien me rongorong ie pahn inoukihdi ren idawehn Ih, wiahla marain lingaling ong sampah, iei ahi kapakap ni Mware mwar sarawi, oh pil Sises Krais atail Kaun, amen.