2010–2019
Kakua ni Yalolailai, Vakadinata Ga
Okotova 2015


Kakua ni Yalolailai, Vakadinata Ga

Ni da sa digitaka meda vakadinata, ka vakayagataka na vakabauta ena veivutuni, ka muria na noda iVakabula, o Jisu Karisito, ena tadola na matada vakayalo ki na veika totoka eda sega ni vakasamataka rawa.

O Papiloni kei Taniela

Ena ruasagavulu ka ono na drau na yabaki sa oti, a matanitu kaukauwa duadua tu e vuravura o Papiloni. E dua na dauniitukutuku makawa a vakamacalataka na bai kei Papiloni ka wavokita tu na korolevu oqo a 300 na fute (90 na mita) na kena cere ka 80 na fute (25 na mita) na kena vavaku. “Ena kena totoka,” a vola, “e sega tale ni dua na korolevu me bau rorova… yani.”1

Ena gauna o ya, e a vanua ni vuli, lawa, kei na filosofi e vuravura o Papiloni. Na kaukauwa ni kena mataivalu e sega ni vakatauvatani rawa. A vakarusa na kaukauwa i Ijipita. A curuma vakaukauwa, vakama, ka yanaraka na koroturaga kei Asiria, o Ninive. A kabai Jerusalemi vakarawarawa sara ka kauti ira na gone vuku ka yalomatua kei Isireli ki Papiloni mera laki qaravi Tui Nepukanesa.

E dua vei ira na vesu oqo o ya e dua na cauravou na yacana o Taniela. Era vakabauta e vuqa na dauniivolatabu ni o Taniela a se rairai yabaki 12 ki na 17 ena gauna o ya. Vakasamataka mada, kemuni na taciqu cauravou lomani ni Matabete i Eroni: A yabaki vata sara kei kemuni o Taniela ena gauna a kau kina ki na itikotiko ni tui me laki vulica na nodra vosa, lawa, lotu, kei na sainisi ni Papiloni vakavuravura.

Rawa beka mo vakasamataka mo a kauvakavesu mai nomu vanua, taubaletaka e 500 na maile (800 na kilomita) ki na dua tani tale na korolevu, ka vakavulici ena nodra lotu na kemu meca?

A susugi cake o Taniela me qaravi Jiova. A vakabauta ka sokalou vua na Kalou i Eparama, Aisake, kei Jekope. A vulica tu mai na nodra vosa na parofita, ka kila tu na lewa ni Kalou vei ira na tamata.

Ia oqo, ni se cauravou lailai, sa mai gonevuli vesuki tiko e Papiloni. A rairai tara bi sara vua na veivakasaurarataki me biuta na nona vakabauta makawa ka ciqoma na kena e Papiloni. Ia a dina tiko ga ki na nona vakabauta—ena vosa kei na cakacaka.

E vuqa vei kemuni o ni kila na ivakarau ni yalo ni da tokona e dua na dina tawakilai. Ena ivosavosa vaka-Initaneti nikua, eda kaya ni da sa “vakamai” mai vei ira era sega ni duavata kei keda. Ia o Taniela a sega walega ni na sotava na veivakacacani e matanalevu. Mai Papiloni, o ira era saqati ira na iliuliu vakalotu era sa kila tu na ibalebale—vakavosa ka vakaidina—mo “vakamai.” Tarogi iratou ga na itokani i Taniela o Setareki, Mesaki, kei Apetiniko.2

Au sega ni kila de a rawarawa beka vei Taniela me tamata vakabauta tiko ena ituvaki vaka o ya. Eso na tamata era sa vakalougatataki tu ena yalo sa dauvakadinata—vei ira oqo, na vakabauta sa isolisoli ga mai lomalagi. Ia vakasamataka mada me o Taniela sa vakataka e vuqa vei keda meda cakacakataka na noda ivakadinadina. Au vakabauta ni vuqa sara na auwa a tekiduru tu kina o Taniela me masu, ka cabora na nona vakatataro kei na rere ena icabocabo ni vakabauta, ka waraka na Turaga me kila vakavinaka ka vakavukui.

Sa mani vakalougatataki Taniela na Turaga. Dina ga ni a bolei ka vakasewasewani na nona vakabauta, a dina tu ga ki na veika sa kila ni dodonu mai na veika a sotava.

A vakadinata ga o Taniela. A sega ni vakatitiqa o Taniela.

E dua na bogi, a qai tadra o Tui Nepukanesa ka vakaleqa sara nona vakasama. A kacivi ira vata mai na nona tamata vuku vakalotu ka daunivakasala ka vakarota mera vakaraitaka vua na tadra vakakina na kena ibalebale.

E dina sara, a sega ni rawa. “Sa sega e dua mena cakava rawa na ka ko ni vinakata,” era a vakamasuti koya. Ia sa qai cudru ga kina vakalevu o Nepukanesa, ka vakarota o ira kece na tamata vuku, daucakamana, daurairai lomalagi, kei na daunivakasala mera sa na musumusulaki—vakakina o Taniela kei ira talega na gonevuli itabagone mai Isireli.

O kemuni ko ni kila vinaka tiko na ivola i Taniela o ni sa kila na cava a qai yaco e muri. A qai kerea o Taniela vei Nepukanesa me wawa mada vakalailai, ka gole o koya kei nona itokani yalodina ki na nodratou ivurevure ni vakabauta kei na kaukauwa savasava. Eratou a masu vua na Kalou ka kerea na veivuke vakalou ena gauna lomolomora o ya. Sa “qai vakaraitaki na ka vuni oqo vei Taniela ena … raivotu.”3

Taniela, na cauravou ni dua na vanua a kabai—a vakasaurarataki ka vakacacani baleta ni vakabauta na nona lotu e tawakilai—sa qai gole vua na tui ka vakatakila vua na tadra kei na kena ibalebale.

Tekivu mai na siga o ya, ena vuku ni nona yalodina tiko vua na Kalou, sa laki daunivakasala nuitaki o Taniela vua na tui, ka kilai levu ena nona vuku e Papiloni taucoko.

Na cauravou a vakadinata ka bulataka nona vakabauta sa yaco me tamata ni Kalou. Me parofita. Me ravouvou ni ivalavala dodonu.4

Eda sa vakataki Taniela beka?

Au taroga vei keda kece eda lewena tiko na matabete tabu ni Kalou, eda sa vakataki Taniela beka?

Eda sa dina tiko beka vua na Kalou?

Eda sa cakava tiko beka na ka eda vunautaka tiko, se da Lotu Vakarisito ga ena Sigatabu?

Sa vakaraitaka tiko beka vakamatata na noda itovo ena veisiga na veika eda kaya tiko ni da vakabauta?

Eda sa vukei ira tiko “na dravudravua kei na luveniyali, na tauvimate kei ira sa vakaleqai”?5

Eda sa vosa tiko beka ga, se da gumatua yani meda cakava?

Kemuni na veitacini, sa soli vakalevu tu vei keda. Eda sa vakavulici ena dina vakalou ni kosipeli vakalesui mai i Jisu Karisito. Sa lesi tu vei keda na lewa ni matabete meda vukei ira kina na wekada raraba ka vukea na tarai cake ni matanitu ni Kalou e vuravura. Eda bula donumaka tiko na kena sovaraki tiko mai vakalevu na kaukauwa vakayalo. Sa tu vei keda na taucoko ni ka dina. Sa tu vei keda na idola ni matabete ni veivauci e vuravura kei lomalagi. Sa vakarautaki tu vakacecere sara na ivolanikalou tabu kei na nodra ivakavuvuli na parofita kei na iapositolo bula.

Kemuni na itokani lomani, meda kakua ni taura vakamamada na veika oqo. Mai na veivakalougatataki kei na veimadigi oqo sa tadu mai kina na kena ilesilesi cecere kei na itavi. Meda sa qai tutaka yani.

Sa mai vurumemea toka na korolevu makawa o Papiloni. Sa mai kacikaci toka ni cagi na kena totoka. Ia o Papiloni vakavuravura ka butobuto se bula tiko ga. Sa qai noda ilesilesi meda bulataka noda vakabauta ena vuravura oqo ni tawavakadinata. Oqo na noda bolebole meda sa tutaka yani ena veisiga na kosipeli vakalesuimai i Jisu Karisito ka bula vakaidina ena ivakaro ni Kalou. Sa na gadrevi meda vosota toka na veivakasaurarataki vakaitaba vata, na nodra veivakasewasewani na tawalotu, na veitemaki nei vu-ni-ca, se noda vucesa ga.

Vakasamataka mada o ya. Sa na rawarawa cake beka ga vei Taniela me sa muria ga na bula mai Papiloni? A rawa sara ga vua me biuta tani na ivakarau ni bula dodonu a solia na Kalou vei ira na luvei Isireli. A rawa sara ga vua me kania na magiti kakana talei sa vakarautaka na tui ka lasamaka na itovo vakayago sa vakavuravura. Ena rawa me kakua ni vakasewasewani kina.

Sa na tamata rogo sara ga kina.

Sa na rauti koya vinaka sara ga.

Sa na rairai sega sara ni dredre na nona ilakolako.

Sa dina sara oqori, me yacova na siga a vakarota kina na tui me kilai na ibalebale ni nona tadra. Sa na raica kina o Taniela ni o koya, me vakataki ira na vo ni “tamata vuku” kei Papiloni sa tagutuvi o koya mai na ivurevure dina ni rarama kei na vuku.

Sa mai qaqa o Taniela ni a vakatovolei. Oi keda se toso tikoga.

Na Yaloqaqa mo Vakadinata

E gadreva tiko o Setani, na keda meca, meda druka. E vakatetea na nona lasu me tiki ni nona sasaga me vakarusa na noda vakadinata. E tukuna vaqaseqasea ni o ira sa vakatitiqa, lomalomarua, kei na vakasama vakatani sa vakatamata ka vuku, ia o ira era vakabauta na Kalou kei na Nona cakamana era sa sesewa, mataboko, se vesumonataki tu. Ena vakarogoya tiko ni ka cecere meda lomatarotaro taka na isolisoli vakayalo kei na nodra ivakavuvuli na parofita.

Au diva meu vukea na tamata kecega mera kila tiko na ka dina oqo: eda vakadinata na Kalou baleta na veika eda kila e yaloda kei na vakasama, sega ni baleta na veika eda sega ni kila. Na veika vakayalo eda sotava e sa rui ka tabu meda wasea yani ena vakasama vakavuravura, ia e sega ni kena ibalebale ni ra sega ni dina.

Sa vakarautaka tu na Tamada Vakalomalagi vei ira na Luvena e dua na magiti vakayalo, ka sa tu kina na veimataqali kakana totoka eda rawa ni vakasamataka—ia, eda qai sega ni marautaka na isolisoli vakayalo oqo, ka vinaka vei ira na dauvakasama vakatani me ra rai tu mai vakayawa, ka tomana tiko na nodra vakatitiqa, lomalomarua, kei na sega ni veidokai.

Cava na vuna me dua me curuma yani na bula oqo ka marautaka wale tu ga na rarama ni nodra cina lailai ni kila, ia ni toso yani vua na Tamada Vakalomalagi, era na rawa ni vakila na siga rarama ni kila-ka vakayalo ka na vakarabailevutaka na nodra vakasama ena vuku ka vakasinaita na yalodra ena reki?

Ni daru veivosaki kei ira na tamata baleta na vakabauta kei na vakadinata, eda dau sega beka ni rogoca, “Au diva me vakaoqori na noqu vakadinata”?

Na ivakaraitaki ena itukutuku vakaoqo sa dua tale na lawaki i Setani: na vakadinata oqo e yaco vei ira eso ka sega vei ira eso. E sega na cakamana ena vakadinata. Ia na gadreva mo vakadinata sa imatai ni kalawa e gadrevi! Na Kalou sa sega ni digitaka vakailoa na tamata.6 O Koya na Tamamuni. E gadreva me vosa vei kemuni. Ia, e gadrevi vakalailai kina na vakadidike ni vakatataro—kei na vakatovolea mada na vosa ni Kalou—kei na cakacakataki ni dua na “vakabauta e ka lailai” wale.7 E gadrevi talega kina na yalomalumalumu. Ka gadrevi kina na yalo e vinaka kei na vakasama e vinaka. E gadrevi kina na vakasaqara, ena ibalebale taucoko ni vosa. Kei na kena e dredre duadua beka, sa na gadrevi kina na vosota kei na waraka na Turaga.

Keda sega ni sasagataka meda vakadinata, eda sa vakataka na tamata e bokoca na cina ka qai beitaka na cina ni sega ni solia mai na rarama.

Dua na gauna sa oti au kurabui ka rarawa sara niu rogoca e dua na lewe ni Matabete i Eroni a dokadokataka na nona sa vakayawakitaki koya mai vua na Kalou. A kaya, “Kevaka ena vakaraitaki Koya mai na Kalou vei au, au na qai vakadinata. Me yacova ni yaco, au na kunea na dina ena noqu kila ga vakai au kei na vuku me vakararamataki na noqu ilakolako.”

Au sega ni kila na yalona na cauravou oqo, kau sega ni rawa ni vukea ia au sa nanumi koya sara vakalevu. Ni rawarawa sara vua me cakitaka na isolisoli sa solia tu vua na Turaga. Na cauravou oqo a bokoca na cina ka qai nanuma ni sa vakacegui kina ena nona vakadidike vuku ni sa sega na rarama.

E ka ni rarawa, ni oqo sara ga na itovo ni nanuma nikua. Ke da rawa ni biuta na icolacola ni veika me vakadinadinataki vua na Kalou, ka da nanuma beka meda vagalalataki keda mai na noda taura vakabibi na ivakaro ni Kalou kei na noda ilesilesi ni veiwekani kei na Tamada Vakalomalagi.

Kemuni na veitacini, me matata mada: e sega ni dua na ka dokai se veivakauqeti na noda vakasama tiko vakatani. E rawarawa na vakatitiqa—e rawa ni dua ga e cakava. Na bula yalodina e gadrevi kina na kaukauwa savasava, gugumatua, kei na yaloqaqa. O ira era tudei tu ena vakabauta era na veivakauqeti cecere cake mai vei ira era dauvakatitiqa voli ena gauna e lasika mai kina na vakatataro tawakilai se kauwai.

Ia eda na sega ni kurabui ni vakabauta e sega ni yaga vei ira sa vakavuravura. Sa kilai tu mai vakabalavu na vuravura oqo ni dau cakitaka na veika e sega ni kila vinaka. Ka dau vakaleqai na nona saga me kila na ka e sega ni raica. Me baleta ga ni da sega ni raica e matada dina e sega ni kena ibalebale o ya ni sega ni tiko dina. E dina sara, “e vuqa na veika sa tu mai lomalagi kei na vuravura e ra … mai na kena eda tatadrataka tu” ena noda ivolanivuli, ivolaniveisiga ni vakadidike, kei na filosofi vakavuravura.8 Sa sinai tu ko lomalagi raraba ena veika cecere ka veivakurabuitaki—na veika e rawa ni kilai walega ena matada vakayalo.

Na Yalayala ni Vakadinata

Ni da sa digitaka meda vakadinata, ka vakayagataka na vakabauta ena veivutuni, ka muria na noda iVakabula, o Jisu Karisito, ena tadola na matada vakayalo ki na veika totoka eda sega ni vakasamataka rawa. Sa na yaco kina me kaukauwa cake na noda vakadinata kei na vakabauta, ka da na rai vakalevu cake.9

Kemuni na veitacini, au vakadinadinataka ena noda gauna butobuto mada ga, na iVakabula ena kaya vei iko me vaka a kaya vua e dua na tama ena dua na gaunisala osooso mai Kalili, “Kakua ni yalolailai, vakadinata ga.”10

Meda digitaka meda vakadinata.

Ni da vakadinata, eda na raica na kida ni rarama.

Eda na kunea na dina.11

Eda na kunea na vakacegu.12

Ena vuku ni noda vakadinata, eda na sega ni walokai ena via kana, ka sega ni karamaca.13 Na isolisoli ni loloma soliwale ni Kalou ena gumatuataki keda meda dina tiko ki na noda vakabauta ka na vakasinaita na yaloda me vakataka na “mata-ni-wai sa tovure ki na bula tawamudu.”14 Eda na sotava na reki sa dina ka tawayalani.15

O koya gona, kemuni na itokani lomani, kemuni na veitacini lomani ena matabete ni Kalou:

Mo ni yaloqaqa ena vakadinata.

Kakua ni yalolailai, vakadinata ga.

Tucake vata yani kei Taniela.

Sa noqu masu vei keda yadua—gone kei na qase—meda na kunea na kaukauwa vakavoui, yaloqaqa, kei na gagadre meda vakadinata ga. Ena yaca i Jisu Karisito, emeni.