Nov Yog Koj Niam

Kuv xav koom nej txhua tus tos txais Txwj Laug Ronald A. Rasband, Txwj Laug Gary E. Stevenson, thiab Txwj Laug Dale G. Renlund thiab lawv peb tug poj niam rau peb txoj kev sib raug zoo uas zoo tshaj lawv xav.

Thaum nws qhia tej uas yuav muaj los yav tom ntej txog tus Cawm Seej txoj Kev Theej Txhoj, Ixayees sau hais tias, “Nws tau tiv peb tej kev nyuaj siab, thiab ris peb tej kev txom nyem.”¹ Kev ua yog toog hauv lub caij nyoog kawg no qhia hais tias Yexus tau los rau hauv lub ntiaj teb kom ris neeg ntiaj teb tej kev txhaum.² Vaj lub kub thaum ub thiab hauv lub caij nyoog no ua tim khawv hais tias nws tau txhiv lawv dim, thiab tau txhawb lawv, thiab tau nqa lawv txhua lub sij hawm yav thaum ub.³ Ib zaj nkauj uas feem coob nyiam thov kom peb “mloog lub suab ntawm tus Cawm Seej!”⁴

Ris, txhawb, tiv, txhiv dim. Tej lus no yog tej lus hais txog tus Mexiyas uas muaj hwj chim heev. Tej lus no qhia txog kev pab thiab kev cia siab tias peb yuav muaj kev kaj siab lug thaum peb pib ntawm qhov peb nyob tam sim no mus rau qhov chaw peb yuav tsum mus—tiam sis ntshe peb mus tsis taus, yog tsis muaj txoj kev pab. Tej lus no kuj txhais hais tias yus ris nra, muaj teeb meem, thiab kev mob kev nkeeg—tej lus uas tsim nyog siv kom piav txog Nws tus, uas txhawb nqa peb thaum peb poob, ris peb mus tom ntej thaum peb tsis muaj dag zog, thiab txhiv peb dim coj peb rov qab mus tsev thaum peb raug xwm txheej loj heev. Nws hais tias, “Kuv Txiv tau xa kuv los xwv kom kuv yuav raug dai rau saum tus ntoo khaub lig; … ib yam li kuv tau raug muab dai … tib yam li ntawd tib neeg yuav raug [dai] … los sawv ntawm kuv xub ntiag.”⁵

Tiam sis los ntawm tej lus no ua rau nej puas xav txog ib txoj hauj lwm ntxiv uas tsim nyog peb siv tej lus xws li ris thiab txhawb,tiv thiab nqa,khwv thiab tso dim? Ib yam li Yexus hais rau Yauhas thaum Nws tab tom theej peb lub txhoj, Nws hais rau peb txhua tus hais tias, “Nov yog koj niam!”⁶

Hnub no nyob ntawm lub sam thiaj no kuv tshaj tawm txog tej yam uas twb hais nyob ntawm no dhau los: hais tias tsis muaj txoj kev hlub nyob hauv lub ntiaj teb no uas loj npaum li Yexus Khetos txoj kev hlub dawb huv tsuas yog txoj kev hlub ntawm ib tug niam tsev rau nws cov me nyuam. Thaum Yaxayas hais txog tus Mexiyas, nws xav qhia txog Yehauvas txoj kev hlub, nws thiaj li ua rau tib neeg xav txog ib tug niam tsev txoj kev muaj siab hlub. “Ib tug poj niam puas yuav muaj cuab kab hnov qab tau nws tus me nyuam uas tseem noj nws mis los?” nws nug. Zoo li nws hais tias, qhov no tsis txaus ntseeg, tiam sis qhov uas peb xav tias Khetos yuav hnov qab peb haj yam tsis txaus ntseeg.⁷

Txoj kev hlub zoo li no “tiv taus ntev, thiab siab zoo, … tsis xav rau nws tus kheej xwb, … tiam sis … tiv tag nrho txhua yam, ntseeg txhua yam, cia siab rau txhua yam, nyiaj tag nrho txhua yam.”⁸ Qhov uas txhawb nqa peb tshaj plaws yog qhov uas txoj kev hlub no “yeej tsis ploj ib zaug li.”⁹ Yehauvas hais tias, “Vim tej toj roob yuav pob thiab tej hauv pes yuav nphau, tiam sis kuv txoj kev hlub yuav tsis ncaim koj li.”¹⁰ Peb cov niam hais li no thiab.

Vim hais tias, tsis yog lawv yug peb xwb, lawv kuj tiv tau nrog peb mus. Qhov uas lawv saib xyuas peb thaum tseem muaj peb hauv plab, thiab lawv saib xyuas peb mus tas ib sim neej yog ib qho zoo kawg nkaus. Yeej muaj ib txhia uas tsis ua zoo li no thiab, tiam sis cov niam tsev feem ntau paub kiag hais tias nov yog ib qho kev lav ris dawb ceev uas tseem ceeb tshaj plaws. Qhov uas ib tug niam tsev hluas paub tias qhov no muaj tseeb ntshe tej lub sij hawm yog ib qho txaus ntshai.

Ib tug niam hluas sau ntawv rau kuv tsis ntev tas los hais tias: “Ib tug neeg yuav hlub ib tug me nyuam npaum li cas kom nws thiaj li txaus siab muab feem ntau ntawm nws txoj kev ywj siab tso tseg? Txoj kev hlub muaj zog npaum li cas kom yus thiaj li txaus siab txais kev lav ris, kev mob siab, kev txhawj xeeb, thiab kev nyuaj siab thiab yus cia li pheej rov qab los kom txais tau ntxiv? Txoj kev hlub yeej zoo li cas kom tom qab yus muaj ib tug me nyuam, yus xav tias yus lub neej yeej tsis yog yus li lawm? Txoj kev hlub ntawm ib tug niam yeej los saum ntuj los. Tsis muaj dab tsi ntxiv uas piav tau. Tej yam uas cov niam tsev ua yeej tseem ceeb rau Yexus Khetos txoj hauj lwm. Qhov ntawd yuav txaus qhia peb hais tias txoj kev hlub zoo li no mas tej lub sij hawm peb nyiaj tsis taus thiab tej lub sij hawm yuav zoo kawg nkaus, pheej rov qab zoo li no ib lub sij hawm dhau lub sij hawm, mus txog thaum peb tau cawm tus me nyuam kawg nyob hauv lub ntiaj teb dim, ces peb thiaj hais tau nrog Yexus hais tias, ‘[Leej Txiv!] Tes hauj lwm uas koj kom kuv ua, kuv twb ua tiav lawm.’¹¹ ”

Thaum peb tseem xav txog tsab ntawv zoo nkauj ntawd, cia kuv qhia peb zaj uas hais txog cov niam tsev lub hwj huam zoo kawg nkaus uas kuv tau pom thaum kuv ua hauj lwm qhuab qhia ob peb lim tiam tas los no.

Zaj thib ib kuv yuav hais yog ib zaj lus ceeb toom, uas ua rau peb nco qab hais tias tsis yog txhua yam uas leej niam ua yuav mus zoo, tej zaum tsis yog tam sim no. Kuv nco qab txog qhov no los ntawm kev sib tham nrog ib tug phooj ywg zoo uas kuv paub tau 50 xyoos lawm uas tab tom tas sim neej tsis nyob hauv txoj kev ntseeg uas nws paub tias muaj tseeb. Kuv sim nplij nws lub siab npaum li cas los, nws tsis nyob kaj siab lug. Thaum kawg nws hais ncaj rau kuv. Nws hais tias, “Jeff, txawm mob npaum li cas thaum kuv yuav sawv ntawm Vajtswv lub xub ntiag, kuv nyiaj tsis tau qhov xav tias kuv yuav sawv ntawm kuv niam lub xub ntiag. Kuv niam xav tias txoj moo zoo thiab nws cov me nyuam muaj nqi tshaj txhua yam. Kuv ua rau nws lub siab puas tas lawm, ces ua rau kuv lub siab puas tas thiab.”

Kuv paub tseeb hais tias thaum nws tas sim neej, nws niam tau qhib siab txais kuv tus phooj ywg; cov niam thiab txiv yeej ua li ntawd. Tiam sis qhov uas kuv ceeb toom los ntawm zaj no yog qhov uas cov me nyuam yeej ua tau rau leej niam tu siab. Ntawm no muaj ib qho ntxiv uas piv rau tus Tswv. Kuv tsis tas qhia kom nej nco qab hais tias Yexus tuag vim nws muaj lub siab mob, ib lub siab uas nkees thiab nyuaj siab vim nws ris neeg ntiaj teb tej kev txhaum. Yog li ntawd, thaum peb raug kev ntxias, xav kom peb pom peb niam thiab peb tus Cawm Seej thiab ua kom nkawd tsis raug kev tu siab vim peb ua txhaum.

Zaj thib ob, kuv hais txog ib tug tub hluas uas tau mus ua tub txib tiam sis nws rov qab los tsev ntxov vim nws nyiam txiv neej thiab muaj xwm txheej txog qhov ntawd. Nws tseem tsim nyog ua tub txib, tiam sis nws ua xyem xyav txog nws txoj kev ntseeg, thiab nws txoj kev nyuaj siab thiab nws txoj kev mob ntawm sab ntsuj plig loj zuj zus tuaj. Tej lub sij hawm nws lub siab mob, tsis to taub, npau taws, thiab kho siab heev.

Nws qhov chaw tshaj tawm txoj moo zoo tus thawj tswj hwm, ceg txheem ntseeg tus thawj tswj hwm thiab tus npisov siv sij hawm ntau nrog nws thaum lawv sim pab nws, tiam sis nws yeej tsis qhia tag nrho nws qhov teeb meem rau lawv. Leej txiv nyob hauv zaj dab neeg no twb ua txhua yam nws ua tau kom pab tus me nyuam, tiam sis vim nws muaj ib txoj hauj lwm uas nws yuav tsum siv sij hawm ntev ua ces tus tub hluas thiab nws niam tau nyob ua ke mus dhau tej kev nyuaj siab uas kav ntev. Txhua hnub txhua hmo, ib lim tiam dhau ib lim tiam, ib hlis dhau ib hlis, ib xyoo dhau ib xyoo, nkawd nrhiav kev kho mob rau nws sab ntsuj plig ua ke. Thaum muaj kev chim siab (feem ntau yog nws tiam sis tej lus sij hawm yog nws niam) thiab kev ntshai (feem ntau yog nws niam tiam sis tej lub sij hawm yog nws) leej niam no ua tim khawv rau nws tus tub txog Vajtswv lub hwj chim, txog Nws lub Koom Txoos tiam sis feem ntau txog Vajtswv txoj kev hlub rau tus tub hluas no. Thiab nws ua tim khawv txog nws txoj kev hlub uas tsis tu tsis tseg uas yeej yuav tsis ploj mus. Xwv kom yuav muab ob qho tseem ceeb hauv nws lub neej koom ua ke—Yexus Khetos txoj moo zoo thiab nws tsev neeg—nws thiaj li thov Vajtswv kawg siab kawg ntsws tsis tu tsis tseg. Nws yoo mov thiab quaj, quaj thiab yoo mov, ces nws pheej mloog thiab mloog ntxiv thaum tus tub pheej qhia nws hais tias nws lub siab mob npaum li cas. Ces nws saib xyuas nws—rov qab saib xyuas nws—tiam sis lub sij hawm no ntev tshaj cuaj hlis. Zaum no nws tau xav hais tias yuav tsum khwv tas mus li kom mus dhau nws txoj kev nyuaj siab.

Tiam sis dhau los ntawm Vajtswv txoj kev tshav ntuj, tus niam tsev lub siab khov kho, thiab kev pab ntawm ntau tus thawj coj hauv lub Koom Txoos, cov phooj ywg, tsev neeg, thiab cov kws ua hauj lwm, tus niam tsev no twb pom nws tus tub rov qab los rau thaj av cog lus tseg lawm. Peb tu siab uas txoj koob hmoov no tseem tsis tau los rau tag nrho cov niam tsev txiv tsev uas nyuaj siab txog lawv cov me nyuam tej kev raug xwm txheej, tiam sis zaum no muaj kev cia siab. Thiab kuv yuav tsum hais tias tus tub hluas txoj kev nyiam txiv neej tsis tau hloov hlo—tsis muaj leej twg uas xav tias yuav hloov li ntawd. Tiam sis nws lub siab pib hloov zuj zus tuaj.

Nws pib rov qab mus koom lub koom txoos. Nws txaus siab thiab tsim nyog txais lub cim nco txog. Nws rov qab txais tau ib daim ntawv tso cai nkag tuam tsev thiab txais txoj kev hu kom ua ib tug qhia seminary thaum sawv ntxov, es nws txawj qhia zoo heev. Thiab tam sim no, tom qab tsib xyoos tas, raws li nws xav thiab nrog lub Koom Txoos txoj kev pab, nws rov qab mus ua tub txib kom ua nws txoj hauj lwm rau tus Tswv tiav lawm. Kuv tau los kua muag thaum kuv xav txog tus tub hluas no thiab nws tsev neeg txoj kev ua siab loj, txoj kev ncaj ncees, thiab kev rau siab kho nws lub neej thiab ua raws li nws txoj kev ntseeg. Nws paub tias nws ris ntau tus neeg txiaj, tiam sis nws ris txiaj loj tshaj rau ob tug Mexiyas nyob hauv nws lub neej, ob tug uas ris nws thiab txhawb nqa nws, ua hauj lwm nrog nws thiab txhiv nws dim—nws tus Cawm Seej, tus Tswv Yexus Khetos, thiab nws niam uas rau siab thiab ncaj ncees tag nrho.

Zaj kawg yog thaum tau muab lub Tuam Tsev Mexico City Mexico rov qab fij tseg tau peb lim tiam tas los. Kuv nrog Thawj Tswj Hwm Henry B. Eyring nyob ntawd thiab wb pom wb tus phooj ywg zoo Lisa Tuttle Pieper sawv nyob hauv kev sib ntsib muab fij tseg uas tshoov wb lub siab. Tiam sis nyuaj rau nws sawv ntseg vim rau qhov nws sab tes laug puag nws tus ntxhais uas xiam oob qhab, hu ua Dora, es nws sab tes xis pab Dora kom tus ntxhais zoo nkauj no yuav tuav tau ib daim phuam dawb dawb yoj mus yoj los thiab hais tej lus uas nws thiab cov tim tswv saum ntuj yuav to taub hais tias “Hauxanas, hauxanas, hauxanas rau Vajtswv thiab tus Me Nyuam Yaj.”¹²

Rau cov niam tsev nyob txhua qhov chaw, yav tas los, niaj hnub no, los sis yav tom ntej, kuv hais rau nej, “Ua tsaug. Ua tsaug vim nej yug me nyuam, pab txhawb nqa tib neeg, pab kom coj cwj pwm zoo, thiab coj yam ntxwv txog Yexus Khetos txoj kev hlub dawb paug.” Rau Niam Evas, Xalas, Lenpekas, thiab Laxees, rau Maivliag ntawm Naxales, thiab rau Leej Niam Saum Ntuj Ceeb Tsheej, kuv hais tias “Ua nej tsaug rau nej lub luag hauj lwm tseem ceeb kom muaj raws li Vajtswv tej lub hom phiaj.” Rau cov niam tsev nyob txhua qhov chaw, tsis hais cov uas raug kev txom nyem los yog, kuv hais rau nej tias, “Cia li nyob kaj siab lug. Ntseeg Vajtswv thiab nej tus kheej. Nej ua zoo dua li nej xav. Nej yog cov cawm seej nyob saum lub Roob Xi-oos,¹³ thiab zoo li nej tus Xib Hwb, nej txoj kev hlub yeej tsis ploj.¹⁴ ” Kuv qhuas tsis tau leej twg ntau tshaj kuv qhuas nej. Los ntawm Yexus Khetos lub npe, amees.