Kilang Inomwen

I men iang patehng kumwail oh kasamwo Elder Ronald A. Rasband, Elder Gary E. Stevenson, oh Elder Dale G. Renlund oh arail pwoud kan ong nan arail pwukoa.

Ni e Kokohpki Tohmw en Sounkomouro, Aiseia ntingih, “Atail tungoal lokolok kan me E lokolongki, atail medek me E toutoukihla.”¹ Kasansal kapwuriamwei en imwin rahn akan kasalehda me Sises ketdohr sampah, pwehn lokolongki dipen aramas koaros.”² Audepen Pwuhk sarawi en kawa oh mwehiet kin kadehdehki me “e ketin doarei irailla, oh lokolongkin irail, oh apwalih irail ahnsou koaros.”³ Apwoat koul sarawi kin koangoahngekin kitail en “rong kapitien atail Soundoar!⁴

Lokokongki, toutouki, apwalih, doare. Lepin mahsen pwukat kin kawehwe ni manaman Mesaia-o. Re kasalehda sawas oh koapwoaroapwoar ong atail pahn kak lella wasa me kitail anahne lella ie—ahpw sohte kak—ma sohte sawas. Wehwehn lepin mahsen pwukat pil wehwehki mehkot katoutou, apwal, oh me kin kihsang angih me konehng pwehn kawehwe duwen doadoahk en Kauno me uhdahn apwal en wehwehki, e kin sewese kitailda ni ahnsou me kitial pwupwudi, kahkahrei kitail kohwei ni ahnsou me solahr angitail, doareikitailla reh ni ahnsou me doarepetail mwomwen dohsang kitail. E mahsanih, “Semeio ketin poaroneiehdo, pwe I en pwekpwekda nin lohpwuo; … duwen me I pwekpwekda nin lohpwuo…iei aramas pahn pwekpwekda rehi.”⁵

Ahpw kumwail kak rong nan mahsen pwukat soangen mahsen me kin kawehwe duwen ehu pali en mour me kitail kin doadoahngki lepin mahsen kan duwehte lokolok oh apwalih,kolokol oh pwekpwek,doadoahk oh doarehla. Duwen Sises ah mahsanihong Sohn ni ahnsouhn Sapwellime Tohmwo, e pil kin mahsanihong kitail koaros, iei “Kilang inomwen!⁶

Rahn wet I kalohngki sang mwoahl wet dahme kalohkier mwoweo: me sohte ehu soahngen limpoak nan mour wet me rasehng limpoak mehlel en Sises Krais, duwehte limpoak en emen nohno ohng nah seri. Ni ahnsou me Aiseia koasoia duwen Mesaiao, e men kawehwe duwen limpoak en Siohwe, e ahpw kasalehda duwen poadidi en nohno. E idek, “Kakete lih emen en manokehla uhdahn nah seri pwelel?Ma lih sohte kak manokehla nah seri a iaduwen Krais, kak en manokei kitaila.⁷

Soahngen limpoak kehlail wet “me kanengamah oh kadek, …sohte kin mehwo, … ahpw … limpoak kin sewesei kitail en loalenohng apwal akan koaros, e kin sewese atail pwoson ahnsou koaros, e kin sewese kitail en liki Koht, oh en pil kanengamah ni mehkoaros.”⁸ A me keieu mwahu me limpoak wet “sohte imwi.”⁹ Kauno mahsanih, “Nahna kan oh dohl akan kakete re en mwerpeseng, ahpw ei limpoak ong uhk sohte kak en sohrala.”¹⁰ Ihme atail nohno kan pil kin nda.

Kumwail kilang, kaidehkinte me re lokolongkihte erein arail liseian ahpw re pil wie doudoulahte soweseikitail nan lokolok. Kaidehkinte ar wie kolokol seri nan kapehd ahpw erein ah mour me karehieng pwukoahn nohno uhdahn kapwuriamwei uwen eh doadoahk laud. Udahn, e pahn mie ahnsou kansensuwed me weksang met, ahpw palilaud en nohno kan kin ese sang loalerail me pwukoa sarawi wet inenen kesempwal. Mehlel nohno pwulopwul kan kin kehn uwen toutou en arail pwukoa oh uwen me e kak kasaloh.

Mie nohno pwulopwul kaselel men me apwtehn ntingdo rehi inda: “Ia mwomwen aramas eh kak inenen poakohng nah seri ni eh kin meirongkihla ah ahnsou pwehki seri men? Dahme kahrehda limpoak en aramas emen inenen kehlail me ahmw mweidala ahnsou mendahte mehn kaluwet, kapwunod, oh mongiong medek oh ahpw kankanengamahte ni limpoak? Soangen limpoak en mour wet dah me kak kahreiong uhk en pehm, mwurin ahmw naineki seri, me sang ahnsowo kohla, ahmw mour solahr pein ahmw? Limpoak en nohno uhdahn kakete sang rehn Koht. Sohte ehu wehwehpe. Dahme nohno kan kin wia udahn kesemwpwalehng doadoahk en Krais. Esehte mwo me itarete en kawewehieng kitail kahrepen uwen soangen limpoak o me kin ekeipak apwal a ekeipak mwahu, kitail pil kak iang Sises inda; maing Sahm, I wiahier doadoahk me komw ketkiongie ien wia.’¹¹ ”

Ni atail medemedewe kisin likou kaselel wet, mweidehng ie en ehukihda irair siluh me kasalehda kesempwalpen mehn kahlemeng mwahu en nohno, me I kilahng nan ahi pwukoa nan wihk siluh samwalahro:

Irair keieu me pahn kataman ong kitail me kaidehkin doadoahk koaros en nohno kin imwisengkihla peren sangete ni tepda. Mehn kataman wet tepisang ahnsou me I koasokoasoia ong emen kempoakepahi me I esehki sounpahr 50 me nektehn pahn mehla oh e pwupwilahsang Mwomwohdiso wet me e ese sang nan ah mongiong me e mehlel. Sohte lipilipil ia uwen me I song en koaloalomwahuih, e sohte kak nan kapehd nsenamwahu. Ni imwi e nda, “Jeff, mendahte e pahn apwal en kesihnen mwohn silangin Koht, ahpw ni mehlel I sehse ia mwomwen I pahn kakehng kesikesihnen mwohn ahi nohno. Rongamwahu oh nah serikan me keieu kesempwal reh. I ese me dahme I wia kauwehla ah mongiong, oh ih me I nsensuwedki.

Uhdahn I kamehlele me ni ahnsou me e mehla, ah nohno kasamwohih kempoakepahio ni limpoak; pwe ihme nohno pahpa kin wia. Wasa me kitail anahne kanahieng sang soi pwoatet, me seri kak kauwehla mongiong en arail nohno. Met kitail kak pwurehng karasahieng Koht. I sohte anahne kataman ong kumwail me Sises mekihla mongiong ohla, ni e ketin toutouki oh lokolongki dipatail kan. Eri ahnsoun songisong koaros, kitail en “kilang inatail,” oh pil atail Sounkomour oh dehr kahrehiong ira koaros en nsensuwedki dipatail kan.

Keriau, I men kosoaia mwahnakapw men me pidelong nan mission oh warohng, ahpw pein ah pilipil e pwuredohsang misin mwadang pwehki eh kin nan maski ohl oh e kehn soansuwedki dahme e mih loalle. E warohngte, ahpw ah pwoson wie tikitikla, ah katoutou kan wie toutoula, oh medek en pali ngene kin wie lalaudla. Nan kapehde kin kehn medek, ping, lingernger oh pahtou oh sangat.

Ah misin President, Stake president, oh ah pishop pwersekieng awa tohto reprepen sawas oh sengseng oh kapkapaiada ih ni arail kin sowese ih, ahpw uwen ah ohla kan, me nohn apwal en indahda me e kin wie kolokol me ekei e sohte kasalehiong irail. Ah pahpa wia uwen me e kak koaros sang palingeni pwehn sewese nah serio, ahpw pwehki eh kalapw kedirepw en doadoahk, ah nohno me kin kalapw mih mwo rehn neira pwutako ni ahnsou me e sohpahih eh kahpwal ni palingehn. Ni rahn oh ni pwong, erein wihk kei, mwuri sounpwong kei me uhd wiahla sounpahr kei, ira kin nannantiong en mwahula. Erein ahnsouhn pwunod oh nsensuwed o, (palilaud pwutako, ahpw ekei pak nohnou) oh ahnsouhn saloh (palilaud nohnou ahpw ekei pak pwutako) liho, me kin toutouki nah serio duwen me nohno kin wia, kadehdehiong nah pwutako duwen Sapwellimen Koht manaman, duwen Sapwellime Mwomwohdiso, ahpw mehlel duwen Sapwellime limpoak ong Sapwellime seri kan. Oh pil ahnsowohte e pil kadehde duwen kehlail koaros en eh limpoak ong ih. Pwehn kihpene soahng riau me keieu kesempwal pwukat—iei, rongamwahun Sises Krais oh eh peneinei—e kin poaden kapakap ni ngidingid. E kin kaisihsol oh sengiseng, sengiseng oh kaisihsol, eri e kin rongorong nah pwutako kin kapwkapwurehiong duwen eh nsensuwed laud. Eri e pwurehngehr kolokol nah pwutako—ahpw ahnsou wet kaidehn liseianki erein sounpwong duahu. Ahnsou wet e medemedewe e pahn lokolongki pwunod en nah pwutako kohkohlahte.

Ahpw sang ni kalahngan en Koht, eh ngoang mehlel, oh sawas sang rehn sounkaweid tohto en Mwomwohdiso, kempoakepahrail kan, peneinei oh semen kan, nohno menet kilangadahr nah pwutak ah powehdi eh kahpwal akan oh kehlailda ni palingehn. E kansensuwed me soahngen kapahi wet kalapw sohte kin wiawi ong nohno pahpa kan me kin pwunodki soangsoangen irair me neirail serikan mih loale, oh ineng en pwutak menet e sohte wiakintehiou wekala ni mwomw kapwuriamwei—sohte me lemehiong me met kak wiawi. Ahpw ni ekis ekis, e weliakapwala.

E tepda pwurela sarawi. E kin iang tungoale kamadipw sarawi sang pein nsene oh e warohng. E pwurehng alehdi nah temple recommend oh alehdi eh pwukoa en wiahla sounpadahk en semineri, oh e pweida mwahu. A met, mwurin sounpahr limahu, sang ni nsene oh sawas laud en Mwomwohdiso, e peki ma e kak pwurala wia doadoahk en misineri pwehn kanekehla eh doadoahk ong Kauno. I sengisengki koapwoaroapwoar, mehlel, oh ngoang en pwutak menet pwehn apwali ah kahpwal kan oh kolokol te ah pwoson. E ese me e pweipwand laud ong aramas tohto, ahpw e pil ese me e keieu pweipwandohng me riemen me wie doadoahk en sounkomour, me riemeno me lokolongki oh apwalih ih, me doadoahk laud reh oh doarehla—iei ah Sounkomour, Kaun Sises Krais, oh lih poadidi mehlel iei eh nohno.

I pahn kaimwisengkihla ehu me I kilahng sang ni kasarawi sapahl en Tehnpas Sarawi en Mexico City nan wihk siluh samwalahro. E mih wasahu me President Henry B. Eyring oh ngehi kilangada kempoakepaht Lisa Tuttle Pieper iang mih nan kemwekid en kasarawi o, me sair kiht. E apwal ohng ih en kesihnenda pwehki apali peh e kolkihda paliweren nah serepein, Dora, ahnsowohte ni apali peh songisong en kihda pali koahiek en pehn Dora pwe serepein handicap menet me sapwellimen Koht serepein masamwahu men en kak iang oaloahlki angkasi pwetepwet oh ni pwoson kihda ngile me sohte sansal ndnda, “Osana, osana, osana ong Koht oh Simpwulo.”¹²

Ohng atail Nohno kan koaros wasa koaros, mehn mahs ko, en ahnsou wet de ahnsou kokohdo, I patohwan ong kumwail, “kalahngan en amwail kin neitik, apwalihada seri, kaskuhlih mwahu noumwail seri kan, oh amwail kin kasalehda limpoak mehlel en Krais.” Ohng Nohno Ihp, Sarah, Repeka oh Reisel, Mery en Nasaret oh Ihn Nanleng, ”Kalahngan en kupwuromwail pwehki amwail pwukoa kesempwal en kapwaiada koasoandi poatopoat kan.” Ohng nohno koaros nan irair koaros, iangahki me kin mi nan apwal, I patohwan, “Popohl ong kumwail. Kahmehlel Koht oh pein kumwail. Kumwail mwahu sang dahme kumwail kin medemedewe. Kumwail me wia sounkomour kei pohn nahna en Saion,¹³ oh duwehte Kauno me kumwail kin idahwen, amwail ‘limpoak me poatopoat, sohte imwi.’¹⁴ ” I Sohte kak kapinga aramas laud sang me I kak kapingahkin kumwail. Ni mwaren Sises Krais, ahmen.