Peren oh kapai ong irail akan me kapwaiada kosoned en Kauno

Keilahn aio, Ansou me ih patohla Australia, Ih patohla wasa kaselel ehu me inenen lingan oh ndand ong dak ilok. Ansou me ih alialu ni keilen pihko ih inenen pwuriamweiki lapalahn ilok kan me sawasawa ekis keilahsang sahpwo ah kisin ilok kan kin kohkohlongodo limwahn pihko.

Ni ansou me I wia alialu kowei, ih tuhwong pwihn en dak ilok kei sang America. Re mwomwen me re insensued ki mehkot, lokolokaia laudki oh idila nan sehdo. Ni ansou me ih kalelepek rehrail ohng dahme sapwung, re idilahte likin sahpwo wasa me lapalahn ilok kan wie sawasawa.

Emen irail lingeringerda oh patohwan ong ie ien, “kilang ieila maslikio.” Oh nda “Ke kak kilang kehlo?” Ni ehi sohng kadehde, I kak kilang kehlo me perehda wasahu me lapalahn ilok kaselel kau sawasawa ie. Kehl wet e mwomwen me e wiawikihda dipwisou kehlail me deidei pene oh utuhtkihda mehn kapei kan pohn sehdo. Tohn dak iloko patohwan me ape wet eh kohsang powe oh lel ni kapin nahmwo.

Tohn dake ilok en America ko pil doula, “Se seilok dohng wasaht pak ehu nan aht mour pwe sen dakilok nan ilok laud pwukat. Se kak dak ilok nan ilok tikitik me sawasawa mas loalehn kehl wet, ahpw kehl wet karehong kiht en ahneki kahpwal en dake ilok laud kan. Se sohte wehwehki kahrepen kehl wet eh patopato wasaho. Ihte me se wehwehki me e inenen kauwehla aht seilok wet.”

Ni ansou me tohn dakilok en America ko inenen lingelingerda mehlel, ah I kasawiada emen soun dakilok me kerendo—emen ohl mehlel oh tohn sahpwo. E mwomwen sohla eh kanengamah ni eh wia rongorong kapwunod akan me wie lalaudla me pid kehlo.

Eh apw patohda oh aluhlahng pwihno. Sohte mweseisei ahpw kihda ah tungoal tupweikilahs sang nan ah kopwouo oh patohwanlang emen irail soun dakiloko oh idila wasa kehlo mie. Emen emen tohn dakiloko ahneki ansou mwahu en doadoangki tipweikilahs kau. Oh lel ai ansou. Sang ni sawas en tipweikilahs kau oh I kak kilang mwahu mehkot me i sohte kak kilang mwowehu: iehi lapalahn pako kei me sasaik kenerail mwenge limwahnte kehlo.

Pwihno eri mwadangete wahuniki dahme sansal ehr. Ohlen dakilok me maho apw alehdi nah tipweikilahso oh kokohla sang irail. Ansou me eh alialu kohkohla ah e patowan mehkot me I sohte kak manokehla: “Kumwail dehr nohn kauwe kehl wet, pwe ihte met me kak perehsang kumwail mwengehla.

Ni aht keskesihnen pohn pihk kaselel wet, se kilang pene nan pwungat. Aht madamadau inenen wekla. Kehl me mwomwen kehlail oh kakos—me mwomwen irehdi aht peren en dak ilok laud akan—wiahlahr mehkot mwahu. Ni aht wehwehkidahr keper me mihmi pahn sehdo, kehlo wialahr perehrehiu, mehn silasil, oh popohl.

Sang ni atail weweid wei pohn alen mour wet oh pwakipwaki atail ouraman kan, en koht eh kosoned oh pil kosondi kan—pil duwehte kehlo—ekei pak inenen apwal ong kitail en wehwehki. Ekei pak eh mwomwen teng oh apwal en kapwaiada, pil kauhdi ahl kan me kaperen oh kin kamwait kitail oh irail me tohto kin idawen. Wahnpoaron Paul mahsanih, “Kitail kilangki klahs me rotorot,”¹  oh ansou koaros kitail sohte kak wehwehki soahg kan me keper me sohte sansal ahpw e rir sang kitail apw karani kitail.

Ahpw Ih me “mwahngi soahng koaros”² ese iawasa me keper kan mihmi ie. E ketkiong kitail kaweid me mehlel, sang sapwellime kosoned akan oh ah kaweid kesempwal akan, pwe kitail en kak powehdi soahng kahpwal akan pwe kitail en kak kainenehla atail mour me kak pere kitail sang imwentihtih en ngehn kan de keper en dihp akan me awiawi kitail pwe ren kang kitaila.³

Kitail kin kaselehong Kauno me kitail limpoak ong Ih—sang atail pwoson Ih—lelepek nan atail wiewia kan rahn koaros oh idawen ahl me eh ketkiong kitail oh pil kapwaiada kosenned akan me Eh ketkiong kitail. Kitail pil kaselehong ih sang ni atail pwoson oh limpoak ong ih sang atail sohte udahn wehwehki kahrepen sapwelimen Koht kosoned akan oh ahl me Eh ketkiong kitail en weweid wei loale. Eh inenen mengei ong kitail en idawen sapwelimen Kauno kosonned akan ma kitail mihmi nan kehlo oh patohwan me ngihn pako kan mihmi likin kehlo. Eh pil inenen apwal ong kitail en kapwaiada kosoned akan ma kitail kak kilang soang men kamweit akan me kaselel likin kehlo. Oh mehlel nan ansou kau—ma kitail pilada en doadaohngki pwoson, oh likih Koht, oh kasalehiong atail paokohng—kitail pahn keirda laud.

Sang nan kadehde kapw, Ananias sohte wehwehki kahrepen kauno padahkihong en rapahkida oh kapaiada Saul—ohl emen me ahneki mweimwei en saliedi aramas akan me kamehlele Krais. Ah pwehki sang ni eh peikiong mahsen en Koht, Ananias wia aramas emen me Kauno kak doadoahngki ih ong sowese Paul wiliekapwla.⁴

Sang ni atail kapworopworiki Kauno, ahneki pwoson, kapwaiada kosonned en Kauno, oh weweidwei nan ahl me e kaunopieng kitail, kitail duehla aramas me Kauno kupwuriki. Ih met me kitail en duehla— wiliakapwala ni mohngiong unsek—me inenen kesempwal. Elder Elder Dallin H. Oaks kaweid kin kitail: “Eh sohte itar ong aramas men en wiwia mwahute nan eh sohte inangi. Kosoned akan, tiahk sarawi akan, oh inou kan en mwomwodiso wet eh sohte wia kosondi kei me kitail en wiahte pwe en kileldi nanleng. Rongamwahu en Sises Krais iei pilan me pahn kaselehong kitail ia mwomwen atail pahn wiahla dahme Samatail Nanleng kupwuriki kitail en wiahla.”⁵

Peik ni mehlel, iei me kitail mweidehng atail mour ni unsek oh en kaweid atail ahl nan ansou me meleilei de pil ansou kahpwal akan, sang ni atail wehwehki me kauno kak sewese kitail laud sang pein atail kohiek.

Ni ansou me kitail mweidehng Kauno soang koaros, kitail kekeirada nan peren of popohl. Nahnmwariki Benjamin kaweidki me irail akan me kapwaiada kosoned akan en kauno, oh idahwen sapwellime ahl pahn ahneki kapai oh peren ni pali koaros ei pali ngehn oh paliwar.⁶ Koht kupwuriki kitail en peren. Eh pil kupwurki kitail en ahneki meleilei. Eh pil kupwuriki kitail en pweida. Eh pil kupwuriki kitail en perehsang kasongosong kan me kapil kitail pene.

Pil ehu kawehwe tohrohr, Kauno ruwese ong kitail en dehr kahpwalehla soahng kan me irehdi atail momour apw kitail en song en esehla dadaur soahng kan me poatoapoat me pahn kamaur kitail nan mour me pahn kohdo. Ahpw kehl me Kauno ketin kaunopada pahn perehsang kitail me suwed akan me pahn kakete kaduh kitail dihla nan kapin nahmw en paisuwed. Sapwellime kosoned akan kin pwulodo sang ni eh limpoak oh kesempwalkinkitail; re wia kamwahupetail ong nan mour wet⁷ duwehte ong atail peren nan mour me pahn kohdo. Eh kosonehdi wiepen mwomwen atail pahn idawen—oh me keieu kesempwal- iei re kaselehong kitail ihs me kitail pahn wiahla ehu rahn.

Nan soahng koaros me pwung oh mehlel, Sihses Krais me wia karasaras mehlel men. Me keieu ileile nan kaselepen peik nan mour wet iei ansou me Iehroso mweidohng Samatail Nanleng soahng koaros. Pekpeki ni karakarahk en ketkisang ih kepo—pwe Ih en pil seilok nan ehu ahl tohrohr sang ahl me kosondi ong Ih—Krais kapwaiada kupwuren Kauno oh idawen ahl me Semehu kupwuriki. Ih ahl wet me elehiong eh lokolongki oh tihwohla nan Gethsemane oh Golgotha wasa me ngenin Semehu kohkohla sang. Apw ihte ahl wet me kahrehiong nan kesiluh en rahno re werweriki me “Eh iasada!”⁸ pakapakair ong saleng oh mwongiong en aramas kan me poakepoake Ih. Eh pil patehng peren lap oh meleilei me kohsang sapwelime tomw ong seri en Kauno koaros lel ni imwi. Pwe ah mweidohng Sahmo, Krais me ketkiong kitail madamadau meleilei poatoapoat, peren poatoapoat, oh mour soutik.

Ih kadehdehki me kitail seri en Koht men me limpoak. Ih kadehdehki me E kupwuriki kitail en peren, alehdi kapai oh pitsang kasongosong kan. Kahrepe wet me, Eh sewese kin kitail ahl me pahn kapwure kitailahng reh oh pil kawada kehl kan pwe en sewese perehsang kitail kasongosong kan. Ma kitail pahn wia atail kak en idawehn ahlo, kitail pahn diar nsenamwahu, peren, oh popohl. Oh ni ansou me kitail pahn mweidohng Ih soahng koaros kitail pahn wiahla aramas me Eh kupwuriki kitail en wiahla. Ni mwaren Sihses Krais, Amen.