E maita’i e e oaoa te feia e haapa’o i te mau faaueraa a te Atua

I te tahi taime i ma’iri a’e nei, a tere orihaere ai au i Auteraria, ua ratere au i te hoê o’o’a matarohia no te horue. A haere ai au i ni’a i te pae tahatai, ua faahiahia vau no te nehenehe o te fatiraa o te mau vave’a rahi i rapae i te o’o’a e te mau vave’a na’ina’i tere haere i te hiti o te pae miti.

A hahaere noa ai au i ta’u nei orihaereraa, farerei atu ra vau i te hoê pupu faahee horue marite. E mea huru riri to ratou i te tahi ohipa, ma te paraparau puai e te tohu i te pae miti. I to’u aniraa tu eaha te fifi, ua faaite ihora ratou ma te tohu i to ratou rima i te vahi fatiraa o te mau vave’a rahi rapae i te o’o’a.

« A hi’o i’ô », faahiti mai ra te hoê o ratou ma te iria. « Te ite ra oe i te aua ? » Ma te hi’o faatata atu, ua ite au i te hoê aua o te tarava nei i te tahi atu pae o te o’o’a, i te vahi mau te reira te mau vave’a rahi o te ume mai e fati ai. E au ra e, ua hamanihia te aua i te hoê materia paari o tei raraahia, tei tape’ahia e te mau poito i ni’a i te pape. Ia au i te mau taata faahee horue, e topa roa teie upe’a i raro i te moana.

Ua parau faahou te taata faahee horue marite : « Tei ô nei matou no te hoê noa taime ratere i roto i te oraraa no te faahee i te reira mau vave’a rahi. E nehenehe matou e faahee atu i te mau vave’a na’ina’i o te fati nei i roto i te o’o’a, are’a ra e ore roa ta matou e nehenehe e faahee i te mau vave’a rahi, no te aua. Aita roa’tu matou i ite no te aha te vai nei teie aua. Ta matou noa i ite, ua mau’a rahi roa to matou tere.

No te mea te rahi noa’tu ra te inoino o te mau faahee horue marite, ua haru atu to’u mata i ni’a i te tahi faahee horue tapiri mai—e taata paari-rii atu e mai te huru ra e, no te reira iho vahi—mai te mea ra e, te rahi noa’tura to’na oroma’i ore a faaroo ai i te mau amuamuraa puai no ni’a i te aua.

I te pae hopea, ua ti’a oia e ua haere atu i pihai’iho i te pupu. Ma te faahiti ore i te hoê noa a’e parau, iriti mai ra oia i te hoê hi’o fenua mai roto mai i ta’na pute tua e horo’atura i te hoê o te faahee horue, ma te faatoro i te aua. Ua hi’o atu te mau taata faahee horue tata’itahi i roto i te hi’o fenua. Ia tae mai i to’u taime, na roto i te tauturu a te hi’o faarahi, ua ti’a ia’u ia ite i te tahi ohipa aita i ti’a ia’u ia ite na mua a’e : te mau repe—te tamaa ra te mau ma’o rarahi i piha’i iho i te a’au i te tahi atu pae o te aua.

Ua maru ohie roa-tu-râ te pupu. Rave iho ra te taata faahee i ta’na hi’o fenua, fariu atu ra e haere atu ra. I to’na na-reira-raa, ua parau oia i te mau parau aore roa e mo’ehia ia’u : « Eiaha e amuamu rahi roa i te aua » ta’na ïa parau, « o te rave’a ana’e ïa no te paruru ia oe eiaha ia amuhia ».

Ma te ti’a i ni’a i teie tahatai nehenehe roa, ua taui oioi atu ra to matou mau hi’oraa. Teie aua ta matou i hi’o ei mea paari e te ta’oti’ahia—te huru faaore i te oaoa e i te aehuehu no te faahee i te mau vave’a rahi mau—ua riro ïa ei ohipa taaê mau. Ma to matou ite apî i te ati o te taponi i raro a’e noa i te miti, e horo’a te aua i teie nei te paruru, te ora e te hau.

A haere ai outou e ô vau nei na ni’a i te mau e’a o te oraraa e a imi noa ai ia faatupu i to tatou mau moemoea, te mau faaueraa a te Atua e te mau ture—mai te aua—e mea fifi te tahi mau taime ia taa i te reira. E au ra ê, e mea etaeta e te farii ore, te opanihia nei te hoê e’a hi’oraa arearea e te anaanatae e o te peehia ra e te mau taata e rave rahi. Mai ta te Aposetolo Paulo i tatara mai, « te ite arehurehu nei tatou »,¹ na roto i te hoê iteraa taoti’ahia mai te reira te huru, pinepine tatou i te ore e taa i te mau fifi rarahi o te taponi nei i raro a’e rii noa.

Are’a ra, o Oia tei « ite i te mau mea ato’a »,² ua taa maita’i tei hea teie mau ati. Ua horo’a mai ia tatou i te tauturu hanahana, na roto i Ta’na mau faaueraa e te arata’iraa here, ia ti’a ia tatou ia ape i te reira mau ati—ia nehenehe ia tatou ia ora i te hoê oraraa paruruhia i te mau tino hamata’u pae varua e i te fifi o te hara.³

E faaite tatou i to tatou here i te Atua—e i to tatou faaroo Ia’na—na roto i te rave-maita’i-raa i te mau mahana ato’a no te pee i te e’a ta’na i faataa no tatou e i te haapa’oraa i te mau faaueraa o Ta’na i horo’a mai ia tatou. E faaite taaê tatou i te reira faaroo e te reira here i roto i te mau taime aita tatou e taa maita’i i te tumu o te faaueraa a te Atua, aore ra te e’a taaê ta’na e parau nei ia tatou ia rave. E mea huru ohie ia pee i te hoê e’a i roto i te aua, ia ite ana’e tatou e, te vai nei te mau tino hamata’u e to ratou mau niho oeoe e ‘au haere noa ra na rapae mai. E mea fifi roa’tu ia tape’a noa i to tatou e’a i roto i te aua, ia ite ana’e tatou i te mau vave’a faahiahia e te faahema i te tahi atu pae. Are’a râ, i roto i te reira mau taime—taime e ma’iti ai tatou ia faaohipa i to tatou faaroo, ia tuu i to tatou ti’aturiraa i roto i te Atua, e e faaite i to tatou here Ia’na—e tupu ai tatou i te rahi e, e upooti’a.

I roto i te Faufaa apî, aita o Anania i haro’aro’a i te faaue a te Fatu ia imi e ia haamaita’i ia Saulo—hoê taata o tei mau i te parau faati’a ia tuu i te fare tape’araa te mau taata o te ti’aturi i te Mesia. Tera râ, no te mea ua haapa’o oia i te faaue a te Atua, ua riro Anania ei mauhaa i roto i te fanauraa pae varua o te aposetolo Paulo.⁴

A ti’aturi ai tatou i te Fatu, e faaohipa i to tatou faaroo, e haapa’o i Ta’na mau faaueraa, e e apee i te e’a Ta’na i faataa no tatou, e hau atu tatou i te riro i te huru taata ta te Fatu e hinaaro ia tatou ia riro mai. O teie « riroraa »—teie fariuraa o te aau—te mea faufaa a’e. Ua haapii mai o Elder Dallin H. Oaks ia tatou : « Eita e nava’i ia rave noa te hoê taata i te ohipa maita’i ma te feruri ore. E ere te mau faaueraa, te mau oro’a, e te mau fafauraa o te evanelia i te hoê tapura no te mau ohipa i tuuhia’tu i roto i te tahi afata i te ra’i ra. Te evanelia a Iesu Mesia, o te hoê ïa faanahonahoraa o te faaite ia tatou nahea ia riro mai te au i ta to tatou Metua i te Ao ra e hinaaro ia tatou ia riro mai ».⁵

Te haapa’o mau, o oia, te horo’a-taato’a-raa ia tatou Ia’na e te faati’araa Ia’na ia faatere i to tatou e’a i roto i te mau pape hau e tae noa’tu i te mau arepurepuraa, ma te ite papû e, e nehenehe Ia’na e rave hau atu no tatou ta tatou iho e ore e nehenehe e rave no tatou iho.

A farii ai tatou i To’na hinaaro, e rahi atu to tatou hau e te oaoa. Ua haapii te Arii Beniamina e, no te mau taata e haapa’o i te mau faaueraa a te Atua—« e haamaita’ihia e, e oaoa » ratou « i to te tino nei e o te Varua ato’a hoi ».⁶ Ua hinaaro te Atua ia oaoa tatou. Te hinaaro nei ia noaa ia tatou te hau. Te hinaaro nei Oia ia manuia tatou. Te hinaaro nei Oia ia ora e ia paruruhia tatou i te mau faaûruraa o te ao e haati nei ia tatou.

E nehenehe ato’a e parau e, eita te mau faaueraa a te Fatu e riro ei mau faatafifiraa toiha i raro i te miti o te titau ia tatou ia haapii ia faaoroma’i ma te au ore i roto i teie oraraa, ia faateiteihia tatou i roto i te oraraa a muri a’e. Tera râ, te riro nei te mau aua tei haamauhia e te Fatu, ei vahi tape’araa hau no tatou i mua i te mau ino e te mau huru vavahiraa o te huti ia tatou i raro i te mau hohonu o te oto. Ua horo’ahia te mau faaueraa a te Fatu na roto i te here e te faaherehere ; ua horo’ahia no to tatou oaoa i roto i teie nei oraraa⁷ e no to tatou ato’a oaoa e te faateiteiraa a muri a’e. E tapa’o te reira no te huru o te mau ohipa o te ti’a ia tatou ia rave—e hau roa’tu i te faufaa, te tauturu nei te reira ia tatou ia ite e, eaha to tatou huru e au ai.

E i roto i te mau ohipa maita’i e te ti’a, te ti’a nei Iesu ei hi’oraa maita’i a’e. Ua tupu te ohipa rahi roa a’e no te haapa’o i roto i te ao a muri atu, a auraro ai te Tamaiti i te hinaaro o te Metua. Ani atu ra Oia ma te haehaa hohonu ia hopoi-ê-hia’tu te au’a—ia nehenehe Ia’na ia haere na te tahi e’a taaê atu i tei faataahia No’na—ua auraro te Mesia i te e’a ta To’na Metua i hinaaro Ia’na ia rave. E e’a o te haere na roto ia Getesemane e i Golagota, i reira Oia i te faarururaa i te mauiui e te oto faito ore, e i reira Oia i vai ai Ona ana’e iho, a faaatea ê atu ai te varua o To’na Metua Ia’na. Are’a râ, ua hope teie e’a i roto i te hoê menema aore e tino faahou to roto, i te toru o te mahana, na roto i te mau tuo « ua ti’a faahou Oia ! »⁸ o tei ta’i i roto i te tari’a e i roto i te aau o te feia tei here Ia’na. Ua apitihia te reira i te oaoa faito ore e te au maita’i tei faatumuhia i roto i To’na Taraehara no te taato’a o te mau tamarii a te Atua e a muri noa’tu. Ma te faati’a ia horomiihia To’na hinaaro i te hinaaro o te Metua, ua horo’a mai te Mesia ia tatou i te rave’a ia farii i te hau mure ore, te oaoa mure ore, e te ora mure ore.

Te faaite papû nei au e mau tamarii tatou na te hoê Atua here. Te faaite nei au e, te hinaaro nei oia ia oaoa e ia hau e ia haamaita’ihia tatou. No reira, ua faaineine oia i te hoê e’a no tatou no te ho’i Ia’na ra, e ua faati’a Oia i te mau aua no te paruru ia tatou i te roaraa o te e’a. A rave ai tatou i te mau ohipa ato’a ia pee i te reira e’a, e iteahia ia tatou i te ora mau, te oaoa e te hau. E mai te mea e haapa’o tatou i To’na hinaaro, e riro tatou mai Ta’na i hinaaro ia tatou ia riro mai. Na roto i te i’oa o Iesu Mesia, amene.