Xaiv txoj Kev Kaj
Los ntawm Txwj Laug Vern P. Stanfill
Ntawm Pawg Xya Caum
Peb yuav tsum xaiv mloog cov yaj saub lus, paub thiab ua raws li tej kev tshoov siab ntawm sab ntsuj plig, ua raws li Vajtswv cov lus txib thiab nrhiav kev tshwm sim.
Tsis ntev tas los, kuv thiab kuv tus poj niam txiav txim siab hais tias wb yuav mus saib qhov zoo nkauj ntawm ib lub cheeb tsam ze wb lub tsev nyob hauv Montana qaum teb sab hnub poob. Peb txiav txim siab caij lub luv thij mus rau txoj Kev Hiawatha, ib txoj kev tsheb nqaj hlau uas hla cov Roob Rocky nyob Montana thiab Idaho nruab nrab. Wb xav tias yuav muaj kev lom zem nrog cov phooj ywg zoo, saib cov roob hauv pes zoo nkauj nyob hauv cheeb tsam ntawd.
Wb paub hais tias thaum peb caij lub luv thij ntawm txoj kev uas ntev li 15 mais (24 km) yuav muaj ntug laj kab choj uas hla cov kwj ha tob heev thiab tej kev qhov av ntev ntev uas tshab cov toj roob. Yog li ntawd wb tau npaj cov teeb uas khi tau rau wb ob lub kaus mom thiab lub luv thij.
Cov uas tau mus ua ntej ceeb toom wb hais tias txoj kev qhov av tsaus ntuj nti, wb thiaj yuav tsum muaj cov teeb uas ci ntsa iab heev. Thaum peb sib sau ua ke nyob pem hauv ntej ntawm kev qhov av loj loj hu ua Taft Tunnel, ib tug uas saib xyuas kev qhov av ntawd piav txog tej xwm txheej ntawm txoj kev, xws li tej kwj tob nyob ntawm ntug kev, phab ntsa uas ntxhib heev, thiab kev tsaus ntuj nti. Peb siab luv heev, peb txawm mus rau hauv txoj kev qhov av. Tom qab peb tau caij lub luv thij tau ob peb feeb xwb, kev tsaus ntuj uas lawv hais txog twb nyob ib puag ncig. Cov teeb uas kuv twb yuav tsis tsis ci txaus, thiab kev tsaus ntuj twb nqos qhov kaj ntawd thiab. Tam sim ntawd, kuv pib ntshai, ua xyem xyav, thiab pib yoob lawm.
Kuv txaj muag qhia kuv cov phooj ywg thiab tsev neeg hais tias kuv ntshai. Txawm kuv txawj caij lub luv thij los, thaum ntawd kuv xav zoo li kuv ib txwm tsis tau caij. Nyuaj rau kuv nyob ntseg ntsees thaum kuv haj yam ua xyem xyav zuj zus tuaj. Thaum kawg, tom qab kuv qhia tias kuv txhawj xeeb rau cov uas nrog kuv nyob, kuv thiaj caij ze dua rau ib tug phooj ywg uas muaj ib lub teeb uas ci ntsa iab heev. Muaj tseeb tiag, txhua tus nyob hauv peb pawg pib caij ze rau nws. Vim peb nyob ze nws thiab tso siab rau qhov kaj ntawm nws lub teeb thiab cov teeb ntawm peb pawg, peb thiaj li mus tob rau hauv kev tsaus ntuj ntawm txoj kev qhov av ntawd.
Zoo li peb mus tau ob peb teev, ua rau kuv pom ib qhov kaj me me. Tam sim ntawd, kuv pib txais kev nplij siab hais tias yuav tsis muaj teeb meem dab tsi. Kuv yeej meem mus tom ntej, tso siab rau kuv cov phooj ywg cov teeb thiab qhov kaj uas loj zuj zus tuaj. Kuv rov qab ntseeg kuv tus kheej zuj zus tuaj thaum qhov kaj loj zuj zus thiab muaj zog tuaj. Ntev heev ua ntej peb txog txoj kev qhov av kawg, kuv tsis tas muaj kuv cov phooj ywg txoj kev pab. Kev ntshai twb ploj mus thaum peb caij lub luv thij ceev mus rau qhov kaj. Kuv muaj siab tus thiab kuv twb txais kev nplij siab ua ntej peb caij mus rau hauv kev sov so thiab kev zoo nkauj ntawm sawv ntxov ntawd.
Peb nyob hauv ib lub ntiaj teb uas sim peb txoj kev ntseeg. Tej zaum peb xav hais tias peb tau npaj siab raug te kev sim siab li no—ces peb txawm kawm hais tias peb tau npaj tsis txaus. Thiab ib yam li kuv tus phooj ywg ceeb toom kuv txog kev tsaus ntuj, peb txais kev ceeb toom niaj hnub no. Cov thwj tim lub suab uas yaum kom peb npaj peb tus kheej kom tau qhov kaj uas muaj zog ntawm sab ntsuj plig.
Thiab, tej zaum peb txaj muag, nyuaj siab, los yog ua xyem xyav ntawm sab ntsuj plig thaum peb raug kev sim peb txoj kev ntseeg. Rau peb feem coob, qhov uas tej kev xav li no yuav muaj zog thiab nyob ntev li cas nyob ntawm seb peb ua li cas. Yog peb tsis ua dab tsi, kev ua xyem xyav, kev muab hlob, thiab tej zaum kev tso qhov tseeb tseg yuav ua rau peb tawm ntawm qhov kaj.
Kuv tau kawm ob peb yam tseem ceeb thaum kuv taug txoj kev qhov av ntawd. Kuv xav qhia ob peb yam xwb.
Qhov thib ib, txawm txoj kev ua xyem xyav tsaus ntuj npaum li cas, peb xaiv tau peb tus kheej yuav ua xyem xyav ntev li cas thiab kev ua xyem xyav yuav muaj hwj chim kav peb npaum li cas. Peb yuav tsum nco ntsoov tias peb Leej Txiv Saum Ntuj Ceeb Tsheej thiab Nws Leej Tub hlub peb. Nkawd yuav tsis tso peb tseg, thiab Nkawd yuav tsis cia tus yeeb ncuab kov yeej peb yog tias peb nrhiav tau Nkawd txoj kev pab. Cia li nco txog Petus thaum raug nthwv dej loj nplawm nyob hauv Dej Hiav Txwv Kalilais. Thaum Petus tab tom tog rau hauv dej hiav txwv uas txias thiab tsaus ntuj, nws paub nws raug xwm txheej thiab xaiv kiag hais tias nws yuav thov kom Yexus pab. Nws tsis tau xav seb tus Cawm Seej puas muaj hwj chim cawm nws; nws cia li hais tias, “Tus Tswv, thov koj pab kuv.”1
Nyob hauv peb lub neej tej zaum ib tug phooj ywg zoo, ib tug thawj coj, los yog yus niam yus txiv yog tus uas ncav tes pab xws li tus Cawm Seej. Thaum peb raug teeb meem nyob hauv kev tsaus ntuj nti, tsis muaj dab tsi txhaum yog tias tau ib ntus yus cia siab rau qhov kaj ntawm cov uas hlub peb thiab xav pab peb tiag tiag.
Thaum peb xav ntsoov, vim li cas peb yuav xav mloog tej lub suab ntawm cov uas peb tsis paub hais lus thuam nyob hauv tej lub tsev loj thiab dav ntawm peb lub caij nyoog thiab tsis mloog cov lus thov ntawm cov uas hlub peb tiag? Cov neeg uas xav txog qhov phem xwb nyiam rhuav thiab thuam thiab tsis nyiam tsa kom siab thiab txhawb nqa. Lawv tej lus thuam yuav chob peb lub neej, feem ntau yog los ntawm kev mloog tej suab hauv cov tshuab uas siv hluav taws xob tau ib me pliag uas lwm tus ua tib zoo npaj kom peb txoj kev ntseeg puas tsuaj. Puas txawj ntse yog peb cia peb txoj sia nyob mus ib txhis rau lwm tus saib xyuas? Puas txawj ntse yog peb hais tias cov uas tsis muaj qhov kaj hlo li los sis cov uas muaj tom txwv uas lawv tsis pub peb paub tau qhia peb? Cov neeg uas tsis qhia npe no, yog tias peb paub lawv tiag tiag, peb yuav tsis siv sij hawm rau lawv hlo li, tiam sis vim lawv siv social media, yam li tsis muaj leej twg tshuaj ntsuam, muaj neeg ntseeg lawv.
Qhov uas peb mloog cov uas thuam tej yam dawb ceev yuav ua rau peb nyob deb ntawm tus Cawm Seej txoj kev kaj uas cawm tau peb dim. Yauhas sau hais tias: “Yexus rov hais rau cov Falixais hais tias, Kuv yog qhov kaj rau neeg ntiaj teb. Tus uas raws kuv qab yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig.”2 Cia li nco ntsoov, cov uas hlub peb tiag tiag yuav pab peb txoj kev ntseeg muaj zog.
Ib yam li kuv txaj muag nyob hauv txoj kev qhov av ntawd, tej zaum peb yuav txaj muag thov kev pab thaum peb ua xyem xyav. Tej zaum lwm tus tau txais kev dag zog ntawm peb, thiab tam sim no peb xav tau kev pab. Thaum peb paub hais tias qhov kaj thiab kev nplij siab uas tus Cawm Seej muab rau peb yeej muaj nqi tshaj peb txoj kev muab hlob, ces cov thawj coj ntawm lub Koom Txoos, yus niam yus txiv, thiab cov phooj ywg zoo pab tau. Lawv twb npaj siab pab peb nrhiav tau kev pab ntawm sab ntsuj plig uas yuav txhawb nqa peb thaum peb raug tej yam uas sim peb txoj kev ntseeg.
Qhov thib ob, peb yuav tsum tso siab rau tus Tswv kom thiaj muaj dag zog ntawm sab ntsuj plig rau peb tus kheej. Peb siv tsis tau qhov kaj ntawm lwm tus mus ib txhis. Kuv paub tias kev tsaus ntuj nti nyob hauv txoj kev qhov av yuav kav tsis ntev yog tias kuv caij lub luv thij ze rau kuv tus phooj ywg thiab nrog rau kuv pawg. Tiam sis kuv twb xav tias kuv yuav mus tau kuv tus kheej tom qab kuv rov qab pom tau qhov kaj. Tus Cawm Seej qhia peb tias yog peb txav los nyob ze nws ces nws yuav txav los nyob ze peb; rau siab ntso nrhiav nws ces nws yuav pom peb; thov, ces peb yuav tau txais; khob, ces yuav qhib rau peb.3 Peb yuav tsum ua tej yam, ntseeg tias tus Tswv yuav ua raws li Nws tau cog lus tias Nws yuav txhawb nqa peb tawm ntawm qhov tsaus ntuj yog tias peb txav los nyob ze Nws. Tiam sis tus yeeb ncuab yuav sim ua rau peb xav tias peb yeej ib txwm tsis tau hnov tus Ntsuj Plig thiab yeej yuav yooj yim dua yog peb tsis siv zog ntxiv.
Thawj Tswj Hwm Dieter F. Uchtdorf hais tias: “Ua xyem xyav txog tej yam nej tsis paub tseeb ua ntej nej ua xyem xyav txog nej txoj kev ntseeg.”4 Nyob hauv kuv pawg ntseeg, ib tug tub hluas hais tias, “Muaj tej yam uas kuv xav hauv kuv lub siab uas kuv tsis pom qab piav tau tsuas yog piav hais tias tej ntawd yog los ntawm Vajtswv.” Nov yog kev ncaj ntawm sab ntsuj plig.
Thaum peb ua xyem xyav los yog muaj lus nug, peb yuav tsum nco ntsoov txog cov koob hmoov thiab tej kev xav ntawm sab ntsuj plig uas tau nkag mus rau hauv peb lub siab thiab peb lub neej dhau los thiab cia li ntseeg Leej Txiv Saum Ntuj Ceeb Tsheej thiab Nws Leej Tub, Yexus Khetos. Ua rau kuv nco txog tej lus qhia nyob hauv ib zaj nkauj qhuas Vajtswv: “Tsis ua xyem xyav, tus Tswv yeej zoo; peb twb sim nws thaum yav tas lawm.”5 Qhov uas peb tsis xav txog los yog tso tej yam ntawm sab ntsuj plig tseg uas muaj dhau los yuav ua rau peb txav mus deb ntawm Vajtswv.
Yog peb txaus siab txais yuav qhov kaj thaum muaj qhov kaj ci ntsa iab nyob hauv peb lub neej ces peb haj yam txais kev pab thaum peb nrhiav tau qhov kaj ntawd. Vaj lug kub qhia tias qhov kaj txhais li cas thiab cog lus rau cov uas txais yuav qhov kaj hais tias: Yam uas los ntawm Vajtswv los, yog qhov kaj; thiab tus uas txais qhov kaj, thiab ua raws li Vajtswv hais ntxiv mus, txais qhov kaj ntxiv; thiab qhov kaj ntawd yuav ci kaj zuj zus mus txog hnub zoo tag nrho.6 Ib yam li thaum peb yeej meem caij luv thij mus rau qhov kaj, peb rau siab ntev npaum li cas los, Nws txoj kev kaj yuav ci ntsa iab zuj zus tuaj nyob hauv peb lub neej. Ib yam li muaj qhov kaj nyob kawg ntawm txoj kev qhov av, Nws lub hwj chim yuav ua rau peb ntseeg peb tus kheej, xav rau siab mus ntxiv, txais kev nplij siab, thiab—qhov tseem ceeb—lub hwj chim kom paub hais tias Nws muaj txoj sia nyob.
Qhov thib peb, tsis muaj kev tsaus ntuj nti uas loj, phem, los yog nyuaj dhau uas qhov kaj kov yeej tsis taus. Txwj Laug Neil L. Andersen qhia hais tias: “Thaum kev phem loj zuj zus tuaj nyob hauv lub ntiaj teb no, muaj hwj chim ntawm sab ntsuj plig uas txhawb cov neeg ncaj ncees. Thaum neeg ntiaj teb tab tom tso tej yam ntawm sab ntsuj plig tseg, tus Tswv npaj ib txoj kev rau cov uas nrhiav Nws, nplij lawv lub siab ntxiv, qhia lawv paub ntxiv, thiab muaj kev ntseeg ntxiv hais tias lawv taug txoj kev zoo rau lawv sab ntsuj plig. Lub txiaj ntsim Vaj Ntsuj Plig Dawb Huv yog qhov kaj ci ntsa iab thaum kaj ntug.”7
Cov kwv tij thiab cov muam, Vajtswv tsis tau tso peb tseg kom peb raug txhua yam kev hloov hauv lub ntiaj teb no, tiam sis peb muaj hwj chim xaiv kev ntseeg kom tsis txhob ua xyem xyav. Yog peb xav tau lub hwj chim ntawm sab ntsuj plig no, peb yuav tsum xaiv mloog cov yaj saub lus, paub thiab ua raws li tej kev tshoov siab ntawm sab ntsuj plig, ua raws li Vajtswv cov lus txib thiab nrhiav kev tshwm sim. Peb yuav tsum xaiv. Thov kom peb yuav xaiv tus Cawm Seej txoj kev kaj. Los ntawm Yexus Khetos lub npe, amees.