2010–2019
Skohé e Lus
2015


Skohé e Lus

Nos mester skohé pa pone atenshon na konseho profétiko, rekonosé i aktuá riba inspirashon spiritual, ta obediente na e mandamentunan di Dios, i buska revelashon personal.

No hopi tempu pasa, mi kasa i ami a disidí ku nos mester eksperensiá mas kompleto e bunitesa di un área serka di nos kas na Montana. Nos a determiná pa tuma nos baiskelnan pa e Hiawatha Trail, ku ta un liña di ferokaril kombertí ku ta krusá e bunita Rocky Mountains entre Montana i Idaho. Nos a antisipá un dia prèt ku bon amigunan, disfrutando e bunitesa natural di e área.

Nos tabata sa ku nos keiru riba e hanchi magnífiko di 15 mia (24 kilometer) lo a inkluí kadernan rekoriendo riba di kañonnan hundu i tùnelnan largu penetrando serunan gròf. Asina ku nos a prepará nos mes ku lusnan pega na nos hèlmnan i baiskelnan.

Imagen
Pafó di e Taft Tunnel

Esunnan ku a bai promé ku nos a avisá nos ku e tùnelnan tabata skur i ku nos tabatin mester di lusnan hopi skerpi. Ora nos a agrupá dilanti di e entrada di piedra masivo di e Taft Tunnel, un kuidadó a spliká algun di e peligernan di e hanchi, inkluso trincheranan hundu riba e rantnan, murayanan gròf, i skuridat kompletu. Sin pasenshi, nos a pushá dilanti den e tùnel. Despues di a koré djis un par di minüt, e skuridat anunsiá a rondoná nos. E lusnan ku mi a kumprá a proba di ta inadekuá, i e skuridat pronto a hundi nos. Direpente, mi a kuminsá sinti ansioso, konfundí, i desorientá.

Imagen
Baiskelnan den tùnel
Imagen
Baiskel den tùnel ku lus ku ta reflehá

Mi tabatin bèrgwensa pa atmití mi ansiedat na mi amigunan i famia. Aunke un siklista eksperensiá, awor mi a sinti manera ku nunka mi a kore un baiskel promé. Mi a lucha pa keda règt miéntras mi konfushon a oumentá. Finalmente, despues di a ekspresá mi inkomodidat na esnan rònt di mi, mi tabata kapas pa yega mas serka di un lus mas poderoso di un amigu. Defakto, tur hende den e grupo a kuminsá formá un sirkulo pèrtá rònt di dje. Dor di pará serka di dje i dependiendo pa un ratu riba su lus i e lus kolektivo di e grupo, nos a pushá mas profundo den e skuridat di e tùnel.

Imagen
Lus na e fin di e tùnel

Despues di loke a sinti manera oranan largu, mi a wak un punto chikitu di lus. Kasi inmediatamente, mi a kuminsá sinti resigurá ku tur kos lo bai sali bon. Mi a kontinuá pa pushá dilanti, dependiendo riba tur dos di e lus di mi amigunan i e punto chikitu di lus ku a sigui krese. Mi konfiansa a bolbe gradualmente manera ku e lus a krese den sais i intensidat. Hopi promé ku nos a yega na e fin di e tùnel, mi no tabatin mester mas di e asistensia di mi amigunan. Tur mi ansiedat a desaparesé manera ku nos a kore mas lihé na e lus. Mi a sinti trankilo i resigurá asta promé ku nos a kore paden e mainta yen di kalor i splendor.

Nos ta biba den un mundu den kua nos ta bai eksperensiá retonan pa nos fe. Nos por sinti konfidente ku nos ta kla pa enfrentá e retonan aki—solamente pa haña sa ku nos preparashon tabata insufisiente. I djis manera mi amigu a avisá mi di e skuridat, nos a wòrdu avisá den nos dia. Stèmnan apostóliko ta urgí nos pa prepará nos mes ku e lus poderoso di forsa spiritual.

Di e mesun manera, por ta nos ta sinti bèrgwensa, inkómodo, òf konfundí spiritualmente ora nos ta kontra ku un reto di nos fe. Generalmente, e intensidat i durashon di e sentimentunan aki lo ta dependé riba nos reakshon riba nan. Si nos ta hasi nada, duda, orguyo, i finalmente apostasia por kita nos for di e lus.

Mi a siña algun lèsnan importante for di mi eksperensia den e tùnel. Mi ta bai kompartí algun di nan.

Promé, no importá kon intenso e skuridat òf duda ta, nos ta skohé kon largu i na ki grado nos ta pèrmitié pa influensiá nos. Nos mester kòrda kon hopi nos Tata Selestial i Su Yu ta stimá nos. Nan nunka lo bandoná nos, i Nan no lo permití nos pa wòrdu vense si nos ta buska Nan yudansa. Kòrda e eksperensia di Pedro den e olanan hostil di e Laman di Galilea. Miéntras ku Pedro a sinti e skuridat friu será rònt di dje, el a rekonosé su dilema di biaha i a skohé den e mes momento ei pa yama pa yudansa. E no a duda e poder di e Salbador pa salb’é; el a simplemente grita, “Señor, skapa mi.”1

Den nos bidanan, e man ekstendé di e Salbador por tuma e forma di yudansa for di un amigu di konfiansa, lider, òf mayor amoroso. Miéntras ku nos ta lucha den e skuridat, no tin nada malu den dependé pa un ratu riba e lus di esnan ku ta stimá nos i tin nos mihó interes na pechu.

Ora nos ta konsiderá ku atenshon, dikon nos lo skucha di e stèmnan sin kara i síniko di esnan den e edifisionan grandi i espasioso di nos tempu i ignorá e ruegonan di esnan ku ta realmente stimá nos? E sínikonan aki ku ta semper presente ta preferá pa kibra na lugá di elevá i pa redikulisá na lugá di halsa. Nan palabranan falsu por koba den nos bidanan, hopi biaha dor di desformashonnan elektróniko hopi kòrtiko i temporalmente, komponé kuidadosamente i intenshonalmente pa destruí nos fe. Ta sabí pa pone nos bienestar eterno den e man di hende straño? Ta sabí pa reklamá iluminashon for di esnan ku no tin lus pa duna òf ku por tin agèndanan privá skondí for di nos? E personanan anónimo aki, si presentá na nos honestamente, nunka no lo a wòrdu duná ni un momentu di nos tempu, pero pasobra nan ta probechá di media sosial, skondí for di skrudiñamentu, nan ta risibí kredibilidat sin meresé [esaki].

Nos skohementu pa duna esnan ku ta hasi bofon di kosnan sagrado atenshon lo distansiá nos for di e lus salbadó i ku ta duna bida di e Salbador. Juan a skirbi: “Jesus a bolbe dirigí palabra na e hendenan: ‘Ami ta é lus pa mundu. Esun ku sigui Mi no ta kana nunka den skuridat, ma [lo e] tin lus ku ta duna bida.’”2 Kòrda, esnan ku berdaderamente ta stimá nos ta yuda nos konstruí nos fe.

Mes manera ku mi tabata brongosá den e tùnel, nos kisas ta sinti brongosá pa puntra pa yudansa ora nos ta duda. Por ta nos ta unu na ken otronan a wak pa fortalesa, i awor [ta] nos mester yudansa. Ora nos realisá ku e lus i e konsuelo ku e Salbador por ekstendé na nos ta demasiado presioso pa pèrdè dor di orguyo, e ora ei lidernan di Iglesia inspirá, mayornan, i amigunan konfiá por yuda. Nan ta para kla pa asistí nos den gana siguransa spiritual ku lo fortalesé nos kontra e retonan di fe.

Di dos, nos mester konfia den Señor pa nos por desaroyá fortalesa spiritual den nos. Nos no por dependé riba e lus di otronan pa semper. Mi tabata sa ku e skuridat den e tùnel no tabata dura si mi tabata sigui kore banda di mi amigu i den e siguridat di e grupo. Pero mi speransa tabata pa ta kapas pa sigui riba mi mes asina mi tabata por a wak e lus. Señor ta siña nos, “Bini serka di mi i mi lo bini serka di boso; buska mi diligentemente i boso lo haña mi; puntra, i boso lo risibí; bati, i e lo wòrdu habrí pa boso.”3 Nos mester aktua, sperando ku Señor lo kumpli Su promesa pa hisa nos for di e skuridat si nos ta bini serka djE. E atversario, sinembargo, lo trata di konvensé nos ku nos nunka a sinti e influensia di e Spiritu i ku e lo ta mas fásil pa no purba mas.

Presidente Dieter F. Uchtdorf a konsehá nos “duda bo dudanan promé ku bo ta duda bo fe.”4 Den mi bario na kas, un hòmber hóben a bisa resientemente, “Tin kosnan ku mi a sinti ku no por wòrdu spliká den niun otro manera mas ku nan ta di Dios.” Esei ta integridat spiritual.

Ora nos ta enfrentá ku preguntanan òf ta tentá pa duda, nos mester kòrda e bendishonnan i sentimentunan spiritual ku a penetrá nos kurasonnan i bidanan den pasado i pone nos fe den Tata Selestial i Su Yu, JesuCristu. Mi ta kòrda e konseho duná den un himno familiar: “De Dios no dudamos en nada; [porque] probamos ya bien Su bondad.”5 Pa ignorá i deskontá eksperensianan spiritual den pasado lo distansiá nos for di Dios.

Nos búskeda pa lus lo wòrdu mehorá pa nos boluntat pa rekonosé ora e ta bria den nos bidanan. Skritura moderno ta definí lus i ta duna e promesa na esnan ku ta aksept’é: “Loke ta di Dios ta lus; i esun ku ta risibí lus, i kontinuá den Dios, ta risibí mas lus; i e lus ku ta krese mas briante i kla te na e dia perfekto.”6 Nèt manera ora nos a sigui kore serka e lus, mas ku nos ta persistí, mas kla Su influensia ta bira den nos bidanan. Manera e lus na e fin di e tùnel, Su influensia lo trese nos konfiansa, determinashon, konsuelo, i—mas importante—e poder pa sa ku E ta biba.

Di tres, no tin skuridat asina denso, asina menasando, òf asina difísil ku e no por wòrdu vense pa lus. Elder Neil L. Andersen resientemente a siña: “Miéntras ku maldat ta oumentá den e mundu, tin un poder spiritual ku ta kompensá pa esnan hustu. Miéntras e mundu ta slep for di su ankra spiritual, Señor ta prepará e kaminda pa esnan ku ta busk’É, ofresiendo nan siguransa, konfirmashon, i konfiansa mas grandi den e direkshon spiritual ku nan ta biahando. E don di Spiritu Santo ta bira un lus mas briante den e krepuskulo ku ta saliendo.”7

Rumannan, nos no a wòrdu laga nos so pa wòrdu influensiá pa kada antoho i kambio den e aktitut di e mundu, pero nos tin e poder pa skohe kreensia over di duda. Pa por tin akseso na poder spiritual ku ta kompensá primintí, nos mester skohé pa pone atenshon na konseho profétiko, rekonosé i aktuá riba inspirashon spiritual, ta obediente na e mandamentunan di Dios, i buska revelashon personal. Nos mester skohé. Laga nos skohé e lus di nos Salbador. Den e nòmber di JesuCristu, amèn.