“Xaiv Los Mus Ua Tim Khawv txog Kuv lub Npe”
Los ntawm Txwj Laug David A. Bednar
Los ntawm Pawg Kaum Ob tug Thwj Tim
Yog ib qho zoo kawg nkaus uas cov txiv neej laus uas muaj tswv yim heev thiab coj zoo ntawm sab ntsuj plig ua thawj coj siab tshaj plaws nyob hauv Yexus Khetos lub Koom Txoos uas Nws muab txum tim rov qab los.
Nyob rau xyoo 1996 Thawj Tswj Hwm Gordon B. Hinckley ua xam phaj nyob hauv kev tshaj tawm xov xwm uas ncha mus thoob plaws lub teb chaws hu ua 60 Minutes. Mike Wallace, ib tug kws qhia xov xwm uas txawj ntse thiab rau siab, nws nug Thawj Tswj Hwm Hinckley txog ob peb yam tseem ceeb.
Thaum nkawd txoj kev xam phaj yuav luag tas, Mr. Wallace hais tias, “Muaj ib txhia hais tias, ‘Nov yog cov neeg laus txoj kev kav. Yog ib lub koom txoos uas cov txiv neej laus kav.’”
Thawj Tswj Hwm Hinckley zoo siab teb kiag hais tias, “Puas yog ib qho zoo kawg uas muaj ib tug txiv neej laus ua tus thawj coj, ib tug txiv neej uas txawj txiav txim thiab tsis raws luag qab rau ub rau no?” (tshaj tawm thaum lub Plaub Hlis Ntuj 7, 1996).
Kuv lub hom phiaj yog piav vim li cas yog ib qho zoo kawg nkaus uas cov txiv neej laus uas muaj tswv yim heev thiab coj zoo ntawm sab ntsuj plig ua thawj coj siab tshaj plaws nyob hauv Yexus Khetos lub Koom Txoos uas Nws muab txum tim rov qab los—thiab vim li cas peb yuav tsum “hnov” thiab “cuab pob ntseg” (Mauxiyas 2:9) rau cov txiv neej no tej lus qhia cov uas tus Tswv tau xaiv kom ua tim khawv txog [Nws] lub npe … mus rau txhua haiv neeg, txhua xeem neeg, txhua yam lus, thiab txhua yam neeg (Q&K 112:1).
Kuv thov Vajtswv kom tus Vaj Ntsuj Plig Dawb Huv qhia peb thaum peb xav txog qhov tseem ceeb no.
Ib Zaj Lus Qhia uas Kav Mus Tas Sim Neej
Kuv muaj cai hais txog qhov no vim kuv muaj kev xam pom txawv ntawm lwm tus. Tau 11 xyoo tas los, kuv yog tus muaj hnub nyoog hluas tshaj lwm tus nyob hauv Pawg Kaum Ob tug Thwj Tim. Thaum kuv ua hauj lwm ua ib tug Thwj Tim, cov txiv neej uas ua hauj lwm hauv Thawj Pawg Thawj Tswj Hwm thiab Pawg Kaum Ob tug Thwj Tim feem ntau muaj 77 xyoo—yog hnub nyoog laus tshaj ntawm ib pawg Thwj Tim tau 11 xyoos nyob hauv lub caij nyoog kawg no.
Cov nyob hauv Pawg Kaum Ob tug Thwj Tim nrog kuv tau foom koob hmoov rau kuv los ntawm lawv tej lub tswv yim thiab tej hauj lwm ua thwj tim, lawv lub neej thiab lawv tej kev ua lawv tej hauj lwm. Ib lub sij hawm thaum kuv sib tham nrog Txwj Laug Robert D. Hales qhia hais tias kuv tau muaj cib fim zoo los kawm ntawm thiab ua hauj lwm nrog cov thawj coj no.
Ob peb xyoos tas los kuv tau siv hnub Sunday tav su nrog Txwj Laug Hales nyob hauv nws lub tsev thaum nws raug mob sab heev. Wb sib tham txog wb tsev neeg, peb tej luag hauj lwm, thiab tej yam tseem ceeb.
Muaj ib zaug kuv nug Txwj Laug Hales, “Koj yog ib tug txiv, ib tug txiv tsev, ib tug navkilas, ib tug kws tsav nyab hoom, ib tug uas lag ua luam, thiab tus thawj coj hauv lub Koom Txoos. Thaum koj laus zuj zus tuaj ua rau koj sab cev nqaij daim tawv tsis muaj zog koj tau kawm dab tsi?”
Txwj Laug Hales tos me ntsis thiab teb hais tias, “Thaum yus ua tsis tau tej yam uas yus ib txwm tau ua, ces yus cia li ua tej yam uas tseem ceeb tshaj plaws xwb.”
Nws lo lus teb kuv uas yooj yim thiab meej heev ua rau kuv xav tsis thoob. Tus thwj tim uas nrog kuv ua hauj lwm uas kuv hlub heev tau qhia kuv ib zaj lus uas kav mus tas sim neej—ib zaj uas tau kawm los ntawm kev txom nyem ntawm sab cev nqaij daim tawv thiab kev nrhiav ntawm sab ntsuj plig.
Tib Neeg tej Teeb Meem thiab txoj Kev Mob
Tej teeb meem ntawm sab cev nqaij daim tawv uas yeej ib txwm muaj thaum yus laus zuj zus tuaj yeej yog tej yam uas pab yus kawm thiab muaj laj lim tswv yim ntawm sab ntsuj plig. Tej yam uas neeg feem coob ntseeg tias ua rau cov tub qhe no ua tsis taus lawv tej hauj lwm tej zaum rais los ua tej yam uas ua rau lawv muaj zog tshaj plaws. Tej yam yus lub cev nqaij daim tawv ua tsis tau pab ua rau yus txawj pom kev ntawm sab ntsuj plig. Qhov uas yus tsis muaj zog ntaus pab yus paub tej yam twg tseem ceeb heev. Qhov uas yus ua tsis taus ntau yam ua rau yus tsom ntsoov rau tej yam uas tseem ceeb tshaj plaws.
Ib txhia hais tias yuav tsum muaj cov thawj coj ntxiv uas hluas thiab muaj zog nyob hauv lub Koom Txoos kom pab kov yeej tej teeb meem loj nyob hauv lub ntiaj teb niaj hnub no. Tiam sis tus Tswv tsis siv tib neeg tej lub tswv yim thiab tej kev ua thawj coj kom muaj raws li Nws tej lub hom phiaj (saib Yaxayas 55:8–9). Peb cia siab ntsoov hais tias tus Thawj Tswj Hwm thiab lwm tus thawj coj ntawm lub Koom Txoos yuav yog cov txiv neej uas laus me ntsis thiab paub mloog tus ntsuj plig.
Tus Tswv txoj kev kav dhau los ntawm tej pawg sab laj nyob hauv Nws lub Koom Txoos pab kho tej xwm txheej uas muaj los ntawm tib neeg tej kev qaug zog. Tsis tas li ntawd, tej kev mob kev nkeeg ntawm cov txiv neej no, qhia hais tias tej kev tshwm sim uas los rau lawv thiab dhau los ntawm lawv twb yog los ntawm Vajtswv los. Muaj tseeb tiag, Vajtswv hu cov txiv neej no los ntawm kev qhia tej uas yuav muaj los yav tom ntej (saib Tej Nqe Kev Ntseeg 1:5).
Tus Yam Ntxwv Npaj
Los ntawm kuv cov Kwv Tij kuv twb saib ib feem ntawm tus Tswv lub hom phiaj kom cov txiv neej laus uas muaj peev xwm txiav txim ua hauj lwm ua cov thawj coj ntawm lub Koom Txoos. Tus Tswv, tus uas cov txiv neej no sawv cev rau, ua hauj lwm rau, thiab hlub, Nws tau qhia lawv tau ntev lawm. Lawv tau kawm kom to taub tus Vaj Ntsuj Plig Dawb Huv yam lus thiab tus Tswv txoj kev muab kev tshwm sim rau lawv. Cov txiv neej no tau ua raws li ib tug txheej txheem uas ua rau lawv muaj lub zeem muag pom meej, muaj laj lim tswv yim zoo, hlub cov neeg nyob hauv txhua lub teb chaws txawm pluag los nplua nuj los yog, thiab qhia lawv paub tias tau muab txoj moo zoo Txum Tim Rov Qab Los tiag tiag.
Kuv pheej pom kuv cov Tij Laug rau siab ntso ua lawv tej lub luag hauj lwm thaum lawv sab cev nqaij daim tawv raug mob heev. Cov txiv neej no tsis tau dim kev txom nyem. Tiam sis, lawv tau koob hmoov thiab kev dag zog kom mus tom ntej yam li ncaj ncees thaum lawv raug mob thiab raug txom nyem.
Thaum kuv ua hauj lwm nrog cov uas sawv cev rau tus Tswv no, kuv twb kawm hais tias qhov lawv xav tau tshaj yog kev paub thiab kev ua raws li peb Leej Txiv Saum Ntuj Ceeb Tsheej thiab Nws Leej Tub lub siab nyiam. Thaum peb sib sab laj, peb tau txais kev tshoov siab thiab txiav txim siab uas los ntawm qhov kaj thiab qhov tseeb ntau tshaj tib neeg lub tswv yim, tej kev xav, thiab kev ua neej. Thaum peb koom siab ua hauj lwm ua ke kho tej teeb meem loj, tus Vaj Ntsuj Plig Dawb Huv yeej pab peb haj yam to taub tej teeb meem ntawd.
Txhua hnub kuv tau koob hmoov saib tej cwj pwm, tej txuj ci thiab tej xeeb ceem ntawm cov thawj coj no. Ib txhia nyuaj siab thiab lawv txoj kev ntseeg ploj mus vim muaj tej yam uas cov Tij Laug ua tsis taus. Kuv xav tias tej yam ntawd txhawb nqa kuv thiab ua rau kuv txoj kev ntseeg loj zuj zus tuaj.
Ib zaj Lus Qhia Ntxiv
Nim no kuv twb saib rau tus ntawm kuv cov Tij Laug ua lawv tej hauj lwm qhuab qhia hauv lub ntiaj teb no tiav lawm thiab mus txais tej hauj lwm tshiab nyob hauv lub ntuj ntsuj plig: Thawj Tswj Hwm James E. Faust, Thawj Tswj Hwm Gordon B. Hinckley, Txwj Laug Joseph B. Wirthlin, Txwj Laug L. Tom Perry, Thawj Tswj Hwm Boyd K. Packer, thiab Txwj Laug Richard G. Scott.
Cov Tij Laug rau siab no tau muab “tag nrho [lawv] tej siab tej ntsws” (Oonis 1:26) kom ua tim khawv txog Yexus Khetos lub npe rau tag nrho lub ntiaj teb. Lawv txhua zaj lus qhia yeej muaj nqi kawg.
Thaum lawv ua lawv tej hauj lwm qhuab qhia yuav luag tiav lawm cov tub qhe no tau qhia lub ntsiab ntawm sab ntsuj plig txog tej yam uas lawv tau kawm tom qab lawv tau rau siab ua hauj lwm tau ntau xyoo lawm. Cov thawj coj tau qhia tej yam tseeb uas muaj nqi heev thaum ib lub sij hawm uas ib txhia ntseeg tias lawv tsis muaj peev xwm pub ntau.
Cia li xav txog tej lus qhia kawg ntawm cov yaj saub tseem ceeb nyob hauv vaj lug kub. Piv txwv hais tias, Nifais xaus nws zaj lus ceev xwm txheej thaum nws sau tej lus no: “Vim tus Tswv tau txib kuv li no, thiab kuv yuav tsum ua raws li” (2 Nifais 33:15).
Thaum nws yuav luag tas sim neej no, Yakhauj ntuas hais tias:
“Nej cia li hloov siab lees txim mog, thiab cia li nkag mus rau hauv lub qhov rooj nqaim mog, thiab kam tiag mus twj ywm rau hauv txoj kev nqaim, mus txog thaum uas nej yuav tau txais txoj sia nyob mus ib txhis.
“Au cia li ua neeg ntse; kuv tseem yuav hais tau dab tsi ntxiv thiab?” (Yakhauj 6:11–12).
Thaum Maulaunais ua nws txoj hauj lwm npaj cov phiaj tiav nws cia siab tos ntsoov Yexus txoj Kev Sawv Rov Los: “Tsis ntev no kuv yuav mus so nyob hauv Vajtswv qhov chaw uas nyob kaj siab lug, mus txog thaum kuv tus ntsuj plig thiab lub cev yuav rov los sib koom ua ke; thiab kuv raug coj los li tus uas kov yeej dhau tej cua, los ntsib nej nyob ntawm Yehauvas tus zoo kawg nkaus lub rooj txiav txim, tus Txiav Txim uas Nyob Mus Ib Txhis ntawm cov neeg uas muaj sia thiab cov neeg tuag” (Maulaunais 10:34).
Peb tau koob hmoov vim peb kawm tau los ntawm cov yaj saub thiab cov thwj tim hauv lub caij nyoog kawg no tej lus qhia thiab zaj lus tim khawv kawg. Niaj hnub no lawv tej npe tsis yog Nifais, Yakhauj, thiab Maulaunais—lawv hua ua Thawj Tswj Hwm Faust, Thawj Tswj Hwm Hinckley, Txwj Laug Wirthlin, Txwj Laug Perry, Thawj Tswj Hwm Packer, thiab Txwj Laug Scott.
Kuv tsis hais tias zaj lus kawg ntawm cov txiv neej no yog tej zaj lus tseem ceeb tshaj plaws ntawm tag nrho lawv tej hauj lwm qhuab qhia. Tiam sis, tag nrho tej yam uas lawv tau kawm ntawm sab ntsuj plig thiab tej yam lawv raug hauv lub neej no ua rau cov thawj coj no muaj peev xwm qhia txog tej qhov tseeb uas kav mus ib txhis yam li muaj hwj chim heev kom yus paub lawv hais tseeb tiag.
Nyob hauv zaum kawg uas nws hais lus nyob hauv lub tuam rooj sab laj, thaum lub Plaub Hlis Ntuj xyoo 2007, Thawj Tswj Hwm Faust hais tias:
“Tus Cawm Seej twb muab kev kaj siab lug rau peb dhau los ntawm Nws txoj Kev Theej Txhoj, tiam sis peb yuav txais tau tsuas yog peb txaus siab muab kev npau taws, kev ntshaw, thiab kev ua pauj tso tseg. …
“Cia peb nco ntsoov tias peb yuav zam txim rau lwm tus kom txais tau kev zam txim. … Nrog kuv lub siab lub ntsws tag nrho, kuv ntseeg lub hwj chim kho neeg uas yuav los rau peb thaum peb ua raws li tus Cawm Seej tej lus qhia kom zam txim rau txhua tus neeg [ Q&K 64:10 ]” (“The Healing Power of Forgiveness,” Liahona, Tsib Hlis Ntuj 2007, 69).
Thawj Tswj Hwm Faust zaj lus yog ib zaj lus qhia uas kav mus tas sim neej los ntawm ib tug uas kuv hlub thiab ib tug txiv neej uas txawj zam txim tshaj txhua tus uas kuv paub.
Thawj Tswj Hwm Hinckley ua tim khawv nyob hauv nws lub tuam rooj sab laj kawg thaum lub Kaum Hli Ntuj xyoo 2007 hais tias: “Kuv ua pov thawj txog qhov uas Vajtswv tau hu tus Yaj Saub Yauxej Xamiv, txog nws tej hauj lwm, txog qhov uas nws cov ntshav nrog kom muab nws zaj lus tim khawv txog qhov tseeb uas nyob mus ib txhis zwm cia. Peb yuav tsum txiav txim siab seb peb puas kam txais qhov tseeb ntawm Thawj Zaj Ua Yog Toog Pom thiab tej yam uas muaj tom qab. Qhov uas lub Koom Txoos muaj tseeb yeej nyob ntawm seb yus yuav teb lo lus nug ntawd li cas. Yog tias qhov no muaj tseeb, thiab kuv ua tim khawv qhov no yeej muaj tseeb, ces txoj hauj lwm uas peb ua tam sim no yog txoj hauj lwm tseem ceeb kawg nkaus nyob hauv lub ntiaj teb” (“The Stone Cut Out of the Mountain,” Liahona, Kaum Ib Hlis Ntuj 2007, 86).
Thawj Tswj Hwm Hinckley zaj lus tim khawv yog ib zaj lus qhia uas kav mus tas sim neej los ntawm ib tug txiv neej uas kuv hlub thiab paub tias yog Vajtswv ib tug yaj saub.
Txwj Laug Wirthlin hais nws zaj lus kawg nyob hauv lub tuam rooj sab laj thaum lub Kaum Hli Ntuj xyoo 2008.
“Kuv tseem nco txog [kuv niam] tej lus ua yeej nrog kuv nyob ‘Txawm tias muaj li cas los, cia li zoo siab.’
“… Yog tias peb saib rau ntawm qhov zoo ces tej kev cov nyom no yuav yog ib txoj koob hmoov rau peb lub neej. …
“Thaum peb kawm txoj kev luag, sim saib qhov nyob mus ib txhis, to taub txoj ntsiab cai ntawm kev muaj nqi zog thiab txav ze rau ntawm peb Leej Txiv Saum Ntuj Ceeb Tsheej, peb yuav nyiaj tau tej kev sim siab thiab tej kev nyuaj siab. Peb yuav hais zoo ib yam li kuv niam hais tias, ‘Txawm tias muaj li cas los, cia li zoo siab’” (“Come What May, and Love It,” Liahona, Kaum Ib Hlis Ntuj 2008, 28).
Txwj Laug Wirthlin zaj lus yog ib zaj lus qhia uas kav mus tas sim neej los ntawm ib tug txiv neej uas kuv hlub thiab ua nws lub neej qhia peb paub kov yeej tej yam nyuaj dhau los ntawm kev ntseeg tus Cawm Seej.
Txwj Laug Perry sawv ntawm lub sam thiaj rau lub hlis tas los. Thaum lub sij hawm ntawd peb yeej tsis tau xav hais tias yog zaum kawg uas nws yuav hais lus nyob hauv ib lub tuam rooj sab laj.
“Cia kuv xaus lus ua tim khawv (thiab vim kuv muaj cuaj caum xyoo kuv thiaj hais tau li no) kuv yim laus zuj zus tuaj, kuv yim pom tau tias tsev neeg yog lub ntsiab ntawm lub neej no thiab yog tus yuam sij ntawm txoj kev zoo siab nyob mus ib txhis li.
“Kuv ua Vajtswv tsaug rau kuv tus poj niam, rau kuv cov me nyuam, thiab kuv cov me nyuam xeeb ntxwv, thiab rau tag nrho … cov kwv tij neej tsa uas ua rau kuv lub neej zoo kawg thiab nyob mus ib txhis li. Kuv ua tim khawv txog qhov tseeb nyob mus ib txhis thiab dawb ceev no” (“Vim Li Cas Kev Sib Yuav thiab Tsev Neeg Muaj Nuj Nqi—Nyob Txhua Qhov Txhia Chaw hauv lub Ntiaj Teb,” Liahona, Tsib Hlis Ntuj 2015, 42)
Txwj Laug Perry zaj lus yog ib zaj lus qhia uas kav mus tas sim neej los ntawm ib tug txiv neej uas kuv hlub thiab to taub dhau los ntawm nws lub neej hais tias tsev neeg thiab kev zoo siab nyob mus ib txhis yeej koom ua ke.
Nyob hauv lub rooj sab laj rau lub hlis tas los Thawj Tswj Hwm Packer hais txog Leej Txiv txoj hau kev zoo siab, tus Cawm Seej txoj Kev Theej Txhoj, thiab tsev neeg uas nyob mus ib txhis:
“Kuv ua tim khawv tias Yexus yog tus Khetos thiab yog Vajtswv Leej Tub. Nws sawv ua tus thawj coj rau Nws lub Koom Txoos no. Dhau los ntawm Nws txoj Kev Theej Txhoj thiab lub hwj chim ntawm lub pov thawj hwj, tej tsev neeg uas pib hauv lub neej no yuav nyob ua ke mus ib txhis li. …
“Kuv zoo siab ua Vajtswv tsaug rau … txoj Kev Theej Txhoj uas ntxuav tau txhua qhov tsis huv txawm nyuaj npaum li cas los yog ntev li cas los yog tau ua ntau zaus npaum li cas los. Txoj Kev Theej Txhoj yuav tso nej dim kom nej muaj peev xwm mus tom ntej, yam li dawb huv thiab tsim nyog” (“Txoj Hau Kev Zoo Siab,” Liahona, Tsib Hlis Ntuj 2015, 28)
Thawj Tswj Hwm Packer zaj lus kawg yog ib zaj lus qhia uas kav mus tas sim neej los ntawm ib tug txiv neej uas kuv hlub thiab pheej tshaj tawm tias lub ntsiab “ntawm tag nrho tej hauj lwm hauv lub Koom Txoos yog qhov uas ib tug txiv neej thiab ib tug poj niam yuav zoo siab nrog nkawd cov me nyuam nyob hauv tsev thiab ua kev sib khi rau lub neej no thiab nyob mus ib txhis” ( Liahona, Tsib Hlis Ntuj 2015, 26)
Txwj Laug Scott nyob hauv nws lub tuam rooj sab laj kawg thaum lub Kaum Hli Ntuj xyoo 2014, hais tias: “Peb twb los rau hauv lub ntiaj teb no kom raug tej kev sim siab. Tej kev sim siab pab peb ua neeg zoo li peb Leej Txiv Saum Ntuj Ceeb Tsheej, thiab Yexus Khetos txoj Kev Theej Txhoj ua rau peb nyiaj tau tej kev sim siab ntawd. Kuv ua tim khawv tias thaum peb rau siab los cuag Nws, peb nyiaj tau txhua yam kev ntxias, txhua yam kev nyuaj siab, txhua yam kev sim siab” (“Cia Li Muab Siab Rau Ntseeg Ua Ntej Txhua Yam,” Liahona, Kaum Ib Hli Ntuj. 2014, 94)
Txwj Laug Scott zaj lus yog ib zaj lus qhia uas kav mus tas sim neej los ntawm ib tug txiv neej uas kuv hlub thiab ib tug uas ua tim khawv txog Khetos lub npe nyob hauv tag nrho lub ntiaj teb no (saib Q&K 107:23).
Kev Cog Lus thiab Zaj Lus Tim Khawv
“Txawm yog los ntawm kuv lub suab los sis los ntawm kuv cov tub qhe lub suab, yeej zoo ib yam” (Q&K 1:38). Thov kom peb yuav mloog thiab ua raws li tej qhov tseeb mus ib txhis uas cov tus Tswv tso cai sawv Nws cev qhia rau peb. Thaum peb ua li ntawd, kuv cog lus tias qhov no yuav txhawb nqa peb txoj kev ntseeg Leej Txiv Saum Ntuj Ceeb Tsheej thiab Yexus Khetos, thiab peb yuav txais kev pov hwm thiab kev coj ntawm sab ntsuj plig kom pab peb.
Kuv ua tim khawv kawg siab kawg ntsws hais tias tus Khetos uas muaj txoj sia nyob coj Nws lub Koom Txoos uas tau muab txum tim rov qab los dhau ntawm Nws cov tub qhe uas Nws tau xaiv kom ua tim khawv txog Nws lub npe. Kuv ua tim khawv li no los ntawm Yexus Khetos lub npe dawb ceev, amees.