“Pilipilda En Kadehdehki Mwarei”
Sang Elder David A. Bednar
Pwihn en Wahnpoaron Ehk Riemeno
E kaselel mehlel aramas me mahlahr oh koaieklahr ni palingen oh direki lamalam mwahu, en mihmi nan pwihn en Kaun laud kan nan Mwomwohdiso en Sises Krais
Nan pahr 1996 (Kid duepwiki duweisek weneu) President Gordon B. Hinckley pwarada nan kasdo en news me kahdaniki 60 Minutes. Mike Wallace, me semen nan pelien nting oh kapeidek kan, kapeidak ih ier President Hinckley duwen ire kesempwal kei.
Ni ara koasoakoasoaipenehr ah kereniong imwseklahro, Wallace dene, “ Mie ekei me kin koasoaia, ‘Pwihn wet poahsoan kihda aramas me mah. E wia mwomwohdiso me ohl mah kei me katakatanga.’”
President Hinckley sapengki ni popohl oh soh peikasal koasoaia, “E sou mwahu en mie ohl me koahieklahr en moange pwihn ehu, me direki lamalam mwahu oh me sohte kin wekiwekidengkiseli sang ni soangsoangen padahk kan?” (Prohdkahs en Apr. 7, 1996)
Kahrepen ahi padahk wet iei ien kawehwehda dahme e inenen mwahu ki me aramas me mahlahr oh koaieklahr ni palingen oh direki lamalam mwahu, en mihmi nan pwihn en Kaun laud kan nan Mwomwohdiso en Sises Krais me kopwurpwurdohr wet—oh dahme kitail pahn anahne rong oh peikiong (Mosiah 2:9) padahk en ohl pwukat me Kauno ketin “piladahr en kadehdehki Mware… ni wehi koaros, lokaia koaros, oh aramas koaros”(D&C 112:1).
I kapakapki me kitail koaros pahn alehdi kaweid sang Ngehn Sarawio ni atail pahn koasoaiapene ire kesempwal wet.
Kaweid en nan Mour
I koasoaia ire wet sang ni karepe ehu me I pilkidahr. Erein pahr eisek ehu, ngehi me wia towe keieu pwulopwul nan Pwihn en Wahnpoaron Ehk Riemeno. Nan erein pahr me I wie papahki, ih wen sounpar me emen emen ohl kin mih loale nan arail wie papah nan Presedensi Keieu oh Pwihn en Wahnpoaron Ehk Riemen iei sounpar Isihsek-Isuh—Sounpar keieu laud nan Wahnpoaron pwukat nan erein sounpar Eisek-Ehu en nan dih wet.
I alehdier kapai laud sang ni pwihn en papah pwukat, mwomwohdiso, sang pein ahi, oh ekei irair tohrohr kan me I lelohngehr sang ni ei papah nan pwihn wet. Karasaras ehu me I ahnkihdier sang rehn iengei Elder Robert D. Hales kasaledahr ansou mwahu me I ahnekihdi ien kaskuhl sang oh papahki kaun pwukat.
Pahr kei samwalahro I mwomwaitih Elder Hales nimwehu ni mwurin sowas en Rahn Sarawi ehu ni ah ahpwte mwamwahudahsang ah soumwahu doar ehu. Se koaskoasoaiapene aht peneinei kan, pwukoah kan nan pwihn en Wahnpoaron ehk riemeno, oh soahng kesempwal tohto me se lelohngehr.
I kalelapangkiong Elder Hales, “ Komw wia ohl pwopwoud pweida, pahpa, sounmwadong, kaun en nan business oh Kaun en mwomwohdiso pweida men. Soahng dah kan me komw koledi ni ahmw mahmahla oh pil sohla kak wia soangen mwokid kei me paliwaromwen kak wia?”
Elder Hales nenenlah oh ih sapeng, “ Ni ansou me ke sohlahr kak wia dahme ke kin kalap wiahda kan, ke uhd wiah te dahme katapan akan.”
I pwuriamwei kihla soangen pasapeng mengei oh sansal me e wiahu. Riei sounpapah limpoak o ehukiong iehier padahk en mour—padahk ehu me alahldi sang ni kahpwal en luwetalahn paliwar oh ni raparapahki pasapeng me pidada ohng mour en pali ngehn.
Ahn Aramas Luwet oh Sou Itar kan
Paliwar ah sohlar kak wia soahng tohto pwehki sang ni mahmahlan sounpar kin kak uhd wiahla mehkot mwahu ohng ansou en kasukuhl en palingehn oh pil kasukuhl en loaletail. Soangen kahrepe kan me aramas tohto kin kamehlele me kin katikala en sounpapah pwukat arail koahiek kak uhd wiahla arail kehl keieu laud. Luwetlahn mwokmwokid en paliwar kin kahreiong madamadau ah kin laud la. Tikitiklahn kehl en mwokmwokid kin kasansalehla soahng kan me keieu kesempwal en epwela mahs. Kahpwal en kak wia mehkot tohto kin uhd kiong aramas o en ese kilangada mehkot me keieu kesempwalo.
Ekei aramas koasoaia me kaun pwulopwul oh roson me anahn ohng nan mwomwohdiso pwe ren kak kapwungala soahng en kahpwal tohto kan me mih nan sampah en mwehi wet. Ahpw Kauno sohte kin ketin doadoahngki kemwekid oh loaloakoang en nan mwehi wet ohng pelien kaun akan pwe ren wiahda Kupwureh kan (tehk Aiseia 55:8–9). Kitail kak ese me President oh Kaun laud en mwomwohdiso wet pahn kalap wia ohl mah oh me ahnkihdier soangen irair tohto me sarawi.
Sapwellimen Koht koasoandi me sansalehr sang rehn pwihn en koukosonned en Sapwellime Mwomwohdiso wet kaunopada ohng katikitiklahn perepen luwet akan en aramas. Me pil kapwuriamweio, wen laud en doadoahk me ohl pwukat mweimweiong en kak wia sang ni ahr sapwellimaniki paliwar en uduk kasaledahr wasa sarawi me kaudiahl pwukat kin kohdosang ie ohng irail. Mehlel, Ohl pwukat malipilip dahr sang Kauno ni kokohp (tehk Irehn Pwoson kan 1:5).
Mwomwen Wiepen Kaunopada
I kasawiada rehn riei Ohl pwukat ekis kisehn kahrepe me Kauno ketin kupwurki ohl me mahlahr oh koahiek en papah nan pwukoah laud en Mwomwohdiso wet. Ohl pwukat alehdier kaskuhl nan erein ansou ehu sang rehn Kauno, me re wia weliepe, kin papah, oh kin poakpoake. Re kaskuhlkier duwen wehwehki ni mwohmw me Ngehn Sarawio kin koasoai oh Sapwellimen Kauno wiepe en alehdi kaudiahl kan. Ohl pwukat lelohngehr kekeirda kopwuriamwei ehu kalaudelahr arail wehwe, kamwahuihla mwomwen ahr kilang mehkot, wiahiong irail ehr en ahnki limpoak ohng aramas en wehi koaros oh sohte lipilipin irair me re mih loale, oh re wia kamehlel pen koapwurpwurdohn rongamwahuo.
Ngehi emen me kalap wia emen soun kadehde en riei ohl pwukat ni ahr kin kalap nananti ni ngoang oh pwersekieng ahr pwukoah ni ansou me re kin ahneki kahpwal en mwokmwokid en paliwar. Ohl pwukat sohte irairdi sang soumwahu. Ahpw re kapaida oh kakehlailda ren nananti kohwei, kehkehlail nan arail kahpwal en soumwahu me re ahneki.
Ni ei wie papah nan pwihn me wia weliepen Kauno ohng kitail, I wehwehkilahr me arail anahn me re keieu men wia iei ren alehdi oh wia kupwur en Sahm Nanleng oh Sapwellime Iehroso. Ni aht kin wia aht tuhpene, se kin alehdi kamarain oh se kin wiahda pilipil me kin kasalehda me se alehdi lapalahn marain oh mehlel laudsang loaloakoang en aramas, kahrepehkan oh irair kan me re lelohngehr. Doadoahk ni ehu pene ohng kahpwal me apwal kan, aht wehwekan ohng irair ehu kalaudla laudsang ni soangen mwohmw lingan kei sang ni manaman en Ngehn Sarawi o.
I inenen kapaida mehlel ei kak ahnekihdi ansou mwahu rahn koaros en kasawih momour en emenemen irail, wen me re kak wiahkan, oh arail mour kesempwal akan en wia kaun en Mwomwohdiso. Ekei aramas diarada me en Ohl pwukat ahr kahpwal en paliwar kan wia mehn kaluwet oh katikitikih arail pwoson. Ohng ngehi sohte unsek pwukat wia mehn koangoang oh kakehlailih pwoson.
Ehu Irehn Kasukuhl Kapatapat
I kadehdehier riei oahl wenemen arail alehdier oh uhd kosou sang ni mehlahn paliwar ohng ehu pwukoah kapw nan sapwen ngehn. President James E. Faust, President Gordon B. Hinckley, Elder Joseph B. Wirthlin, Elder L. Tom Perry, Elder Boyd K. Packer oh Elder Richard G. Scott.
Ohl pwerisek pwukat mweidala arail “mour unsek” (Omni 1:26) pwe ren kadehdeki mwaren Sihses Krais ohng sampah pwon. Arail padahk koaros me inenen kesempwal oh keneinei.
Ohl pwukat ehukiong kitail mwohn arail mour ah pahn kereniong ehr imwseklahu kaweid kehlail oh kaselel en dahme re eselahr sang ni arail wie papahki ansou werei. Kaun pwukat pwilikihdi ohng kitail mehkot mehlel me inenen kesempwal mehlel ni ansou me ekei pahn kamehlele me re kiong kitail te kisin mehkot kis.
Kitail kilang imwiseklahn padahk kan sang soukohp kan nan pwuhk sarawi. Ni karasepe, Nephi kaimwsengkihla ah inting ki koasoai pwukat: “ pwe ihme Kauno ketin mahsaniongiehier, oh I pahn udahn peikiong” (2 Nephi 33:15).
Kohkohlahn imwin eh mour, Jacob kaweidki:
“Koluhla, oh pidelong nan ahl ineno, oh mihmi nan ahl o me tehtikitik, lel ni ansou me ke pahn alehda mour soutik.
“ Oh ken loaloakoang la: dahme I pahn kak pil kapatahiong?”(Jacob 6:11–12).
Moroni kaimwsekihla ah doadoahk ni ah kaunopada pleitko ohng koapwoaroapwoar en ni iasadahu: “Me keren, I pahn kommoaledi nan paradais en Koht lao lel ni ansou me ngeni oh paliwerei pahn pwurpene, oh I pahn pwarodo ni ei pahn pwerido nan wehwe pwehn tuhwong kumwail mwohn mwoalen kopwung kaperen en Sihowa lapalap, me Sounkopwung soutuk en me momour oh me melahr akan”(Moroni 10:34).
Kowe oh ngehi inenen kapaikidahr en kaskuhl sang kaimwiseklahn padahk oh kadehde sang soukohp oh wahnpoaroan en imwin rahn pwukat. Ahd pwukat rahn wet kaiden Nephi, Jacob, oh Moroni—ahpw iei President Faust, President Hinckley, Elder Wirthlin, Elder Perry, President Packer oh Elder Scott.
Ahpw I sohte koasoakoasoaia me imwiseklahn en ohl pwukat koasoai me keieu kesempwal oh katapan nan arail wie papah. Ahpw, kapatpatpenehn arail kaskuhl en pali ngehn oh soahng kan me re eselahr nan mour wiahiong kaun pwukat en koasoaia mehlel kan me inenen pwung oh manaman.
Nan ah kaimwseklahn kapokon lap nan Epreil pahr 2007, President Faust koasoaia:
“ Sounkomouro ketikiong kitail koaros meleilei ehu sang ni Sapwellime Toamwo, ahpw met kak kohdote ma kitail pahn mweidala soangen pepehm sakanakan kan en lingeringer, insensuwed, oh dupuk. …
Kitail tamataman me kitail anahne mahk pwe kitail en kak alehdi mahk. … Sang nan ahi mohngiong unsek, I kamehlele manaman en kakehlail me pahn kohdo sang ni atail pahn idawehn kaweid sang atail Sounkomour ‘en mahkong aramas koaros’[ D&C 64:10 ]” (“The Healing Power of Forgiveness,” Liahona, Mei 2007, 69).
En President Faust kaweid o iei padahk en mour kehlail pwoat sang emen ohl I poakohng oh me keieu ahneki mahk laud me I ese.
President Hinckley kadehdehdaier nan ah kaimwseklahn kapokolap en Oktohpe 2007: I pahn kapwurehieng ahi wia soun kadehde en Sapwellimen soukohp Joseph kapwukoah me kohiengehr, ah doadoahk kan, ohng ah katengehkihdi ah kadehde sang ni ntah ni ah kamakamla pwehki ah doandoare mehkot mehlel soutuk. … Kowe oh ngehi anahne sapengala kalelapak mengei en alehda mehlelpen Tepin Kaudiahlo oh soahng kan me kohdo mwuri. Mehlel pen mwomwohdiso wet tepisang ni mehlel pen Tepin Kaudiahlo. Ma iei ih me mehlelo, oh I kadehdehki me e mehlel, eri doadoahk me kitail koaros mih ier loale met iei me keieu kesempwal pohn sampah wet” (“The Stone Cut Out of the Mountain,” Liahona, Nohpempe 2007, 86).
En President Hinckley ah kadehde kamehlelohngie padahk kaselel en mour sang rehn ohl me I poakpoake oh ese me iei ih soukohp en Koht.
Elder Wirthlin wia kaimwseklahn ah kapahrek nan kapokon lap nan Oktohpe 2008.
“I tamataman te en ahi nohnou ah kaweid ohng ie nan rahn me ngehi oh ahi pwihn en mwadongo luhs nan mwadong en football: ‘mweidohng dahme pahn wiawi en wiawi, mweidohng dahme pahn kohdo en kohdo, oh poakpoake.’
Kasongosong kan, ma kitail kalowehdi ni pwungih, e pahn kak wia kapai ohng atail mour. …
“Ni atail kin rapahki mehkot kemenkouruhr, kitail rapahki kamwahupe mwahu oh soutuk kan, wehwehkila koasoandi en Kauno, oh kereniongala Samatail Nanleng, kitail kak dadaur oh apwahpwalihala kahpwal oh kasongosong kan. Kitail kak koasoai duwehte dahme ahi nohno koasoaia, ‘ mweidong dahme pahn wiawi en wiawi, mweidohng dahme pahn kohdo and kohdo, oh poakoahng’” (“Come What May, and Love It,” Liahona, Nohpempe 2008, 28).
En Elder Wirthlin padahk wia padahk kehlail en mour sang ohl me I poakpoake powehdi ah kahpwal akan sang ni ah pwoson Sounkomouro.
Elder Perry kesihnen wasa kiset sounpwung wenou samwalahro: Ni ansou o, se sohte kak medewe me ah kadehde pahn wia kaimwseklahn ah sakarada nan kapokon lap.
“Mweidohng ie ien kaimwsengkihla ahi kadehde (oh ahi sounpar duweisek nan mour wiahiong ie laud ien nda met) ni ansou me I mahmahla, I esesehla me peneinei wia mehkot keieu kesempwal nan mour oh iei kih ohng peren soutuk.
I kaping ohng ahi pwoud, oh nei serihkan, oh nein nei serihkan serihkan oh pil neirail serihkan, oh peneinei lap me kiong ahi mour en kopwehpwe oh, en pil soutuk. Ohng mehlel soutuk wet me I wiahki ahi kadehde kehlail oh sarawi” (“Why Family and Marriage Matter—Everywhere in the World,” Liahona, Mei 2015, 42).
En Elder Perry ah padahk wia padahk kehlail ohng padahk en mour sang rehn ohl me wehwehki laud duwen kesempwal en ehupenehn nan peneinei oh mour soutuk.
Presiden Packer koasoaiahda nan kapokon lap sounpwung wenou samwalahro duwen sapwellimen Kauno pilahn en komouro, Sapwellimen Sounkomouro Toamwo, oh peneinei soutuk.
I wia ahi kadehde me Sihses iei ih me Krais oh Sapwellimen Koht ieias Ieroso. E kesihnen ni moangen mwomwohdiso wet. Sang ni sapwellime Toamwo oh manaman en prihsduhd, peneinei me tepidahr nan mour wet kak mihmi pene kohkohlahte. nb}…
“I inenen kapingki ohng … Toamwo me kin kak kamwakelehda rei kan sohte lipilipil en iawen ah apwal de iawen werei de pak depe e kapwkapwurpwurieng. Toamwo kak kahreiong ahmw kak mour saledek, mwakelekel, oh warohng” (“The Plan of Happiness,” Liahona, Mei 2015, 28).
En President Packer kaimwseklahn padahk wia kaweid en mour sang ohl me I poakpoake oh me kehlailki oh kalap koasoaia me kahrepen “kemwekid en nan mwomwohdiso wet iei en kilang me ohl oh lih oh neira serihkan peren nan imwarail, katengtengpene ohng mour soutuk” ( Liahona, Mei 2015, 26).
Elder Scott padahngkier nan ah kaimwiseklahn kapokonlap, nan Oktohpe 2014 patohwan: Kitail kohdohn mour wet pwehn keirda sang atail kahpwal oh songosong kan. Kahpwal kan kin sewese kitail en duwehla Samatail Nanleng, oh Toamw en Sises Krais me kahrehda kitail en kakehng kahpwal pwuko. I kadehdehki me ni atail pahn kohla Reh, kitail pahn kak kanengamahiong kasongosong, mongiong medek oh kahpwal koaros me kitail pahn sohpahi” (“Make the Exercise of Faith Your First Priority,” Liahona, Nohpempe 2014, 94).
En Elder Scott kaweido wia padahk kehlail en mour en emen ohl me I poakpoake oh emen sounkadehde en mwaren Krais ong sampah unsek (tehk D&C 107:23).
Inou oh Kadehde
Sounkomouro mahsani, “Ma sang ni pein ei mahsen de sang ni mahsen en nei ladu kan, e duwepenehte”(D&C 1:38). Kitail rong oh kapwaiada mehlel soutuk kan me kohsangehr rehn sapwellimen Koht sounkadehde malipilip dah kan. Ni atail pahn wia met, I inouki me atail pwoson Sahm Nanleng oh Sises Krais pahn laudla, oh kitail pahn alehdi kaweid oh silasil ong atail iren kahpwal akan oh anahn akan.
Nin duwen ahi kak koaros, I kadehde me Krais ieiaso kin kaweid kemwekid en Sapwellime rongamwahu kapwurpwurdohu oh mwomwohdiso sang ni Sapwellime ladu me pilipildahr pwe ren kadehdehki Mware. I kadehdehki lengileng kapai ni mwaren Sises Krais, amen.