Na Dikevi ni Ka sa Vakalou Eloma
Mai vei Rosemary M. Wixom
Peresitedi Raraba ni Lalai
Eda lako mai ki na vuravura oqo meda bucina ka raica na sorenikau ni ka sa vakalou era tu wavoliti keda.
Kemuni na marama, keitou lomani kemuni! Au vakadinadinataka ni bula e sa isolisoli. Sa tiko e dua na ituvatuva ni Kalou me baleti keda yadua, ka sa tekivu makawa na noda inaki yadudua ni bera noda lako mai ki na vuravura oqo.
Au sa mai vakila wale tikoga oqo na cakamana ni sucu ni dua na gone ki vuravura me tiki ni ituvatuva ni Turaga. O keda yadua a taracake vakayago ena loma ni ketei tinada ni da vakanuinui voli ena vuqa na vula me na vukei keda na yagona. Ia, kena itinitini, na ivakarau ni sucu—ka vakasakiti kivua na tina kei na gone—a tawasei keda.
Ni sa basika mai ki na vuravura oqo e dua na gone dramidrami, na veisau ni draki kei na rarama kei na sereki vakasauri ni kaukauwa ena serena e vakavuna ki na gonedramidrami me taura nai matai ni nona icegu. Era vakatawani sara ena matai ni gauna na ivi lalai oya ena cagi, sa tekivu cakacakataki ira na veigacagaca, ka sa tekivu cegu na gonedramidrami. Ni sa vesuki na vicovico, na isemabula oya ni tina kei na gonedramidrami e sa tamusuki vakadua, ka sa tekivutaka na nona bula e vuravura na gonedramidrami.
A kaya o Jope, “Sa buli au na yalo ni Kalou, a sa solia vei au na bula nai cegu i Koya sa Kaukauwa.”1
Eda lako mai ki na vuravura oqo “ni da kauta vata mai e so na lagilagi mai lomalagi.”2 “Na Matavuvale: Ai Vakaro ki Vuravura Raraba” e vakavulica ni o keda yadua “sa luvedrau tagane se yalewa lomani vakayalo na noda itubutubu vakalomalagi,” ka sa “vakalou na noda bula kei na ilesilesi yadua e baleti keda.”3 E solia vakayauyau tu na Tamada Vakalomalagi e dua na tiki ni Nona ka sa vakalou kivei keda. Na ka sa vakalou oya e basika vakailoloma mai Vua ena loloma duaduaga e rawa ni vakila e dua na itubutubu.
Eda lako mai ki na vuravura oqo meda bucina ka raica na sorenikau ni ka sa vakalou era tu wavoliti keda.
Eda Kila na Vuna
A kaya o Elaine Cannon, e dua na peresitedi raraba ni Goneyalewa e liu, “Sa tiko e rua na siga bibi ena bula ni dua na marama: Na siga e sucu kina kei na siga e kila kina na vuna.”4
Eda kila na vuna. Eda sa lako mai meda vukea na taraicake ni Nona matanitu ena vuravura oqo ka vakavakarau me baleta nai Karua ni Lakomai ni Luvena, o Jisu Karisito. Ena veicegu kece eda taura, eda saga meda muri Koya. Na ka sa vakalou e tiko vei keda yadua e sa vakavinakataki ka vakalevutaki ena sasaga eda cakava meda toro voleka kina vua na Tamada kei na Luvena.
Na noda ka sa vakalou sa sega ni tautauvata na noda rawaka vakaikeda, na itutu eda rawata, na iwiliwili ni veitau eda ciciva, se na noda kilai levu kei na noda nuidei. Na noda ka sa vakalou sa lako mai vua na Kalou. E a yavutaki ena dua na bula ni bera na noda sucu ka na tomani voli me tawamudu.
Eda Sa Lomani
Eda cakava na ka e salavata na noda ka sa vakalou ni da vakila ka solia na loloma ni Tamada mai Lomalagi. Sa noda na galala meda bucina, me na kadre, ka vukea me tubu. Kaya o Pita sa soli vei keda na “vosa ni yalayala e levu sara ka talei” meda “rawata kina na ka sa vakalou.”5 Ni da sa kilai keda vakamatata—ni luvena yalewa na Kalou—eda sa tekivu vakila na veiyalayala talei oya.
Na nodra raica tale eso, mai na noda raici keda, e vukei keda meda kila vakamatata ni da sa Luvena. Eda vuki vakamatau Vua ena masumasu, ka da sa maleleta ni wilika na Nona vosa ka cakava na Lomana. Sa rawa meda ciqoma na vakilai ni keda yaga mai Vua sa tiko ecake, ka sega mai vei ira na tamata ena vuravura wavoliti keda se mai vei ira ena Facebook se Instagram.
Kevaka o na vakatitiqataka ni sa tiko vei iko na ka sa vakalou, tekiduru ena masumasu ka kerea na Tamada Vakalomalagi, “Au sa Luvemuni yalewa dina beka, ka Ni sa lomani au li?” A kaya o Elder M. Russell Ballard, “Dua na itukutuku kamica duadua ena tukuna na Yalotabu oya na cava e nanuma na Turaga me baleti iko.”6
Eda sa Nona. Kaya o Paula, “A Yalo oqo sa tukuna mai ki na yaloda, ni da sa luve ni Kalou.”7 Vakavuqa na matai ni sere ni Lalai eda vulica oya na “Au Luve ni Kalou.”8 Oqo na gauna me tauri kina na malanivosa lomani oya “Au Luve ni Kalou” ka kuria na vosa “Cava me’u na qai cakava?” Eda na taroga beka na taro eso me vakaoqo: “Na cava au na cakava me tutaki kina noqu bula me vaka e dua na luve ni Kalou?” “E rawa vakacava ni’u taracake na ka sa vakalou e tiko vei au?”
A kaya o Peresitedi Dieter F. Uchtdorf, “E talai iko mai ke na Kalou mo mai vakarautaki iko ki na dua na vunilagi e cecere cake mai na veika kecega e rawa ni o vakasamataka.”9 Na vunilagi oya, dua na siga ena dua na gauna, sa yaco me ka dina vei iko ni ko cakava e levu cake mai na nomu bula tu ga; e basika dina ni o tutaka na nomu bula mo rawa ni vakataucokotaka na inaki o a buli taumada kina. Oqo e sureta na Turaga ki na nomu bula, ka sa tekivu mo vakavuna na Lomana me sa nomu.
Eda Vuli me Baleta na Noda Ka sa Vakalou
Na ka sa vakalou e taracake vei keda na gagadre meda kila na veidina tawamudu oqo me baleti keda.
Dua na goneyalewa na yacana o Amy a vakatavulici au wale toka ga ena lesoni oqo ni vola: “E sa ka dredre na bula voli vagoneyalewa ena gauna oqo. E sa qiqo tiko ga mai na salatu. Sa tovolea vakaidina tiko o Setani. Na ka kece ena donu se na cala; sega na ka e tuvakawawa.”
A tomana o koya: “So na gauna sa dau dredre me kunei na itokani vinaka. Dina ga ni o nanuma ni ra tiko na nomu itokani vinaka sara ka na sega ni biubiu, oya e rawa ni veisau ena inaki cavaga. O ya na vuna au marau kina ni tiko na noqu matavuvale, na Tamada Vakalomalagi, o Jisu Karisito, kei na Yalo Tabu, ka rawa ni noqu itokani ena gauna e veicalati kina na ka eso vata kei na veitokani.”
E tomana nona kaya o Amy: “Dua na bogi au a lomaleqa. Au tukuna vei tuakaqu ni’u sega ni kila na ka me’u cakava.”
Dede vakalailai ena bogi oya a vakauta vua o tuakana e dua na tex ka tukuna toka kina na vosa nei Elder Jeffrey R. Holland: “Kakua ni soro. … Kakua ni o vakasuka. Mo toso tikoga. Mo tovolea tikoga. Sa tiko mai liu na veivuke kei na bula marau. … Ena yaco me daumaka vakaoti. Nuitaka na Kalou ka vakadinata na basika mai na veika vinaka.”10
A vakamacalataka o Amy: “Au a nanuma ni wilika voli oya ka masuta me’u na vakila na loloma ni Kalou kevaka a tiko dina ekea o Koya me baleti au.”
Kaya o koya: “Na gauna ga au a taroga ka vakadinata kina ni sa tiko ekea o Koya, au a vakila na marau levu, veivakurabuitaki me’u qai sotava. Na vosa e sega ni rawa ni vakamacalataka. Au kila ni a tiko ekea o Koya ka sa lomani au.”
Baleta ni o sa Luvena, sa kila o Koya o cei o na rawa ni vakataka. Sa kila o Koya na ka o rerevaka kei na nomu tatadra. E marautaka o Koya na nomu sasaga. E waraki iko tu o Koya mo lako Vua ena masumasu. Baleta ni o sa Luvena, o sega walega ni gadrevi Koya, ia e gadrevi iko talega o Koya. O ira na dabe wavoliti iko voli ena gauna oqo ena soqoni oqo era gadrevi iko. E gadrevi iko o vuravura, ka sa vakatarai iko na nomu ka sa vakalou mo sa Nona tisaipeli nuitaki kivei ira taucoko na Luvena. Ni da sa qai raica rawa na ka sa vakalou e tiko vei keda, sa rawa ni da raica vei ira tale eso.
Eda Veiqaravi Baleta na Noda Ka sa Vakalou
Na ka sa vakalou e taracake vei keda na gagadre meda qaravi ira tale eso.
Wale tikoga oqo, o Sharon Eubank, na dairekita ni Humanitarian Services kei na LDS Charities, a tukuna e dua na ka a sotava o Elder Glenn L. Pace. A yaco e dua na lauqa levu ka lailai sara na kakana e Ethiopia ena loma ni 1980. Me vakarautaki na veivuke, a tara na siteseni eso ni veivakani e tu kina na wai kei na kakana me baleti ira na rawa ni yacova. E dua na turaga qase walokai voli a lakova tiko e dua na sala balavu me yaco ki na dua na siteseni ni veivakani. A lako sivita voli o koya e dua na koro ni sa rogoca na tagi ni dua na gone dramidrami. A vaqaqara o koya me yacova ni kunea na gone dramidrami ni dabe tikiva voli na tinana sa mate tu ena qele. A taura cake na gone dramidrami, ka tomana me taubaletaka na turaga oqo e 25 na maile (40 na km) ki na siteseni ni veivakani. Ni sa yaco yani, nai matai ni nona vosa a sega ni “Au sa walokai” se “Vukei au.” E a “Na cava e rawa ni caka vua na gone dramidrami oqo?”11
Na ka sa vakalou e tiko vei keda e vakalevutaka na noda gagadre ni torovi ira tale yani eso ka vakauqeti keda meda cakacaka. Na Tamada Vakalomalagi kei Jisu Karisito sa rawa ni vukei keda ni kunea na kaukauwa meda cakava vakakina. Sa rawa li ni vakatarogi keda na Turaga, “Na cava e rawa ni caka vua na goneyalewa oqo, na turaga oqo, na tama oqo, se itokani oqo?”
Mai na vakasolokakana ni Yalotabu sa yaco kina na ka sa vakalou ni dua na dauvakatitiqa, ni oti nona sasaga dredre voli me rawata na vakabauta, sa ciqoma na vakacegu veirauti me rawata tale kina na vakabauta.
Ni sa vosa na parofita, na nona vosa e vakayarayarataka na noda ka sa vakalou ka solia vei keda na kaukauwa meda cakava na ka e tukuna.
Na vakayagataki ni sakaramede ena veimacawa e vakarautaka na nuinui ki na ka sa vakalou e lomada, ka da nanuma na noda iVakabula, o Jisu Karisito.
Au yalataka ni ko vakasaqara mo vakadikeva na titobu ni ka sa vakalou e tiko vei iko, ko sa na tekivu vakalevutaka yani na nomu isolisoli talei. Laiva me tuberi iko mo yaco mo Luvena yalewa, ni lakovi lesu na salatu Vua—ni da na “vakalesui tale vua na Kalou sa solia vei [keda] na icegu ni bula.”12 Ena yaca i Jisu Karisito, emeni.