Diarada lingan Sarawi me mih loalomw
Sang Rosemary M. Wixom
Presiden Lap en Primary
Kitail kohdo sampah pwe kitail en kakairada wahn sohsoh sarawi kan me mih loaletail.
Riei Lihoko,I pokepoke kumwail! I kadehdeh ki me mour wia kisakis ehu . Mie Sapwelimen Koht koasondi ong emenemen kitail, Sangete ni tapio,emenemen mie ier kahrepe kesemwpwal me eh kohkihdo sampah.
Me keren ahi diarada me ipwidi en seri kan nan mourwet manaman ehu oh wia sapwelimen Koht kosoandi. Kitail koaros kekeirda nan kapehden atail nohno ko erein sounpwong tohto pwe palinwararail kan en kak kakehlail ih kitailda. Ahpw, ni imwilah, ipwidien serih—wia mwekid apwal iou ong nohno oh serio koaros—e kin katohre ira peseng.
Ni serihmen ah kin ipwidieng sampah, wekideklahn engin karakar oh marain me wiakin tehieu lel nan mwaremwaren serio me karehieng ah tepin esingekda. Ansou me kisin ngolingol tikitik pwukat kin mwadangete audaudkihda ahngwet, ngolngolo doadoahkehr, oh serio tepidahr esingek.Ni ansou me pwuhsen serio kin dolsang, Sahl me katengepene nohnohu oh serio loplahr oh serio tapiadahr ah mour pohn sampah.
Job kosoia, “Ngehn en Koht me wiaiehda, oh ketkiong ie sapwelime engin mour pwe ien kak mour.”1
Kitail kohdoh sampah oh “sehrehdo marain ehu sang nanleng.”2 “Peneinei: Padahk ehu ong Sampah”padahk ki me emen emen kitail “wia seri kesemwpwal kei me kohdosang atail nohno oh pahpa me ketiket Nanleng,” oh “ kitail koaros mie atail sohso sarawi oh atail pwukoa me kitail kohkihdo.”3 Sang ni kalahngan en Samatail Nanleng E kasalehiong kitail ehr ekei duwen Sapwelime kosondi sarawi kan. Kosondi sarawi wet wia kisakis en limpoak ehu me sang reh me nohno oh pahpa te me kak kehn.
Kitail kohdo sampah pwe kitail en kakairada oh diarada wahn sohsoh sarawi kan me mih loaletail.
Kitail Ese Ia Kahrepe
Elaine Cannon, me wia presiden lap en serepein pwulopwul rahnteio, kosoia, “Mie rahn riau me kesemwpwal ong kitail lih nan atail mour: Rahn mee iwpidi oh rahn me e diarada kahrepen ah ipwidi o.”4
Kitail ese kahrepe. Kitail kohdo pwe kitail en sewese kawada Sapwelime wehi pohn sampah oh kaunop ong ketdo keriau en Sapwelime Ieros, Sises Krais. Atail esingek koaros kitail en idawehnla Ih. Sohso sarawi me mihmi rehtail pahn kekeirda oh lalaudla sang ni atail pahn kin song en karakarani Samatail oh Sapwelime Ieroso.
Atail sohso sarawi kan sohte doke pweida me emen emen kitail ahneki,de atail pwukoah uwen tohto en maresong me kitail tangkilahr koaros,de atail ndand kan oh koapwoaropwoar me pein kitail ahneki. Atail sohso sarawi kohsang rehn Koht. E mihmier rehtail mwohn atail ipwidieng pohn sampah oh pahn mihmi rehtail kohkohlahte .
Kauno poak ong kitail.
Kitail kak kasawihda kesemwpwalpen atail sohso sarawi kan ansou me kitail kin pehm oh kihwei limpok sang Samatail Nanleng. Kitail ahneki saledek en pilada en apwaliada, kalinganahda oh sewese pwe en keirda .Peter kosoiakitail ale ier “inou kesemwpwal ko” ihme kitail iang alehki sohso sarawio.”5 Ni atail kin esehla ihs kitail, me kitail wia—sapwelimen Kauno serepein kei—kitail kin kamelelehda inou kesemwpwal ko.
Ni atail kin kilengiei likin atail wenihmw tok kan, kaidehn te nan kilahs en irongin, e kin sewesei kitail en kilang kitail me kitail wia sapwelime. Kitail en kin sohpeieng ni kapakap, oh kitail kin men rong sapwelime mahsen akan oh kapwaiada kupwure. Kitail kin kak wia dahme e kupwuriki, kaidehn dahme sampah kin wia de sang irail akan me kin iang facebook de Instagram.
Ma mie peidek me pid lingan sarawi me mihmi loalomw, kelepwidi kowe kapakap oh idek rehn Samatail Nanleng, “Mehlel I wia Sapwelimomwi serepein, oh Komw poakong ie?” Elder M. Russell Ballard kosoia, “Ehu kaweid keiou kesemwpwal me Ngehn Sarawi song en kasalehwei iei iawen Sapwelimen Koht pepehm ong komwi”6
Paul kosoia, Kitail wia Sapwelime. “Ngehnen Koht kin ketin ehuong ngenitail oh kadehdehda me kitail sapwelimen Koht seri.”7 Pak tohto koul en primary me kitail kin tepin esehla iei “ Ngehi me Seri en Koht.”8 Ansou mwahu met kitail en alehda iren koul kesemwpwal wet “Ngehi me Seri en Koht” oh kapatahieng mahsen pwukoat “ Eri, dah?” Kitail pahn kakete peidek ki soang pwukat: “Dahme I pahn wia pwe ien kak momour nin duen ei wia seri en Koht men? Ia mwomwen ahi pahn kak kalaudehla sohso sarawi me mih loale iet?”
Presiden Dieter F. Uchtdorf kosoia, “ Koht kadar uhkodo pwe ken kak kaunop ong rahn me kohkohdo me ienenen lingan sang soang koaros me ke kak medewehda.”9 Ansouo, ehu rahn ehu pako, pahn kiong uhk roson laud pwehki omw kin kapwaiada soang kan koaros kaidehn pwehki ke wie momour te; e pahn konoiukedi pwehki ke kolokol mour oh kanekehla dahme ke kohkihdo sampah ni tapio. Met wia luhk iou ong Koht nan omw mour, oh kowe eri tapiada mweidong Kupwure kan koaros en wiawi.
Kitail esehla pwehki Atail Sohso Sarawi
Sohso Sarawio kiong kitail ineng en pein esehla me soang mehlel pwukat pahn kokohlate.
Serepein pwulopwul men me adanki Amy apwtehn kiong ie iren madmadau ehu ni ah ntingihdi: “ E apwal wia aramas pwulo .pwul rahn pwukat. sehdan kin wia ah kak koaros pwe en kahlwai kitailsang nan ahlo oh sohte kapwaiada sapwelimen koht kosoned akan. Ihte soahngete riau pwung de sapwung: ahpw sohte nan pwunge.”
E apw doula koasoaia: “apwal diarada kempoakepahmw me mwahu ekei pak. Mendahte ke medewe me pahn sohte pounsehse iukala, soang wet kak wiawi pwehki songen karehpe kei. Ihme karehda I inenen kalahngan ki ahi peneinei, Samatail Nanleng, Sises Krais, oh Ngehn Sarawi me kin ieiang ie ansou kan me kin mie sapwung nan pwungen ngehi oh kempoakepahi kan.”
Amy apw pil doulahte nda, “ Ehu soutiko I pwunodada, eri ngehi ndahng riei serepeino I sehselahr dahme I pahn wia.”
Eri soutik ohte rie serepeino kadaralahng padahk ehu sang Jeffrey R. Holland ni ah kosoia: Kedeh Pwangada. … Kedeh pa uhdi. Kowe alialuhte kohwei. Kowe nannantieng. Mie Sawas oh insenamwahu mihmi mwohmw. …Soang koaros pahn mwahula ni imwio. Koapworopwoarki Kauno oh kamehlele me mwahu pahn kohdo.”10
Amy kosoiahda, “ I tamataman ni ahi wadek irehu oh wie kapakapki ien kak kehn limpoak sang Kauno ma mehlel E pahn ieiang ie.”
E nda: “Ni ansou me I peki oh kamehlele me E pahn ieiang iehu, I kehnda ehu soangen peren laud, oh pepehm en limpok. Sohte lokaia kak kawehwehda. I ese me E ieiang ie oh E poakong ie.”
Pwehki ahmw wia Sapwelime seri, E ese dahme ke pahn kak wiahla. E ese soang kan me ke masak oh ahmw ouraman. E perenki ahmw koaiok me ke kolokol. E awiawih iuk ken kohdo Reh sang ni ahmw pahn kapakap .Pwehki ke wia Sapwelime seri,. kaidehn kowehte me anahne, ahpw E pil anahne iuk. Irail koaros me mwohd limwahmw ansou wet nan ehupene wet anahne iuk. Sampah anahne iuk, ahmw sohso sarawi kan eleiong uhk en wia Sapwelime soun sawas ong Sapwelime serihkan koaros. Ansou ehu me kitail kak her kilangada lingan sarawio rehtail, kitail pahn kak kilangada rehn mehteikan.
Kitail Sawas pwehki atail Sohso Sarawi
Sohso sarawi kiong kitail ineng en sewese mehteikan.
E me keren te, Sharon Eubank, kaun en Humantarian Services oh LDS Charities, kosoiahda mwekid ehu me wiawi me pein Elder Glenn L. Pace pil kosoia. Mie karakar oh lehk laud iou me kohpeseng nan Ethiopia nan werengen pahr 1980. Sawas lel la, oh mie wasahn epwel kaunopda me kihda pihl oh mwenge wiawidahngete ong irail kan me kak lel la wasa kiset. Ohllaud men me men mwengedahr aluhsang wasa doh pwe en kak lela wasa sawas wet kohkohda ie. E alu daulih sin kousoan iou ih rongada ngilen seri ah wie sengiseng. E rapahki lahu ih diar wasa serio wie sengiseng iehu me iei limwahnte ah nohno me melahr o. E pwokada serio ih eri douluhl alialu kohla mile 25 (40 km) pwe en lel wasa kikihda sawas o.Ansou me e lela wasahu, tepin lokaia me kohsang na ewen ohl menet kaidehn “I men mwenge” de “sewese ie” ih kosoi en iei “ songen sawas dah me kak wiawiong seriet?”11
Sohso sarawi me mih rehtail kin kalaudehla atail ineng en sewesehda mehteikan oh kamwakid kitail en wia. Samatail Nanleng oh Sises Krais kak sewese kitail en wia me pwukat. Mehlel Koht kak peidekkiong kitail, “Songen sawas dah me pahn kak wiawi ong serepein menet, de pwutak menet, pahpa menet, de kompokepahmw menet?”
Sang ni mwenginingin en Ngehn Sarawi ong aramas emen me sohte kamehlele rongamwahu wet ni ah kolokol Sohso Sarawi wet me eleiong en kak pwurehng daperedi esingek en mour, oh alehdi meleilei sang ni ah mie da ah pwoson.
Ni ansou me soukohp kin mahsen, sapwelime mahsen kin audei kitailda oh kihong kitail kehlail en idawehn ih.
Alahldahn kamadipw sarawi nan wihk koaros kiong kitail kopworopwor ong soang kesemwpwal sarawi me mih loaletail oh kitail eri tamanda atail Sounkomour, Sises Krais.
I inoukihwei ni amw pahn nantieng diarada sohso sarawi me mih rehmw en, ke pahn ahnkilah koaiok mwahu sang kisakis kesemwpwal wet. Mweidong en kaweid uhk en wia Sapwelime serepein, alu nan ahlo pwe ken pwurala Reh—wasa kitail pahn unsekla iehu me iei rehn Kauno me ketkiong kitail esingek.”12 Ni mwaren Sisen Krais, amen.