2010–2019
Mata me Raica kei na Daliga me Rogoca
Okotova 2015


Mata me Raica kei na Daliga me Rogoca

Kevaka eda na rai vei Karisito ka dolava na matada kei na daligada, ena vakalougatataki keda na Yalo Tabu me da raica ni cakacaka tiko ena noda bula na Turaga ko Jisu Karisito,

Ena nona veiqaravi vakalotu ena bula oqo, a vakayacora o Jisu na veicakacaka mana ni veivakabulai ka veivakavulici ena dodonu kei na mana ka tukuna kina na ivolanikalou, “A sa rogovaki yani na kena irogorogo ki Siria taucoko … a ra sa lewevuqa sara sa muri koya mai.”1

Eso era a raica na Nona veivakabulai ka rogoca Nona veivakavulici era a sega ni ciqomi Koya. Eso era muri koya ga me dua na gauna ka sega tale ni lako vata kaya.2 A tu sara ga e matadra na Turaga ko Jisu Karisito, ia era sega ga ni raica rawa se o cei dina o Koya. Era mataboko, ka ra digia me ra vuki tani. Ena vukudra, e kaya kina ko Jisu:

“Au sa lako mai vei ira na kai noqu, ia era sa sega ni vakabauti au.”3

“A sa didivara na daligadra, a sa bobo na matadra.”4

Ia, e vuqa na tagane kei na yalewa, oka kina o ira na Nona iApositolo yalodina, ka ra kelea tu na nodra bula Vua. E dina ni ra vagolei tani tiko ena veika vakavuravura, sega ni matata vei ira na Nona ivakavuvuli, ena rere sara mada ga, era vakabauti Koya, lomani Koya, ka muri Koya.

Ena vukudra, e kaya kina ko Jisu: “A sa kalougata na matamudou ni dou sa raica, kei na daligamudou ni dou sa rogoca.”5

Ni vakarau me vakararawataki mai Kecisemani vakakina mai Kalivari, a yalataka vei iratou na Nona tisaipeli o Jisu na yalayala vakasakiti oqo: “O koya sa vakabauti au, ena kitaka talega na cakacaka au sa kitaka; ia ena kitaka na cakacaka e uasivi cake ena ka oqo; ena vuku niu sa lako vei Tamaqu.”6

A vakayacora ko Jisu na yalayala oqori: vakatekivu ena siga ni Penitiko, era vakalougatataki na tisaipeli ena papitaiso ni bukawaqa kei na Yalo Tabu.7 Ena nodra vakabauti Karisito, veivutuni, kei na talairawarawa, sa yaco me nodratou itokani na Yalo Tabu, veisautaka na yalodratou, ka vakalougatataki iratou ena ivakadinadina veivauci ni dina.

Na isolisoli kei na veivakalougatataki oqo a vaqaqacotaki ira na tisaipeli ni Turaga. E dina ni a rerevaki ka veilecayaki na gauna era a bula donumaka, era a ciqoma na isolisoli vakayalo ni mata me raica kei na daliga me rogoca. Ena kaukauwa ni Yalo Tabu, sa tekivu me ra raica na dina ni veika ena kedra ituvaki dina sara, vakauasivi na Turaga o Jisu Karisito kei na Nona cakacaka ena kedra maliwa.8 Sa vakararamataka na Yalo Tabu na nodra vakasama, ka ra rogoca matata cake na domo ni Turaga. Sa dromu vakatitobu ki yalodra na kosipeli i Jisu Karisito.9 Era a tudei ka talairawarawa.10 Era vunautaka na kosipeli ena yalodoudou kei na qaqa ka tara cake na matanitu ni Kalou.11 Era rekitaka na Turaga ko Jisu Karisito.

E vuqa na ka eda tautauvata kina kei ira na tagane kei na yalewa yalodina ena ituvuka ni gauna. Eda a bula talega ena dua na gauna e dau cakacaka mana kina ena keda maliwa na Turaga o Jisu Karisito—okati kina na nodra vakabulai na tauvimate, vakasavasavataki keda mai na ivalavala ca, veisautaka na yaloda, ka dolava na veivakabulai vei ira na luve ni Kalou ena yasa ruarua ni ilati. Ena noda gauna era tu talega na noda parofita bula kei na iapositolo, na kaukauwa ni matabete, isolisoli vakayalo, kei na veivakalougatataki vakalou ni cakacaka vakalotu ni veivakabulai.

Na noda gauna e gauna rerevaki—na gauna e levu kina na ca kei na veitemaki, na gauna ni veilecayaki kei na tiko yavavala. Ena gauna ca oqo, sa kacivi keda na parofita ni Turaga e vuravura, o Peresitedi Thomas S. Monson, me da vueti ira na mavoa tu vakayalo,12 me da tutaka na dina ena yaloqaqa,13 ka tara cake na matanitu ni Kalou.14 Se cava ga na ivakatagedegede vakayalo se ni vakabauta se talairawarawa eda tu kina ena gauna oqo, e se bera ga ni veirauti kei na cakacaka e tu mai liu. Eda gadreva na rarama kei na kaukauwa vakayalo levu cake. Eda gadreva na mata me da raica vakavinaka cake na iVakabula ni cakacaka ena noda bula kei na daliga me rogoca vakatitobu na Domona e yaloda.

Na veivakalougatataki vakasakiti oqo ena yaco mai ni da dolava na yaloda ka ciqoma,15 ciqoma vakaidina, na Turaga o Jisu Karisito, Nona ivunau, kei na Nona Lotu ki na noda bula. E sega ni gadrevi me da vinaka sara, ia eda gadreva me da vinaka ka vinaka cake tiko. Eda gadreva me da segata me da bulataka na dina matata ka rawarawa ni kosipeli. Kevaka eda taura na yaca i Karisito, cakacaka ena vakabauti Koya me da veivutunitaka noda ivalavala ca, muria Nona ivunau, ka dau nanumi Koya tikoga, eda na ciqoma na veitokani ni Yalo Tabu ena loloma veivueti kei na loloma soliwale i Jisu Karisito.

Na talairawarawa vakadodonu e kauta mai na Yalotabu ki yaloda. Ena noda veivale, eda masu ena vakabauta, vakasaqaqara ena ivolanikalou, ka vakarokorokotaka na Siga ni Vakacecegu. Ena noda veivalenilotu, eda vakaivotavota ena sakaramede ka cakava na veiyalayala bibi vei Tamada Vakalomalagi ena yaca i Karisito. Ena veivaletabu, eda vakaitavi ena veicakacaka vakalotu tabu ena vukudra na wekada ena yasa kadua ni ilati. Ena noda matavuvale kei na noda ilesilesi mai vua na Turaga, eda dolele yani vei ira tale eso, laveta na nodra icolacola ka sureti ira me ra lako mai vei Karisito.

Kemuni na taciqu kei na ganequ, au kila ni kevaka eda cakava na veika oqo, ena lako mai na Yalo Tabu! Eda na tubu vakayalo ka kila na Yalo Tabu, ka na yaco o Koya me noda itokani. Kevaka eda na rai vei Karisito ka dolava na matada kei na daligada, ena vakalougatataki keda na Yalo Tabu me da raica ni cakacaka tiko ena noda bula na Turaga ko Jisu Karisito, ka vaqaqacotaka na noda vakabauti Koya ena veivakadeitaki kei na ivakadinadina. Eda na raici ira vakalevu cake na tacida kei na ganeda ena ivakarau e raici ira kina na Kalou, ena loloma kei na yalololoma. Eda na rogoca na domona na iVakabula ena ivolanikalou, ena vakasolokakana ni Yalotabu, kei na nodra vosa na parofita bula.16 Eda na raica na kaukauwa ni Kalou vei ira na Nona parofita kei ira kece na iliuliu ni Nona Lotu bula, ka da na kila deivaki ni oqo na Nona cakacaka tabu na Kalou.17 Eda na raica ka kilai keda kei na vuravura wavoliti keda ena ivakarau e raica ka kila kina na iVakabula. Ena yaco me tu vei keda na ka e vakatoka na iApositolo ko Paula me “na vakasama i Karisito.”18 Ena tu na matada me da raica kei na daligada me da rogoca, ka da na tara cake na matantiu ni Kalou.

Ena dredre cake beka na bula, veilecayaki, mosimosi, ka veivakayalolailaitaki. Au wasea vei kemuni na noqu ivakadinadina ena veitokani ni Yalo Tabu ena selecuruma na rarama ni kosipeli i Jisu Karisito na veilecayaki, na mosi, kei na butobuto. Ena dua beka na kacabote levu se drodro malua mai, na kaukauwa vakayalo lagilagi oya ena vakatubura na loloma veivakabulai kei na vakacegu vei ira na veivutuni, mavoa vakayalo; me kau laivi na butobuto ena rarama ni dina; ka vakasava tani na yalolailai ena inuinui vei Karisito. Eda na raica na yaco mai ni veivakalougatataki oqo, ka da na kila ena ivakadinadina ni Yalo ni sa cakacaka tiko ena noda bula na Turaga o Jisu Karisito. Na noda icolacola ena “vuabale sara ena rekitaka na [noda Dauveivueti].”19

E dua na ka erau a sotava na tinaqu kei na tamaqu e na vuqa na yabaki sa oti e vakaraitaka na bibi kei na kaukauwa ni mata me raica kei na daliga me rogoca. Ena 1982 erau a kacivi na noqu itubutubu me rau laki veiqaravi ena Tabana ni Kaulotu na Davao ena Yatu Filipaini. Ni dolava o tinaqu na ivola ka raica na vanua erau kacivi kina, a kaya yani vei tamaqu, “Sega! Mo qiri vei iratou ka tukuna ni daru sega ni rawa ni lako ki na Yatu Filipaini. Eratou kila ni o ceguoca tiko.” Sa tauvi ceguoca tu o tamaqu ena loma ni vicavata na yabaki, ka leqataki koya vakalevu o tinaqu.

Ena vica na bogi ka tarava a vakayadrati tamaqu o tinaqu rauta na 2:30 ena mataka. A kaya, “Merlin, o rogoca beka na domo oya?”

“Sega, au sega ni rogoca e dua na domo.”

“Io, au sa rogoca vakatolu na domo oya ena bogi nikua, ka kaya mai, ‘Na cava o lomaleqataka? O sega beka ni kila niu sa kila ni tauvi ceguoca tiko? Au na maroroi koya, kau na maroroi iko. Vakarautaki iko mo laki veiqaravi ki na Yatu Filipaini.’”

iVakatakilakila
Merlin kei Helen Clark

Erau a veiqaravi ena Yatu Filipaini na tinaqu kei na tamaqu ka rau sotava e dua na gauna vakasakiti. E nodrau itokani na Yalo Tabu, ka rau vakalougatataki ka taqomaki. A sega ni vakaleqai tamaqu na nona ceguoca. A veiqaravi vaka imatai ni daunivakasala ena mataveiliutaki ni tabana ni kaulotu, ka rau tubera kei tinaqu e drau na daukaulotu kei na udolu na Yalododonu Edaidai yalodina ena kena vakarautaki na yaco mai ni tabanalevu kei na iteki ena yanuyanu ko Mindanao. Erau a vakalougatataki ena mata me raica kei na daliga me rogoca.

Kemuni na taciqu kei na ganequ, au vakadinadinataki Jisu Karisito. Au kila ni bula tiko. O koya na noda iVakabula ka Dauveivueti. Au kila ni kevaka eda ciqomi Koya ki na noda bula ka bulataka na dina matata ka rawarawa ni Nona kosipeli, eda na marautaka na veitokani ni Yalo Tabu. Eda na rawata na isolisoli talei ni mata me raica kei na daliga me rogoca. Au vakadinadinataka ena yaca tabu i Jisu Karisito, emeni.