2010–2019
Qhov Muag Kom Pom Kev thiab Pob Ntseg Kom Hnov Lus
October 2015


Qhov Muag Kom Pom Kev thiab Pob Ntseg Kom Hnov Lus

Yog peb yuav ntsia Khetos thiab qhib peb qhov muag thiab pob ntseg, tus Vaj Ntsuj Plig Dawb Huv yuav foom koob hmoov rau peb kom peb pom tau tus Tswv Yexus Khetos ua hauj lwm hauv peb lub neej.

Nyob hauv Nws txoj kev ua hauj lwm qhuab qhia hauv ntiaj teb, Yexus tau ua tej txuj ci loj thaum nws kho tib neeg tej kev mob thiab muaj hwj huam thiab hwj chim qhuab qhia es cov vaj lug kub hais tias, “lub moo nrov ncha lug mus thoob plaws Xilias teb chaws … thiab muaj neeg coob coob tuaj nrog nws mus.”1

Ib txhia uas pom Nws kho neeg thiab hnov Nws qhia yeej muab nws xyeej tseg. Lwm cov tau raws Nws qab rau ib ntus, tiam sis tsis kam nrog Nws mus ntxiv.2 Tus Tswv Yexus Khetos nyob tom lawv hauv ntej, tiam sis lawv yeej tsis pom tseeb hais tias Nws yog leej twg tiag. Lawv dig muag, thiab tau txiav txim tig mus tod. Hais txog lawv, Yexus hais tias:

“Kuv tau los rau hauv kuv cov neeg kiag, thiab kuv cov, neeg tsis tau txais kuv.”3

“Lawv ntsaws pob ntseg, lawv tsis xav ntsia, lawv qi muag.”4

Tiam sis, muaj coob tug txiv neej thiab poj niam, kuj suav Nws cov Thwj Tim uas rau siab ntseeg, uas tso tag nrho lawv lub neej rau Nws. Txawm muaj tej yam hauv ntiaj teb uas tab kaum lawv, muaj kev kub ntxhov rau tej yam uas Nws qhia, thiab yeej muaj kev ntshai, tab sis mas lawv tseem ntseeg Nws, hlub Nws, thiab raws Nws qab.

Hais txog lawv, Yexus hais tias: “Nej yog cov uas muaj hmoo, nej qhov muag thiaj pom thiab nej pob ntseg thiaj hnov.”5

Ua ntej Nws mus raug txom nyem hauv lub Vaj Khexemanes thiab saum lub Roob Khaulakhauthas, Yexus tau cog lus rau Nws cov thwj tim li no hais tias: “Kuv qhia tseeb rau nej hais tias tus uas ntseeg kuv yuav ua tej hauj lwm uas kuv ua; tsis yog li ntawd xwb, nws tseem yuav ua tau ntau dua tej uas kuv ua, rau qhov kuv mus cuag Leej Txiv lawm.”6

Yexus ua raws li lo lus cog tseg: pib thaum hnub Peetekos, cov thwj tim tau koob hmoov vim ua kev cai raus dej ntawm hluav taws thiab tus Vaj Ntsuj Plig Dawb Huv.7 Dhau ntawm kev ntseeg Khetos, kev hloov siab lees txim, thiab kev mloog lus, tus Vaj Ntsuj Plig Dawb Huv tau los ua lawv tus khub, tau pauv lawv lub siab, thiab foom koob hmoov rau lawv kom lawv muaj lus tim khawv txog qhov tseeb.

Cov txiaj ntsim no thiab koob hmoov tau ntxiv zog rau tus Tswv cov thwj tim. Txawm tias lawv nyob hauv ib lub caij uas muaj xwm txheej thiab kev kub ntxhov los, lawv tau txiaj ntsim ntawm sab ntsuj plig uas yog qhov muag kom pom kev thiab pob ntseg kom hnov lus. Los ntawm tus Vaj Ntsuj Plig Dawg Huv lub hwj chim, lawv tau pib pom qhov tseeb tiag, qhov tseem ceeb yog tus Tswv Yexus Khetos thiab Nws txoj hauj lwm rau lawv.8 Tus Vaj Ntsuj Plig Dawb Huv pab lawv to taub, thiab lawv haj yam hnov tus Tswv lub suab zoo dua. Yexus Khetos txoj moo zoo tau nkag mus tob hauv lawv tej siab.9 Lawv tau sawv ruaj khov thiab mloog lus.10 Lawv tau ua siab loj thiab muaj hwj chim qhia txoj moo zoo thiab tau txhim tsa Vajtswv lub nceeg vaj.11 Lawv muaj kev zoo siab los ntawm tus Tswv Yexus Khetos.

Muaj ntau yam uas cov txiv neej thiab poj niam uas rau siab ntseeg thaum lub caij nyoog ntawd ua ib yam li peb ua. Peb kuj nyob hauv ib lub caij thaum tus Tswv Yexus Khetos ua tej txuj ci tseem ceeb rau peb pom—kuj hais txog txoj kev kho tib neeg mob, ntxuav peb ntawm peb tej kev txhaum, pauv peb lub siab, thiab muab kev cawm dim rau Vajtswv cov me nyuam uas nyob ob sab daim ntaub thaiv. Nyob hauv peb lub caij nyoog peb kuj muaj cov yaj saub thiab cov thwj tim uas muaj sia nyob, lub pov thawj lub hwj chim, tej khoom plig ntawm sab ntsuj plig, thiab tej koob hmoov vim muaj tej kab ke uas cawm neeg txoj sia.

Peb lub caij muaj kev kub ntxhov ntau—ib lub caij uas muaj kev phem thiab kev ntxias ntau, ib lub caij uas muaj kev ntxhov siab thiab xwm txheej heev. Nyob hauv lub caij kub ntxhov no, tus Tswv tus yaj saub hauv ntiaj teb no, Thawj Tswj Hwm Thomas S. Monson, tau hu peb los cawm tej tus neeg uas raug mob,12 ua siab loj sawv tiv thaiv qhov tseeb,13 thiab kom txhim tsa Vajtswv lub nceeg vaj.14 Txawm hais tias niaj hnub no peb muaj kev ntseeg los yog mloog lus los yog sab ntsuj plig muaj zog npaum li cas los, nws yeej yuav tsis txaus rau tej hauj lwm uas tseem nyob tom peb hau ntej. Peb haj yam xav tau qhov kaj thiab hwj chim rau sab ntsuj plig. Peb xav tau qhov muag uas pom tau kev meej meej tias tus Cawm Seej yeej koom tes nrog peb ua neej nyob thiab tej pob ntseg uas haj yam hnov tau Nws lub suab hais lus rau peb siab peb ntsws.

Txoj koob hmoov zoo kawg no los rau peb thaum peb qhib peb siab ntsws thiab kam txais,15 txais yuav kiag, tus Tswv Yexus Khetos, Nws cov lus qhuab qhia, thiab Nws lub Koom Txoos hauv peb lub neej. Peb tsis tas yuav ua neeg zoo tag nrho, tiam sis peb yuav tsum ua siab zoo thiab tab tom xyaum ua zoo dua. Peb yuav tsum sib zog sim ua raws li tej kev tseeb uas yooj yim to taub hauv txoj moo zoo. Yog tias peb kam ris Khetos lub npe, muaj kev ntseeg rau Nws thiab hloov siab lees txim, ua raws li Nws cov lus txib, thiab niaj hnub nco ntsoov txog Nws, ces peb yuav txais tus Vaj Ntsuj Plig Dawb Huv los ua peb tus khub vim yog Yexus Khetos txoj kev hlub tshua thiab kev tshav ntuj.

Txoj kev mloog lus xwb yuav coj tus Ntsuj Plig los rau hauv peb lub siab. Nyob hauv peb vaj peb tsev peb muaj kev ntseeg thov Vajtswv, tshawb nrhiav cov vaj lug kub, thiab hwm Hnub Caiv kom dawb huv. Nyob hauv peb tej tsev teev ntuj peb noj lub cim nco txog thiab cog lus lus dawb ceev tseg rau peb Leej Txiv Saum Ntuj Ceeb Tsheej nyob hauv Khetos lub npe. Nyob hauv tej tuam tsev dawb huv peb ua tej kab ke dawb ceev sawv cev rau peb cov kwv tij thiab cov muam uas nyob sab tim ub daim ntaub thaiv. Nyob hauv peb tsev neeg thiab tej hauj lwm peb ua rau tus Tswv, peb ncav tes mus pab lwm tus neeg, nqa lawv tej nra thiab caw lawv los cuag Khetos.

Kuv cov kwv tij thiab cov muam, kuv paub yog hais tias peb yuav ua tej yam no ces, tus Vaj Ntsuj Plig Dawb Huv yuav los! Peb sab ntsuj plig yuav loj hlob tuaj thiab peb yuav txawj nrog tus Vaj Ntsuj Plig Dawb Huv sib raug zoo, thiab Nws yuav ua peb tus khub. Yog peb yuav ntsia Khetos thiab qhib peb qhov muag thiab pob ntseg, tus Vaj Ntsuj Plig Dawb Huv yuav foom koob hmoov rau peb kom peb pom tau tus Tswv Yexus Khetos ua hauj lwm hauv peb lub neej, ntxiv zog rau peb txoj kev ntseeg Nws vim peb yuav tau puav pheej thiab paub qhov tseeb. Peb yuav haj yam pom peb cov kwv tij thiab cov muam ib yam li Vajtswv pom lawv, yuav muaj kev hlub thiab kev khuv leej rau lawv. Peb yuav hnov tus Cawm Seej lub suab hauv cov vaj lug kub, hauv tus Ntsuj Plig tej kev ntxhi lus, thiab hauv cov yaj saub uas muaj sia nyob cov lus qhia.16 Peb yuav pom Vajtswv lub hwj chim nyob ntawm Nws tus yaj saub thiab txhua tus thawj coj hauv Nws lub Koom Txoos tseeb thiab lub uas muaj sia nyob, thiab peb yuav paub tseeb hais tias nov yog Vajtswv txoj hauj lwm dawb huv.17 Peb yuav pom thiab to taub peb tus kheej thiab txhua yam uas nyob ntawm peb ib ncig ib yam nkaus li tus Cawm Seej paub. Peb thiaj yuav muaj qhov uas tus Thwj Tim Povlauj hu ua “Khetos lub siab.”18 Peb yuav muaj qhov muag kom pom kev thiab pob ntseg kom hnov lus, thiab peb yuav txhim tsa Vajtswv lub nceeg vaj.

Tej zaum lub neej no yuav nyuaj, ntxhov siab, ua rau peb mob siab, thiab ua kom peb poob siab. Kuv hais lus tim khawv rau nej tias dhau ntawm tus Vaj Ntsuj Plig Dawb Huv txoj kev ua khub, qhov kaj ntawm Yexus Khetos txoj moo zoo yuav tshem kev ntxhov siab, kev mob, thiab kev tsaus ntuj tawm. Tab txawm qhov ntawd cia li tshwm plaws los sis maj mam los xwb, lub hwj chim ntawm sab ntsuj plig no yuav muab kev hlub thiab nplij siab los kho tus uas hloov siab lees txim, tus uas raug mob; yuav muab qhov kaj pauv kev tsaus ntuj chaw; thiab Yexus txoj kev cia siab yuav tshem kev poob siab tawm. Peb yuav pom tej koob hmoov no los, thiab peb yuav paub los ntawm tus Ntsuj Plig tias yeej yog tus Tswv Yexus Khetos los ua hauj lwm hauv peb lub neej. Peb tej nra yuav pib “ploj mus hauv [peb tus Txhiv Dim] txoj kev zoo siab.”19

Ntau xyoo tas los lawm kuv niam thiab txiv raug ib yam uas piav seb qhov uas muaj qhov muag kom pom kev thiab pob ntseg kom hnov lus tseem ceeb thiab muaj hwj chim li cas. Hauv xyoo 1982 kuv niam txiv raug hu mus ua hauj lwm hauv Qhov Chaw Tshaj Tawm Txoj Moo Zoo hauv Philippines Davao Teb. Thaum kuv niam qhib tsab ntawv thiab pom hais tias nkawd raug hu mus qhov twg, kuv niam qw rau kuv txiv tias, “Tsis tau! Koj yuav tsum hu lawv thiab qhia lawv tias peb mus tsis tau rau Phillippines teb. Lawv paub hais tias koj mob ntsws nqias.” Kuv txiv twb mob ntsws nqias tau ntau xyoo lawm, thiab kuv niam txhawj nws heev.

Ob peb hmos tom qab ntawd kuv niam tau tsa kuv txiv thaum 2:30 teev sawv ntxov. Nws hais tias, “Merlin, koj puas tau hnov lub suab ntawd?”

“Tsis hnov, kuv tsis tau hnov ib lub suab li.”

Niam tias “Kuv twb hnov lub suab ntawd peb zaug hmo no uas hais tias, ‘Vim li cas koj txhawj? Koj tsis paub hais tias kuv yeej paub tias nws mob ntsws nqias los? Kuv yuav tu nws, thiab kuv yeej yuav tu koj. Cia li npaj koj tus kheej mus rau Philippines teb.’”

Daim Duab
Merlin thiab Helen Clark

Kuv niam thiab txiv tau mus ua tub txib tim Philippines teb thiab tau ua hauj lwm zoo kawg. Tus Vaj Ntsuj Plig Dawb Huv tau ua nkawd tus khub, thiab nkawd tau koob hmoov thiab raug kev pov hwm. Kuv txiv twb tsis tau muaj teeb meem vim nws mob ntsws nqias. Nws tau ua tus pab cuam thib ib hauv qhov chaw tshaj tawm txoj moo zoo pawg thawj tswj hwm, nws thiab kuv niam tau qhia ntau pua tus tub txib thiab ntau txhiab tus neeg ntseeg hauv ib Tsoom Haiv Neeg Ntseeg hauv Hnub Nyoog Kawg kom lawv npaj tos rau tej pawg ntseeg thiab ceg txheem ntseeg uas yuav los rau lub koog pov txwv Mindanao. Lawv tau koob hmoov vim nkawd muaj qhov muag uas pom kev thiab pob ntseg uas hnov lus.

Cov kwv tij thiab cov muam, kuv ua tim khawv txog Yexus Khetos. Kuv paub tias Nws muaj txoj sia nyob. Nws yog peb tus Cawm Seej thiab tus Txhiv Dim. Kuv paub yog peb tos txais Nws hauv peb lub neej thiab ua raws li tej kev tseeb hauv Nws txoj moo zoo, peb yuav muaj tus Vaj Ntsuj Plig Dawb Huv los ua peb tus khub. Peb yuav muaj lub txiaj ntsim uas yog qhov muag kom pom kev thiab pob ntseg kom hnov lus. Kuv ua tim khawv li no los ntawm Yexus Khetos lub npe dawb ceev, amees.