2010–2019
Na Vakabauta e sega ni Ka Vakacalaka, ia sa Ka ni Digidigi
Okotova 2015


Na Vakabauta e sega ni Ka Vakacalaka, ia sa Ka ni Digidigi

Na vakabauti Jisu Karisito sa dua na isolisoli mai lomalagi ka na yaco mai ni da sa digitaka meda vakabauta ka da na vakasaqara ka maroroya.

Na iVakabula e kila vinaka tu na kaukauwa kei na malumalumu ni nodra vakabauta na dau vakamuri Koya voli. Vua e dua, e a kaya ena veivakadonui, “Sa levu na nomu vakabauta.”1 A rarawataka e dua tale, “Koi kemudou sa lailai na nomudou vakabauta.”2 E a vakatarogi ira tale e so, “Sa evei na nomudou vakabauta?”3 Sa qai vakaduatanitaka sara e dua o Jisu ni a kaya, “Au sa sega ni kunea [vei ira na Isireli] e dua na vakabauta levu vakaoqo.”4

Au tarogi au, “E vakacava tu na nona raica noqu vakabauta na iVakabula?” Au tarogi kemuni ena bogi edaidai, “Ena vakacava nona raica na iVakabula na nomuni vakabauta?”

Na vakabauta na Turaga o Jisu Karisito e sega ni dua na ka e caka wale tu ga vakaveitalia, ka ciri voli ena maliwa lala. Na vakabauta e sega ni ka me donumaki keda na kena lutu mai, se me noda ni da sucu mai. Ia, sa ikoya, me vaka e kaya na ivolanikalou, “vakanuinuitaki …, na veika sa tawa kune5.” Na vakabauta e kaburaka na rarama vakayalo kei na rarama o ya e laukune votu.6 Na vakabauti Jisu Karisito sa dua na isolisoli mai lomalagi ka na yaco mai ni da sa digitaka meda vakabauta.7 ka da na vakasaqara ka maroroya. Na nomu vakabauta ena dua ga vei rua, tubucake tiko se sa lutusobu mai. Na vakabauta e ivakavuvuli dodonu ka kaukauwa ka sega ni bibi walega ena bula oqo ia ena bula talega ena daku ni ilati.8 Ena loloma soli wale i Karisito eda na vakabulai kina ena dua na siga ena vakabauti ni Yacana.9 Na nomu vakabauta e sega ni yaco wale tu ga, ia sa ka ni digidigi.

Nona Vakabauta Dua na Kai Brazil Gone

Ena dua na vula sa oti mai Brazil, au a sotavi Aroldo Cavalcante kina. A papitaiso ni a yabaki 21, na imatai ni lewe ni Lotu mai na nona matavuvale. Sa rarama levu sara na nona vakabauta, ka sa tekivu vakavakarau sara me lako ki kaulotu. Ka ni rarawa ni a qai kune vei tinai Aroldo na kenisa. Tolu na vula e muri ni vo tiko e vica walega na siga me mate e a tukuna vei Aroldo e dua na ka e lomaleqataka tiko: E sega tu na wekadratou me veivuke. O Aroldo, me na qaravi rau na ganena yalewa kei na tacina tagane. Sa yalataka sara ga o Arolodo vei tinana ka sa voleka tu ni mate, ni na cakava vakakina.

iVakatakilakila
Veitacini na Cavalcante

Dau laki cakacaka ena baqe ena siga, ka laki vuli ena univesiti ena bogi. Tosoya tikoga nona maroroya na nona veiyalayalati ni papitaiso, ia na nona vakanuinui ni laki kaulotu sa sega ni rawa. Sa nona kaulotu ga na qarauna na nona matavuvale.

Vica na vula e muri ni vakarautaka tiko e dua na vosa ena soqoni ni sakaramede, a vulica kina o Aroldo na vosa i Samuela ena nona vakasalataka na Tui o Saula: “Na talairawarawa,” e a wilika, “e vinaka cake mai na uro ni sipi tagane.”10 E a ciqoma o Aroldo na ivakatakilakila ni dodonu me muria na kaci mai vua na parofita me laki kaulotu. Ni sega ni vakayalolailaitaki ena itavi sa tu e matana, sa toso ga ki liu ena vakabauta.

iVakatakilakila
Elder Aroldo Cavalcante

Maroroya voli ga o Aroldo na cruzeiro ni Brazil e rawata. Ni yabaki 23 sa ciqoma kina na nona veikacivi ni kaulotu. Sa qai vakamacalataka vei tacina tagane se me na vica me na laki kauta mai na nona akaude ena baqe ena veivula. Se sega tikoga ni tiko vei Aroldo na ilavo me rawa ni laki kaulotu kina kei na kena me ratou na bula tiko kina na tacina, ia ena vakabauta e a lako ka laki curuma na KVK. Dua na macawa e muri e a ciqoma kina na imatai ni nona veivakalougatataki. Na baqe ka a cakacaka tu kina o Elder Cavalcante e a vakaruataka na ilavo me soli vei koya ni sa vakacegu mai na cakacaka. Na cakamana oqo kei na vica tale e a vakarautaka na ilavo ka rawa kina vua me vakacavara na nona kaulotu ka ratou qaravi vinaka talega kina na tacina ena gauna e yali tu kina.

iVakatakilakila
Matavuvale na Cavalcante nikua

Ruasagavulu na yabaki mai ki muri, sa peresitedi tu ni iTeki mai Recife Brazil Boa Viagem, o Baraca Cavalcante. Ni vakananuma lesu o koya na veigauna vakaoqori e a kaya, “Niu tovolea meu buladodonu, au vakila na loloma kei na veidusimaki ni iVakabula. Oqo e vukea na tubucake ni noqu vakabauta, solia vei au na galala meu sotava na noqu bolebole.”11 Na vakabauta nei Aroldo e sega ni lako mai vakacalaka ia e lako mai na digidigi.

Era tiko na tagane kei na yalewa ena veimatalotu Vakarisito ka titobu tu na nodra vakabauti Jisu Karisito ka da dokai ira ka rokovi ira.

Sega Tale ena Vanua Tautauvata

Ia, kemuni na veitacini sa soli vei keda e dua na ka e levu cake, na matabete ni Kalou, na kaukauwa ni Kalou sa vakalesui mai ki vuravura mai vei ira na agilosi savasava. Oqo e vakavuna mo ni duatani kina. Ko ni sa sega ni tu oqo ena vanua tautauvata. Na nomuni vakabauta ena sega ni tubu vakacalaka ia ena digidigi walega.

Na ivakarau ni noda bula tiko ena vakalevutaka se vakalailaitaka na noda vakabauta. Na masu, talairawarawa, na yalodina, na savasava ni vakasama kei na ivalavala, kei na sega ni dau kocokoco ena vakalevutaka na vakabauta. Ni sega na ivakarau vakaoqo, ena torosobu ka waicala na noda vakabauta. Na cava e kaya kina na iVakabula vei Pita, “Au sa masulaki iko me kakua ni malumalumu na nomu vakabauta”?12 Baleta ni tiko na vu ni ca ka na marautaka me vakarusa na noda vakabauta! Meda sa yalodina ena kena taqomaki.

Taro ena Yalodina

Na kena dau saumi na vakatataro dina e dau vukea na tubucake ni vakabauta, ka da na vakayagataka kina na noda kila vakavuli kei na ka eda vakila. Sa kaya na Turaga, “Raica au na tukuna sara kina lomamudou.”13 Ena sega ni lako mai vakarawarawa na isau kece ni taro, ia e levu na taro era na saumi ena vulici kei na kerekere vua na Kalou. Ni vakayagataki na vakasama ka sega na yalo ena sega ni kunei kina na isaunitaro vakayalo. Vakatavuvulitaka na vosanikalou, “Na veika ni Kalou sa sega tale e dua sa kila a yalo ga ni Kalou.”14 Me na maroroi keda tiko sa yalataka o Jisu “e dua tale na Dauniveivakacegui, … sa ikoya ga na Yalotabu sa vu ni ka dina.”15

Na vakabauta e sega ni dau vakasaurarataka na isau ni veitaro kecega. Ia, na vakabauta ena vaqara na veivakadeitaki kei na yaloqaqa ni toso ki liu ka dina ga ni so na gauna eda na vakadinadinataka kina, “Au sega ni kila na veika kecega ia au sa kila toka e levu na ka meu tosoya kina na noqu itavi vakatisaipeli.”16

Na tikotiko ga ena yalo ni vakatitiqa, qai vakaikuritaki mai vei ira na tawavakabauta kei na sega ni vakabauta ena vakamalumalumutaka na nona vakabauta e dua vei Jisu Karisito kei na Veivakalesuimai.17 “Ia, na tamata sa vakayago sa sega ni vakabauta na veika ni Yalo ni Kalou ni sa ka lialia vua.”18

Kena ivakaraitaki na veitaro me baleta na Parofita o Josefa Simici era sega ni ka vou. Era kaburaki yani vua mai vei ira na dauvakalewai koya mai na ivakatekivu ni cakacaka oqo. Vei ira kece na tamata yalodina ni vakabauta, ka ra a raica ena iloilo duiroka ni ika 21 ni senitiuri era se taroga tikoga na ka e a kaya na parofita o Josefa Simici ena 200 na yabaki sa oti, meu veivakasalataki mada vakamalua: ena gauna oqo ni solia mada vei Baraca Josefa na galala! Ena dua na gauna mai oqo ena vaka 100 taki na levu ni itukutuku mai na nodra cokovata na veisala kece ni vaqaqara sa tu nikua, ka na solia kece mai na Tamada mai Lomalagi e kila na ka kecega.19 Vakasamataka na vakataucokotaki ni nona bula—sucu ena vakaloloma, ka lailai na gauna ni nona vuli ia e vakadewataka rawa na iVola iMomani ena loma ni 90 na siga.20 E tini na udolu vakacaca na tamata yalodina nuitaki kina cakacaka ni Veivakalesuimai, ni bera ni qai mai dregata na nona cakacaka ena nona dra ni sa yabaki 38. Au vakadinadinataka ni o Josefa Simici e parofita ni Kalou. Vakadeitaka oqo ena nomu vakasama ka qai toso yani!

iSolisoli e Vakalevutaka Noda Vakabauta

Sa tiko oqo vei keda na iVola Tabu kei na i Vola i Momani me rau vakadeitaka ni o Jisu na Karisito na Luve ni Kalou. Au taura tiko oqo e dua na imatai ni ilavelave ni iVola i Momani ni Varanise ka a vakadewataka ka tabaka o John Taylor, ena nona sa laki tekivutaka na cakacaka ki Varanise ena 1852. E so, se na iVola i Momani taucoko sa vakadewataki tu oqo ena 110 na veimataqali vosa ena veiyasai vuravura. E vakarautaka e dua na ivakadinadina ni kena dina na Veivakalesuimai. Na cava na iotioti ni gauna o wilika kina na iVola i Momani mai na kena itekivu kina iotioti ni tabana? Wilika tale. Ena vakatubura na nomu vakabauta.21

Dua tale na isolisoli mai vua na Kalou ka na laveta cake na noda vakabauta sa ikoya na nodratou veituberi na Mataveiliutaki Taumada kei na Kuoramu ni Le Tinikarua. Edaidai eda tokoni iratou kina na lewe tolu na Le Tinikarua vou, ka kidavaki iratou mai o Elder Rasband, Elder Stevenson, kei Elder Renlund kina iwirini tabu ni Kuoramu ni Le Tinikarua. E kaya o Paula:

“Sa [kaciva] eso mera iapositolo; ka so me … parofita; …

“Mera vakavinakataki kina ko ira sa lotu … :

“Meda yaco kina koi keda kecega, meda lomavata ena vakabauta ka kila sara na luve ni Kalou. … :

“Meda kakua ni vagonegonea tiko ka veikauyaki ka veitosoyaki ena cagi kecega ni ivakavuvuli ena ilawaki ca ni tamata na dau veivaqaseni sa nakiti kina na veivakacalai.”22

Na veituberi ni Mataveiliutaki Taumada kei na Le Tinikarua ena vukea na taqomaki ni noda vakabauta.

iVakatakilakila
Yameyame ni Vakabauta

Ena lailai toka beka na caudre ni nomu itekitekivu ia, na digidigi dodonu ena vakadeitaki iko ka na tubu cake kina na nomu vakabauta na Kalou. Dina ga ni dredre ni bula oqo ena tu mera tarovi iko kei na so na gauna e dau tu na vunica ena vanua buto mera vakawabokotaka na nomu vakabauta. Ena nomu sa tekivu digidigi vakadodonu, vakararavi vua na Kalou, ka vakamuria na Luvena, ena solia mai na Turaga na rarama kei na kila ka e levu cake, ka na tudei ka sega tale ni lomalomarua na nomu vakabauta. Na vosa i Peresitedi Thomas S. Monson sa dina sara: “Kakua ni lomaleqa. … Na veisiga ni mataka sa rarama me vaka na nomu vakabauta.”23

Porter, Zane, kei Max Openshaw

Sa rui ka talei na vakabauta e tiko vei ira na cauravou ena Lotu oqo!

iVakatakilakila
Matavuvale na Openshaw

Ena ika 12 ni June ni yabaki oqo, au ciqoma kina e dua na imeli ka tukuni mai vei au ni dua na bisopi mai na dua na tabanalevu e Utah, o watina, kei na rua na luvedrau eratou a mate ena dua na vakacalaka ni waqavuka. O Bisopi Mark Openshaw e a pailatetaka tiko e dua na waqavuka lailai ena nona a biuta e dua na rara ni waqavuka lailai ka vakasauri na kena sa lutu mai lagi ka kacabote e delaniqele. Eratou a mate ena vakacalaka o ya o Bisopi Openshaw, o watina o Amy, kei na luvedrau o Tanner kei Ellie. Vaka na cakamana ni a bula na luvedrau tagane lailai o Max, ka ni a viritaki mai na nona idabedabe e loma ni waqavuka ka ramusu walega e so na nona sui.

Au rogoca ni o luvedrau tagane o Elder Porter Openshaw e kaulotu tiko mai na Marshall Islands Majuro Mission kei na luvedrau tagane o Zane e lako tu vakavuli ena vakaraitaki itovo vakavanua ki Jamani.

Au a qiriti Elder Openshaw mai Christmas Island. Dina ga ni a yalorarawa ena itukutuku ni nodrau mai mate tu vakasauri vaka o ya o tamana, tinana, kei rau na ganena, a totolo talega na nona leqataki rau na tacina tagane e rau se bula tiko o Elder Openshaw.

Sa rau mani lewa o Elder Openshaw kei tacina tagane o Zane mera na mai veivuke e so e vale ka me na tosoya tikoga o Porter na nona kaulotu. Erau kila ni o ya na ka erau na gadreva vakalevu na nodrau itubutubu.

iVakatakilakila
Tiko ena dua na papitaiso o Elder Porter Openshaw

Ena neirau veivosaki kei Elder Openshaw, au vakila na nona rarawa, sa vaka talega kina na caudre tiko ni nona vakabauta. “Au sa vakadeitaka,” e kaya vei au, “ka kila ka sega tale ni vakatitiqa niu na sotavi iratou tale na noqu matavuvale. … Na kaukauwa ena loma ni veivakatovolei ena laurai ena bula ni … noda Turaga o Jisu Karisito. … Na liga kaukauwa ni Kalou sa dau laurai ni vukei [au] kei iratou na taciqu ena gauna dredre au lako curuma tiko oqo.”24

iVakatakilakila
Vosa nei Zane Openshaw ena veibulu

Au qai sotavi Zane vakadua ena siga ni veibulu. Niu raica na va na kisi ni mate ena matai keitou e valenilotu, au taleitaka na vakabauta e tiko vua na gone yabaki 17 oqo ena nona vosa vei ira na ivavakoso. “Edaidai,” e a kaya, “eda sa mai soqoni vata ena yalomalumalumu kei na yalo sa ramusu, meda mai vakananuma kina na bula nei tinaqu, tamaqu, o Tanner kei Ellie. … Eda sa mai veivosaki vata, tagi vata, vakanananu vata, ka vakila vata na liga ni Kalou. …

“Na siga au rogoca kina na itukutuku ni vakacalaka, au a raica e dua na ivola mai vei tinaqu ena noqu kato. E a vola vakaoqo ena ivola: ‘Zane, nanuma tiko se o cei o iko kei na vanua o lako mai kina. Keitou na dau masulaki iko ka na dau nanumi iko tiko.’” Tomana o Zane: “Sa na sega tale ni dua na iotioti ni vosa e vinaka cake mai vei tinaqu me vaka o ya. Au kila ni o koya kei Ellie, Tanner kei Tamaqu eratou … sa masulaki rau tiko mai na [taciqu tagane kei] au. Au kila ni na vaka o ya … ni ratou masulaka meu rawa ni kila se o cei o au … baleta me… . vakataki kemuni, au luve ni Kalou, ka sa talai au mai eke. Au vakadinadinataka [ni] … ke na mani vakacava sara noda galili, na Kalou ena sega vakadua ni laivi keda.”25

Kemuni na noqu itokani, e sega ni tekivu na nomuni vakabauta ena siga o ni sucu kina, ka sega ni na oti ena siga o ni mate kina. Na vakabauta e ka ni digidigi. Ni vaqaqacotaka nomuni vakabauta, ka bula tiko me rawa ni ko ni rogoca na vosa ni veivakadonui ni iVakabula: “Sa ka levu na nomu Vakabauta.” Ena nomuni sa cakava au yalataka vei kemuni ni nomuni vakabauta ena loloma soliwale nei Jisu Karisito ena rawa kina vei kemuni me na dua na siga mo na tucake vata kei ira ko dau lomana, savasava ka kilikili ena iserau ni Kalou, ena yaca i Jisu Karisito, emeni.

iDusidusi

  1. Maciu 15:28.

  2. Maciu 6:30.

  3. Luke 8:25.

  4. Maciu 8:10.

  5. Iperiu 11:1.

  6. Raica na Alama 32:35.

  7. Raica na L. Whitney Clayton. “Digitaka Mo Vakadinata,” Liaona, Me 2015, 36–39.

  8. Raica na Lectures on Faith, (1985) 33.

  9. Raica na Efeso 2:8.

  10. 1 Samuela 15:22.

  11. Veitalanoa yadudua kei Aroldo Cavalcante, Okos. 29, 2015, Salvador, Brazil, vakakina e dua na imeli ni 31 ni Aug., 2015, Levu tale na ka e tu ena italanoa kei Aroldo Cavalcante. Ena nona yalayala vei tinana me qaravi rau na tacina. Ena veiyabaki ka tarava mai na mate i tinana e dau dusi rau wasoma o ganena kei tacina ni rau “luvena” Ena nona a kaulotu voli, na nona ivola kei na qiri ena Siganisucu kei na Sigatabu ni tina e dau vakau vei rau na nona matavuvale. Ena nona sa vulica na vakacacabo sa colata sara ga o Aroldo na veika vakailavo me rau vuli kina na tacina ka laki kaulotu talega na tacina tagane. E waraka toka o Aroldo me rau vakawatini sara na tacina ka sa qai vakawati o koya ni sa yabaki 32. Eratou se veivolekati tikoga vakamatavuvale ena gauna oqo.

  12. Luke 22:32.

  13. Vunau & Veiyalayalati 8:2.

  14. 1 Korinica 2:11.

  15. Joni 14:16–17.

  16. Raica na Adam Kotter, “When Doubts and Questions Arise,” Liaona, Maji 2015, 39–41.

  17. E a kaya ena dua na gauna o Elder Neal A. Maxwell, “E so era vinakata mera vulica na Lotu ena nodra rai o ira na sa drovaka—me vaka na vakatarogi Jiutasa me kilai Jisu kina, o ira na sa dro vaka oqo era na tukuna e levu na ka me baleti ira mai na ka e vuna na nodra sa dro,” (‘All Hell Is Moved” [Brigham Young University Devotional, Nov. 1977] 3.speeches byu.edu).

  18. 1 Korinica 2:14.

  19. “Au a sega ni tukuna vei iko niu sa vinaka sara; ia e sega ni dua na cala ena ivakatakila au sa vakavulica” (Nodra iVakavivuvuli na Peresitedi ni Lotu: Josefa Simici [2007], 522).

  20. Raica na John W. Weltch kei Tim Rathbone, “Na vakadewataki ni iVola i Momani: Basic Historical Information,” FARMS, 3 ni Okot. 1986.

  21. Na ivakadinadina vakayalo ni iVola iMomani sa itakele ni saumaki ni Yalododonu Edaidai. Sa na dua na ivakadinadina me na vakavoui ena veigauna kece sara; Kevaka me sega na veika e dau vakilai vakayalo sa na tekivu me waicala yani ka sa na tekivu guilecavi na kaukauwa ka a dau vakilai. “Era sa tekivu guilecava na tamata na ivakatakilakila kei na ka e veivakurabuitaki, era a rogoca, ia sa lailai sobu tikoga na nodra kurabuitaka na ivakatakilakila kei na ka e veivakurabuitaki mai lomalagi ka sa tekivu me kaukauwa na yalodra ka butobuto na lomadra ka ra sa sega ni vakabauta na veika era a rogoca se raica … mera vakadinata ni sa tawayaga ka vakalialia na ivakavuvuli i Karisito.” (3 Nifai 2:1–2).

  22. Efeso 4:11–14.

  23. Thomas S. Monson, “Dou Vakacegu,” Liahona, Me 2009, 92.

  24. Imeli e tauri mai vei Elder Porter Openshaw, Okos. 23, 2015.

  25. Vosa nei Zane Openshaw ena lotu ni veibulu vei iratou na nona matavuvale, 22 ni June, 2015.