Tsis Lam Tau Kev Ntseeg, Xaiv Muaj Kev Ntseeg
Los ntawm Txwj Laug Neil L. Andersen
Los ntawm Pawg Kaum Ob tug Thwj Tim
Kev ntseeg Yexus Khetos yog ib lub txiaj ntsim uas Vajtswv foom pub rau peb thaum peb xaiv ntseeg thiab thaum peb nrhiav thiab tuav nkaus lub txiaj ntsim ntawd.
Tus Cawm Seej txawj pom tias cov neeg nyob ib puag ncig Nws muaj kev ntseeg loj npaum li cas. Rau ib tug, Nws pom zoo hais tias, “[Koj] muaj kev ntseeg heev.”1 Nws nyuaj siab hais rau lwm tus hais tias, “Ua li cas nej kev ntseeg yuav tsawg ua luaj.”2 Nws nug lwm cov hais tias, “Nej kev ntseeg dua twg tas lawm?”3 Thiab Yexus hais rau lwm tus hais tias, “Txawm yog hauv cov Ixayees los kuv tsis tau pom ib tug uas muaj kev ntseeg npaum li tus no.”4
Kuv nug kuv tus kheej, “Tus Cawm Seej pom kuv txoj kev ntseeg zoo li cas?” Thiab hmo no kuv nug nej hais tias, “Tus Cawm Seej pom nej txoj kev ntseeg zoo li cas?”
Kev ntseeg tus Tswv Yexus Khetos tsis yog ib qho uas tsis muaj nqi, uas raug nplawm thaum cua tshuab mus. Tsis yog peb lam tau kev ntseeg thiab peb tsis txais tau kev ntseeg los ua peb tug. Vaj lug kub qhia tias kev ntseeg yog “qhov uas peb cia saib ntsoov rau tej uas peb qhov muag tsis pom.”5 Kev ntseeg muaj qhov kaj ntawm sab ntsuj plig, thiab lwm tus pom tau qhov kaj ntawd.6 Kev ntseeg Yexus Khetos yog ib lub txiaj ntsim uas Vajtswv foom pub rau peb thaum peb xaiv ntseeg7 thiab thaum peb nrhiav thiab tuav nkaus lub txiaj ntsim ntawd. Nej txoj kev ntseeg tab tom muaj zog zuj zus tuaj los sis qaug zog zuj zus tuaj. Kev ntseeg yog ib lub ntsiab cai ntawm hwj chim, uas tseem ceeb nyob hauv lub neej no thiab hauv lub neej tom ntej.8 Dhau ntawm Khetos txoj kev tshav ntuj, muaj ib hnub peb yuav tau kev dim los ntawm Nws lub npe.9 Nej txoj kev ntseeg thaum yav tom ntej yuav tsis yog vim nej lam tau, tiam sis vim nej xaiv tau.
Ib tug Tub Hluas Los ntawm Brazil txoj Kev Ntseeg
Ib lub hlis tas los nyob hauv Brazil, kuv ntsib Aroldo Cavalcante. Nws tau ua kev cai raus dej thaum nws muaj 21 xyoos, nws yog thawj tus mej zeej ntawm lub Koom Txoos nyob hauv nws tsev neeg. Nws txoj kev ntseeg loj heev, thiab nws pib npaj ua ib tug tub txib. Tu siab, Aroldo niam muaj mob cancer. Peb hlis tom qab ntawd, ob peb hnub ua ntej nws tas sim neej, nws hais rau Aroldo txog qhov nws txhawj xeeb tshaj: Tsis muaj txheeb ze pab lawv. Aroldo yuav tsum lav ris saib xyuas nws ob tug muam thiab nws tus kwv Nws cog lus rau nws niam nws mam ua li no.
Thaum nruab hnub nws ua hauj lwm hauv lub tsev cia nyiaj, thiab thaum tsaus ntuj nws mus kawm ntawv. Nws tseem tau ua raws li nws tej kev khi lus ntawm kev cai raus dej, tiam sis nws tsis cia siab tias nws yuav muaj cib fim ua ib tug tub txib. Nws txoj kev ua tub txib yog kev saib xyuas nws tsev neeg.
Ob peb hlis tom qab ntawd thaum nws npaj hais lus hauv kev sib ntsib txais lub cim nco txog, Aroldo kawm txog Xamuyees tej lus rau tus Vaj Ntxwv Xa-ules: “Mloog tus Tswv lus zoo dua qhov uas muab tej [yam] fij rau nws.”10 Aroldo txais kev tshoov siab kom nws mloog tus yaj saub lus thiab mus ua tub txib. Nws tsis ntshai tej kev cov nyom uas yuav muaj, es nws cia li muaj kev ntseeg heev.
Aroldo muab txhua lub nyiaj Brazil cruzeiro cia uas nws cia tau. Thaum nws muaj 23 xyoos, nws txais tau nws txoj kev hu ua ib tug tub txib. Nws qhia nws tus kwv kom nws paub rho pes tsawg nyiaj txhua lub hlis rau nws tsev neeg. Aroldo tseem tsis tau muaj nyiaj txaus them tag nrho nws txoj kev ua tub txib thiab nws tus kwv thiab ob tug muam tej nqi ua neej, tiam sis nws cia li muaj kev ntseeg thiab mus rau hauv lub MTC. Ib lub lim tiam tom qab ntawd nws tau txais thawj qhov koob hmoov. Lub tsev cia nyiaj uas ntiav Txwj Laug Cavalcante ua hauj lwm tau pub ob npaug nyiaj rau nws thaum nws xaus nws txoj hauj lwm. Qhov txuj ci tseem ceeb no, nrog rau lwm yam, ua rau nws muaj nyiaj txaus them rau nws txoj kev ua tub txib thiab nws tsev neeg.
Nees nkaum xyoo tom qab ntawd, Tij Laug Cavalcante yog tus thawj tswj hwm ntawm Ceg Txheem Ntseeg Recife Brazil Boa Viagem. Nws xav txog lub sij hawm ntawd hais tias, “Thaum kuv ua neej ncaj ncees, kuv hnov tau tus Cawm Seej txoj kev hlub thiab kev coj. Kuv txoj kev ntseeg loj tuaj, kuv thiaj kov yeej tau kuv tej kev cov nyom.”11 Tsis yog Aroldo lam tau nws txoj kev ntseeg, tiam sis nws xaiv kom muaj kev ntseeg zoo li ntawd.
Muaj ntau tus txiv neej thiab poj niam uas muaj kev ntseeg tus Tswv Yexus Khetos, thiab peb hwm thiab saib lawv rau nqi.
Tsis Sawv Nruab Nrab Ntxiv Li Lawm
Tiam sis, kuv cov kwv tij, peb tau txais ib yam dab tsi ntxiv: Vajtswv lub pov thawj hwj, Vajtswv lub hwj chim uas cov tim tswv dawb huv tau muab txum tim rov qab los rau hauv lub ntiaj teb no. Qhov no ua rau nej txawv ntawm lwm tus. Nej tsis sawv nruab nrab lawm. Nej txoj kev ntseeg yuav loj tuaj tsis yog vim nej lam tau xwb, tiam sis vim nej xaiv muaj.
Peb ua neej li cas ua rau peb txoj kev ntseeg loj tuaj los sis tsawg zuj zus mus. Kev mloog lus, kev ncaj ncees, kev xav thiab ua tej yam dawb huv, thiab kev tsis xav txog yus tus kheej ua rau nej txoj kev ntseeg loj tuaj. Yog tsis muaj tej no, txoj kev ntseeg yuav ploj zuj zus mus. Vim li cas Tus Cawm Seej hais rau Petus hais tias, “Kuv twb thov Vajtswv pab koj lawm, kom koj muab siab rau ntseeg”?12 Vim yeej muaj ib tug yeeb ncuab uas zoo siab ua rau peb txoj kev ntseeg puas tsuaj! Cia li tiv thaiv nej txoj kev ntseeg ntawd tsis tu tsis tseg.
Tej Lus Nug uas Ncaj
Kev teb tej lus nug uas peb xav paub tiag tiag yog ib qho tseem ceeb ntawm peb txoj kev txhawb nqa kev ntseeg thiab peb siv peb txoj kev txawj ntse thiab peb tej kev xav. Tus Tswv hais tias Nws yuav qhia rau peb nyob hauv peb lub cim xeeb thiab peb lub siab.13 Tsis yog peb yuav txais lus teb sai sai txhua lub sij hawm, tiam sis peb yuav txais lus teb thaum peb rau siab kawm thiab nrhiav lus teb los ntawm Vajtswv. Yog peb siv peb txoj kev txawj ntse xwb thiab tsis mloog peb lub siab ces peb txais tsis tau lus teb ntawm sab ntsuj plig. “Tsuas yog Vajtswv tus Ntsuj Plig thiaj paub Vajtswv lub siab xwb.”14 Thiab xwv kom pab peb, Yexus cog lus tias yuav xa dua ib tug Nplij Siab los rau peb, uas twb yog tus Ntsuj Plig Dawb Huv ntawm kev cog lus.15
Kev ntseeg tsis yuam kom muaj lus teb rau txhua yam tiam sis kev ntseeg xav tau kev nplij siab thiab kev ua siab loj kom mus tom ntej, thiab tej lub sij hawm lees hais tias, “Kuv tsis paub txhua yam, tiam sis kuv paub txaus kom taug mus tom ntej.”16
Qhov uas yus xav txog yus txoj kev ua xyem xyav tas li, thiab mloog cov uas tsis ntseeg thiab cov uas tso kev ntseeg tseg tej lus, yuav ua rau yus txoj kev ntseeg Yexus Khetos thiab txoj Kev Muab txoj Moo Zoo Txum Tim Rov Qab Los tsis muaj zog.17 “Tus uas tsis muaj Vaj Ntsuj Plig, tus ntawd yeej tsis tau txais tej uas Vajtswv tus Ntsuj Plig pub, rau qhov lawv pom hais tias tej ntawd tsis muaj qab hau dab tsi.”18
Piv txwv hais tias, yeej ib txwm muaj tej lus nug txog tus Yaj Saub Yauxej Xamiv. Cov uas ntxub nws yeej ib txwm liam nws txij thaum txoj hauj lwm no pib los. Kuv xav hais rau txhua tus uas muaj kev ntseeg, cov uas xav zoo li cov neeg ntawm tiam neeg xyoo 2000, xav txog tej yam los sis tej lus uas tus Yaj Saub Yauxej Xamiv hais puag thaum 200 xyoo tas los, cia kuv hais lus ntuas rau nej hais tias: Txij no mus, tsis txhob txiav txim rau Yauxej! Thaum yav tom ntej, nej yuav muaj xov xwm 100 npaug tshaj tag nrho tej uas muaj nyob hauv Internet niaj hnub nim no, thiab tej ntawd yuav los ntawm peb Leej Txiv Saum Ntuj Ceeb Tsheej uas paub txhua yam.19 Cia li xav txog Yauxej lub neej tag nrho—nws yug los rau ib tsev neeg txom nyem thiab txawm nws tsis tau kawm ntawv ntev, nws siv tsawg dua li 90 hnub kom txhais Phau Ntawv Maumoos.20 Ntau pua txhiab tus txiv neej thiab poj niam uas rau siab thiab ncaj ncees los pab lub hom phiaj ntawm Kev Muab txoj Moo Zoo Txum Tim Rov Qab Los. Nws muab nws cov ntshav ntaus cim rau nws txoj hauj lwm thaum nws muaj 38 xyoo. Kuv ua tim khawv tias Yauxej Xamiv yog Vajtswv ib tug yaj saub. Cia li ntseeg thiab tsis txhob txhawj txog qhov no ntxiv!
Tej Txiaj Ntsim uas Txhawb Nqa Peb txoj Kev Ntseeg
Phau Npainpaum thiab Phau Ntawv Maumoos qhia tseeb rau peb hais tias Yexus yog tus Khetos, Vajtswv Leej Tub. Nyob hauv kuv txhais tes kuv tuav ib Phau Ntawv Maumoos uas txhais lus Fabkis, uas John Taylor muab luam tawm thaum nws pib ua hauj lwm nyob Fabkis Teb thaum xyoo 1852. Tam sim no peb twb muab ib feem los sis tag nrho Phau Ntawv Maumoos txhais rau 110 yam lus nyob thoob plaws lub ntiaj teb no. Phau no ua tim khawv txog qhov uas txoj Kev Muab txoj Moo Zoo Txum Tim Rov Qab Los muaj tseeb tiag. Lub sij hawm twg yog zaum kawg uas nej tau nyeem tag nrho Phau Ntawv Maumoos? Cia li nyeem ib zaug ntxiv. Phau no yuav ua rau nej txoj kev ntseeg loj tuaj.21
Ib lub txiaj ntsim uas Vajtswv foom pub kom txhawb nqa peb txoj kev ntseeg ntxiv yog Thawj Pawg Thawj Tswj Hwm thiab Pawg Kaum Ob tug Thwj Tim txoj kev coj. Hnub no peb tau txhawb nqa peb tug mej zeej tshiab rau Pawg Kaum Ob tug Thwj Tim thiab kuv zoo siab tos txais Txwj Laug Rasband, Txwj Laug Stevenson, thiab Txwj Laug Renlund rau Pawg Kaum Ob tug Thwj Tim. Povlauj hais tias:
“Nws [hu cov thwj tim]; thiab … [yaj saub]; …
“Kom cov ntseeg paub ua Vajtswv tes hauj lwm … :
“Mus txog thaum peb sawv daws ua tau ib lub siab, ntseeg ib yam nkaus, paub tseeb Vajtswv tus Tub … :
“… Peb yuav tsis … mloog cov neeg dag tej lus, thiab raws luag qab rau ub rau no. Cov neeg dag ntawd txhob txwm dag kom sawv daws yuam kev xwb.”22
Thawj Pawg Thawj Tswj Hwm thiab Pawg Kaum Ob tug Thwj Tim pab tiv thaiv peb txoj kev ntseeg.
Txawm nej txoj kev ntseeg tsis loj, kev ua ncaj ncees yuav ua rau nej tso siab rau Vajtswv, thiab nej txoj kev ntseeg yuav loj tuaj. Muaj teeb meem ntawm lub neej no tshuab hlob hlob nplawm nej, thiab kev phem tos ntsoov nyob hauv kev tsaus ntuj nti, xav kom muab nej txoj kev ntseeg tua. Tiam sis thaum nej tseem xaiv ua tej yam zoo, tso siab rau Vajtswv, thiab ua raws li Nws Leej Tub, tus Tswv yuav muab qhov kaj thiab kev txawj ntse rau nej, thiab nej txoj kev ntseeg yuav khov kho thiab ruaj nrees. Thawj Tswj Hwm Thomas S. Monson hais tias: “Tsis txhob ntshai. Yuav muaj kev tshav ntuj thaum yav tom ntej ntau npaum li nej txoj kev ntseeg.”23
Porter, Zane, thiab Max Openshaw
Cov tub hluas ntawm lub Koom Txoos no muaj kev ntseeg heev!
Xyoo no thaum lub Rau Hli Ntuj hnub tim 12, kuv tau txais ib tsab email qhia kuv tias ib tug npisov los ntawm ib pawg ntseeg hauv Utah, nws tus poj niam, thiab nws ob tug me nyuam tau tas sim neej thaum lawv nyab hoom poob. Npisov Mark Openshaw yog tus uas tsav nyab hoom es thaum nws pib ya ntawm ib lub tshav nyab hoom me, ua rau lub nyab hoom poob thiab tawg tag. Npisov Openshaw, nws tus poj niam, Amy, thiab nkawd ob tug me nyuam Tanner thiab Ellis,tau tas sim neej. Yog ib qho txuj ci tseem ceeb uas nkawd tus tub uas muaj tsib xyoos, Max, thaum lub nyab hoom poob ua rau nws lub rooj dhia tawm plaws mus sab nraud, nws tsuas mua ob peb tug pob txha tau dam tiam sis tseem muaj sia nyob.
Kuv kawm hais tias nkawd tus tub Txwj Laug Porter Openshaw yog ib tug tub txib hauv Qhov Chaw Tshaj Tawm txoj Moo Zoo Marshall Islands Majuro thiab nkawd tus tub uas muaj 17 xyoo, Zane, yog ib tug tub kawm ntawv uas kawm kab lig kev cai nyob hauv Yelemes Teb.
Kuv tau hu Txwj Laug Openshaw nyob hauv lub Pov Txwv Christmas. Txawm nws nyuaj siab kawg nkaus vim nws niam, txiv, tus kwv thiab tus muam puav leej tas sim neej, Txwj Laug Openshaw txhawj txog nws ob tug kwv.
Thaum kawg Txwj Laug Openshaw thiab nws tus kwv Zane txiav txim siab tias lwm tus pab tau lawv nyob hauv tsev thiab Porter yuav tsum nyob ua tub txib kom tiav. Nkawd paub hais tias nkawd niam thiab txiv yuav xav kom nws ua li ntawd.
Thaum kuv nrog Txwj Laug Openshaw tham, kuv paub nws tu siab tiam sis nws kuj muaj kev ntseeg heev. Nws tau qhia kuv tias, “Kuv muaj kev ntseeg thiab kuv paub tseeb tias kuv yuav pom kuv tsev neeg dua ntxiv. … Peb tus Tswv Yexus Khetos … yeej yog tus uas txhawb peb lub dag zog thaum peb raug kev txom nyem. … Kuv twb pom Vajtswv txhais tes pab [kuv] thiab kuv ob tug kwv thaum peb raug qhov nyuaj heev [no].”24
Kuv ntsib Zane nyob ntawm lub ntees tuag. Thaum kuv saib plaub lub hleb nyob hauv chav teev tiam Vajtswv, kuv xav tsis thoob uas ib tug uas muaj 17 xyoo yuav muaj kev ntseeg npaum li cas thaum nws hais lus. Nws hais tias, “Hnub no, peb sib sau ua ke nrog lub siab mos siab muag, kom nco txog kuv niam, txiv, Tanner, thiab Ellie lub neej. … Peb twb sib tham ua ke, quaj ua ke, nco txog lawv ua ke, thiab paub txog Vajtswv txoj kev saib xyuas ua ke. …
“Ib hnub tom qab kuv hnov xov txog kev raug xwm txheej no, kuv nrhiav tau ib tsab ntawv nyob hauv kuv lub hnab los ntawm kuv niam. Nyob hauv tsab ntawv ntawd nws sau hais tias: ‘Zane, cia li nco qab ntsoov tias koj yog leej twg thiab koj tuaj qhov twg tuaj. Peb yuav thov Vajtswv pab koj thiab nco koj.’” Zane hais ntxiv hais tias: “Yeej yuav tsis muaj lus zoo dua uas kuv niam tau hais. Kuv paub tias nws, nrog rau Tanner, Ellie, thiab kuv txiv lawv puav leej … thov Vajtswv pab [kuv ob tug kwv tij] thiab kuv. Kuv paub tias … lawv thov Vajtswv pab kuv nco qab tias kuv yog leej twg … vim, kuv zoo li nej, kuv yog Vajtswv ib tug me nyuam, thiab Nws tau xa kuv los nyob no. Kuv ua tim khawv tias … txawm peb xav tias peb nyob ib leeg los, Vajtswv yeej yuav tsis tso peb tseg.”25
Kuv cov phooj ywg, nej txoj kev ntseeg tsis tau pib thaum nej yug los, thiab nej txoj kev ntseeg yuav tsis tuag thaum nej tas sim neej no. Kev ntseeg yog ib qho kev xaiv. Cia li txhawb nqa nej txoj kev ntseeg, thiab ua neej kom tsim nyog txais tau tus Cawm Seej tej lus pom zoo tias: “Koj muaj kev ntseeg heev.” Thaum nej ua li ntawd, kuv cog lus rau nej tias dhau ntawm Yexus Khetos txoj kev tshav ntuj, yuav muaj ib hnub, nej txoj kev ntseeg yuav qhib kev rau nej sawv nrog cov uas nej hlub, ua neeg dawb huv nyob ntawm Vajtswv lub xub ntiag, los ntawm Yexus Khetos lub npe, amees.