Ang Timon Ara sa Kamot sang Dios

Sang nagligad nga Octubre nga konperensya, gindapit ko ang mga nagpalamati nga sundon ang laygay ni Brigham Young nga magpabilin sa Dumaan nga Barko Zion nga amo ang Simbahan ni JesuCristo sang Mga Santos sa Ulihing Mga Adlaw, kag mangunyapot sa duha ka kamot.¹ Ang pila ka mga miyembro sang akon pamilya kag iban nagpamangkot sa akon sining pamangkot, “Ano ang ara sa Dumaan nga Barko Zion nga dapat naton kapyutan?” Ginsiling ko ang ginhambal ni Presidente Brigham Young: “Ara kita sa Dumaan nga Barko Zion. … [Ang Dios] ang nagakapot sa timon kag magapabilin dira. … Siya nagadikta, nagagiya, kag nagapamuno. Kon ang katawhan lubos nga may pagsalig sa ila Dios, kag indi gid magsikway sang ila mga kasugtanan ukon sang ila Dios, magagiya Siya sa aton sang husto.”²

Ang aton Langitnon nga Amay kag ang Ginuong JesuCristo nagbutang sa Dumaan nga Barko Zion sang maathag kag simple nga mga kamatuoran sang walay katubtuban nga makabulig sa aton sa tama nga pagpanakayon sa mabalud nga dagat sining kabuhi. Ari lamang ang pila.

Ang Simbahan ni JesuCristo dalayon nga ginapamunoan sang buhi nga mga propeta kag mga apostoles. Bisan sila mga tawo kag may tawhanon nga mga kakulangan, ang mga alagad sang Ginuo may ara sang inspirasyon agud buligan kita nga makalikaw sa mga sablag-nga-makamatay sa espiritu kag makabulig sa aton nga makaagi sing luwas sa sining kabuhi padulong sa aton puluy-an sa langit.

Sa halos 40 anyos ko nga kaupod sila, saksi ako sa mahipos nga inspirasyon kag makahulogan nga bugna nga nagpahulag sa mga propeta kag mga apostoles, sang iban nga mga General Authority, kag mga lider sang auxiliary. Bisan sila indi perpekto kag makasayup, ining maayo nga mga lalaki kag mga babayi himpit nga dedikado sa pagpamuno sa buluhaton sang Ginuo pasulong suno sa Iya pagdirekta.

Kag makapat-od kamo: ang Ginuo nagadirekta sang Iya Simbahan paagi sa buhi nga mga propeta kag mga apostoles. Sa amo sini nga paagi nga Siya dalayon nga nagabuhat sang Iya buluhaton. Tunay, ang Manluluwas nagtudlo, “Sa pagkamatuod, ginasiling ko sa inyo, Siya nga nagabaton sa kay kon sin-o man nga akon ginpadala, nagabaton sa akon.”³ Indi naton mabulag si Cristo sa Iya mga alagad. Kon wala ang una Niya nga mga Apostoles, wala kita sang nasulat nga panaksihon parte sa madamo nga panudlo Niya, ang Iya pagpangalagad, ang Iya pag-antus sa Hardin sang Gethsemane, kag sang Iya kamatayon sa krus. Kon wala ang ila mga pagpamatuod, wala kita sang saksi halin sa apostoles parte sa bakante nga lulubngan kag sang Pagkabanhaw.

Ginmandoan Niya yadtong unang mga Apostoles:

“Gani kadtui ninyo ang mga tawo sa tanan nga mga lugar. Himoa sila nga akon mga sumulunod, kag bunyagan sila sa ngalan sang Amay, kag sang Anak, kag sang Espiritu Santo:

“Tudloi ninyo sila nga tumanon ang tanan nga akon ginsugo sa inyo.”⁴

Ining mando ginhatag liwat sa aton panahon sang ang Ginuo nagtawag kay Joseph Smith agud ipanumbalik ang Simbahan, nga may naordinan nga mga Apostoles agud magpahayag sang Iya ebanghelyo sa pinakaulihing tion antes Siya liwat nga mag-abot.

Dalayon nga pagtilaw sa kalibutan ang magbaton sa buhi nga mga propeta kag mga apostoles, apang ini kinahanglan gid nga buhaton agud lubos nga mahangpan ang Pagpasag-uli kag ang mga panudlo ni JesuCristo kag magbaton sa kabug-osan sang mga bugay sang priesthood nga ginhatag sa yadtong mga gintawag Niya.

Tuman ka madamo nga katawhan ang nagahunahuna nga mga lider sang Simbahan kag mga miyembro dapat perpekto ukon halos perpekto. Nalipatan nila nga ang grasya sang Ginuo nagakaigo agud matuman ang iya buluhaton paagi sa mga tawo. Ang aton mga pinuno may ara sang pinakamaayo nga mga tuyo, apang kami kon kaisa makahimo sang sayup. Indi ini pinasahi sa mga relasyon sa Simbahan, subong nga ang amo man nagakatabo sa mga relasyon sa tunga sang mga abyan, mga kasilingan, kag mga trabahante kag bisan pa sa tunga sang mga magtiayon kag mga pamilya.

Mahapos magpangita sang kapaltahan sang tawo. Apang, seryosong may sayup kita kon ini lang ang aton makita kag kita bulag sa kamot sang Dios nga nagabuhat paagi sa mga gintawag Niya.

Ang magtumod sa kon paano ang Ginuo nagahatag sang inspirasyon sa pinili Niya nga mga pinuno kag kon paano Niya ginapahulag ang mga Santos sa paghimo sang halangdon kag pinasahi nga mga butang wala sapayan sa ila pagkatawo amo ang isa ka paagi nga kita makapangunyapot sa ebanghelyo ni JesuCristo kag magpabilin nga luwas sa sulod sang Dumaan nga Barko Zion.

Ang ikaduhang kamatuoran amo ang doktrina sang plano sang kaluwasan. Paagi sa Propetang si Joseph Smith, ang Dios naghatag sang Libro ni Mormon, Ang Doktrina kag Mga Kasugtanan, kag madamo pa nga dugang nga mga panudlo sa Simbahan. Ang mga ini nagalakip sa ihibalo parte sa plano sang kaluwasan, nga amo ang mapa sang kon diin kita naghalin, ang aton katuyoan diri sa kalibutan, kag kon diin kita makadto kon kita magtaliwan. Ang plano nagahatag man sa aton sang pinasahi, walay katapusan nga panan-aw nga kita mga anak sang Dios sa espiritu. Paagi sa paghangop kon sin-o ang aton Langitnon nga Amay kag ang aton relasyon sa Iya kag sa Iya Pinalangga nga Anak, si JesuCristo, kita magabaton sang Ila mga sugo kag maghimo sang mga kasugtanan nga magadala sa aton balik sa Ila atubang sa walay katubtuban.

Kada tion nga ako nagauyat sang bag-o nabun-ag nga lapsag, nagapamangkot ako: “Sin-o ikaw, diutay nga bata? Mangin sin-o ka paagi sa Pagpasag-uli ni Cristo?”

Kita nagapamangkot sang kasubong nga mapainoinohon nga mga pamangkot kon ang isa ka pinalangga naton nagataliwan: “Diin na sila? Ano ang ila nakita kag nabatyagan? Nagapadayon bala ang kabuhi? Ano ang kinaiya sang aton ginakahamot-an sing labi nga mga relasyon sa dakung kalibutan sang mga espiritu sang nagtaliwan?”

Sa sinang kalibutan, ang amon pamilya may duha ka apo nga babayi, sanday Sara kag Emily, kag isa ka apo nga lalaki, si Nathan. Sa kada pagtaliwan sang apo, ang amon pamilya nangunyapot sa duha ka kamot sa mga kamatuoran sang ebanghelyo. Ang amon mga pamangkot nasabat nga may kasulhay kag pagpasalig paagi sa Pagpasag-uli sang Manluluwas. Bisan nasuboan kami sa amon mga apo, nabal-an namon nga sila buhi, kag makit-an namon sila liwat. Nagapasalamat gid kami sa sining espirituhanon nga paghangop sa mga tion sang kaugalingon kag panimalay nga kabudlay.

Ang isa pa ka importante nga kamatuoran sa Simbahan amo nga ang Langitnon nga Amay nagtuga kay Adan kag Eba para sa mataas nga katuyoan. Ginmando sa ila,—kag, sang ulihi, sa ila mga kaliwatan—ang magtuga sang mortal nga mga lawas para sa mga anak nga espiritu sang Dios agud sila mabuhi sa kalibutan. Sa sining proseso, ang Langitnon nga Amay nagapadala sang Iya mga anak nga espiritu pakadto sa kalibutan agud magtuon kag maglambo paagi sa mga inagihan sa mortal nga kabuhi. Bangud palangga Niya ang Iya mga anak, ang Dios nagpadala sang langitnon nga mga mensahiro kag Apostoles agud magtudlo sa ila parte sa sentro nga papel ni JesuCristo bilang Manluluwas naton.

Sa ginatos ka mga tuig, ang mga propeta nagatuman sang ila katungdanan sang sila nagapaandam sa katawhan parte sa mga katalagman nga ara sa ila atubang. May katungdanan ang mga Apostoles sang Ginuo nga magbantay, magpaandam, kag magbulig sa yadtong mga nagapangita sang mga sabat sa mga pamangkot sang kabuhi.

Baynte anyos nga nagligad, ang Unang Pangulohan kag ang Korum sang Napulogduha ka mga Apostoles nag-isyu sang “The Family: A Proclamation to the World.” Sa sinang dokumento nga may inspirasyon, nagtapos kami sa masunod: “Ginapaandaman namon ang mga tawo nga nagalapas sa kasugtanan sang pagkaputli, nga nagaabuso sa tiayon ukon anak, ukon napaslawan sa pagtuman sang mga responsibilidad sa panimalay nga sa isa ka adlaw sila magaatubang sa Dios nga may salabton. Dugang, nagapaandam kami nga ang pagkarumpag sang panimalay magadala sa katawhan, mga komunidad, kag mga nasyon sang mga kalamidad nga gintagna sang dumaan kag moderno nga mga propeta.”⁵

Bilang mga Apostoles, ginapamatud-an namon liwat ining sagradong pagpaandam karon nga adlaw. Palihog dumdoma nga ang mga sugo kag mga kasugtanan bilidhon nga mga kamatuoran kag mga doktrina nga ara sa Dumaan nga Barko Zion, kon diin ang timon ara sa kamot sang Dios.

Ang isa pa ka doktrina nga dapat naton kaptan amo ang pagtuman sa Adlaw nga Inugpahuway. Ini nagabulig sa aton nga magpabilin nga walay mantsa sa kalibutan, nagahatag sang lawasnon nga pagpahuway, kag sa kada isa sa aton sang espirituhanon nga kasulhay sang pagsimba sa Amay kag sa Anak kada Domingo.⁶ Kon kita nagakalipay sa Adlaw sang Inugpahuway, ini tanda ang aton pagpalangga sa Ila.⁷

Bilang bahin sang amon pagtinguha nga himuon ang Adlaw nga Inugpahuway nga isa ka kalipay, ginpangabay namon ang mga lokal nga pinuno kag mga miyembro sang Simbahan nga magdumdom nga ang sacramento nga miting iya sang Ginuo kag dapat nagaugat kag nagapasad sa Iya panudlo. Ang paghiwat sang ordinansa sang sacramento amo ang pagbag-o liwat sang aton mga kasugtanan kag pagkumpirma liwat sang aton pagpalangga sa Manluluwas kag magdumdom sang Iya Sakripisyo kag Pagpasag-uli.

Ang amo man nga espiritu sang pagsimba ang dapat mangibabaw sa aton binulan nga mga “fast and testimony meeting”. Ining “sacrament meeting” para sa mga katapo agud malip-ot nga magpahayag sang ila pagpasalamat, pagpalangga, kag pagkilala sa Langitnon nga Amay, kay JesuCristo, kag sa ginpanumbalik nga ebanghelyo kag magpamatuod sa sining mga bagay. Ang “Fast and testimony meeting” isa ka tion nga magpaambit sang malip-ot kag inspiradong mga hunahuna kag sagradong pagpamatuod. Indi ini tion agud maghatag sang pamulongpulong.

Ang diutay nga mga bata dapat maghanas sa pagpaambit sang ila mga pagpamatuod sa Primary kag upod sa ila mga ginikanan sa ila mga “home evening” tubtob nga sila makahangop sa importanteng kahulogan sang pagpamatuod.

Ang bag-o nga pagpatalupangod parte sa paghimo sang Adlaw nga Inugpahuway bilang isa ka kalipay isa ka direkta nga bunga sang inspirasyon halin sa Ginuo paagi sa mga lider sang Simbahan. Ang mga miyembro sang “ward council” dapat magbulig sa bishopric sa naunang pila ka mga simana paagi sa paglantaw sang musika kag mga topiko nga ginpanugyan para sa kada sacrament meeting.

Tanan kita ginabugayan kon ang Adlaw nga Inugpahuway napuno sang pagpalangga sa Ginuo sa puluy-an kag sa simbahan. Kon ang aton mga anak natudloan sang mga butang sang Ginuo, sila makabalo nga magbatyag kag magsunod sa Iya Espiritu. Kita tanan magahandom sa pagtambong kada Domingo agud mag-ambit sang sacramento kon mabatyagan naton ang Espiritu sang Ginuo. Kag ang tanan, bata kag tigulang, nga nagapas-an sang mabug-at nga mga palas-anon makabatyag sang espirituhanon nga pagpaumpaw kag kasulhay nga nagahalin sa isa ka Adlaw nga Inugpahuway nga gindulot para sa maligdong nga pagdumdom sa aton Langitnon nga Amay kag sa Ginuong JesuCristo.

Maayo lang, kay si Cristo dalayon nga ara, nagahulat kag luyag nga magbulig sa aton kon kita magpangamuyo para sa bulig kag handa sa paghinulsol kag magpalapit sa Iya.

Karon, samtang ginabinagbinag naton ining pila lamang ka mga kamatuoran nga ara sa sulod sang Dumaan nga Barko Zion, magpabilin kita sa barko kag magdumdom nga, sa kahulogan, ang barko isa ka salakyan, ang katuyoan sang isa ka salakyan amo ang magdala sa aton sa isa ka padulongan.

Ang padulongan sang aton barko amo ang bug-os nga mga bugay sang ebanghelyo, ang ginharian sang langit, ang himaya selestiyal, kag ang pag-upod sang Dios!

Ang plano sang Dios nakapwesto. Ang timon ara sa Iya, kag ang Iya daku kag gamhanan nga barko nagapanakayon padulong sa kaluwasan kag eksaltasyon. Dumdoma nga indi kita makaabot didto paagi sa paglumpat paggwa sa barko kag magtinguha sa paglangoy nga nagaisahanon.

Ang eksaltasyon amo ang kalab-uton sining mortal nga pagpanakayon, kag wala sang makadungka didto kon wala ang mga paagi sang ebanghelyo ni JesuCristo: ang Iya Pagpasag-uli, mga ordinansa, kag ang nagagiya nga mga doktrina kag mga prinsipyo nga ara sa Simbahan.

Sa Simbahan naton matun-an ang mga buluhaton sang Dios kag kon diin kita nagabaton sang grasya sang Ginuong JesuCristo nga makaluwas sa aton. Sa sulod sang Simbahan kon diin ginaporma naton ang mga panaad kag mga kasugtanan sang walay katapusan nga mga pamilya nga amo ang aton pasaporte sa eksaltasyon. Ang Simbahan amo ang ginapaandar sang priesthood nga nagaduso sa aton lampuwas sa di-mapaktan nga kadagatan sang mortalidad.

Magpasalamat kita bangud sa Dumaan nga Barko Zion, kay kon wala ini kita ginhaboy nga nagalutaw, nagaisahanon kag wala sing mahimo, ginadala sang anod nga wala sang timon ukon bugsay, ginadala sang alimpuros sang hangin kag mga balud sang kaaway.

Mangunyapot sing todo mga kautoran, kag magpanakayon sa mahimayaon nga barko, Ang Simbahan ni JesuCristo sang Mga Santos sa Ulihing Mga Adlaw, kag kita makalab-ot sa aton padulongan sa walay katubtuban. Ini ang akon pagpamatuod kag pangamuyo para sa aton tanan sa ngalan Niya nga kon kay sin-o ang Dumaan nga Barko Zion ginhingalanan, bisan ang aton Ginuo kag Manluluwas, si JesuCristo, amen.