Vajtswv Yog tus uas Tsav lub Nkoj

Thaum lub tuam rooj sab laj lub Kaum Hli Ntuj tsaib no, kuv tau caw cov mloog kom los ua raws li Brigham Young cov lus qhia uas hais tias nyob twj ywm rau ntawm lub Nkoj Xi-oos, uas yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thiab tuav rawv siv ob txhais tes tib si.¹ Txij thaum ntawd los, kuv zoo siab kawm hais tias ib txhia neeg hauv kuv tsev neeg thiab lwm tus neeg tau mloog zoo thiab lawv tau nug kuv hais tias, “Muaj dab tsi nyob hauv lub nkoj uas peb tuav tau?” Kuv pab lawv nco qab ntsoov Thawj Tswj Hwm Young cov lus hais tias: “Peb nyob hauv lub nkoj Xi-oos. … [Vajtswv] tab tom tsav lub nkoj thiab Vajtswv yuav nyob ntawd nraim tsis txav li. … Nws txib, coj kav thiab qhuab ntuas. Yog tias tib neeg tso siab plhuav rau lawv tus Vajtswv, tsis tso lawv tej kev khi lus los sis lawv tus Vajtswv tseg, Nws yeej yuav coj peb kev.”²

Muaj tseeb tiag, peb Leej Txiv Saum Ntuj Ceeb Tsheej thiab tus Tswv Yexus Khetos tau kho lub Nkoj Xi-oos kom muaj tej qhov tseeb uas meej meej thiab yooj yim to taub thiab uas yuav pab peb mus ncaj nraim dhau tej dej nphau nthwv ntawm lub neej no. Nram qab no yog ob peb qho tseeb uas kuv hais txog ntawd.

Yexus Khetos lub Koom Txoos yeej los tau muaj cov yaj saub thiab cov thwj tim coj kav nws. Txawm hais tias cov thawj coj no yeej yuam kev qee zaum, los tus Tswv cov tub qhe txais tau kev tshoov siab kom pab peb zam tej kev cov nyom uas yuav ua tau rau peb sab ntsuj plig puas tsuaj mus thiab kom pab peb mus kom dhau lub neej no raws li qhov nyab xeeb kom mus txog peb lub neej nyob saum ntuj ceeb tsheej thaum kawg.

Kuv twb nrog cov thawj coj no koom tes tau 40 xyoo no los lawm, thiab kuv tau ua tim khawv pom thaum tej kev tshwm sim thiab tej kev tshoov siab tau coj cov yaj saub thiab cov thwj tim, lwm cov Tuam Thawj Coj, thiab cov thawj coj rau cov tuam koom haum pab mus khiav Vajtswv tej dej tej num. Txawm hais tias lawv tsis zoo tag nrho los yog yuam kev tsis tau, cov txiv neej thiab cov poj niam no tau rau rau siab coj tus Tswv tej hauj hwm mus tom ntej raws li Nws coj qhia.

Thiab tsis txhob yuam kev txog qhov no: tus Tswv coj kav Nws lub Koom Txoos dhau ntawm cov yaj saub thiab cov thwj tim. Tus Tswv yeej los tau ua Nws tej hauj lwm li no. Tiag tiag, tus Cawm Seej tau qhia hais tias, “Kuv qhia tseeb rau nej hais tias tus uas lees yuav tus uas kuv txib los, tus ntawd lees yuav kuv thiab tus uas lees yuav kuv.”³ Peb muab tus Khetos cais tawm ntawm Nws cov tub qhe tsis tau li. Yog tias tsis muaj Nws thawj cov Thwj Tim, peb yuav tsis muaj lus tim khawv pom hais txog Nws cov lus qhia, Nws tej kev pab lwm tus neeg, Nws tej kev raug txom nyem hauv lub Vaj Khexemanes, thiab Nws txoj kev tuag saum ntoo khaub lig. Tsis muaj lawv cov lus tim khawv, peb yuav tsis muaj cov Thwj Tim cov lus tim khawv txog lub qhov ntxa uas tsis muaj dab tsi nyob haud thiab txoj Kev Sawv Rov Los.

Tus Tswv txib thawj cov Thwj Tim ntawd hais tias:

“Yog li ntawd, nej cia li tawm mus qhia txhua haiv neeg, tuav Leej Txiv, Leej Tub thiab Vaj Ntsuj Plig Dawb Huv lub npe muab lawv ua kev cai raus dej:

“Qhia kom lawv paub coj raws li txhua yam uas kuv tau qhia rau nej lawm.”⁴

Rov qab muaj txoj lus txib hauv peb lub caij nyoog no thaum tus Tswv tau hu Yauxej Xamiv los txhim tsa lub Koom Txoos, ua ke nrog cov Thwj Tim tshiab uas raug tsa los mus tshaj tawm tus Tswv txoj moo zoo ib zaug ntxiv ua ntej Nws yuav rov qab los zaum thib ob.

Yeej nyuaj heev rau cov neeg ntiaj teb txais yuav cov yaj saub thiab cov thwj tim uas muaj txoj sia nyob, tiam sis tseem ceeb heev ua li ntawd kom thiaj to taub tau txoj Kev Theej Txhoj thiab Yexus Khetos cov lus qhia thiab kom thiaj txais tau tej koob hmoov los ntawm lub pov thawj hwj uas los ntawm cov uas tus Tswv tau hu los mus ua hauj lwm tam Nws.

Neeg coob heev xav hais tias lub Koom Txoos cov thawj coj thiab cov mej zeej yuav tsum yog neeg zoo tag nrho los yog yuav luag zoo tag nrho. Lawv tsis nco qab hais tias tus Tswv txoj kev tshav ntuj txaus kom ncav tau Nws tej hom phiaj dhau ntawm tib neeg ntiaj teb. Peb cov thawj coj yeej rau rau siab ua tej yam zoo, tiam sis qee zaum peb kuj yuam kev thiab. Qhov no tsis yog hais tau txog cov neeg hauv lub Koom Txoos xwb, kuj hais tau ib yam txog tej yam uas muaj los rau ntawm ib co phooj ywg, neeg zej zog, thiab khub hauj lwm thiab nyob ntawm ib khub niam txiv thiab hauv tsev neeg thiab.

Thaum peb nrhiav kom tau tej yam uas lwm tus neeg tsis muaj zog ua, peb nrhiav tau yooj yim heev. Tsis kav, peb yuam kev loj heev thaum peb tsuas pom qhov uas lwm tus neeg ua yuam kev es tsis pom Vajtswv lub hwj chim ua hauj lwm dhau ntawm tus neeg ntawd.

Tsom ntsoov qhov uas tus Tswv tshoov siab rau cov thawj coj uas Nws xaiv lawm thiab saib tus Tswv ua li cas txhij cov Ntseeg ua tej yam zoo kawg nkaus txawm tias lawv yog tib neeg ntiaj teb xwb, ua li yog ib qho uas peb tuav rawv Yexus Khetos txoj moo zoo thiab nyob ruaj kho hauv lub Nkoj Xi-oos tau.

Ib qho tseeb thib ob yog txoj lus qhuab qhia ntawm txoj kev cawm seej. Dhau los ntawm tus Yaj Saub Yauxej Xamiv, Vajtswv tau muab Phau Ntawv Maumoos, phau Lus Qhuab Qhia thiab Kev Khi Lus, thiab lwm yam lus qhuab qhia rau lub Koom Txoos. Tej lus qhuab qhia no suav qhov uas peb paub txog txoj kev cawm seej, uas yog ib daim pheem thib qhia tias peb los qhov twg los, peb lub ntsiab ua neej yog zoo li cas, thiab peb yuav mus qhov twg tom qab peb tas sim neej. Txoj hau kev no kuj qhia peb hais tias peb yog Vajtswv cov me nyuam ntsuj plig. Thaum peb to taub saib peb Leej Txiv Saum Ntuj Ceeb Tsheej yog leej twg tiag thiab peb nrog Nws thiab Nws tib leeg tub, Yexus Khetos, sib txheeb li cas, peb yuav txais Nkawd cov lus txib thiab nrog Nkawd sib khi lus, uas yuav coj peb rov qab mus cuag tau Nkawd saum ntuj ceeb tsheej.

Txhua lub sij hawm kuv puag ib tug me nyuam mos liab tshiab, kuv xav zoj rau kuv tus kheej hais tias: “Koj yog leej twg, me naib? Koj yuav rais los mus ua dab tsi dhau ntawm tus Khetos txoj Kev Theej Txhoj?”

Peb kuj xav zoj zoo ib yam li ntawd thaum ib tug neeg uas peb hlub tas sim neej hais tias: “Nws nyob qhov twg? Nws pom dab tsi thiab muaj li cas rau nws lawm? Puas muaj txoj sia txuas ntxiv mus? Peb tej kev sib txheeb sib ze uas peb saib muaj nqis ntau heev yuav zoo li cas tiag hauv lub ntuj ntsuj plig?”

Hauv lub ntuj ntawd, kuv tsev neeg muaj ob tug ntxhais xeeb ntxwv, Sara thiab Emily, thiab ib tug tub xeeb ntxwv, Nathan. Thaum cov me nyuam xeeb ntxwv no tas sim neej ib tug dhau ib tug, peb ua ib tse neeg tuav rawv txoj moo zoo tej qhov tseeb siv ob txhais tes tib si. Tus Cawm Seej txoj Kev Theej Txhoj tau pab teb peb cov lus nug thiab nplij peb tej siab tej ntsws. Txawm tias peb nco peb cov me nyuam xeeb ntxwv los, peb paub tias lawv muaj sia nyob, thiab peb paub tias peb yuav rov qab pom lawv dua ib zaug ntxiv. Peb zoo siab uas peb to taub txog tej lus qhia ntawm sab ntsuj plig no thaum muaj tej kev kub ntxhov hauv tsev neeg thiab ntawm peb tus kheej.

Muaj dua ib qho tseeb tseem ceeb heev hauv lub Koom Txoos uas yog qhov uas hais tias Leej Txiv Saum Ntuj Ceeb Tsheej tau tsim Adas thiab Evas rau ib lub ntsiab zoo kawg. Twb yog nkawd txoj hauj lwm txib—thiab, tom qab no, nkawd cov xeeb leej xeeb ntxwv txoj hauj lwm txib—kom muaj me tub me nyuam kom Vajtswv tej me nyuam ntsuj plig thiaj nqis los nyob hauv lub ntiaj teb no tau. Li no ces, Leej Txiv Saum Ntuj Ceeb Tsheej thiaj xa Nws cov me nyuam ntsuj plig los rau lub ntiaj teb kom kawm thiab loj hlob tuaj los ntawm tej yam uas muaj los rau lawv hauv lub neej ntiaj teb no. Vim Vajtswv hlub Nws cov me nyuam, Nws xa cov tim tswv saum ntuj thiab cov Thwj Tim los qhia Nws cov me nyuam txog Yexus Khetos lub luag hauj lwm tseem ceeb ua peb tus Cawm Seej.

Ib tiam dhau ib tiam, cov yaj saub tau ua lawv tej hauj lwm tiav thaum lawv ceeb toom cov neeg hais txog tej kev xwm txheej uas yuav los rau lawv yog tias lawv tsis hloov siab. Tus Tswv cov Thwj Tim muaj lub luag hauj lwm kom saib xyuas, ceeb toom, thiab cev tes mus pab lawv cov uas nrhiav kom tau lus teb rau cov lus nug hauv lub neej no.

Nees nkaum xyoo dhau los, Thawj Pawg Thawj Tswj Hwm thiab Pawg Kaum Ob tug Thwj Tim tau tshaj tawm ”Tsev Neeg: Ib zaj Lus Tshaj Tawm rau lub Ntiaj Teb.” Nyob hauv tsab ntawv ntawd, peb tau xaus lus hais tias: “Peb ceeb toom hais tias cov neeg uas txhaum tej kev khi lus ntawm kev coj dawb huv, cov uas tsim txom lawv tus khub los yog lawv cov me nyuam, los yog cov uas tsis lav ris koob lawv tsev neeg yuav muaj ib hnub twg uas lawv yuav lav ris txog tej no rau ntawm Vajtswv lub xub ntiag. Hais txuas ntxiv, peb ceeb toom hais tias txoj kev puas tsuaj ntawm tsev neeg yuav coj tej kev kub ntxhov uas cov yaj saub thaum ub thiab niaj hnub nim no hais txog los rau saum tej tib neeg, zej zog, thiab teb chaws.”⁵

Ua ib pawg Thwj Tim, peb rov qab ceeb toom li ntawd ib zaug ntxiv niaj hnub nim no. Thov nco qab ntsoov hais tias, tej lus txib thiab tej kev khi lus yog tej qhov tseeb thiab tej lus qhuab qhia uas muaj nqis ntau heev rau lub Nkoj Xi-oos, uas yog Vajtswv tsav.

Muaj dua ib txoj lus qhuab qhia uas peb yuav tsum tuav rawv uas yog kev hwm Hnub Caiv kom dawb huv. Ua li no pab peb tsis raug qias vim yog lub ntiaj teb, cia peb lub cev so, thiab kuj pab peb txhua tus sab ntsuj plig so thaum teev tiam Leej Txiv thiab Leej Tub txhua Hnub Caiv.⁶ Thaum peb zoo siab txog Hnub Caiv, twb yog ib lub cim hais tias peb hlub Nkawd.⁷

Ua ib feem ntawm peb tej kev xav ua rau Hnub Caiv, peb tau hais kom cov thawj coj nyob ze thiab lub Koom Txoos cov mej zeej nco qab ntsoov hais tias txoj kev sib ntsib noj lub cim nco txog yog tus Tswv li thiab yuav tsum yog ib lub sij hawm uas peb xav txog Nws cov lus qhia thiab txoj Kev Theej Txhoj. Txoj kab ke noj lub cim nco txog yog lub sij hawm uas peb rov qab khi lus thiab rov qab cog peb txoj kev hlub rau tus Cawm Seej thiab nco qab ntsoov Nws txoj kev txi thiab Nws txoj Kev Theej Txhoj.

Tib txoj kev teev tiam no yuav tsum kav peb tej kev sib ntsib yoo mov thiab ua tim khawv thiab. Txoj kev sib ntsib noj lub cim nco txog no yog rau cov mej zeej hais lus ua Vajtswv tsaug rau txoj moo zoo, qhia lawv kev hlub rau Vajtswv thiab tib neeg, thiab ris Leej Txiv Saum Ntuj Ceeb Tsheej thiab Yexus Khetos txiaj, thiab kom ua tim khawv txog tej yam no. Txoj kev sib ntsib yoo mov thiab ua tim khawv yog ib lub sij hawm qhia tej kev tshoov siab thiab tej lus ua tim khawv rau sawv daws yam luv luv li. Tsis yog ib lub sij hawm uas yuav hais lus dav dav txog ub no.

Cov me nyuam me yuav tsum xyaum qhia lawv tej lus tim khawv rau hauv lub Koom Haum Me Nyuam Yaus thiab nrog rau lawv cov niam txiv hauv tsev neeg hmo ua ke mus txog thaum lawv to taub saib ib zaj lus tim khawv tseem ceeb npaum li cas.

Qhov uas muaj tsis ntev tas los no hais txog ua rau Hnub Caiv ua ib hnub zoo siab yog tus Tswv tshoov lub Koom Txoos cov thawj coj tej siab tej ntsws kom tsom ntsoov qhov no. Cov mej zeej koom pawg ntseeg pawg sab laj yuav tsum pab pawg npis sov ob peb lim tiam ua ntej dhau ntawm qhov uas lawv tshab xyuas cov nkauj thiab tej ntsiab lus uas tau teem tseg rau txhua txoj kev sib ntsib noj lub cim nco txog.

Peb txhua tus tau koob hmoov thaum Hnub Caiv puv nkaus muaj kev hlub rau tus Tswv nyob hauv tsev thiab nyob tom lub koom txoos. Thaum peb qhia peb tej me nyuam tus Tswv tej kev coj ua, lawv kawm hnov thiab to taub Nws tus Ntsuj Plig. Peb txhua tus yuav xav koom ua ke txhua Hnub Caiv kom noj lub cim nco txog thaum peb cov me nyuam hnov tus Tswv tus Ntsuj Plig. Thiab tag nrho txhua tus neeg, txawm laus los hluas, uas tab tom ris nra hnyav yuav hnov tau tus Ntsuj Plig txhawb nqa lawv thiab nplij lawv lub siab vim yog teev tiam Leej Txiv Saum Ntuj Ceeb Tsheej thiab Yexus Khetos thaum Hnub Caiv.

Ua Vajtswv tsaug uas Khetos yeej ib txwm nyob ze, tos ntsoov thiab kam pab peb thaum peb hloov siab lees txim thiab los cuag Nws.

Nim no, thaum peb xav txog ob peb qho tseeb no uas muaj hauv lub Nkoj Xi-oos, cia peb ua twj ywm nyob hauv lub nkoj thiab nco qab ntsoov hais tias ib lub nkoj yog ib yam uas thauj peb mus qhov twg.

Qhov chaw uas peb yuav mus ntawd yog tag nrho tej koob hmoov ntawm txoj moo zoo, Vajtswv lub nceeg vaj, lub nceeg vaj Xilethi-aus, thiab Vajtswv lub xub ntiag!

Vajtswv txoj hau kev yeej khov kho. Nws yog tus uas tsav lub nkoj, thiab Nws lub nkoj loj thiab muaj hwj chim yuav mus txog kev cawm seej thiab kev tsa nto. Nco qab ntsoov hais tias peb yuav mus tsis txog yog tias peb dhia nkoj thiab sim ua luam dej mus txog peb tus kheej.

Kev tsa nto yog lub hom phiaj ntawm lub neej no, thiab tsis muaj leej twg txais tau yog tias tsis muaj kev pab los ntawm Yexus Khetos txoj moo zoo: Nws txoj Kev Theej Txhoj, tej kab ke, thiab tej ntsiab cai uas kav thiab nrhiav tau hauv lub Koom Txoos.

Twb yog nyob hauv lub Koom Txoos peb thiaj kawm tau txog Vajtswv tej hauj lwm thiab txais yuav Yexus Khetos txoj kev tshav ntuj uas cawm peb dim. Twb yog nyob hauv lub Koom Txoos peb thiaj cog lus thiab khi lus kom tau tsev neeg nyob mus ib txhis li uas yog tus yawm sij ntawm kev tsa nto. Twb yog lub Koom Txoos uas muaj lub hwj chim ntawm lub pov thawj hwj uas yuav pab coj peb mus dhau tej nthwv dej loj ntawm lub neej no.

Cia peb zoo siab heev rau peb lub Nkoj Xi-oos, vim yog tias tsis muaj lub nkoj ntawd, peb yuav nyias nyob nyias ib leeg xwb tsis muaj hwj chim hlo li, es cov dej yuav tshoob peb mus tom ub tom no raws li tus yeeb ncuab coj mus tau.

Cov kwv tij thiab cov muam, cia li tuav rawv thiab yeej meem caij lub nkoj no, Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thiab peb yuav mus txog qhov chaw nyob mus ib txhis li uas peb yuav mus ntawd. Nov yog kuv zaj lus tim khawv thiab zaj lus thov Vajtswv rau peb txhua tus los ntawm lub npe ntawm tus uas tis npe rau lub Nkoj Xi-oos, twb yog peb tus Tswv thiab tus Cawm Seej, Yexus Khetos, amees.