Anij Ej pād ilo Jebwe eo

Kweilo̧k eo eļap ilo Oktoba eo ļo̧k, iaar karuwaieneik rūron̄jake ro n̄an ļoor kapilōk eo an Brigham Young n̄an pād wōt ilo Waan Zaion in, eo ej Kabun̄ eo an Jisōs Kraist im Armej ro Rekwojarjar ilo Raan-ko Āliktata, im n̄an jirok likatōttōt wōt ie.¹ Jān tōre eo, ij m̧ōņōņō in jeļā bwe jet iaan baam̧le eo aō im ro jet raar ron̄jake im kar kajjitōk ippa, “Ta ko ilo wa eo me jemaron̄ likatōttōt n̄ani?” Iaar kakememej er kōn ta eo Būreejtōn Young eaar ba: Jej pād ioon waan Zaion in. … [Anij] ej pād ilo jebwe eo im enaaj pād wōt ie. … Ej kwaļo̧k, tōl im kōjbwebwe. Eļan̄n̄e armej renaaj dipio aer lōke ilo aer Anij, jab kowaan bujen ko aer ak aer Anij, Enaaj tōl kōj ilo jim̧we.”²

Ealikkar, Jemedwōj Ilan̄ im Irooj Jisōs Kraist kar kōpooj Waan Zaion in mokta kōn m̧ool ko an mour indeeo me ralikkar im repidodo me renaaj jipan̄ kōj pād wōt ilo iaļ in jekdo̧o̧n nana ko, an mour in. Errein jet iaer.

Kabun̄ eo an Jisōs Kraist eaar baj tōl wōt jān rikanaan im rijilōk ro remour. Men̄e rej kanniōk im jab weppān, ro rikarejeran Irooj rej im̧we n̄an jipan̄ kōj joļo̧k kapan̄pan̄ ko me rōkauwōtata ilo mour in jetōb im n̄an jipan̄ kōj anjo̧ ilo mour in n̄an raan ko āliktata, eļaptata, mejen kajjid eo ilan̄.

Epaakeļo̧k 40 iiō ko in aō iiaio ippān Rutiej ro an Kabun̄, iaar kam̧ool kōn n̄a make jim̧or kōn im̧we im revelesōn ko rekajoor me rekar uwaak in jet m̧akūtkūt kar kōm̧m̧ani jān rikanaan im rijilōk ro, Rutiej ro jet an Kabun̄, im ritōl ro an radik ko. Men̄e rejjab weppān ak rej kōm̧m̧an bōd, m̧aan im kōrā rein rem̧m̧an ekanooj jejjet aer wūjlepļo̧k n̄an tōl jerbal eo an Irooj m̧aanļo̧k ilo An jipan̄ tōl er.

Im jab bōd ilo menin: Irooj ej tōl Kabun̄ eo An kōn rikanaan im rijilōk ro remour. En̄in ej wāween eo ilo An kadedeļo̧k jerbal ko An aolep iien. Ilo m̧ool, Rilo̧mo̧o̧r eaar kwaļo̧k, “Em̧ool, em̧ool, Ij ba n̄an kom̧, eo ej bōk jabdewōt eo Ij jilkinļo̧k e ej bōk N̄a, im eo ej bōk N̄a, ej bōk Eo ear jilkiton Eō.”³ Jejjab maron̄ kōjeno̧lo̧k Kraist jān ro Rikarejeran. Ilo an jako Rijilōk ro An m̧oktata, eban kar wōr ad rikam̧ool kōn ļo̧o̧k ko kōn elōn̄ iaan katak ko An, jerbal eo An, An en̄taan ilo Jikin Kallib Gethsemane, im mej eo An ioon debwāāl eo. N̄e enkar ejjeļo̧k aer naan in kam̧ool, eban kar wōr ippād kam̧ool ko an rijilōk ro kōn lōb eo ejjeļo̧k kobban im Jerkakpeje eo.

Eaar jiron̄ Rijilōk ro m̧okta:

“Innām kom̧win ilo̧k, im kōm̧m̧an ri aelōn̄ ko otemjej bwe ren ri kaļora, im peptaij er ilo etan Jemen im Nejin im Jetōb Kwojarjar:

“Im katakin er bwe ren pokake naan ko otemjej I ar jiron̄ kom̧.”⁴

Jerbal in ekar bar kōkāāle ilo raan kein ke Irooj eaar kūr Josep Smith n̄an kōjepļaaktok Kabun̄ in, ippān tok Rijilōk ro emōj kapit er n̄an kwaļo̧k gospel eo An bar juon alen āliktata m̧okta jān An bar itok.

Ekar baj juon apān n̄an laļ in jān etto n̄an tōmak ilo rikanaan im rijilōk ro remour rainin, bōtaab emenin aikuj n̄an kōm̧m̧ane n̄an ad lukkuun meļeļe kōn Pinmuur eo im katak ko an Jisōs Kraist im n̄an bōk tarlep in kōjeram̧m̧an ko an priesthood eo me rej itok āinwōt tōprak in ļoor rein Eaar kūr er.

Ekanooj lōn̄ armej rej ļōmņak bwe ritōl ro im membōr ro an Kabun̄ in rej aikuj in wānōk ak epaakeļo̧k wānōk. Rej meļo̧kļo̧k bwe jouj eo an Irooj ebwe n̄an kōttōprak jerbal eo An ilo mour in. Ritōl ro ewōr ippāer jibadbad ko rem̧m̧an, ak jet iien jej kōm̧m̧an bōd. Jekjek in ejjab kāāl n̄an Kabun̄ in, ejja menin wōt ej waļo̧k ilo kadkad ko ad ibwilijin ro m̧ōttad, ro rūturid, im iiaio ko ilo jikin jerbal im kōtaan ripālele ro im ilo baam̧le ko.

Lale m̧ōjņo̧ ko an armej ippān ro jet epidodo. Mekarta, jej kōm̧m̧ani bōd ko reļļap ilo ad kalimjōk wōt piktokin armej im likjab in lo jerbal ko an Anij ippān ro Eaar kūr er.

Mije wāween an Irooj im̧we ritōl ro An me ekar kālet im wāween An kōm̧akūt ro Rikwojarjar n̄an kōm̧m̧ane men ko rekabwilōn̄lōn̄ kōjekdo̧o̧ņ piktok in armej ej juon wāween eo me jej jirok likatōttōt n̄an gospel eo an Jisōs Kraist im pād ilo ineem̧m̧an ioon Waan Zaion in.

M̧ool eo kein karuo ej katak eo kōn karōk in lo̧mo̧o̧r. Kōn Rikanaan Josep Smith, Anij eaar letok Bok in Mormon, Katak im Bujen ko, im elōn̄ bar katak ko n̄an Kabun̄ in. Men kein ekoba jeļā eo kōn karōk in lo̧mo̧o̧r, eo ej juon m̧ōņakjān kōn ia eo jaar itok jān e, jibadbad eo ad ioon laļ in, im ijo jej ilo̧k n̄an e n̄e jemej. Karōk eo ebar kōpooj juon erreim̧aanļo̧k ejej uwaan, ļōmņak indeeo in me jej ajri in jetōb ro nejin Anij. Ilo ad meļeļe wōn eo Jemedwōj Ilan̄ im kadkad eo ad n̄an E im n̄an Nejin Jitōnbōro, Jisōs Kraist, jenaaj tōmaki kien ko Aer im kōm̧m̧an bujen ko Ippāer me naaj tōlļo̧k kōj n̄an im̧aan Mājeer ilo mour indeeo.

Aolep iien ij jibwe juon ajri ej kab ļotak, ij lo aō kejōkļo̧kjeņ: “Wōn kwe, ajri jidikdik en? Ta eo kwonaaj erom kōn Pinmuur eo an Kraist?”

Jej kajjitōk ejja kajjitōk ko rem̧wilaļ n̄e juon eo jej iakwe ej mej: “Ewi er? Ta eo rej loe im en̄jake? Mour ej wōnm̧aanļo̧k wōt ke? Ta naaj paotok eo an kadkad ko ilo laļ eo eļap an jetōb an ro remej?”

Ilo laļ en, ewōr ruo jibūm̧ leddik ro, Sara im Emily, im juon jibūm̧ laddik, Nathan. Kōn kajjojo ajri rein jibūm remej, kōm āinwōt juon baam̧ļe kar jirok likatōttōt n̄an m̧ool ko an gospel. Kajjitōk ko am raar uwaak kōn kaenōm̧m̧an im m̧ool eo kōn Pinmuur eo an Rilo̧mo̧o̧r. Men̄e kōm oon̄ kōn ajri ro jibūm̧, kōm jeļā remour, im kōm jeļā kom̧ naaj lo er bar juon alen. Eļap am kam̧oolol kōn meļeļe in ilo jetōb ilo iien ko reppen an juon make im baamle.

Bar juon m̧ool eaorōk ilo Kabun̄ in ej bwe Jemedwōj Ilan̄ eaar kōm̧anm̧an Adam im Eve n̄an juon un ekwojarjar. Eaar eddo eo aer—im, tok ālik, eddo eo an ro ineer—n̄an ejake ānbwiinin ajri in jetōb ro nejin Anij bwe ren maron̄ kar jeļā im en̄jake mour in. Kōn jekjek in, Jemedwōj Ilan̄ ej jilkintok ajri in jetōb ro Nejin n̄an laļ in n̄an katak im eddōkļo̧k kōn en̄jake ko an mour in. Kōnke Ej iakwe ajri ro Nejin, Anij ej jilkintok enjeļ jān lan̄ im Rijilōk ro n̄an katakin er kōn jerbal eo eļap an Jisōs Kraist āinwōt juon ad Rilo̧mo̧o̧r.

Ilo epepen ko, rikanaan ro raar kakūrm̧ool jerbal eo aer ke raar kakkōl armej ro kōn kauwōtata ko ipeļakier. Rijilōk ro an Irooj eaar wōr aer eddo n̄an mije, kakkōl, im pukōtļo̧k n̄an jipan̄ ro me rej pukōt uwaak ko raorōk an mour.

Ron̄oul iiō ko remootļo̧k, Būreejtōnji eo Kein Kajuon im Doulul eo an Jon̄oulruo Rijilōk ro rekar kwaļo̧k “Baam̧le Eo: Juon Naan In Kean̄ n̄an Laļ in.” Ilo kar peba in, kōm kar kōjem̧ļo̧k kōn naan kein: “Kōmij kakkōl bwe jabdewōt ro rej rupe bujen ko an kien erreo, ro rej kakkure pāleen ak ro nejin, ak ro rej likjab in kōttōprak eddo ko an baam̧le eo naaj juōn raan ņaruwier im̧aan Anij. Barāinwōt, kōmij kakkōl bwe ejeblōklōk in baam̧le eo enaaj bōktok ioer kajjojo, jukjukinped ko, im laļ ko buromōj ko kōnono kaki m̧oktaļo̧k jān rikanaan ro m̧okta im rikanaan ro kiiō.”⁵

Ilo eddo eo am āinwōt Rijilōk, kōmij bar kapen kakkōl in ekwojarjar bar juon alen rainin. Jouj im kememej bwe Kien ko im bujen ko rej m̧ool ko raorōk im katak ko jej loi ilo Waan Zaion in, ijo Anij ej pād ilo Jebwe eo.

Bar juon katak eaorōk me jej aikuj dāpiji ej n̄an kōjparok raan in Jabōt. Menin ejipan̄ dāpij kōj jān lipijinjin ko an laļ in, eletok n̄an kōj kakkije ilo kanniōk, im eletok n̄an kōj kajjojo kōkāal eo ilo jetōb ilo ad kabun̄jar n̄an Jemen im Nejin aolep Jabōt.⁶ N̄e jej m̧ōņōņō ilo raan in Jabōt, ej juon kōkaļļe in ad iakwe n̄an Er.⁷

Ejja m̧ōttan wōt jibadbad ko ad n̄an kōm̧m̧an bwe Jabōt en kam̧ōņōņō, kōm kar kajjitōk ippān ritōl ro ijoko kom ej pād ie im membōr ro ilo Kabun̄ in n̄an kememej bwe kweilo̧k in kwojkwoj eo ej an Irooj im eaikuj pen ioon katak ko An. Kōm̧m̧ani kain̄i ko an kwojkwoj eo ej n̄e jej kōkāāl bujen ko ad im bar kapen iakwe eo ad n̄an Rilo̧mo̧o̧r im kememej en̄taan eo An im Pinmuur eo An.

Ejjab jetōb in kabun̄jar in aikuj kobrak kweilo̧k in jitlo̧k im naan in kam̧ool ko ad allōn̄ otemjeļo̧k. Kwojkwoj in kweilo̧k in ej n̄an membōr n̄an kwaļo̧k kam̧oolol, iakwe, im kautiej eo n̄an Jemedwōj Ilan̄, Jisōs Kraist, im gospel eo me emōj an jepļaaktok im kwaļo̧k kam̧ool ko ad kajjojo kōn men kein. Kweilo̧k in jitlo̧k im naan in kam̧ool eo ej juon iien n̄an kwaļok ļōmņak ko rekadu rōkōbōkakkak, im kwaļo̧k kam̧ool eo em̧ool. Ejjab juon iien n̄an kōm̧m̧ane juon jipiij.

Ajri ro reddik raikuj kaminene kwaļo̧k naan in kam̧ool ko aer ilo Būraimere im ippān ro jinier im jemeer ilo iien nokon in jota ko an baam̧le m̧ae iien remeļeļe aorōkin juon naan in kam̧ool.

Katak eo kar kwaļo̧k raan kein kōn wāween kōm̧m̧ane bwe Jabōt en juon menin lan̄lōn̄ ej juon tōprak in im̧we an Irooj n̄an ritōl ro ilo Kabun̄ in. Membōr ro an ward ko̧o̧njeļ eo rej aikuj jipan̄ bisporik eo jet wiik ko m̧okta n̄an etale al ko im unin kōnono ko me emōj karōki n̄an kajjojo kweilo̧k in kwojkwoj ko.

Aolepād wōj jejeram̧m̧an n̄e Jabōt ej obrak kōn iakwe n̄an Irooj ilo kapijuknen im m̧ōn jar eo. N̄e ajri ro nejid rej katakin ilo wāween ko an Irooj, rej katak n̄an en̄jake im uwaake Jetōb eo An. Jenaaj aolep ikdeelel n̄an etal kajjojo Jabōt n̄an bōk kwojkwoj eo n̄e jej en̄jake Jetōb eo an Irooj. Im aolep, dik im rūtto, ro rej ineek eddo ko redo naaj en̄jake jipan̄ eo an jetōb im kaenōm̧m̧an eo me ej itok jān raan in Jabōt ilo ad ajeļo̧k raan in Jabōt n̄an kōļmenļo̧kjeņ kōn Jemedwōj Ilan̄ im Irooj Jisōs Kraist.

Kōn kam̧oolol, Kraist ej iien otemjej epaak, kōttar im kōņaan jipan̄ kōj n̄e jej jar kōn jipan̄ im m̧ōņōņō in ukweļo̧k im itok n̄an Ippān.

Kiiō, ilo ad baj kejōkļo̧kjeņ kōn m̧ool kein me repād ilo Waan Zaion eo, jān pād wōt ioon im kememej bwe, kōn meļeļe in, juon tim̧a ej juon wa, im jibadbad eo an juon wa ej n̄an bōkļo̧k kōj n̄an jikin eo jej jipadōke.

Jikin eo wa eo waad ej jibadōkļok ej tarlep in kōjeram̧m̧an ko an gospel eo, aelōn̄ in lan̄, aiboojoj eo an celestial, im im̧aan mejān Anij!

Karōk eo an Anij ededeļo̧k. E ej pād ilo jebwe eo, im wa eo ekajoor im eļap Waan ej wōnm̧aanļok n̄an lo̧mo̧o̧r im mour āinwōt Anij. Kememej jej jab maron̄ tōpare ijo n̄e jekeļo̧k jān wa eo im kajieon̄ aaō make iaad n̄an ijo jej kōtōprake.

Mour eo eutiejtata ej juon kōttōpar ilo iaļ in ilo mour in, im ejjeļo̧k juon ej tōpare n̄e ejjab kōn gospel eo an Jisōs Kraist: Pinmuur eo An, kain̄i ko, im pedped in tōl im katak ko me rej pād ilo Kabun̄ in.

Ej ilo Kabun̄ in ijo jej katak kōn jerbal ko an Anij im bōk jouj eo an Irooj Jisōs Kraist me rej lo̧mo̧o̧ren kōj. Ej ilo Kabun̄ in me jej ejaaki kallim̧ur ko im bujen ko an baam̧le ko n̄an indeeo me ej kōmaron̄ kōj n̄an bōk mour eo eutiejtata. Ej ilo Kabun̄ in me ej kōkajoor kōn priesthood eo n̄an iuunm̧aanļo̧k kōj ilo ad jab jeļā ta im̧aan ilo mour in.

Jān kam̧oolol kōn Waan Zaion in waad eaiboojoj, bwe n̄e ejako jeban wōnm̧aanļo̧k, makeļo̧k im m̧ōjņo̧, peļļo̧k ilo an jab kōjōbwebwe ak aņōōņ, ero̧o̧lol ippān aaet ko rekajoor an kōto im ņo ko an rikapo eo.

Jirok likatōttōk im jerakļo̧k ilo wa aiboojoj in, Kabun̄ eo an Jisōs Kraist im Armej ro Rekwojarjar ilo Raan-ko Āliktata, im jenaaj tōpar ijo jej jibadōke indeeo. En̄in ej naan in kam̧ool eo aō im jar eo n̄an aolepādwōj ilo āt eo Etan eo Waan Zaion eo ej etōņake etan, em̧ool ad Irooj im Rilo̧mo̧o̧r, Jisōs Kraist, amen.