Koht me ketin Kakaun

Nan kapokon lap nekiero, I luke koaros en idawehn sapwellimen Brigham Young kaweid en mihmi nan Sohp en Mahs Zion, me iei Mwomwohdiso en Sises Krais en Souleng en Imwin rahn akan, oh kolkihdi peh koaros.¹ Mwurin ahnsouo, I peren pweki ahi ese me ekei tohn ahi peneinei oh ekei aramas rongorongie oh irail kalalepak rehi, “Dahme mih nan sohp en mahso me kitail kak koledi?” I katamankin irail dahme President Young mahsanih: “Kitail mih nan sohp en mahs Zion. … [Koht] me mongmonge oh pahn ketket mwo. … E kin ketin poahngok, kahlua, oh kaweid. Ma aramas akan pahn likih melel arail Koht, sohte monokehla arail inou kan de arail Koht, E pahn ketin Kahlua irail pwung.”²

Sansal me Sahm Nanleng oh Kauno Sises Krais kaunopada nan Sohp en Mahs Zion padahk mehlel me sansal oh mengei me pahn sowese kitail mihmi nan ahlo nan sehd apwal en mour wet. Iet akan ekei kisehn padahk ko.

Mwomwohdiso en Sises Krais kin weweid pahn kaweid en soukohp oh wahnpoaron. Mehndahte arail wia aramas oh kak sapwungala, ladu en Kauno kan kin alehdi kamarain me pahn sowese kitail powehdi kahpwal me kak kawehla palingehn en mour oh kak sowese kitail keid nan ahl en mour wet pwuralahng nanleng.

Kereniongehr lel sounpar 40 me I patehng soukohp oh wahnpoaron, Kaun Lapalap teikan, oh kaun en utuht kan, I alehdi kadehde sang ni kamarain oh kaudiahl me kin kamwakid irail. Mehndahte arail sohte unsek, ohl oh lih pwukat tohnmeteiki ni unsek arail wiwia doadoahk en Kauno nin duwen sapwellime koasondi kan.

Oh met sohte likamw: Kauno me kin kahlua Sapwellime Mwomwohdiso sang soukohp oh wahnpoaron ieias akan. Ih wiepe me E kin wia ansou koaros nan Sapwellime doadaohk. Mehel, Soundoro mahsanih, I ndahiong kumwail, mehmen me pahn alehda me I pahn kadarewei pahn aleiehda.³ Kitail sohte kak katohrehsang Krais sapwellime ladu kan. Ma sohte sapwellime tepin wahnpoaron ko, kitail sohte pahn alehdi kadehde en sapwellime kaweid kan, doadoahk kan, sapwellime lokolok nan Mwetuel en Gethsemane, oh pwoula pohn lohpwuo. Ma sohte arail kadehdeh kan, kitail sohte pahn alehdi kadehdehn wahnpoaron en ni sousouo oh Iasadahu.

E mahsanihong tepin wahnpoaron ko:

“Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh Ngehn Sarawi,

“kehkehlingkihong irail re en peikiong mehkoaros me I koasoanediong kumwail.”⁴

Kaweid wet pwurehng kohdo nan atail ansou ahnsou me Kauno malipe Joseph Smith en kapwurehdo Mwomwohdiso, iangahki Wahnpoaron me kasarawihla en padahk ki rongamwahu mwohn ah pahn sapahldo.

E kin wia mehkot apwal sampah en alehda soukohp oh wahnpoaron ieias akan, ahpw e kesempwal irail en alehda ma irail men wehwehki unsek Tomwo oh sapwellimen Sises Krais padahk kan oh alehdi kapai en priesthoodo ni unsek me kin kohieng irail akan me e kin ketin malipe.

Tohtolahr aramas kin medewe me kaun en Mwomwohdiso oh towe kan anahne unsek de karanih unsek. Irail monokehla me sapwellimen Kauno mahk kak sowese aramas wia Sapwellime doadoahk. Atail kaun akan kin ahneki ineng me pwung, ahpw re kin sapwungala ekei pak. Met sohte kin wiawihte nan Mwomwohdiso, ahpw e pil kin wiawi nan pwungen kepoakepah kan, kahnihmw kan, oh wasahn doadoahk oh nan pwungen pwopwoud oh peineinei kan.

Kilahngada sapwung rehn mehteikan e kin mengei. Ahpw, kitail kin wiahda sapwung laud me kitail kin kilangete sapwung en aramaso oh sohte kilang ia mwomwen Koht ah kin wia ah doadoahk rehn aramas me E kin ketin malipe kan.

Ma kitail pahn kilelehdi mwomwen Kauno ah kin kamarainih sapwellime ladu kan me wia kaun oh mwomwen ah kin kamwakid Souleng kan en wia mehkot mwahu kan mehndahte arail wia aramas kei, ih ehu wiepe me kitail kin kak kolokol rongamwahu en Sises Krais oh mihmi nan Sohp en Mahs Zion.

Keriau en padahk mehlel iei padahk en pilahn en komour. Sang Soukohp Joseph Smith, Koht ketkihong Pwuhk en Mormon, Doctrine and Covenants, oh tohto padahk kapatapat kei ong Mwomwohdiso. Met iangahki marain en pilahn en komour, me wia map en ia wasa kitail kohsang, kahrepen atail kohdo sampah, oh ia wasa kitail kokohlahng mwurin mehla. Pilahn wet pil padahkiheng kitail padahk kesempwal ehu, me kitail iei sapwellimen Koht seri ngehn kei. Sang ni atail wehwehkihda ihs me Samatail Nanleng oh ia mwomwetail ong ih oh sapwellimehu, Sises Krais, kitail pahn alehda Sampwellimara kosonned akan oh wiahiong Ihr inou kan me pahn kapwureikitailahng nan Mwoalera kohkohlahte.

Ansou koaros I kin koledi seri me aptehn ipwidi, I kin medemedewe: “Ihs kowe, kisin seri? Dahme ke pahn wiahla sang Tomwpen dihp en Krais?”

Kitail kin kalelapak ansou me aramas me kitail poakpoake kin mehla: “Ia irail? Dahme irail kilikilang oh wiwia? Mour kin doudoulahte? Dahme pahn wiawihong ehupene me kitail kin keieu kesempwaliki nan sapwen ngehn en me melahr akan?”

Nan sahpwo, nan aht peneinei, nein naiht seri serepein riemen, Sara oh Emily, oh emen pwutak, Nathan. Irail koaros mehla, nan aht peneinei se katengetengdieng padahk en rongamwahu. Aht kalelapak pasapengla sang popohl oh koapoaroapwoar me Tomw en Soundoro ketkihdo. Mehndahte aht poakpoake irail da, se ese me irail momour, oh se ese me se pahn pwurehng kilang irail. Ia wen kaping pwehki aht wehwehki padahk kesempwal wet nan ahnsou apwal.

Pil ehu padahk me wia ehu kih nan Mwomwohdiso iei Sahm Nanleng kapikada Adam oh Eve ong kahrepe kesempwal ehu. E wia koasondi ehu ong ira—koasondi en nainiki seri—wiahda paliwar ong sapwellimen Koht seri ngehn kan pwe irail en kak iang kohdo sampah. Wiepe wet me Koht kin ketin kadaredo sapwellime seri ngehn kan sampah pwe irail en marainla oh keirda sang arail mour pohn sampah. Pwehki Ah limpoak ong Sapwellime seri kan, Koht kin poaronehdo sapwellime meninkeder kan oh Wahnpoaron kan irail en kalohk ki duwen Sises Krais ah wia Soundor.

Senduri kei mwuri, soukohp kan kapwaiada arail pwukoa sang arail kin kaperehki aramas akan keper kan me mih mwohrail. Sapwellimen Kauno Wahnpoaron kan pwukoahki tetehk, kaweid, oh sowesehda irail akan me raparapahki pasapeng en kalelapak en mour akan.

Sounpar rieisek samwalahro, Keieu en Presidency oh Wahnpoaron Ehkriemeno wiahda padahk en “Peneinei: Kalohk ong Sampah.” Nan kisin likou kesmpwalo, Se kaimsengkihla ireh: “Se kepereki me emenemen aramas me kawehla inou kan en mour mwakelekel, me kin wiakawe ah pwoud de nah seri, de me sohte kapwaiada ah pwukoa kan ong ah peneinei pahn ehu rahn kadeingki mwohn Koht. doulahte, se keperki me mwerpeseng en peneinei pahn wahdohng pohn emenemen aramas, kousapw kan, oh wehi kan mwekid suwed akan me kokohpda sang soukohp akan en kawao oh rahn wet. ”⁵

Ni aht wia Wahnpoaron, se kapwurehieng ireh rahn wet. Menlau tamataman kosonned akan oh inou kan ahr wia padahk mehlel kei me sohte kak pweipweida me kin mih nan Sohp en Mahs Zion, wasa me Koht ketin kakaun.

Pil ehu padahk mehlel me kitail anahne koledi iei peikiong rahn Sarawi. Met kin sowese kitail mwakelekelsang sampah, kiheng kitail komoal, oh kiheng kitail kakehlail en palingehn ni atail pwongih Sahmo oh Sapwellimeu rahn Sarawi.⁶ Ansou me kitail kin peikiong rahn Sarawi, e wia kilel en atail limpoak ong Ira.⁷

Nan aht pwukoa en sowese kakehlaka wahu en rahn Sarawi, se peki kaun en ward oh stake kan oh tohn mwomwohdiso en tamataman me mihting kamadipw sarawi iei Sapwellimen Kauno oh anahne en poahsonki Sampwellime padahk mehlel kan. Ahnsou en kamadipw sarawi e wia ansou me kitail kin onesapahl atail inou kan oh kakehlaka atail limpoak ong Soundoro oh tamataman Sapwellime tohnmetei oh Tomwo.

Soangen ngehn en kaudoko pahn kin anahne en wiawi nan atail rahn sarawi en kadehde oh kaisihsol en soumpwung koaros. Ahnsou en kamadipw sarawi iei ansou me towe kan kin kasalehda arail kaping, limpoak, kalahng ong Sahm Nanleng. Ahnsou en kaisihsol oh wia kadehde iei ansou me kitail kin ehukihda atail pepehm oh kadehde mehlel. E sohte wia ansou en wia kapahrek.

Noumwail serihkan anahne kaiahnki wia arail kadehde nan Primary oh rehn pahpa nohno nan soutik en peneinei lau lel ansou me irail wehwehki kesempwal en kadehde.

Kaweid en perenki Rahn Sarawi wiawiher ansou kis samwalahr iei wahn kamarain me Kauno ketkihong kaun en Mwomwomwohdiso. Tohn ward konsel kan anahne sowese pisoprik wihk kei mwowe sang ni arail pahn tehk koul oh oaralap me kin pilipilda ong ansou en sarawi.

Kitail koaros kin paiki ma atail Rahn Sarawi kin audaudki limpoak ong Kauno nan ihmatail oh wasahn sarawi. Ansou me neitail serihkan kin alehdi padahk en Kauno, irail kin esehla kehn oh peikiong Sapwellime Ngehno. Kitail koaros inangih iang sarawi oh ale kamadipw sarawi ansou me irail kehn Ngehn en Kauno. Oh koaros, me pwulopwul oh mah, me ahneki toutou pahn kehn marahrahda oh koaloalamwahu sang arail pahn kapwaiada medemedewe Samatail Nanleng oh Kauno Sises Krais rahn sarawi.

Kapingkalahnganki, Krais kin karanih kitail, awiawih oh nsenohki sowese kitail ansou me kitail kin inangih koluhla oh kohdo Reh.

Eri, met ni atail doandoaropwe padahk malaulau mehlel pwukat me mih nan Sohp en Mahs Zion, kitail mihmi loale oh tamatamante, wewehn, sohp iei mehn peidaid, oh mehn peidaid kin waikitaila wasahieu.

Wasa me weretail sohpo pahn lel ie iei wasa me kapai unsek en rongamwahuo kin alahldi, me iei wein nanleng, nan celestial klori, oh rehn Koht!

Sapwellimen Koht plahn miehier. Ih me mongmonge, Sapwellimen sohp kalaimwon oh kehlailo kohkohlahng mour soutuk oh duwehla Ih. Tamataman me kitail sohte kak lusie sang nan pwohto oh song en pein papala wasahu.

Mour en Koht iei kahrepen atail seilok do sampah, oh sohte me kak lela mwo ma sohte rongamwahu en Sises Krais—Tomw pen dihp, tiahk sarawi kan, oh padahk en wiwiahkan me kin kohsang Mwomwohdiso.

Nan mwomwohdiso me kitail kin esehla doahdoahk en Koht oh alehda mahk en Kauno Sises Krais me pahn kamourkitaila. Nan Mwomwohdiso me kitail kin wiahda inou sarawih kan en peneinei soutuk me wia neitail passport en duwehla Koht. Nan Mwomwohdiso me kehlail en priesthood kin katangakitail kohwei nan pihl keperkan en mour wet.

Kitail kapingki weretail Sohp en Mahs Zion, pwe ma sohte sohpo kitail pahn salongala, kelehpwla oh luwetala, peipei kohla sohte me katanga, oh peipeiseli mwahl nan angin suwed akan.

Kohledi teng oh iangewei nan sohp kaselel wet, Mwomwohdiso en Sises Krais en Souleng en Imwin rahn akan, oh kitail pahn lel wasa kitail kohkohlahng. Met iei ahi kadehdeh oh kapakap kin kitail koaros ni lengileng kapai en Ih me Sohp en Mahs Zion adaniki, me iei Kauno oh Sounkomouro, Sises Krais, amen.