O Le Atua o Loo i le Foeuli

I le konafesi aoao o Oketopa talu ai, sa ou valaaulia ai le au faafofoga ia mulimuli i le fautuaga a Polika Iaga ia nofo i totonu o le vaa tuai o Siona, o lona uiga o Le Ekalesia a Iesu Keriso o le Au Paia o Aso e Gata Ai, ma ia pipiimau i lima uma e lua.¹ Talu mai lena taimi, ua ou fiafia lava e iloa sa faalogo nisi o lo’u aiga ma isi ma fesili mai le fesili lenei ia te au, “O le a se mea o i ai i totonu o le Vaa Tuai o Siona e tatau ona matou pipiimau i ai?” Sa ou faamanatu atu i ai le saunoaga a Peresitene Polika Iaga: “O loo tatou i ai i totonu o le vaa tuai o Siona. … O loo i ai le [Atua] i le foeuli ma o le a tumau ai iina. … Na te faatonu, taiala ma taitai. Afai o le a i ai le talitonuga maumaututu atoatoa o tagata i lo latou Atua, ma lē lafoaia a latou feagaiga po o lo latou Atua, o le a Ia taiala sao i tatou.”²

Ua manino lava le faatumuina e lo tatou Tama Faalelagi ma le Alii o Iesu Keriso o le Vaa Tuai o Siona i upumoni e faavavau manino ma faigofie ia o le a fesoasoani ia i tatou e tumau ai i luga o le ala i taimi o fesouaiga o le olaga faaletino. O nisi nei o upumoni.

O Le Ekalesia a Iesu Keriso o le Au Paia o Aso e Gata Ai sa, ma o loo taitaia pea e perofeta ma aposetolo soifua. E ui o i latou o tagata soifua ma e i ai foi vaivaiga faaletagata, ae e musuia lava auauna a le Alii e fesoasoani mai ia i tatou ia aloese mai faafitauli ia e lamatia ai le olaga faaleagaga ma fesoasoani ia i tatou ia pasia ma le saogalemu le olaga faaletino ia oo atu ai i lo tatou taunuuga mulimuli i le lagi.

I le taimi o a matou fegalegaleaiga vavalalata ua lata nei i le 40 tausaga, ua avea ai au ma se molimau patino o musumusuga mālū ma faaaliga loloto o faatinoina e perofeta ma aposetolo, o isi Pulega Aoao, ma taitai o ausilali. E ui e le atoatoa pe naunau foi e fai se measese, ae ua tuuto atoatoa atu nei tamalii ma tamaitai lelei e taitai atu i luma le galuega a le Alii a o Ia taitaia.

Ma aua lava nei sese i le mea lenei: e taitai e le Alii Lana Ekalesia e ala i perofeta soifua ma aposetolo. O le ala lenei Na te faia ai lava i taimi uma Lana galuega. O le mea moni, sa aoao mai le Faaola, “E moni, e moni, ou te fai atu ia te outou, o le talia se tasi ou te auina atu, e talia e ia o au.”³ E le mafai ona tatou tuueseeseina Keriso ma Ana auauna. A na le seanoa ma Ana uluai Aposetolo, semanu tatou te le mauaina ni tala o mea na vaaitino i ai tagata e uiga i le tele o Ana aoaoga, Lana galuega, Ona mafatiaga i le Togalaau o Ketesemane, ma Lona maliu i luga o le satauro. A na le seanoa la latou molimau, semanu tatou te le mauaina se molimau faaaposetolo o le tuugamau avanoa ma le Toetu.

Sa Ia poloaiina na uluai Aposetolo:

“O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia:

“Aoao atu ia te i latou ia tausi i mea uma ua ou fai atu ai ia te outou.”⁴

O lenei poloaiga sa toefaafouina i o tatou lava aso ina ua valaauina e le Alii ia Iosefa Samita e toefuatai le Ekalesia, faatasi ai ma Aposetolo faauuina e folafola atu Lana talalelei mo le taimi mulimuli a o lei toe afio mai o Ia.

O loo avea pea i taimi uma ma luitau mo le lalolagi ia taliaina perofeta ma aposetolo soifua, ae e matua taua le iloaina o i latou ina ia malamalama atoatoa ai i le Togiola ma aoaoga a Iesu Keriso ma ia maua ai le atoaga o faamanuiaga o le perisitua ua tuuina atu ia i latou ua Ia valaauina.

E anoanoai tagata e manatu e tatau i taitai ma tagata o le Ekalesia ona atoatoa pe latalata foi i le atoatoa. Ae ua galo ia i latou ua lava le alofa tunoa o le Alii e faataunuu ai Lana galuega e ala i [faatinoga a] tagata soifua. Ua i ai i o tatou taitai ni faamoemoega silisili, ae o nisi lava taimi tatou te faia ai ni measese. E le na o mafutaga faale-Ekalesia e tupu ai lea mea, aua o le mea foi lava lea e tasi o loo tupu i a tatou mafutaga ma uo, tuaoi, ma paaga i falefaigaluega, faapea le va ma taitoalua ma aiga.

O le faigofie ia o le sailiili masei i vaivaiga faaletagata o isi. Peitai, tatou te faia se measese tuga e ala i le matauina na o le natura faaletagata o le tasi ma le isi ae le mafai ona vaaia le aao o le Atua o loo galue e ala mai ia i latou ua Ia valaauina.

O le taulai atu i le auala o loo musuia ai e le Alii Ana taitai filifilia ma le auala Na te uunaia ai le Au Paia e faia ni mea ofoofogia ma tulagaese e ui lava i o latou tulaga faaletagata, o le tasi lea auala tatou te pipiimau ai i le talalelei a Iesu Keriso ma tumau ai ma le saogalemu i totonu o le Vaa Tuai o Siona.

O se upumoni lona lua o le aoaoga faavae o le ata o le faaolataga. E ala mai i le Perofeta o Iosefa Samita, na tuu atu i ai e le Atua le Tusi a Mamona, le Mataupu Faavae ma Feagaiga, ma le tele o isi mau aoaoga faaopoopo i le Ekalesia. Sa aofia ai ma se malamalama o le ata o le faaolataga, o lona uiga o le faafanua o le mea na tatou o mai ai, lo tatou faamoemoega iinei i le lalolagi, ma le mea tatou te o i ai pe a tatou feoti. Ua tatou maua foi i le fuafuaga se vaaiga tulagaese e faavavau, o tatou o fanau agaga a le Atua. E ala mai i le malamalama po o ai lo tatou Tama Faalelagi atoa ai ma lo tatou sootaga ia te Ia ma Lona Alo Pele, o Iesu Keriso, o le a tatou taliaina ai a La poloaiga ma osia ni feagaiga ma i Laua ia o le a taitai atu ai i tatou e toefoi atu i lo La afioaga e faavavau.

Soo se taimi lava ou te siiina ai se pepe fou faatoa fanau mai, ou te fesili ai lava: “O ai oe, pepe? O ai o le a e avea ai e ala i le Togiola a Keriso?”

Tatou te faia foi ia fesili faatupu manatu faapea pe a maliu se tasi tatou te alolofa i ai: “O fea o i ai i latou? O le a se mea o latou vaaia ma lagonaina? E faaauau pea le olaga? O le a le natura o le a i ai a tatou sootaga sili ona faapelepele i le lalolagi tele o agaga o e ua oti?”

I lena lalolagi, ua i ai mai le matou aiga ni fanau teine a fanau, o Sara ma Emily, ma Nathan, le atalii o lo’u atalii. I le maliliu taitoatasi ai o ia fanau a fanau, sa matou pipiimau ai o se aiga i upumoni o le talalelei i lima uma e lua. Sa taliina a matou fesili i le mafanafana ma le faamautinoaga e ala i le Togiola a le Faaola. E ui ua matou misia a matou fanau a fanau, ae matou te iloa o loo ola i latou, ma e matou te iloa o le a matou toe vaai ia i latou. Matou te faafetai tele mo lenei malamalamaaga faaleagaga i taimi o faigata faaletagata lava ia ma faaleaiga.

O le isi upumoni autu i le Ekalesia e faapea, na foafoaina e le Tama Faalelagi ia Atamu ma Eva mo se faamoemoega paia. O lo la tiute lena—ma na mulimuli ane, avea ma tiute o le la fanau—le foafoaina o tino faaletino mo fanau agaga a le Atua ina ia latou oo mai ai i le olaga faaletino. E ala i lenei faagasologa, ua auina mai ai e le Tama Faalelagi Ana fanau agaga i le lalolagi ia aoao ma tuputupu ae e ala i aafiaga o le olaga faalelalolagi. Ona e alofa o Ia i Ana fanau, ua auina mai ai e le Atua avefeau faalelagi ma Aposetolo e aoao i latou e uiga i le matafaioi tutotonu a Iesu Keriso i le avea ai ma o tatou Faaola.

I le gasologa o seneturi, e faataunuu ai e perofeta lo latou tiute pe a latou lapatai atu i tagata e uiga i le mea matautia o loo i o latou luma atu. Ua noatia Aposetolo a le Alii i le tiute e leoleo, lapatai, ma aapa atu e fesoasoani ia i latou o loo sailia ni tali i fesili o le olaga.

Lua sefulu tausaga talu ai, na tuuina mai ai e le Au Peresitene Sili ma le Korama a Aposetolo e Toasefululua le “O Le Aiga: O Se Folafolaga i le Lalolagi.” I lena pepa musuia o faamatalaga, sa matou faaiu atu ai i le mea lenei, “Matou te lapatai atu o tagata taitoatasi o e solia feagaiga o le ola mama, o e faasaunoa i taitoalua po o fanau, o e ua faatalale i le faataunuuina o tiutetauave faaleaiga, o le a i ai se aso tou te tutu atu ai e tali atu i luma o le Atua. E le gata i lea, matou te lapatai atu foi, o le faamalepeina o le aiga o le a aumai ai i tagata taitoatasi, alalafaga, ma malo, faafanoga ia na uluai ta’u mai e perofeta anamua ma aso nei.”⁵

I le avea ai o ni Aposetolo, matou te toe saga faamautu atu lenei lapataiga faamaoni i le asō. Faamolemole ia manatua o poloaiga ma feagaiga o ni upumoni ma aoaoga faavae le mafaatauina o loo maua i totonu o le Vaa Tuai o Siona, lea o loo i ai le Atua i le foeuli.

O le isi aoaoga faavae taua e tatau ona tatou pipiimau i ai, o le tausia lea o le aso Sapati. E fesoasoani ia i tatou ia tausia ia le pisia mai le lalolagi, tatou te maua ai le malologa faaletino, ma maua ai e i tatou taitoatasi le faafouga faaleagaga o le tapuai atu i le Tama ma le Alo i Aso Sa uma.⁶ A tatou fiafia i le aso Sapati, o se faailoga lea o lo tatou alofa mo i Laua.⁷

O se vaega o a matou taumafaiga ia faia le Sapati o se aso fiafia, ua matou talosagaina ai taitai i le lotoifale ma tagata o le Ekalesia ia manatua o le sauniga faamanatuga o le sauniga a le Alii ma e tatau ona mauaa ma mausali i Ana aoaoga. O le faatinoga o le sauniga o le faamanatuga o le taimi lea tatou te faafou ai a tatou feagaiga ma toe faamautu lo tatou alofa mo le Faaola ma manatua Lana taulaga ma Lana Togiola.

O lea lava agaga e tasi o le tapuai e tatau ona faatumulia ai a tatou sauniga anapogi ma molimau i masina taitasi. O lea sauniga faamanatuga e mo le au paia e faailoa puupuu atu ai le lotofaafetai, alofa, ma le talisapaia o lo tatou Tama Faalelagi, Iesu Keriso, ma le talalelei toefuataiina ma tuu atu ai le molimau a le tagata lava ia e uiga i nei mea. O le sauniga anapogi ma molimau o se taimi lea e faasoa atu ai ni mafaufauga musuia pupuu, ma tuu atu se molimau faamaoni. E le o se taimi e fai atu ai se lauga.

O fanau laiti e tatau ona faataitai ona faasoa atu a latou molimau i le Peraimeri ma faatasi ai ma o latou matua i faatasiga o afiafi faaleaiga seia oo ina latou malamalama i le uiga taua o se molimau.

O le faamamafa talu ai nei o le faia o le Sapati ma aso fiafia o se taunuuga tonu lea o musumusuga mai le Alii e ala mai i taitai o le Ekalesia. E tatau i sui o aufono a uarota ona fesoasoani i le au epikopo i le tele o vaiaso a o lumanai [sauniga faamanatuga] e iloilo musika ma autu ua fautuaina mai mo sauniga faamanatuga taitasi.

E faamanuiaina i tatou uma pe a faatumulia le Sapati i le alofa mo le Alii i le aiga ma i le lotu. A aoaoina a tatou fanau i ala o le Alii, latou te aoaoina ia lagona ma tali atu i Lona Agaga. O le a tatou mananao uma e auai i Aso Sa taitasi e taumamafa i le faamanatuga pe a latou lagonaina le Agaga o le Alii. Ma o tagata uma, talavou ma matutua, o loo tauaveina ni avega mamafa o le a lagonaina le siitiaina faaleagaga ma le mafanafana lea e sau mai le tuuto atu o le aso Sapati e mafaufau loloto ai i lo tatou Tama Faalelagi ma le Alii o Iesu Keriso.

O le mea e faafetai ai, o loo latalata mai pea Keriso, o loo faatalitali ma naunau e fesoasoani mai ia i tatou pe a tatou tatalo mo se fesoasoani ma naunau foi e salamo ma o mai ia te Ia.

O lenei, a o tatou mafaufau loloto i nisi o nei upumoni o loo i ai i totonu o le Vaa Tuai o Siona, sei o tatou nonofo ai pea i totonu ma manatua, e ala i lona uiga, o se vaa o se taavale, ma o le faamoemoega o se taavale o le ave o i tatou i se taunuuga.

O le taunuuga o la tatou vaa o faamanuiaga atoatoa ia o le talalelei, le malo o le lagi, le mamalu selesitila, ma le afioaga o le Atua!

Ua mausali le fuafuaga a le Atua. O Ia o loo i le foeuli, ma o Lona vaa tele ma le malosi o loo folau atu i le faaolataga ma le faaeaga. Manatua e le mafai ona tatou oo i lena nofoaga e ala i le oso i fafo mai le vaa ma taumafai ai e aau iina na o i tatou.

O le faaeaga o le sini lea o lenei malaga faaletino, ma e leai se tasi e oo i ai e aunoa ma auala o le talalelei a Iesu Keriso: Lana Togiola, o sauniga, ma aoaoga faavae ma mataupu faavae taiala ia o loo maua i le Ekalesia.

O le Ekalesia lea tatou te aoao ai i galuega a le Atua ma talia ai le alofa tunoa o le Alii o Iesu Keriso lea e faaolaina ai i tatou. O totonu lava foi o le Ekalesia tatou te fatuina ai tautinoga ma feagaiga o aiga e faavavau ia e avea ma o tatou tusifolau e ō ai i le faaeaga. O le Ekalesia lea o loo faamanaina e le perisitua o loo tuleia i tatou e asa atu i mea lamatia lē mafaufauina o le olaga nei.

Tatou faafetai mo le Vaa Tuai matagofie o Siona, aua a na leai po o pe nei ua tatou pa’ulia, pe tuuatoatasi e aunoa ma se malosi, ma tafefea solo ai e aunoa ma se tapasa, ma taavivili ai i ave malolosi o matagi ma galu a le fili.

Pipiimau, uso e ma tuafafine, ma folau pea i totonu o le vaa mamalu, Le Ekalesia a Iesu Keriso o le Au Paia o Aso e Gata Ai, ma o le a tatou taunuu ai i lo tatou taunuuga e faavavau. O la’u molimau ma le tatalo lea mo i tatou uma i le suafa o Ia o le o loo faaigoa ai le Vaa Tuai o Siona, lo tatou Alii ma le Faaola, o Iesu Keriso, amene.